Magdiretso sa kaundan

Magdiretso sa listahan sang kaundan

Ang Moderno nga Pagkaganyat sa “mga Santos”

Ang Moderno nga Pagkaganyat sa “mga Santos”

 Ang Moderno nga Pagkaganyat sa “mga Santos”

“Nadumduman mo bala ang tion nga daw natak-an na kita sa pagsambit sa mga baganihan? Daw indi apektado sini ang 4.2 milyones nga Amerikano nga nagtan-aw sa lubong ni Mother Teresa sang Sept. 13. Sugod sang napatay sia sang Sept. 5, ginpaulanan sang mga tawo ang Batikano sing mga pangabay nga ideklarar sia sing pormal subong isa ka santos. Pila lamang ka tawo ang nagaduhaduha nga matabo ini.”​—Sun-sentinel, Estados Unidos, Oktubre 3, 1997.

ANG mga buhat sa kaluoy kag bulig sa mga imol nga ginhimo sang Katoliko nga misyonera nga si Mother Teresa ginakabig sang madamo subong amo gid ang kahulugan sang isa ka matuod nga santos. Ang iban nga mga relihion may yara man mga baganihan. Apang, ayhan wala na sang ginakilala sing opisyal subong sang sa gindeklarar nga mga santos sang Romano Katoliko nga Simbahan.

Kapin sa 450 ka tawo ang ginkanonisar ukon gindeklarar nga santos ni Papa Juan Paulo II sa tion sang iya pagkapapa, nga mas madamo sangsa gintingob nga ginkanonisar sang tanan iban pa nga papa sang ika-20 nga siglo. * Ngaa nagapadayon ang pagkadebotado sa “mga santos,” nga madamo sini ang indi tanto kilala sa tunga sang mga Katoliko sa kabilugan?

Ang teologo nga si Lawrence Cunningham sang Notre Dame University nagpaathag: “Interesado ang mga tawo sa ideya nga may nagaluntad nga sagrado sa kalibutan. Ang mga santos nagapakita nga posible mangin baganihan, bisan sa karon.” Dugang pa, ginapatihan nga ang “mga santos” pinasahi nga makakomunikar sa Dios, amo nga epektibo sila nga mga manugpatunga para sa mga buhi. Kon makita ang relikya ukon mga tul-an sang isa ka “santos,” ginasimba ini sa pagpati nga may yara ini gahom.

Ang Catechism of the Council of Trent, nga ginbalhag sang ika-16 nga siglo agod palig-unon ang doktrina sang mga Katoliko, nagsiling: “Makahinakop gid kami, nga ang pagpadungog sa mga santos nga ‘nagtulog sa Ginuo,’ ang pagpangabay sang ila pagpatunga, kag ang pagsimba sa ila sagrado nga mga relikya kag abo, wala gid nagabuhin sang himaya sang Dios, kundi nagapadugang pa gani sini, sa kasangkaron nga ang paglaum sang Cristiano ginapasanag kag ginapabakod, kag ginapalig-on sia nga ilugon ang ila maayong mga kinaiya.” (The Catechism of the Council of Trent, 1905) Luyag gid sang matuod nga mga Cristiano nga magkabuhi sing maayo, magpalapit sa Dios sing nagakaigo, kag magbaton sing bulig sang Dios. (Santiago 4:7, 8) Busa, suno sa Pulong sang Dios, sin-o ang kalipikado subong matuod nga mga santos? Kag ano nga papel ang ila ginatungdan?

[Nota]

^ par. 4 Ang pagkanonisar opisyal nga nagakilala sa isa ka napatay na nga Romano Katoliko subong takus kag dapat simbahon sang tanan.