Magdiretso sa kaundan

Magdiretso sa listahan sang kaundan

‘Ang Pulong sang Dios Gamhanan’

‘Ang Pulong sang Dios Gamhanan’

 Report sang mga Manugbantala sang Ginharian

‘Ang Pulong sang Dios Gamhanan’

SA MAINIT nga isla sang Jamaica sa Caribeano, pamilyar gid sa Biblia ang kalabanan nga tawo. Sa katunayan, ang King James Version masapwan sa halos tanan nga puluy-an, kag napamatud-an sang pila nga “ang pulong sang Dios buhi kag gamhanan.” (Hebreo 4:12) Ining gahom sarang magpabag-o sang kabuhi, subong sang ginapakita sang masunod nga eksperiensia.

Bag-o gid lang nag-abot sa iya balay gikan sa trabaho si Cleveland sang ginduaw sia sang isa sa mga Saksi ni Jehova. Pagkatapos mapaambit ang pila ka punto sa Kasulatan, ginbilinan sia sang Saksi sing bulig sa pagtuon sang Biblia nga Ang Ihibalo nga Nagadul-ong sa Kabuhi nga Walay Katapusan. Wala gid marealisar ni Cleveland kon paano ipakita sang Pulong sang Dios ang gahom sini sa iya kabuhi.

Nagapangamuyo anay si Cleveland sa Dios sing tatlo ka beses sa isa ka adlaw, nagapangabay sa Dios nga buligan sia nga makita ang husto nga paagi sang pagsimba sa Iya. Kumbinsido si Cleveland nga sala ang pagsimba sang iya mga ginikanan, apang napaslawan lamang sia pagkatapos mausisa ang iban nga mga relihion. Bisan pa nakabati na sia tuhoy sa mga Saksi ni Jehova, nagduhaduha sia kon bala yara sa ila ang kamatuoran. Bisan amo sini ang iya ginabatyag, nagpasugot si Cleveland nga magtuon sa Biblia upod sa Saksi nga nagduaw sa iya. Ngaa? Agod ipakita sa mga Saksi nga sala sila!

Wala magdugay natun-an ni Cleveland nga ang iya imoral nga relasyon sa duha ka babayi di-kalahamut-an sa Dios. (1 Corinto 6:​9, 10) Pagkatapos lamang sang duha ka pagtuon, nangisog sia nga utdon ang iya relasyon sa duha ka babayi. Nagsugod man sia sa pagtambong sa Cristianong mga miting sa Kingdom Hall. Apang nangin isa naman ini ka pagtilaw.

Aktibo katama si Cleveland sa soccer team sang ila lugar, kag ang ila mga hampang nagaupang sa iya pagtambong sa mga miting. Ano ang iya himuon? Bisan pa mabaskog ang pag-ipit sang iya mga kaupdanan sa hampang, coach, kag mga abyan, nagdesisyon si Cleveland nga maghalin sa soccer team. Huo, nagsugod sa pagpakita sang gahom ang Pulong sang Dios, nag-impluwensia sa iya sa kaayuhan!

Nangin dayag liwat ang gahom sang Pulong sang Dios sang nagsugod na si Cleveland sa pagpakig-ambit sang iya ihibalo sa Biblia sa iban. (Binuhatan 1:⁠8) Subong resulta, duha sang kaupod niya anay sa team ang nagsugod sa pagtambong sa mga miting sang mga Saksi ni Jehova. Sang nangin kalipikado na si Cleveland nga mangin manugbantala sang maayong balita, nakaeksperiensia sia sing daku nga kalipay sa ministeryo, nga nagagamit sang Pulong sang Dios sa pagbulig sa iban.

Padayon nga ginapahulag sang gahom sang Pulong sang Dios, ginsimbuluhan sang ulihi ni Cleveland ang iya dedikasyon kay Jehova paagi sa bawtismo sa tubig kag natigayon niya ang pribilehiyo nga mag-alagad subong isa ka bug-os tion nga ministro kag subong isa ka ministeryal nga alagad sa kongregasyon.

Sa Jamaica kag sa bug-os nga kalibutan, linibo ka tawo ang nakatuon nga ‘ang Pulong sang Dios buhi gid kag gamhanan.’

[Mapa/Retrato sa pahina 8]

(Para sa aktual nga pormat, tan-awa ang publikasyon)

JAMAICA

[Credit Line]

Mapa kag globo: Mountain High Maps® Copyright © 1997 Digital Wisdom, Inc.