Magdiretso sa kaundan

Magdiretso sa listahan sang kaundan

Internasyonal nga mga Kombension sa 2003

Internasyonal nga mga Kombension sa 2003

 Internasyonal nga mga Kombension sa 2003

SANG Sabado, Oktubre 6, 2001, ginhiwat ang tuigan nga miting sang mga katapo sang Watch Tower Bible and Tract Society of Pennsylvania sa Jersey City, New Jersey, E.⁠U.⁠A. Pagkatapos sini nga miting, namati sa isa ka pinasahi nga programa ang mga katapo kag ang ila mga bisita. Sang masunod nga adlaw, sa dugang pa nga mga miting nga ginhiwat sa apat ka siudad sa Canada kag sa Estados Unidos, ginpahibalo sang mga katapo sang Nagadumala nga Hubon sang mga Saksi ni Jehova ang masunod pagkatapos sang ila katapusan nga pamulongpulong:

“Samtang nagatulok kita sa unahan, indi gid dapat patumbayaan sang tanan nga katawhan sang Dios ang ila pagtilipon. Naglaygay si apostol Pablo nga dapat ini himuon, lakip ang pagpalig-unay sa isa kag isa, sing labi na gid samtang ginatan-aw naton nga nagahilapit ang daku kag makakulugmat nga adlaw ni Jehova. (Hebreo 10:​24, 25) Nahisanto sa sini nga sugo sang Kasulatan, nagalaum kami nga mahiwat ang distrito nga mga kombension sa tanan nga bahin sang kalibutan sa masunod nga tuig [2002]. Nian sa tuig 2003, kon kabubut-on ni Jehova, posible nga maghiwat sing pinasahi nga internasyonal nga mga kombension sa pila ka duog sang kalibutan. Tion na karon nga magpabilin nga nagabugtaw kag padayon nga nagabantay, ginahantop ang mga nagakahanabo sa kalibutan.”

Walay sapayan sang pag-uswag sang pagkawalay kapat-uran kag mga tension samtang nagahingapos ang karon nga sistema, ang hilikuton sang katawhan sang Dios dapat magpadayon. Ang maayong balita sang Ginharian, lakip ang nagapaandam nga mensahe sang Biblia, dapat ibantala sa tagsa ka pungsod, tribo, hambal, kag katawhan, nagapalig-on sa ila nga ‘kahadlukan ang Dios kag hatagan sia sing himaya bangod nagahilapit na gid ang oras sang iya paghukom.’ (Bugna 14:​6, 7) Gani, suno sa kabubut-on kag kahamuot sang aton langitnon nga Amay, ginaplano ang internasyonal nga mga kombension sa nanuhaytuhay nga mga duog sa kalibutan sa tuig 2003.

Una, tentatibo nga gin-iskedyul ini nga mga pagtilipon sa pila ka siudad sa Aminhan nga Amerika kag masunod sa Europa. Sa ulihi nga bahin sang 2003, himuon ang mga kahimusan nga maglakbay ang mga grupo sang mga delegado sa pila ka siudad sa Asia; kag sa hingapusan nga bahin sang tuig, ang dugang pa nga mga grupo magakadto sa Aprika, Bagatnan nga Amerika, kag sa Pasipiko. Pangabayon ang pila ka sanga talatapan nga magpadala sing limitado nga kadamuon sang mga delegado sa espesipiko nga mga lokasyon sang kombension, gani imposible nga mahatagan ang tanan sing imbitasyon sa pagtambong. Apang, makapalig-on nga may mga delegado nga nagarepresentar sa lainlain nga mga pungsod sa tagsa ka duog.

Makabaton sa indi madugay ang mga kongregasyon sang mga Saksi ni Jehova sing impormasyon nahanungod sini nga mga pagtilipon. Ang impormasyon tuhoy sa eksakto nga mga petsa kag espesipiko nga mga siudad diin mahimo magtambong ang gin-agda nga mga delegado ipadala sang ila sanga talatapan. Gani, ginapangabay nga indi anay kamo magsulat ukon magpamangkot tuhoy sini sa sini nga tion.

Ang mapilian sa ulihi nga mga delegado gikan lamang sa dedikado kag bawtismado nga mga Saksi nga mangin maayo nga mga halimbawa kag magapakita sing utudnon nga pagpalangga sa lokal nga mga kauturan. Sila naman may kahigayunan nga mag-abiabi sing mahigugmaon sa mga bisita. (Hebreo 13:​1, 2) Magaresulta ini sa “pagbayluhanay sing pagpalig-on.” (Roma 1:​11, 12) Ipadala ang dugang pa nga mga detalye tuhoy sa sini nga mga kahimusan sang mga sanga talatapan nga gin-agda sa pagpadala sing mga delegado sa partikular nga pungsod ukon mga pungsod.

Hiwaton ang tatlo ka adlaw nga distrito nga mga kombension para sa tuig 2003 sa kalabanan nga pungsod sa kinaandan nga paagi. Paagi sa pagtipon sing tingob, may kahigayunan ang tanan nga ‘magpamati, magtuon, kag mapalig-on.’ (Deuteronomio 31:12; 1 Corinto 14:31) Magahatag ini sing kahigayunan sa tanan nga katawhan sang Dios nga ‘matilawan kag makita nga si Jehova maayo.’ (Salmo 34:⁠8) Sa tanan nga internasyonal nga mga kombension, subong man sa madamong distrito nga mga kombension, magatambong ang mga misyonero, ang pila sa ila may bahin sa programa.

Sa sini nga tuig, matambungan naton ang “Makugi nga mga Manugbantala Sang Ginharian” nga Distrito nga mga Kombension, nga magapapagsik sa aton sa pagpanaksi sing dugang. Samtang ginahimo naton ini, magatubo gid ang aton kalangkag sa ginatigana ni Jehova sa masunod nga tuig. Magabulig ini sa aton nga ‘padayon nga magbantay, magbugtaw, kag mangin handa’ sa sining makahalanguyos kag importante nga mga tion.​—⁠Mateo 24:42-44.