Magdiretso sa kaundan

Magdiretso sa listahan sang kaundan

Magkalipay sa Pagkamatarong ni Jehova

Magkalipay sa Pagkamatarong ni Jehova

 Magkalipay sa Pagkamatarong ni Jehova

“Sia nga nagatinguha sang pagkamatarong kag mahigugmaon nga kaayo makasapo sing kabuhi, pagkamatarong kag himaya.”​—⁠HULUBATON 21:21.

1. Ano nga dalanon sang mga tawo karon ang may malaglagon nga mga resulta?

“MAY dalanon nga matarong sa atubangan sang isa ka tawo, apang ang mga dalanon sang kamatayon amo ang katapusan sini.” (Hulubaton 16:25) Daw ano ka sibu ang paglaragway sining hulubaton sa Biblia tuhoy sa mga dalanon sang kalabanan nga mga tawo karon! Sa kabilugan, interesado lamang ang mga tawo nga himuon ang ginakabig nila nga matarong, nga nagapasapayan sang panguna nga mga kinahanglanon sang iban. (Hulubaton 21:2) Nagapangangkon sila nga nagatahod sa mga kasuguan kag mga talaksan sang pungsod apang nagatinguha nga malutsan ini sa tanan nga higayon. Ang resulta amo ang isa ka katilingban nga nabahinbahin, naligban, kag nagasaligmato.​—⁠2 Timoteo 3:1-5.

2. Ano gid ang kinahanglanon karon para sa kaayuhan sang katawhan?

2 Para sa aton kaayuhan​—⁠kag para sa paghidait kag kalig-unan sang tanan nga tawo​—⁠kinahanglan gid naton karon ang isa ka kasuguan ukon talaksan nga matadlong kag matarong, isa nga dapat batunon kag tumanon sing kinabubut-on sang tanan nga tawo. Apang maathag nga wala sing kasuguan ukon talaksan nga ginhimo sang bisan sin-o nga tawo, bisan daw ano pa sia kaalam kag ka sinsero, ang makahatag sini nga kinahanglanon. (Jeremias 10:23; Roma 3:​10, 23) Kon may yara gid man sini nga talaksan, diin ayhan ini masapwan kag mangin kaangay ini sa ano? Ayhan ang mas importante nga pamangkot amo, Kon ining talaksan nagaluntad, malipay ka bala nga tumanon ini?

Pagsapo sing Matarong nga Talaksan

3. Sin-o ang labing kalipikado sa paghatag sing isa ka talaksan nga kalahamut-an kag mapuslanon sa tanan nga tawo, kag ngaa?

3 Agod makakita sing isa ka talaksan nga kalahamut-an kag mapuslanon para sa tanan, dapat magkadto kita sa isa nga indi apektado sang rasa, kultura, kag politika kag indi mabalabagan sang pagkakitid sing hunahuna kag kaluyahon sang tawo. Wala sing duhaduha, ang lamang nga kalipikado amo ang labing gamhanan nga Manunuga, si Jehova nga Dios, nga nagsiling: “Kay subong  nga ang mga langit mataas pa sa duta, sa amo ang akon mga dalanon mataas pa sa inyo mga dalanon, kag ang akon mga panghunahuna sa inyo mga panghunahuna.” (Isaias 55:9) Dugang pa, ang Biblia nagalaragway kay Jehova subong “isa ka Dios sang katutom, nga sa iya wala sing inhustisya; matarong kag matadlong sia.” (Deuteronomio 32:4) Sa bug-os nga Biblia, masapwan naton ang ekspresyon nga “si Jehova matarong.” (Exodo 9:27; 2 Cronica 12:⁠6; Salmo 11:⁠7; 129:⁠4; Panalabiton 1:18; Bugna 19:​2, footnote) Huo, makasalig kita kay Jehova para sa labing maayo nga talaksan bangod matutom sia, matadlong, kag matarong.

4. Ano ang kahulugan sang tinaga nga “matarong”?

4 Sa pagkamatuod, ang tinaga nga “matarong” wala naluyagan karon. Ang matuod, ginatamod ini sang kalabanan nga tawo subong negatibo, nagapakanubo pa gani, nga ginapaanggid ini sa pakunokuno nga pagkabalaan, ukon salimpapaw nga pagkarelihioso kag pagkadebotado. Apang, suno sa isa ka diksionaryo, ang “matarong” nagakahulugan sing “matadlong, halangdon; walay kasawayan, walay sala; nagahisanto sa mga prinsipio sang kasuguan sang Dios ukon ginabaton nga mga talaksan sang moralidad; nagapanghikot sing nagakaigo ukon makatarunganon.” Wala bala kamo malipay sa isa ka kasuguan ukon talaksan nga nagalakip sining maayong mga kinaiya?

5. Ilaragway ang kinaiya nga pagkamatarong subong sang ginpakita sa Biblia.

5 Tuhoy sa kinaiya nga pagkamatarong, ang Encyclopaedia Judaica nagsiling: “Ang pagkamatarong indi isa ka teoriya lamang kundi sa baylo napasad ini sa paghimo sing matarong kag nagakaigo sa tanan nga kaangtanan.” Halimbawa, ang pagkamatarong sang Dios indi lamang ang nasulod ukon personal niya nga kinaiya, subong sang iya pagkabalaan kag kaputli. Sa baylo, ekspresyon ini sang iya kinaugali sa paagi nga nagakaigo kag makatarunganon. Sarang isiling nga bangod si Jehova balaan kag putli, ang tanan nga iya ginahimo kag ang tanan nga nagahalin sa iya matarong. Subong sang ginasiling sang Biblia, “si Jehova matarong sa tanan niya nga dalanon kag mainunungon sa tanan niya nga binuhatan.”​—⁠Salmo 145:17.

6. Ano ang ginsiling ni Pablo tuhoy sa pila ka di-matinuuhon nga mga Judiyo sang panahon niya, kag ngaa?

6 Ginpadaku ni apostol Pablo ini nga punto sa iya sulat sa mga Cristiano sa Roma. Tuhoy sa pila ka di-matinuuhon nga mga Judiyo, sia nagsulat: “Bangod wala nila mahibalui ang pagkamatarong sang Dios kundi nagatinguha sa pagtukod sang ila kaugalingon, wala sila magpasakop sa pagkamatarong sang Dios.” (Roma 10:3) Ngaa ginsiling ni Pablo nga “wala nila mahibalui ang pagkamatarong sang Dios”? Wala bala sila matudluan sa Kasuguan, ang matarong nga mga talaksan sang Dios? Sa pagkamatuod, gintudluan sila. Apang, ginatamod sang kalabanan sa ila ang pagkamatarong subong maayong kinaiya lamang, nga matigayon paagi sa mauti kag maid-id nga pagtuman sa relihioso nga mga pagsulundan, sa baylo nga subong isa ka talaksan nga magatuytoy sa ila mga pagpakig-angot sa isigkatawo. Kaangay sang relihioso nga mga lider sang panahon ni Jesus, wala nila mahangpan ang matuod nga kahulugan sang hustisya kag pagkamatarong.​—⁠Mateo 23:23-​28.

7. Paano ginpabutyag ang pagkamatarong ni Jehova?

7 Sa kabaliskaran, ang pagkamatarong ni Jehova ginapakita kag maathag gid sa iya mga pagpakig-angot. Bisan pa ang iya pagkamatarong nagakinahanglan nga indi gid niya pagpasapayanan ang mga sala sang hungod nga mga nagalapas, wala ini nagahimo sa iya nga mangin isa ka walay balatyagon kag mapiliton nga Dios, nga dapat kahadlukan kag palayuan. Sa baylo, ang iya matarong nga mga buhat nagahatag sing basihan nga sarang sia mapalapitan sang mga tawo kag maluwas sila gikan sa malain nga mga epekto sang sala. Busa, nagakaigo gid nga si Jehova ginlaragway subong “isa ka matarong nga Dios kag isa ka Manluluwas.”​—⁠Isaias 45:21.

Pagkamatarong kag Kaluwasan

8, 9. Sa ano nga mga paagi ginpakita sang Kasuguan ang pagkamatarong sang Dios?

8 Agod mahangpan ang kaangtanan sa ulot sang pagkamatarong sang Dios kag sang iya mahigugmaon nga mga buhat sang pagluwas, binagbinaga ang Kasuguan nga ginhatag niya sa pungsod sang Israel paagi kay Moises. Wala sing duhaduha nga ang Kasuguan matarong. Sa iya pagpamilinbilin, ginpahanumdom ni Moises ang mga Israelinhon: “Anong daku nga pungsod ang may matarong nga mga regulasyon kag hudisyal nga mga desisyon kaangay sining bug-os nga kasuguan nga ginabutang ko karon sa inyo atubangan?” (Deuteronomio 4:8) Mga siniglo sang ulihi, si Hari David sang  Israel nagsiling: “Ang mga paghukom ni Jehova matuod; ini tanan matarong sing bug-os.”​—⁠Salmo 19:9.

9 Paagi sa Kasuguan, gin-athag ni Jehova ang iya himpit nga mga talaksan sang husto kag sayop. Gindetalye sang Kasuguan kon paano ang mga Israelinhon dapat maggawi indi lamang sa relihioso nga mga butang kundi sa pagnegosyo man, sa pag-asawahay, sa pagkaon kag katinlo kag, siempre, sa hudisyal nga mga desisyon. Ang Kasuguan may yara estrikto nga silot sa mga manuglapas, nagapatuman pa gani sing silot nga kamatayon sa pila ka kaso.⁠ * Apang ang matarong bala nga mga ginapatuman sang Dios, subong sang ginsulat sa Kasuguan, isa ka mapintas kag makakalapoy nga lulan sa mga tawo, nga nagakuha sang ila kahilwayan kag kalipay, subong sang ginapangangkon sang madamo nga tawo karon?

10. Ano ang ginabatyag sang mga naghigugma kay Jehova tuhoy sa iya mga kasuguan?

10 Ang mga naghigugma kay Jehova nalipay gid sa iya matarong nga mga kasuguan kag mga pagsulundan. Halimbawa, wala lamang ginkilala ni Hari David ang hudisyal nga mga desisyon ni Jehova subong matuod kag matarong, subong sang aton na nakita, kundi nagbatyag man sia sing tinagipusuon nga kahamuot kag apresasyon sa sini. Tuhoy sa mga kasuguan kag hudisyal nga mga desisyon ni Jehova, sia nagsulat: “Halandumon sila sing labi pa sa bulawan, huo, sangsa madamo pa nga bulawan nga bus-og; kag matam-is pa man sa dugos kag sa mga nagatulo sa uludlan. Subong man, paagi sa ila ginapaandaman ang imo alagad; sa pagtuman sa sini may daku nga padya.”​—⁠Salmo 19:​7, 10, 11.

11. Paano ang Kasuguan nangin isa ka ‘manunudlo nga nagatuytoy kay Cristo’?

11 Mga siniglo sang ulihi, ginpakita ni Pablo ang mas daku nga balor sang Kasuguan. Sa iya sulat sa mga taga-Galacia, sia nagsiling: “Ang Kasuguan nangin manunudlo naton nga nagatuytoy kay Cristo, agod mapahayag kita nga matarong bangod sa pagtuo.” (Galacia 3:24) Sang adlaw ni Pablo, ang isa ka manunudlo (pedagogue, Kingdom Interlinear) isa ka alagad ukon ulipon sang isa ka daku nga panimalay. Trabaho niya nga amligan ang kabataan kag updan sila pakadto sa eskwelahan. Sing kaanggid, ang Kasuguan nagaamlig sa mga Israelinhon gikan sa makapahigko nga moral kag relihioso nga mga buhat sang mga pungsod sa palibot. (Deuteronomio 18:​9-​13; Galacia 3:23) Dugang pa, ang Kasuguan nagpahanumdom sa mga Israelinhon nga sila makasasala kag kinahanglan nila ang pagpatawad kag kaluwasan. (Galacia 3:19) Ang mga kahimusan sa paghalad nagpakita nga kinahanglan ang isa ka halad nga gawad kag naghatag sing isa ka matagnaon nga sulundan agod makilala ang matuod nga Mesias. (Hebreo 10:​1, 11, 12) Sa amo, samtang ginpabutyag ni Jehova ang iya pagkamatarong paagi sa Kasuguan, ginhimo niya ini para sa kaayuhan kag dayon nga kaluwasan sang mga tawo.

Ang mga Gintamod nga Matarong sang Dios

12. Ano ang matigayon sang mga Israelinhon paagi sa pagtuman sing mahalungon sa Kasuguan?

12 Bangod ang Kasuguan nga ginhatag ni Jehova matarong sa tagsa ka paagi, matigayon sang mga Israelinhon ang matarong nga tindog sa atubangan sang Dios paagi sa pagtuman sini. Ginpahanumdom ni Moises ang mga Israelinhon sang manugsulod na sila sa Ginsaad nga Duta:  “Magakahulugan ini sing pagkamatarong para sa aton, nga bantayan naton ang paghimo sini tanan nga sugo sa atubangan ni Jehova nga aton Dios, suno sa ginsugo niya sa aton.” (Deuteronomio 6:25) Dugang pa, si Jehova nagsaad: “Tumanon ninyo ang akon mga palatukuran kag ang akon mga hudisyal nga desisyon, nga kon himuon sang isa ka tawo, magakabuhi man sia paagi sa sini. Ako amo si Jehova.”​—⁠Levitico 18:⁠5; Roma 10:5.

13. Si Jehova bala di-matarong sa pagsugo sa iya katawhan nga tumanon ang matarong nga Kasuguan? Ipaathag.

13 Sing makapasubo, subong isa ka pungsod, wala ‘mahimo [sang mga Israelinhon] ini tanan nga sugo sa atubangan ni Jehova’ kag busa wala nila mabaton ang ginsaad nga mga pagpakamaayo. Wala nila matuman ang tanan nga sugo sang Dios bangod ang Kasuguan sang Dios himpit apang sila indi. Ang buot bala silingon sini nga ang Dios indi matadlong ukon di-matarong? Pat-od nga indi. Si Pablo nagsulat: “Ano karon ang isiling naton? May inhustisya bala sa Dios? Kabay nga indi ina matabo!” (Roma 9:14) Ang matuod amo nga ang mga indibiduwal, antes kag pagkatapos nga ginhatag ang Kasuguan, ginkabig nga matarong sang Dios bisan pa sila di-himpit kag makasasala. Ang listahan sinang mahinadlukon sa Dios nga mga tawo nagalakip kanday Noe, Abraham, Job, Rahab, kag Daniel. (Genesis 7:⁠1; 15:⁠6; Job 1:⁠1; Ezequiel 14:14; Santiago 2:25) Busa ang pamangkot amo: Sa anong rason nga ginkabig sila sang Dios nga matarong?

14. Ano ang buot silingon sang Biblia kon ginatawag sini ang isa ka tawo nga “matarong”?

14 Kon ginatawag sang Biblia ang isa ka tawo subong “matarong,” wala ini nagakahulugan sang pagkawalay sala ukon kahimpitan. Sa baylo, nagakahulugan ini sang pagtuman sa iya mga obligasyon sa atubangan sang Dios kag sang mga tawo. Halimbawa, si Noe gintawag nga “tawo nga matarong” kag “walay kasawayan sa iya mga kadungan” bangod “ginhimo [niya] ang tanan suno sa ginsugo sang Dios sa iya. Amo gid ang ginhimo niya.” (Genesis 6:​9, 22; Malaquias 3:18) Sanday Zacarias kag Elisabet, ang mga ginikanan ni Juan Bautista, “matarong sa atubangan sang Dios bangod sang paglakat nga walay kasawayan suno sa tanan nga sugo kag legal nga ginapatuman ni Jehova.” (Lucas 1:6) Kag ang isa ka di-Israelinhon, isa ka Italyano nga opisyal sang hangaway nga si Cornelio, ginlaragway subong “isa ka tawo nga matarong kag mahinadlukon sa Dios.”​—⁠Binuhatan 10:22.

15. Sa ano naangot sing suod ang pagkamatarong?

15 Dugang pa, ang pagkamatarong sa mga tawo naangot sing suod sa kon ano ang yara sa tagipusuon sang isa​—⁠ang iya pagtuo kag apresasyon kag gugma kay Jehova kag sa iya mga saad​—⁠kag indi lamang ang paghimo sang kon ano ang ginapatuman sang Dios. Ang Kasulatan nagasiling nga si Abraham ‘nagtuo kay Jehova; kag gin-isip niya ini sa iya subong pagkamatarong.’ (Genesis 15:6)  Si Abraham may pagtuo indi lamang sa pagluntad sang Dios kundi sa iya man saad tuhoy sa “binhi.” (Genesis 3:​15; 12:⁠2; 15:⁠5; 22:18) Pasad sa sina nga pagtuo kag mga buhat suno sa pagtuo, mapakig-angutan kag mapakamaayo ni Jehova si Abraham kag ang iban pa nga matutom bisan pa nga indi sila himpit.​—⁠Salmo 36:10; Roma 4:​20-​22.

16. Ano ang resulta sang pagtuo sa gawad?

16 Sa katapusan, ang pagkamatarong sa mga tawo nasandig sa pagtuo sa halad gawad ni Jesucristo. Sa mga Cristiano sang unang siglo, si Pablo nagsulat: “Subong walay bayad nga dulot nga ginpahayag sila nga matarong sang di-bagay nga kaayo [sang Dios] paagi sa paghilway bangod sa pagtubos nga ginbayad ni Cristo Jesus.” (Roma 3:24) Ginapatuhuyan diri ni Pablo ang mga pinili nga mangin kaupod nga manunubli ni Cristo sa langitnon nga Ginharian. Apang ang halad gawad ni Jesus nagbukas man sing kahigayunan para sa minilyon nga iban pa nga makatigayon sing matarong nga tindog sa atubangan sang Dios. Nakita ni apostol Juan sa palanan-awon ang “isa ka dakung kadam-an, nga wala sing tawo nga makaisip, . . . nga nagatindog sa atubangan sang trono kag sang Kordero, nga napanaptan sing malaba nga mga panapton nga maputi.” Ang malaba nga mga panapton nga maputi nagasimbulo sang ila katinlo kag pagkatarong sa atubangan sang Dios bangod “ginlabhan nila ang ila mga panapton nga malaba kag ginpaputi ini sa dugo sang Kordero.”​—⁠Bugna 7:​9, 14.

Magkalipay sa Pagkamatarong ni Jehova

17. Ano nga mga tikang ang dapat himuon sa pagpangita sing pagkamatarong?

17 Samtang mahigugmaon nga gin-aman ni Jehova ang iya Anak, si Jesucristo, subong ang paagi nga matigayon sang mga tawo ang matarong nga tindog sa atubangan niya, ang resulta indi awtomatiko. Ang isa dapat magpakita sing pagtuo sa gawad, magpahisuno sang iya kabuhi sa kabubut-on sang Dios, magdedikar kay Jehova, kag simbuluhan ini paagi sa pagpabawtismo sa tubig. Nian, ang isa dapat magpadayon sa pagpangita sing pagkamatarong, kag sing iban pa nga mga kinaiya sa espirituwal. Si Timoteo, isa ka bawtismado nga Cristiano nga may langitnon nga pagtawag, ginlaygayan ni Pablo: “Tinguhaa ang pagkamatarong, diosnon nga debosyon, pagtuo, gugma, pagbatas, kalmado nga buot.” (1 Timoteo 6:11; 2 Timoteo 2:22) Ginpadaku man ni Jesus nga kinahanglan magpadayon sa pagpanikasog sang sia nagsiling: “Padayon, nian, nga pangitaa anay ang ginharian kag ang iya pagkamatarong.” Mahimo nga nagapanikasog kita sing lakas agod matigayon ang mga pagpakamaayo sang Ginharian sang Dios, apang nagapanikasog man bala kita sing subong sini agod pangitaon ang matarong nga mga dalanon ni Jehova?​—⁠Mateo 6:33.

18. (a) Ngaa indi mahapos ang paghimo sing pagkamatarong? (b) Ano ang aton matun-an gikan sa halimbawa ni Lot?

18 Sa pagkamatuod, indi mahapos ang paghimo sing pagkamatarong. Ini bangod tanan kita di-himpit kag ang aton natural nga huyog amo ang pagkadimatarong. (Isaias 64:6) Dugang pa, napalibutan kita sang mga tawo nga wala nagatalupangod sa matarong nga mga dalanon ni Jehova. Ang aton kahimtangan kaangay gid sadtong iya ni Lot, nga nagkabuhi sa tuman kalaut nga siudad sang Sodoma. Si apostol Pedro nagpaathag kon ngaa nagakaigo nga ginluwas ni Jehova si Lot gikan sa nagapakari nga kalaglagan. Si Pedro nagsiling: “Yadtong matarong nga tawo bangod sang iya nakita kag nabatian samtang nagapuyo sa tunga nila sa adlaw-adlaw nagpaantos sa iya matarong nga kalag bangod sang ila malinapason nga mga buhat.” (2 Pedro 2:​7, 8) Sa amo, ang tagsatagsa sa aton dapat mamangkot: ‘Nagaugyon bala ako sing likom sa imoral nga mga buhat nga makita naton sa palibot? Daw indi bala tanto kalain para sa akon ang popular apang masingki nga kalingawan ukon mga isport? Ukon nagaantos bala ako kaangay ni Lot bangod sinang di-matarong nga mga buhat?’

19. Ano nga mga pagpakamaayo ang matigayon naton kon nagakalipay kita sa pagkamatarong sang Dios?

19 Sa sining makatalagam kag walay kapat-uran nga mga adlaw, ang pagkalipay sa pagkamatarong ni Jehova isa ka tuburan sang kalig-unan kag proteksion. Sa pamangkot: “O Jehova, sin-o ang mangin bisita sa imo tolda? Sin-o ang magapuyo sa imo balaan nga bukid?” Si Hari David nagsabat: “Sia nga nagalakat nga walay kasawayan kag nagahimo sing pagkamatarong.” (Salmo 15:​1, 2) Paagi sa pagtinguha sing pagkamatarong sang Dios kag pagkalipay sa sini, mahuptan naton ang isa ka maayo nga kaangtanan sa iya kag padayon nga matigayon naton ang iya pabor kag pagpakamaayo. Sa amo, magakabuhi kita nga may pagkakontento, pagtahod sa kaugalingon, kag malinong nga panghunahuna. “Sia nga nagatinguha sang pagkamatarong kag mahigugmaon nga kaayo makasapo sing kabuhi, pagkamatarong kag himaya,” siling sang Pulong sang Dios. (Hulubaton 21:21) Dugang pa, ang pagtinguha gid naton nga himuon ang matarong kag nagakaigo magaresulta sa malipayon personal nga mga kaangtanan kag mainuswagon nga sahi sang pagkabuhi​—⁠sa moral kag sa espirituwal. Ang salmista nagsiling: “Malipayon ang mga nagasunod sing katarungan, nga nagahimo sing pagkamatarong sa tanan nga tion.”​—⁠Salmo 106:3.

[Nota]

^ par. 9 Para sa mga detalye tuhoy sa kasangkaron sang Mosaikong Kasuguan, tan-awa ang artikulo nga “Some Features of the Law Covenant,” sa pahina 214-​20 sa tomo 2 sang Insight on the Scriptures, nga ginbalhag sang mga Saksi ni Jehova.

Mapaathag Mo Bala?

• Ano ang pagkamatarong?

• Paano ang kaluwasan naangot sa pagkamatarong sang Dios?

• Pasad sa ano nga ginkabig sang Dios nga matarong ang mga tawo?

• Paano kita magkalipay sa pagkamatarong ni Jehova?

 [Mga Pamangkot sa Pagtinuon]

[Mga retrato sa pahina 15]

Si Hari David nagpabutyag sing tinagipusuon nga kahamuot sa mga kasuguan sang Dios

[Mga retrato sa pahina 16]

Sanday Noe, Abraham, Zacarias, Elisabet, kag Cornelio ginkabig nga matarong sang Dios. Nahibaluan mo bala kon ngaa?