Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Sang nakita ni Juan ang “dakung kadam-an” nga nagahimo sing sagrado nga pag-alagad sa templo ni Jehova, diin nga bahin sang templo nila ini ginahimo?​​—⁠Bugna 7:​9-​15.

Makatarunganon isiling nga ang dakung kadam-an nagasimba kay Jehova sa isa sang dutan-on nga mga luwang sang iya dakung espirituwal nga templo, sing espesipiko ang isa nga katumbas sang naguwa nga luwang sang templo ni Solomon.

Ginasiling anay nga ang dakung kadam-an yara sa espirituwal nga katumbas, ukon sa isa ka antitipo, sang Luwang sang mga Gentil sang panahon ni Jesus. Apang, ginapakita sang dugang nga pagpanalawsaw ang di-magkubos lima ka rason kon ngaa indi ini husto. Una, indi tanan nga bahin sang templo ni Herodes may antitipo sa dakung espirituwal nga templo ni Jehova. Halimbawa, ang templo ni Herodes may Luwang sang mga Babayi kag Luwang sang Israel. Ang lalaki kag babayi puwede makasulod sa Luwang sang mga Babayi, apang mga lalaki lamang ang makasulod sa Luwang sang Israel. Sa dutan-on nga mga luwang sang dakung espirituwal nga templo ni Jehova, wala ginapain ang lalaki kag babayi sa ila pagsimba. (Galacia 3:​28, 29) Busa, wala sing katumbas ang Luwang sang mga Babayi kag ang Luwang sang Israel sa espirituwal nga templo.

Ikaduha, wala sing Luwang sang mga Gentil sa ginhatag sang Dios nga plano sang arkitektura sang templo ni Solomon ukon sang templo sa palanan-awon ni Ezequiel; wala man sing Luwang sang mga Gentil sa templo nga gintukod liwat ni Zerubabel. Busa, wala sing rason nga maghaumhaum nga may espirituwal nga katumbas ang Luwang sang mga Gentil sa kahimusan sa pagsimba sa dakung espirituwal nga templo ni Jehova, ilabi na kon ginabinagbinag ang masunod nga punto.

Ikatlo, ang Luwang sang mga Gentil gintukod sang Edomnon nga si Hari Herodes sa paghimaya sa iya kaugalingon kag sa pagpahamuot sa Roma. Ginsugdan ni Herodes ang pagkay-o sa templo ni Zerubabel ayhan sang 18 ukon 17 B.⁠C.⁠E. Nagpaathag ang The Anchor Bible Dictionary: “Bangod sang luyag sini sa dumaan nga Griego kag Roma nga arkitektura, ginpatuman sang imperyal nga gahom sa Katundan [nga Roma] . . . ang pagtukod sa isa ka templo nga mas daku sangsa kaanggid nga mga siudad sa sidlangan.” Apang, ang templo nagatindog na. Ang diksionaryo nagpaathag: “Bisan pa ang kadakuon sang Templo dapat nga pareho sa mga nauna sa sini [ang templo nga ginpatindog nanday Solomon kag Zerubabel], ang Bukid sang Templo wala nagpabilin sa orihinal nga kadakuon sini.” Busa, ginpadakuan ni Herodes ang duog sang templo paagi sa pagdugang sang ginatawag karon nga Luwang sang mga Gentil. Masiling bala naton nga ang amo sini nga ginhalinan sang pagtukod may antitipo sa kahimusan sang espirituwal nga templo ni Jehova?

Ikap-at, halos tanan​​—⁠mga bulag, mga piang, di-sirkunsidado nga mga Gentil​—⁠puwede makasulod sa Luwang sang mga Gentil. (Mateo 21:​14, 15) Matuod, ang luwang nagtugot sa madamong di-sirkunsidado nga mga Gentil nga maghalad sa Dios. Kag sa sini nga duog nagpamulong kon kaisa si Jesus sa kadam-an kag makaduha nga gintabog ang mga manugbaylo sing kuwarta kag mga negosyante, nagsiling nga ginpakahuy-an nila ang balay sang iya Amay. (Mateo 21:​12, 13; Juan 2:​14-​16) Walay sapayan sini, ang The Jewish Encyclopedia nagsiling: “Ining naguwa nga luwang, sa estrikto nga paghambal, indi bahin sang Templo. Ang duta sini indi balaan, kag bisan sin-o lamang ang nagasulod diri.”

Ikalima, ang Griegong tinaga nga (hi·e·ron’) nga ginbadbad nga “templo” nga gingamit sa pagpatuhoy sa Luwang sang mga Gentil “nagapatuhoy sa  bug-os nga mga tinukod, sa baylo nga sa tinukod lamang sang Templo,” siling sang A Handbook on the Gospel of Matthew, ni Barclay M. Newman kag Philip C. Stine. Sa kabaliskaran, ang Griegong tinaga nga (na·os’) mas espesipiko nga ginbadbad nga “templo” sa palanan-awon ni Juan tuhoy sa dakung kadam-an. Sa konteksto sang templo sa Jerusalem, masami ini nga nagapatuhoy sa Balaan sang mga Balaan, sa tinukod sang templo, ukon sa presinto sang templo. Ginabadbad ini kon kaisa nga “santuaryo.”​​—⁠Mateo 27:​5, 51; Lucas 1:​9, 21; Juan 2:20.

Ang mga katapo sang dakung kadam-an nagatuo sa halad gawad ni Jesus. Matinlo sila sa espirituwal, bangod “ginlabhan nila ang ila mga panapton nga malaba kag ginpaputi ini sa dugo sang Kordero.” Busa, ginpahayag sila nga matarong nga may paglaum nga mangin mga abyan sang Dios kag maluwas sa dakung kapipit-an. (Santiago 2:​23, 25) Sa madamong paagi, kaangay sila sang mga proselita sa Israel nga nagpasakop sa katipan sang Kasuguan kag nagsimba upod sa mga Israelinhon.

Sa pagkamatuod, wala mag-alagad ang mga proselita sa nasulod nga luwang, diin ginahimo sang mga saserdote ang ila mga katungdanan. Kag ang mga katapo sang dakung kadam-an wala sa nasulod nga luwang sang dakung espirituwal nga templo ni Jehova, diin ang luwang sini nagarepresentar sa kahimtangan sang himpit, matarong nga tawhanon nga pagkaanak sang mga katapo sang “balaan nga pagkasaserdote” ni Jehova samtang yari pa sila diri sa duta. (1 Pedro 2:5) Apang subong sang ginsiling sang langitnon nga gulang kay Juan, ang dakung kadam-an yara gid sa sulod sang templo, wala sa guwa sang templo nga kaangay sang espirituwal nga Luwang sang mga Gentil. Daw ano ini nga pribilehiyo! Kag ginapadaku gid sini ang kinahanglanon nga huptan sang tagsa-tagsa ang espirituwal kag moral nga kaputli sa tanan nga tion!

[Diagram/Retrato sa pahina 31]

(Para sa aktual nga pormat, tan-awa ang publikasyon)

Templo ni Solomon

1. Tinukod sang Templo

2. Nasulod nga Luwang

3. Naguwa nga Luwang

4. Hagdanan pakadto sa Luwang sang Templo