Magdiretso sa kaundan

Magdiretso sa listahan sang kaundan

May Seguridad Karon—May Seguridad sa Walay Katubtuban

May Seguridad Karon—May Seguridad sa Walay Katubtuban

 May Seguridad Karon​—May Seguridad sa Walay Katubtuban

NGAA masami nga mabudlay makita ang seguridad kag, kon makita man ini, umalagi lamang? Mahimo ayhan nga ang aton ginabatyag nga seguridad pasad lamang sa handurawan​—⁠sa kon ano ang aton ginalauman nga matigayon sa baylo nga kon ano gid ang mahimo matigayon? Ining sayop nga panghunahuna mahimo matawag nga pagkabuhi sa ginadamgo nga kalibutan.

Sa paghanduraw, ang imo hunahuna nagabiya sa matuod nga nagakatabo sa kabuhi upod ang mga pagkawalay seguridad sini kag nagasulod sa matahom kag may seguridad nga kahimtangan, nga wala ginasapak ang bisan ano nga butang nga magaguba sa ginadamgo nga kalibutan. Apang, ang mga problema sang matuod nga kalibutan masami nga hinali lang nagalutaw sa sining ginadamgo nga kalibutan kag wala kaluoy nga nagadula sang kalipay, sa amo ginapabugtaw ang nagadamgo sa masubo nga katunayan.

Binagbinagon naton ang isa ka patag diin ginapangita sang tawo ang seguridad​—⁠geograpiko nga lokasyon. Halimbawa, ang daku nga siudad mahimo daw nagapangako sing maayo nga palaabuton, nagapahanduraw sang makalilipay nga mga tinion, daku nga tseke, kag matahom nga mga puluy-an. Huo, daw nagahatag ini sing seguridad nga madugay na ginapaabot. Apang matuod gid bala ini nga handurawan?

Lokasyon​—⁠Daku nga Siudad Ukon Daku nga Dalamguhanon?

Sa imol nga mga pungsod, ang pasayod nagasulay sa malangkagon nga mga imahinasyon nga maganyat sa daku nga siudad. Ang mga organisasyon nga nagabayad sa sining pasayod indi gid interesado sa imo seguridad kundi, sa baylo, sa ila benta. Ginatago nila ang mga problema sang matuod nga kalibutan paagi sa madinalag-on nga mga laragway agod ipakita ang seguridad. Sa amo, ang seguridad ginaangot sa ila ginapasayod nga produkto kag sa daku nga siudad.

Binagbinaga ang masunod nga halimbawa. Ang mga opisyales sa isa ka siudad sa Katundan nga Aprika nagbutang sing mga billboard nga nagalaragway sing maathag nga ang pagpanigarilyo kaanggid sa pagsunog sa kuwarta nga ginpangabudlayan sing lakas. Bahin ini sang isa ka kampanya agod paandaman ang mga pumuluyo sini batok sa pagpanigarilyo. Ginkontra ini sang mga nagahimo kag mga nagabaligya sang sigarilyo paagi sa pagbutang sing tuso nga mga billboard diin ang mga nagapanigarilyo ginapakita nga yara sa matahom nga mga lugar nga may kalipay kag kadalag-an. Dugang pa, ginpasuksok sang isa ka kompanya sang sigarilyo ang pila ka empleyado sini sing maluho nga mga uniporme kag matahom nga mga kalo sa besbol agod magpanagtag sing sigarilyo sa mga pamatan-on sa dalan, ginaganyat ang kada isa nga “tilawan ini.” Ang madamo sining mga pamatan-on naghalin sa mga minuro kag, bangod mapinatihon sila sa matahom nga pasayod, nadaya sila sining imbitasyon. Nagiyan sila sa sigarilyo. Ang tagaminuro nga mga pamatan-on nagkadto  sa daku nga siudad sa pagpangita sing seguridad agod masuportahan ang ila pamilya ukon agod makatibawas sa pinansial. Sa baylo, ginsunog nila ang daku nga bahin sang kuwarta nga kuntani nagamit nila sa mas maayo nga mga katuyuan.

Ang mga pasayod nga nagalaragway sang isa ka madinalag-on nga kabuhi sa daku nga siudad wala pirme nagahalin sa mga negosyante. Mahimo ini maghalin sa baba sang mga tawo nga nagsaylo sa daku nga siudad apang nahuya magpauli sa ila minuro. Agod ihinago ang kapaslawan, ginapahambog nila ang kuno manggad kag hinimuan nila sa siudad. Apang, kon usisaon sing maayo ang ila ginaangkon nga kahimtangan, ang ila karon pagsinalayo indi pag-uswag sa ila anay kabuhi sa minuro; nagahimakas sila sa pinansial kaangay sang iban pa nga mga tagasiudad.

Ang mga bag-o lang nag-abot sa siudad nga nagapangita sing seguridad amo ilabi na ang nangin biktima sang mga mahingaliton. Ngaa? Wala pa sila sing suod nga mga abyan kag malayo sila sa ila pamilya. Gani wala sing nagalaygay sa ila agod buligan sila nga malikawan ang mga siod sang materyalistiko nga kabuhi sa siudad.

Si Josué wala masulay nga manigarilyo. Isa pa, narealisar niya nga indi niya masarangan ang pangabuhi sa siudad. Sa bahin niya, ang mahatag gid lang sa iya sang siudad amo ang daku kag wala matuman nga mga dalamguhanon. Nahibaluan niya nga indi niya matigayon ang matuod nga seguridad sa siudad; indi gid sia bagay didto. Nagabatyag sing kasubo, kahuya, kag kapaslawan, sang ulihi gintulon niya ang iya bugal kag nagpauli sa minuro.

Nangalag-ag sia anay nga basi yagutaon sia. Apang sa baylo sini, malipayon sia nga gin-abiabi sang iya pamilya kag matuod nga mga abyan. Bangod sang malipayon nga pagbaton sang iya pamilya, sang naandan nga mga palibot sa minuro, kag sang gugma sang iya mga abyan sa Cristianong kongregasyon, nabatyagan niya gilayon nga mas may seguridad sia diri sangsa daku nga siudad, diin ang dalamguhanon sang madamo nangin bangungot. Sa kakibot niya, ang mapisan nga pagpanguma upod sa iya amay naghatag gid sa iya kag sa iya pamilya sing mas daku nga kinitaan sangsa mahimo kuntani niya kitaon sa siudad.

Kuwarta​—⁠Ano Gid ang Problema?

Makahatag bala sa imo ang kuwarta sing seguridad? Si Liz nga taga-Canada nagsiling: “Sang pamatan-on pa ako, abi ko wala na sing libog kon may kuwarta ka.” Naghigugma sia sa isa ka tawo nga manggaranon. Nagpakasal sila sang ulihi. Nabatyagan bala niya ang seguridad? Si Liz nagsiling pa: “Sang namana ako, may matahom kami nga balay kag duha ka salakyan, kag bangod sang amon kahimtangan sa pinansial, natigayon namon ang halos tanan nga materyal nga mga butang, nakalakbay kami kag nakaliwaliwa. Sing makatilingala, nagapalibog gihapon ako sa kuwarta.” Ginpaathag niya kon ngaa: “Madamo kami sing mahimo madula. Subong bala nga kon mas madamo ang imo ginapanag-iyahan, mas nagabatyag ka nga walay seguridad. Wala madula sang kuwarta ang libog ukon kabalaka.”

Kon sa banta mo wala ka sing bastante nga kuwarta agod may seguridad, pamangkuta ang imo kaugalingon, ‘Ano gid ang problema? Kulang bala sing kuwarta, ukon indi maalamon nga pag-uyat sing kuwarta?’ Nagahinumdom sang iya nagligad, si Liz nagsiling: “Narealisar ko karon nga ang ginhalinan sang mga problema sang akon pamilya sang bata pa ako amo ang indi maayo nga pag-uyat sing kuwarta. Namakal kami sing utang, gani pirme kami ginpabug-atan sang utang. Naghatag ini sing kabalaka.”

Apang, si Liz kag ang iya bana nagabatyag karon nga mas may seguridad, bisan pa diutay lamang ang ila kuwarta. Sang matun-an nila ang kamatuoran sang Pulong sang Dios, wala na sila namati sa makasululay nga ginasiling tuhoy sa kuwarta kag ginapamatian nila ang kaalam sang Dios, lakip na ining mga pulong: “Tuhoy sa isa nga nagapamati sa akon, magapuyo sia nga may kalig-unan kag indi matublag sang kahadlok sa kalamidad.” (Hulubaton 1:33) Luyag nila nga mangin mas may kabilinggan ang ila kabuhi sangsa mahatag sang daku nga pinatago sa bangko. Karon, subong mga misyonero sa malayo nga pungsod, si Liz kag ang iya bana nagatudlo sa mga manggaranon kag sa mga imol nga sa dili madugay, paluntaron ni  Jehova nga Dios ang matuod nga seguridad sa bug-os nga duta. Ini nga hilikuton nagahatag sing daku nga kaayawan kag kalig-unan nga nagagikan sa mas mataas nga katuyuan kag labaw nga mga kabilihanan, indi gikan sa pinansial nga daug.

Tandai ining sadsaran nga kamatuoran: Ang mangin manggaranon sa Dios mas bilidhon sangsa materyal nga manggad. Ginapadaku sa bug-os nga Sagrado nga Kasulatan ang pagtigayon sing maayo nga tindog sa atubangan ni Jehova, nga mahuptan naton paagi sa padayon nga paghimo sa kabubut-on sang Dios nga may pagtuo, kag indi ang pagpanag-iya sing materyal nga manggad. Ginpalig-on kita ni Cristo Jesus nga mangin “manggaranon sa Dios” kag magtipon sing “bahandi sa langit.”​—⁠Lucas 12:​21, 33.

Posisyon​—⁠Diin ka Padulong?

Kon nasulay ka sa pagbatyag nga ang pagtigayon sing mas mataas nga posisyon sa katilingban amo ang dalan padulong sa seguridad, pamangkuta ang imo kaugalingon: ‘Sin-o gid ang nakatigayon sing matuod nga seguridad? Ano pa nga posisyon ang dapat ko lab-uton?’ Ang isa ka madinalag-on nga karera mahimo maghatag sa imo sing sayop nga pagbatyag sing seguridad, nga nagadul-ong sa kapaslawan ukon, ang malain pa, sa malaglagon nga pagkapukan.

 Ginapakita sang matuod nga mga eksperiensia nga ang maayo nga ngalan sa atubangan sang Dios nagahatag sing daku pa nga seguridad sangsa ngalan sa atubangan sang tawo. Si Jehova lamang ang makahatag sa tawo sing dulot nga kabuhi nga dayon. Nagakinahanglan ina sang pagsulat sang aton ngalan, indi sa direktoryo sang mga tawo, kundi sa iya sang Dios tulun-an sang kabuhi.​—⁠Exodo 32:32; Bugna 3:5.

Kon wala ka na nagadalamguhanon, paano mo timbangon ang imo karon nga kahimtangan, kag ano gid ang mapaabot mo sing tampad gikan sa palaabuton? Wala sing isa nga nagapanag-iya sang tanan nga butang. Subong ginsiling sang isa ka maalam nga Cristiano, “Dapat ko tun-an nga ang kabuhi indi gid ini KAG ina kundi ini UKON ina.” Magdulog sa makadali kag basaha ang kahon, “Ginsugilanon sa Benin.”

Sabta karon ining mga pamangkot: Ano ang importante nga destinasyon, ukon tulumuron, sa akon kabuhi? Diin ang pinakamalapit nga alagyan agod makalab-ot didto? Mahimo ayhan nga yara ako sa malawig kag walay seguridad nga alagyan kag ang gusto ko kag kon ano gid ang posible sarang matigayon paagi sa indi tanto kabudlay nga alagyan?

Sa tapos maglaygay tuhoy sa relatibo nga kabilihanan sang materyal nga mga butang kon ipaanggid sa kabilihanan sang espirituwal nga mga butang, si Jesus nagsiling nga huptan ang mata nga “simple,” ukon “nakapokus.” (Mateo 6:22; footnote) Ginpaathag niya nga ang panguna nga mga butang sa kabuhi amo ang espirituwal nga mga kabilihanan kag mga tulumuron nga nasentro sa ngalan sang Dios kag sa iya Ginharian. (Mateo 6:​9, 10) Ang iban pa nga mga butang indi tanto ka importante ukon, kon sa aton pa, indi ang sentro sang igtalupangod.

Madamo nga kamera karon ang mapokus sing awtomatiko sa mga butang sa malayo kag malapit. Nahuyog ka bala nga mangin amo sini? Halos tanan bala nga makita mo nga “nakapokus”​—⁠buot silingon, importante, halandumon kag, ginadamgo, matigayon? Kon bahin lang sini ang nakapokus, ang Ginharian, nga amo ang importante nga tulumuron para sa mga Cristiano, mahimo madula sa nagalinapta nga iban pa nga mga larawan, kay ang kada isa nagatinguha nga makuha ang imo igtalupangod. Ang laygay gid ni Jesus amo: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.”​—⁠Mateo 6:33.

May Seguridad Karon kag sa Walay Katubtuban

Kita tanan mahimo maghandum sing mas maayo nga mga butang para sa aton kaugalingon kag sa aton mga hinigugma. Apang, bangod kita di-himpit, nagakabuhi sa di-himpit nga kalibutan, kag may malip-ot nga kabuhi, mapilitan kita nga limitehan ang mga butang nga ginalauman gid naton nga matigayon. Ang manunulat sang Biblia nagpaathag linibo ka tuig ang nakaligad: “Nagliso ako kag nakita ko sa idalom sang adlaw nga ang palumba indi sa madasig, ukon ang inaway sa makusog, ukon ang kalan-on sa maalam, ukon ang manggad sa mga mahangpunon, ukon ang kahamuot sa mga may ihibalo; bangod ang tion kag wala ginapaabot nga hitabo nagakahanabo sa ila tanan.”​—⁠Manugwali 9:11.

Kon kaisa masako gid kita sa makatalaka nga pangabuhi sa adlaw-adlaw amo nga nalipatan naton nga tan-awon ang daku pa nga larawan sa kon sin-o kita kag kon ano gid ang aton kinahanglan agod may matuod nga seguridad. Binagbinaga ining dumaan nga mga pulong sang kaalam: “Kon ginahigugma mo ang kuwarta, indi ka gid mabusog; kon handum mo nga magmanggaranon, indi mo gid matigayon ang tanan nga  luyag mo. Ini walay pulos. Ang tawo nga nagapangabudlay mahimo ukon indi mahimo bastante ang ginakaon, apang makatulog sia sing mahamuok. Apang, ang tawo nga manggaranon may bugana amo nga nagapabilin sia nga nagabugtaw nga nagapalibog.” (Manugwali 5:​10, 12, Today’s English Version) Huo, diin nasandig ang imo seguridad?

Kon ang imo kahimtangan daw kaangay sa di-matuod nga dalamguhanon ni Josué, maislan mo bala ang imo mga plano? Ang tunay nga nagahigugma sa imo mangin masinuportahon, subong sang pamilya kag mga abyan ni Josué sa Cristianong kongregasyon. Makakita ka sing daku pa nga seguridad sa kubos nga palibot upod sa nagahigugma sa imo sangsa siudad upod sa mahimo maghingalit sa imo.

Kon manggaranon ka na, kaangay ni Liz kag sang iya bana, mapasibu mo bala ang imo pagsinalayo agod mas madamo nga tion kag kusog ang mahinguyang mo sa pagbulig sa mga tawo, manggaranon man ukon imol, nga makatuon tuhoy sa Ginharian, ang paagi sa pagtigayon sing matuod nga seguridad?

Kon madugay ka na nagatinguha nga matigayon ang mas mataas nga posisyon sa katilingban ukon sa imo ulubrahan, ayhan luyag mo binagbinagon sing tampad kon ano ang nagapahulag sa imo. Matuod, ang iban nga mga kasulhayan nga ginaagom mo nagadugang sing kalipay sa kabuhi. Apang, nakapokus ka bala gihapon sa Ginharian​—⁠ang matuod nga paagi sa pagtigayon sing permanente nga seguridad? Dumduma ang mga pulong ni Jesus: “Mas daku ang kalipay sa paghatag sangsa pagbaton.” (Binuhatan 20:35) Kon makigbahin ka sa nagkalainlain nga mga hilikuton sa Cristianong kongregasyon, maagom mo ang makapaladya nga seguridad.

Ang mga nagasalig sing bug-os kay Jehova kag sa iya Ginharian nagaagom sing makalilipay nga seguridad karon kag nagapaabot sing bug-os nga seguridad sa palaabuton. Ang salmista nagsiling: “Pirme ko ginabutang si Jehova sa akon atubangan. Bangod yara sia sa akon tuo nga kamot, indi ako mationg. Busa nagakalipay ang akon tagipusuon, kag ang akon himaya nahuyog nga magkalipay. Subong man, ang akon unod magapuyo nga may seguridad.”​—⁠Salmo 16:​8, 9.

[Kahon/Retrato sa pahina 6]

Ginsugilanon sa Benin

Ini nga sugilanon linibo ka beses na nga ginasugilanon kag may madamo ini nga bersion. Sining karon lang, ginsugid sang isa ka tigulang sa minuro sa Benin, Katundan nga Aprika, ang masunod nga bersion sa pila ka pamatan-on.

Ang mangingisda nagpauli sakay sa iya baruto kag ginsug-alaw sia sang isa ka dumuluong nga eksperto sa negosyo sa sining imol nga pungsod. Ginpamangkot sang eksperto ang mangingisda kon ngaa temprano pa sia nagpauli. Nagsabat sia nga mahimo pa kuntani sia magpadugaydugay apang bastante na ang iya napangisda para sa kinahanglanon sang iya pamilya.

“Kag huo gali, ano ang ginahimo mo sa imo tanan nga tion?” pamangkot sang eksperto.

Ang mangingisda nagsabat: “Ti, nagapangisda ako sing makadali. Nagapakighampang ako sa akon mga anak. Nagapahuwayhuway kami kon mainit. Sa gab-i, nagapanihapon kami sing dungan. Pagkagulugab-⁠i, nagakinanta kami sang akon mga abyan, kag iban pa.”

Ang eksperto nagsaligbat: “Tan-awa, nakatapos ako sa unibersidad kag gintun-an ko ini nga butang. Luyag ko ikaw buligan. Dapat magpadugaydugay ka sa pagpangisda. Mangin daku ang imo kinitaan kag makabakal ka sing dakudaku nga sakayan sa baylo sining baruto. Kon dakudaku na ang imo sakayan, magadaku man ang imo kinitaan kag sa dili madugay magadamo ang imo sakayan sa pagpangisda.”

“Kag pagkatapos?” pamangkot sang mangingisda.

“Pagkatapos, sa baylo nga magbaligya sing isda paagi sa isa ka ahente, ikaw na mismo ang maganegosyar sa pabrika ukon masugdan mo pa gani ang imo kaugalingon nga planta sa pagproseso sing isda. Makahalin ka na sa imo minuro kag makasaylo sa Cotonou, ukon Paris, ukon New York kag makanegosyo halin didto. Mahimo mo pa gani mabutang sa stock market ang imo negosyo kag minilyon ang imo kitaon.”

“Daw ano ka dugay ang kinahanglan agod maagom ko ini?” pamangkot sang mangingisda.

“Ayhan 15 tubtob 20 ka tuig,” sabat sang eksperto.

“Kag pagkatapos?” padayon sang mangingisda.

“Diri sini nga mangin makawiwili ang kabuhi,” paathag sang eksperto. “Nian makaretiro ka na. Mahimo ka maghalin sa masako nga siudad kag magpuyo sa nabaw-ing nga minuro.”

“Kag ano ang mangin resulta?” pamangkot sang mangingisda.

“Nian may tion ka na sa pagpulupangisda, sa pagpakighampang sa imo mga anak, sa pagpahuwayhuway kon mainit, sa pagpanihapon upod sa pamilya, kag sa pagkinanta upod sa imo mga abyan.”

[Mga retrato sa pahina 7]

Ang pagtin-ad bala nagahatag sing seguridad?

[Mga retrato sa pahina 8]

Ang imo mga masigka-Cristiano interesado gid sa imo seguridad