Magdiretso sa kaundan

Magdiretso sa listahan sang kaundan

Duha ka Pastor nga Nagpabalor sa mga Sinulatan ni Russell

Duha ka Pastor nga Nagpabalor sa mga Sinulatan ni Russell

 Duha ka Pastor nga Nagpabalor sa mga Sinulatan ni Russell

SANG 1891, si Charles Taze Russell, nga isa ka talalupangdon nga manugpangabudlay sa tunga sang matuod nga Cristianong mga sumilimba ni Jehova, nagduaw sa Europa sa nahauna nga tion. Suno sa pila ka report, sang naghapit sia sa Pinerolo, Italya, nasugilanon ni Russell si Propesor Daniele Rivoire, isa anay ka pastor sang isa ka relihioso nga grupo sang ginatawag nga mga Waldonhon.⁠ * Bisan suod gihapon nga nakig-upod si Rivoire sa mga Waldonhon pagkatapos sia maghalin sa pagkapastor, ginhuptan niya ang bukas nga hunahuna kag nagbasa sang madamo nga publikasyon nga ginsulat ni C. T. Russell.

Sang 1903, ginbadbad ni Rivoire ang libro ni Russell nga The Divine Plan of the Ages sa Italyano kag gingastuhan ang pag-imprinta sini. Antes pa ini sang ginbalhag ang opisyal nga Italyano nga edisyon. Sa introduksion sang libro, si Rivoire nagsulat: “Ginatugyan namon sa pangamlig sang Ginuo ining nahaunang Italyano nga edisyon. Kabay nga pakamaayuhon niya ini agod nga, walay sapayan sang mga pagkadihimpit sa sini, makaamot ini sa pagpadaku sang iya labing balaan nga ngalan kag mapalig-on ang iya Italyano nga mga anak sa kapin pa nga debosyon. Kabay nga ang tanan nga, sa pagbasa sini nga libro, nag-apresyar sa kadakuon sang kamanggaran, kaalam, kag ihibalo sang plano kag gugma sang Dios, magpasalamat sa Dios mismo, nga paagi sa iya bugay nabalhag ini nga libro.”

Ginsugdan man ni Rivoire ang pagbadbad sa Zion’s Watchtower and Herald of Christ’s Presence sa Italyano. Ginbalhag ini nga magasin, ang una nga porma sang Ang Lalantawan, kada tatlo ka bulan sang 1903. Bisan pa si Propesor Rivoire wala mangin Estudyante sang Biblia, subong amo ang pagtawag sa mga Saksi ni Jehova sadto, nagpakita sia sing daku nga interes sa pagpalapnag sa mensahe sang Biblia suno sa pagpaathag sa mga publikasyon sang mga Estudyante sang Biblia.

“Daw Subong Bala nga Nahukas ang mga Himbis sa Akon mga Mata”

Ang isa pa ka Waldonhon nga pastor nga nagpabalor sa mga publikasyon ni Russell amo si Giuseppe Banchetti. Ang amay ni Giuseppe, nga nakumbertir halin sa Katolisismo, naghatag sa iya sang Waldonhon nga edukasyon. Sang 1894, nangin pastor si Giuseppe kag nag-alagad sa madamong Waldonhon nga mga komunidad sa Apulia kag Abruzzi kag sa mga isla sang Elba kag Sicily.

Ginbalhag ang opisyal nga Italyano nga edisyon sang Divine Plan of the Ages ni Russell sang 1905. Nagsulat si Banchetti sang isa ka mapagsik nga komento sa libro. Nagguwa ini sa Protestante nga periodiko nga La Rivista Cristiana. “Para sa amon,” sulat ni Banchetti, ang libro ni Russell “amo ang labing nasanagan kag pat-od nga giya nga magamit sang isa ka Cristiano sa mapuslanon kag makapaladya nga pagtuon sang Balaan nga Kasulatan . . . Sang mabasa ko ini, daw subong bala nga nahukas ang mga  himbis sa akon mga mata, kag ang dalanon padulong sa Dios nangin mas matadlong kag mas mahapos. Bisan ang hayag nga mga pagsumpakilay masami nga nadula. Ang mga doktrina nga mabudlay anay hangpon nangin mahapos kag husto gid. Ang mga butang nga indi anay mahantop nangin maathag na. Ang dalayawon nga plano para sa kaluwasan sang kalibutan paagi kay Cristo nangin simple gid katama sa akon amo nga makatuaw ako kaupod sang Apostol: O pagkadalom sang kamanggaran kag kaalam kag ihibalo sang Dios!”​—⁠Roma 11:33.

Subong sang ginsiling ni Remigio Cuminetti sang 1925, nagpakita si Banchetti sing “daku nga simpatiya” sa hilikuton sang mga Estudyante sang Biblia kag “nakumbinse gid” sa mga doktrina nga ila ginapaathag. Sa iya kaugalingon nga paagi, ginpalapnag man ni Banchetti ini nga mga doktrina.

Maathag gikan sa mga sinulatan ni Banchetti nga, kaangay sang mga Saksi ni Jehova, nagpati sia nga may pagkabanhaw sa duta, subong sang ginatudlo sang Kasulatan. Nag-ugyon man sia sa mga Estudyante sang Biblia sang ginpaathag niya nga ang tuig nga napatay si Jesus ginpat-od kag ginpahayag sang Dios sa tagna ni Daniel tuhoy sa 70 ka semana. (Daniel 9:24-27) Kapin sa isa ka bes, kag sa hayag nga di-pag-ugyon sa mga panudlo sang iya simbahan, nga nagpati sia nga ang Memoryal sang kamatayon ni Jesucristo dapat saulugon sing makaisa gid lang kada tuig, “sa adlaw mismo nga nagatupa ang anibersaryo.” (Lucas 22:​19, 20) Ginsikway niya ang teoriya ni Darwin sa ebolusyon, kag ginpamatud-an niya nga ang matuod nga mga Cristiano indi dapat magpakigbahin sa inaway sang kalibutan.​—⁠Isaias 2:4.

Isa ka bes, ginbinagbinag ni Banchetti ang mga sinulatan ni Russell upod kay J. Campbell Wall. Bilang sabat sa mga kritisismo ni Wall, si Banchetti nagsiling: “Napat-od ko nga kon basahon mo ang anom ka tomo ni Russell, malipay gid ikaw, kag pasalamatan mo gid ako. Wala ko ginapadayawdayaw ang doktrina; apang nabasa ko ini nga mga libro sang nagligad nga onse ka tuig, kag nagapasalamat ako sa Dios kada adlaw bangod sang pagbutang niya sa akon atubangan sini nga kapawa kag paglipay paagi sa isa ka libro nga napasad sing bug-os kag malig-on sa Balaan nga Kasulatan.”

“Magpamati, Magpamati, Magpamati”

Talalupangdon nga gin-apresyar sining duha ka Waldonhon nga mga pastor​—⁠si Daniele Rivoire kag si Giuseppe Banchetti⁠​—⁠​ang paagi sang pagpaathag ni Russell sa Biblia. Si Banchetti nagsulat: “Masiling ko nga wala sa amon nga mga Evangelical, wala bisan sa amon mga pastor ukon mga propesor sa teolohiya, wala sing bisan sin-o nga nakahibalo sang tanan nga butang. Wala, madamo pa gid kami sang dapat matun-an. . . . [Dapat kami] . . . magpabilin kag magpamati, wala nagahunahuna nga nahibaluan na namon ang tanan, kag wala nagasikway sang ginatanyag sa amon nga dapat usisaon. Sa baylo, magpamati, magpamati, magpamati.”

Kada tuig, linibo ang nagapamati sa mensahe sang Ginharian nga ginadala sa ila puluy-an sang mga Saksi ni Jehova. Ang bukas sing hunahuna nga mga tawo bisan diin nga ginauhaw sa kamatuoran sang Biblia nagasabat sa pangagda ni Jesus: “Kari magsunod sa akon.”​—⁠Marcos 10:17-21; Bugna 22:17.

[Nota]

^ par. 2 Ginhingadlan sila sunod kay Pierre Vaudès, ukon Peter Waldo, isa ka negosyante sang ika-12 nga siglo nga taga-Lyons, Pransia. Ginsikway si Waldo sa Simbahan Katoliko bangod sang iya mga pagpati. Para sa dugang nga impormasyon sa mga Waldonhon, tan-awa ang artikulo nga “Ang mga Waldonhon​—⁠Halin sa Pagkaerehes Pakadto sa Protestantismo” sa Marso 15, 2002, nga Ang Lalantawan.

[Retrato sa pahina 28]

Si Propesor Daniele Rivoire

[Retrato sa pahina 29]

Si Giuseppe Banchetti

[Credit Line]

Banchetti: La Luce, April 14, 1926