Magdiretso sa kaundan

Magdiretso sa listahan sang kaundan

Diin Nasandig ang Imo Seguridad?

Diin Nasandig ang Imo Seguridad?

 Diin Nasandig ang Imo Seguridad?

Sa isa ka magamay nga minuro sa Katundan nga Aprika, ang pamatan-on nga si Josué nagpaalam sa iya pamilya kag mga abyan. * Nian nagkadto sia sa daku nga siudad sa pagpangita sing pinansial nga seguridad. Apang, pag-abot gid niya, nagdulom ang iya paglaum kay narealisar niya nga ang siudad indi gali isa ka lugar nga madali magmanggaranon.

SA PAGHIMUD-OS nga makigbagay sa pangabuhi sa siudad, si Josue nalugaw-an gid. Ang daku nga siudad indi subong sang ginhanduraw niya. Sadto man nga tion, gusto na ni Josué nga magpauli sa iya pamilya kag mga abyan sa kubos nga minuro nga ginbiyaan niya. Apang nahadlok sia nga basi yagutaon sia sang iban nga mga tagaminuro. ‘Tawgon nila ako nga nalugaw-an,’ kabalaka niya, ‘bangod wala ako magmadinalag-on sa siudad.’

Ang mabug-at pa sa iya amo ang kapaslawan nga mahimo batyagon sang iya mga ginikanan. Sia lamang ang ginasaligan nila nga makabulig sa ila sa pinansial. Samtang ginabatuan niya ini nga balatyagon, nagtrabaho si Josue sing maski ano lang sa halos tanan nga adlaw kag may manubo kaayo nga kinitaan sangsa ginlauman niya. Kapoy gid sia sa sobra nga trabaho. Kag sa paglipas sang tagsa ka semana, nagadiutay pa ang iya tion para sa Cristianong mga hilikuton, nga iya ginapabaloran sing tama. Bangod malayo sa iya pamilya kag mga abyan, masinulub-on sia kag nagaisahanon. Natukiban niya nga wala mahatag sang siudad ang seguridad nga ginahandum gid niya.

Bisan pa nagalainlain ang mga ngalan kag mga lugar, ang masubo nga sugilanon ni Josué nagakatabo pirme. Si Josué indi mahamkunon sa handum niya nga maglakat​—⁠handum lang niya nga makakita sing seguridad. Abi niya daku ang tsansa niya nga magtin-ad sa siudad sangsa iya magamay nga minuro. Matuod, kon kaisa ang isa ka tawo nagatin-ad sa pangabuhi, apang wala ini nagakahulugan sing matuod nga seguridad. Indi amo sini ang natabo kay Josué, ukon ayhan sa madamo pa nga nanikasog man. Bangod sini, mahimo kita mamangkot, ‘Ano ang seguridad?’

Lainlain ang paghantop sang mga tawo sa seguridad. Siling sang isa ka diksionaryo ang seguridad amo ang “kahilwayan sa katalagman” ukon “kahilwayan sa kahadlok ukon kabalaka.” Narealisar sang kalabanan nga mga tawo nga wala karon sing lugar nga may bug-os nga “kahilwayan sa katalagman.” Kontento na sila basta nagabatyag sila nga may seguridad, walay sapayan sang makatalagam nga mga kahimtangan sa palibot nila.

Kamusta ka? Diin mo ginapangita ang seguridad? Makita bala ini sa siudad kag indi sa minuro, subong sang pagdumdom ni Josué? Ukon makita bala ini sa kuwarta, walay sapayan kon diin ukon kon paano mo ini mahimo tigayunon? Makita bala ini sa paghimulat nga maangkon ang mataas nga posisyon? Bisan diin man ang ginapatihan mo nga ginasandigan sang imo seguridad, daw ano ka dugay ini nga seguridad para sa imo kag sa imo pamilya?

Binagbinagon naton ang tatlo ka paagi kon paano nagapangita ang madamo nga tawo sing seguridad​—⁠geograpiko nga lokasyon; kuwarta; posisyon, ukon kahimtangan. Nian usisaon naton kon diin nasandig ang matuod kag permanente nga seguridad.

[Nota]

^ par. 2 Gin-islan ang ngalan.