Magdiretso sa kaundan

Magdiretso sa listahan sang kaundan

Mga Miting nga Nagapukaw sang Gugma kag Maayong mga Buhat

Mga Miting nga Nagapukaw sang Gugma kag Maayong mga Buhat

 “Kari sa Akon, . . . kag Paumpawan Ko Kamo”

Mga Miting nga Nagapukaw sang Gugma kag Maayong mga Buhat

HALIN sa Toronto pakadto sa Tokyo, halin sa Moscow pakadto sa Montevideo​—⁠ang minilyon ka Saksi ni Jehova kag ang ila mga abyan nagadugok sa ila mga duog sang pagsimba sing pila ka beses kada semana. Lakip sa ila amo ang mabakas nga mga lalaki nga may pamilya, nga kapoy kaayo sa tapos sang malawig nga inoras sa trabaho; ang mapisan nga mga asawa kag mga iloy nga ginaupdan sang ila magagmay nga mga anak; ang mapagsik nga mga pamatan-on nga bilog nga adlaw nga nagaeskwela; ang mahuyang nga mga tigulang nga mahinay maglakat bangod sang kasakit; ang maisugon nga mga balo kag mga ilo; kag ang napung-awan nga mga kalag nga nagakinahanglan sing lugpay.

Ining mga Saksi ni Jehova nagagamit sing madamo nga sahi sang transportasyon​—⁠halin sa madasig nga mga bullet train pakadto sa mga asno; halin sa gutok nga mga tren sa subway pakadto sa mga trak. Ang iban nagatabok sa mga suba nga madamo sing buaya, samtang ang iban naman nagaagwanta sa magansal nga trapiko sa dalagku nga mga siudad. Ngaa nagapanikasog gid ining tanan nga tawo?

Una bangod ang pagtambong kag pagpakigbahin sa Cristianong mga miting isa ka importante nga paagi sa pagsimba kay Jehova nga Dios. (Hebreo 13:15) Ginpatalupangod ni apostol Pablo ang isa pa ka rason sang nagsulat sia: “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon, . . . kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.” (Hebreo 10:​24, 25) Ginpalanog diri ni Pablo ang ginabatyag ni salmista David, nga nag-amba: “Nagkasadya ako sang nagsiling sila sa akon: ‘Makadto kita sa balay ni Jehova.’ ”​—⁠Salmo 122:1.

Ngaa nasadyahan ang mga Cristiano sa pagkadto sa ila mga miting? Bangod ang mga nagatambong indi lamang mga tagpanilag. Sa baylo, ang mga miting nagahatag sa ila sing higayon nga makilala ang isa kag isa. Ining mga pagtilipon ilabi na nga nagahatag sing mga higayon sa paghatag, indi lamang sa pagbaton, kag sa pagpukaw sa isa kag isa sa pagpakita sing gugma kag sa paghimo sing maayong mga buhat. Nagabulig ini agod ang mga miting mangin makalilipay nga mga okasyon. Isa pa, ang Cristianong  mga miting isa sang mga paagi nga ginatuman ni Jesus ang iya saad: “Kari sa akon, . . . kag paumpawan ko kamo.”​—⁠Mateo 11:28.

Isa ka Dalangpan sang Lugpay kag Pag-ulikid

May rason gid ang mga Saksi ni Jehova agod tamdon ang ila mga miting subong makapaumpaw. Una, ang espirituwal nga pagkaon sa nagakaigo nga tion ginahatag sa mga miting sang “matutom kag mainandamon nga ulipon.” (Mateo 24:45) Ang mga miting nagabulig man sa mga alagad ni Jehova nga mangin lantip kag makugi nga mga manunudlo sang Pulong sang Dios. Dugang pa, makita sang isa sa Kingdom Hall ang isa ka grupo sang mahigugmaon, mainulikdon, kag matinatapon nga mga abyan nga handa sa pagbulig kag sa paglugpay sa iban sa tion sang kapiot.​—⁠2 Corinto 7:5-7.

Amo ini ang naeksperiensiahan ni Phillis, nga nabiyuda sang ang iya mga anak lima kag walo ka tuig pa lamang. Sa paglaragway sa makapaumpaw nga epekto sang Cristianong mga miting sa ila sang iya mga anak, sia nagsiling: “Isa ka lugpay nga magkadto sa Kingdom Hall bangod pirme ginapakita sang mga masigkatumuluo ang ila gugma kag kabalaka paagi sa hakos, panghunahuna sa Kasulatan, ukon pagpisga sa kamot. Isa ini ka duog nga luyag ko pirme kadtuan.”​—⁠1 Tesalonica 5:14.

Sa tapos maoperahan si Marie, ang iya doktor nagsiling nga magapaayo sia sa sulod sang mga anom ka semana. Sa una nga senemana sang iya pagpaayo, si Marie indi makatambong sa mga miting. Natalupangdan sang iya doktor nga indi sia malipayon subong sang una. Sang mahibaluan sang doktor nga wala sia nagatambong sa mga miting, ginpalig-on sia sang doktor nga magtambong. Si Marie nagsabat nga ang iya bana, nga lain ang relihion, indi luyag nga magkadto sia sa mga miting bangod sang pagkabalaka sa iya panglawas. Busa naghimo ang doktor sing isa ka opisyal nga resita nga “nagasugo” kay Marie nga magkadto sa Kingdom Hall para sa makapalig-on kag makapabakod nga pagpakig-upod. Si Marie naghinakop: “Sa tapos makatambong sa isa ka miting, nag-ayo ang akon pamatyag. Nakakaon na ako, nakatulog sa bug-os nga gab-i, talagsa na lang ako nagainom sing bulong sa palanakit, kag nagayuhum na liwat ako!”​—⁠Hulubaton 16:24.

Ang mahigugmaon nga kahimtangan sa Cristianong mga miting natalupangdan sang mga tagaguwa. Ginpili sang isa ka estudyante sa kolehiyo nga obserbahan ang mga Saksi ni Jehova agod makasulat sing salaysay para sa iya klase sa ethnology. Tuhoy sa kahimtangan sa mga miting, nagsulat sia sa iya salaysay: “Ang mainit nga pag-abiabi sa akon . . . dalayawon gid. . . . Ang pagkamainabyanon sang mga Saksi ni Jehova talalupangdon gid nga kinaiya kag amo ini ang ginakabig ko nga pinakaimportante nga bahin sang mga miting.”​—⁠1 Corinto 14:25.

Sa sining magamo nga kalibutan, ang Cristianong kongregasyon isa ka espirituwal nga dalangpan. Isa ini ka duog nga may paghidait kag gugma. Paagi sa pagtambong sa mga miting, maeksperiensiahan mo mismo ang kamatuoran sang mga pulong sang salmista: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa!”​—⁠Salmo 133:1.

[Kahon/Retrato sa pahina 25]

PAG-AMAN SA ISA KA PINASAHI NGA KINAHANGLANON

Paano ang mga bungol makabenepisyo sa mga miting? Sa bug-os nga kalibutan, ang mga Saksi ni Jehova nagatukod sing sign-language nga mga kongregasyon. Sa nagligad nga 13 ka tuig, 27 ka sign-language nga mga kongregasyon kag 43 ka sign-language nga mga grupo ang natukod sa Estados Unidos. Sa di-magkubos 40 pa ka pungsod, may yara na karon mga 140 ka sign-language nga kongregasyon. Ang Cristianong mga publikasyon ginhimo sa video sa 13 ka sign language.

Ang Cristianong kongregasyon nagahatag sing higayon sa mga bungol agod madayaw si Jehova. Si Odile, isa anay ka Katoliko sa Pransia nga ginaatake sang malubha nga kapung-aw kag may huyog sa paghikog, nagapasalamat gid sa edukasyon sa Biblia nga nabaton niya sa Cristianong mga miting. “Napasag-uli ko ang akon kapagros kag ang kalipay sa kabuhi,” siling niya. “Apang labaw sa tanan, nasapwan ko ang kamatuoran. Ang akon kabuhi may katuyuan na karon.”