Magdiretso sa kaundan

Magdiretso sa listahan sang kaundan

Matuod Gid Bala sa Imo ang Pagpanguna ni Cristo?

Matuod Gid Bala sa Imo ang Pagpanguna ni Cristo?

 Matuod Gid Bala sa Imo ang Pagpanguna ni Cristo?

“Indi kamo magpatawag nga ‘mga lider,’ kay isa lamang ang inyo Lider, ang Cristo.”​​—⁠MATEO 23:10.

1. Sin-o lamang ang Lider sang matuod nga mga Cristiano?

MARTES, Nisan 11. Paglipas sang tatlo ka adlaw, si Jesucristo patyon. Amo ini ang katapusan niya nga pagduaw sa templo. Sa sini nga adlaw, ginpaalinton ni Jesus ang importante nga panudlo sa kadam-an nga nagtipon didto kag sa iya mga disipulo. Nagsiling sia: “Indi kamo magpatawag nga Rabbi, kay isa lamang ang inyo manunudlo, samtang kamo tanan mag-ulutod. Dugang pa, indi kamo magtawag nga amay kay bisan sin-o nga tawo sa duta, kay isa lamang ang inyo Amay, ang Isa nga langitnon. Indi kamo magpatawag nga ‘mga lider,’ kay isa lamang ang inyo Lider, ang Cristo.” (Mateo 23:8-10) Sing maathag, si Jesucristo amo ang Lider sang matuod nga mga Cristiano.

2, 3. Ano ang epekto sa aton kabuhi kon pamatian naton si Jehova kag batunon ang Lider nga gintangdo niya?

2 Daw ano gid ka mapuslanon ang mga epekto sang pagpanguna ni Jesus sa aton kabuhi kon batunon naton ini! Nagatagna sa pagkari sining Lider, si Jehova nga Dios nagpahayag paagi kay manalagna Isaias: “Kamo dira, tanan kamo nga ginauhaw! Kari kamo sa tubig. Kag ang mga wala sing kuwarta! Kari kamo, magbakal kag magkaon. Huo, kari kamo, magbakal sing alak kag gatas bisan wala sing kuwarta kag wala sing bayad. . . . Pamati sing maayo sa akon, kag magkaon kon ano ang maayo, kag tuguti nga ang inyo kalag makasapo sing tuman nga kalipay sini sa katambok. . . . Yari karon! Subong saksi sa pungsudnon nga mga grupo ginhatag ko sia, subong lider kag kumandante sa pungsudnon nga mga grupo.”​—⁠Isaias 55:1-4.

3 Naggamit si Isaias sing kinaandan nga mga likido​—⁠tubig, gatas, kag alak​—⁠subong mga paanggid agod ipakita kon paano maapektuhan ang aton personal nga kabuhi kon magpamati kita kay Jehova kag magsunod sa Lider kag Kumandante nga ginhatag niya sa aton. Ang resulta makapaumpaw. Kaangay ini sang pag-inom sing isa ka baso sang mabugnaw nga tubig sa mainit nga adlaw. Ang aton kauhaw sa kamatuoran kag pagkamatarong ginabulong. Subong nga ang gatas nagapabaskog sa mga lapsag kag nagabulig sa ila nga magtubo, ‘ang gatas sang pulong’ nagapabakod sa aton kag nagapauswag sang espirituwal nga pagtubo sang aton kaangtanan sa Dios. (1 Pedro 2:1-3) Kag sin-o ang makapanghiwala nga ang alak nagaamot sa kalipay sa masadya nga mga okasyon? Sa kaanggid nga paagi, ang pagsimba sa matuod nga Dios kag ang pagsunod sa tikang sang gintangdo niya nga Lider ‘nagapahalipay sing bug-os’ sang kabuhi. (Deuteronomio 16:15) Importante, nian, nga ipakita naton tanan​—⁠bata kag tigulang, lalaki kag babayi​—⁠nga ang pagpanguna ni Cristo matuod gid sa aton. Apang, paano naton mapakita sa aton adlaw-adlaw nga pagkabuhi nga ang Mesias amo ang aton Lider?

Mga Pamatan-on​—⁠Padayon nga ‘Mag-uswag sa Kaalam’

4. (a) Ano ang natabo sang nagduaw ang 12-anyos nga si Jesus sa Jerusalem sang panahon sang Paskuwa? (b) Daw ano ka damo ang nahibaluan ni Jesus sa edad lamang nga 12 anyos?

4 Binagbinaga ang halimbawa nga ginpahamtang sang aton Lider para sa mga pamatan-on. Bisan pa diutay lamang ang nahibaluan tuhoy sa pagkabata ni Jesus, isa ka hitabo ang nagasugid sang importante gid nga butang. Sang si Jesus 12 anyos, gin-upod sia sang iya mga ginikanan sa ila tuigan nga pagduaw sa Jerusalem para sa Paskuwa. Sini nga okasyon nawili sia sa pagpakighambal tuhoy sa Kasulatan, kag di-hungod nga nabayaan sia sang iya pamilya. Paglipas sang tatlo ka adlaw nakita sia sa templo sang iya nabalaka nga mga ginikanan, nga sanday Jose kag  Maria, “nga nagalingkod sa tunga sang mga manunudlo kag nagapamati sa ila kag nagapamangkot sa ila.” Dugang pa, “ang tanan nga nagapamati sa iya padayon nga natingala sa iya paghangop kag sa iya mga sabat.” Handurawa nga sa edad lamang nga 12 anyos, si Jesus indi lamang makapamangkot sing makapahunahuna nga pamangkot tuhoy sa espirituwal nga mga butang kundi makahatag man sing intelihente nga mga sabat! Sa walay duhaduha, ang paghanas sang iya mga ginikanan nakabulig sa iya.​—⁠Lucas 2:41-50.

5. Paano matulutimbang sang mga pamatan-on ang ila panimuot sa pangpamilya nga pagtuon sa Biblia?

5 Ayhan isa ikaw ka pamatan-on. Kon ang imo mga ginikanan debotado nga mga alagad sang Dios, mahimo may regular nga programa sang pangpamilya nga pagtuon sa Biblia sa inyo puluy-an. Ano ang imo panimuot sa pangpamilya nga pagtuon? Ngaa indi mo binagbinagon ang mga pamangkot subong sang: ‘Bug-os tagipusuon ko bala nga ginasuportahan ang kahimusan sa pagtuon sa Biblia sang akon pamilya? Nagakooperar bala ako sa sini, nga wala sing ginahimo agod maguba ang tion nga gintalana para sa pagtuon?’ (Filipos 3:16) ‘Aktibo bala ako nga nagakomento sa pagtuon? Kon nagakaigo, nagapamangkot bala ako bahin sa ginatun-an kag nagakomento tuhoy sa aplikasyon sini? Samtang nagauswag ako sa espirituwal, ginapalambo ko bala ang gana para sa “pagkaon nga matig-a para sa hamtong nga mga tawo”?’​—⁠Hebreo 5:​13, 14.

6, 7. Daw ano ka mapuslanon ang programa sa adlaw-adlaw nga pagbasa sa Biblia para sa mga pamatan-on?

6 Ang programa sa adlaw-adlaw nga pagbasa sa Biblia mapuslanon man. Ang salmista nag-amba: “Malipayon ang tawo nga wala nagalakat sa laygay sang mga malauton, . . . kundi ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.” (Salmo 1:​1, 2) Ang nagbulos kay Moises, nga si Josue, ‘nagabasa sing mahinay sang tulun-an sang kasuguan sa adlaw kag gab-i.’ Nagbulig ini sa iya sa pagpanghikot sing maalamon kag mangin madinalag-on sa pagtuman sa iya hatag-Dios nga asaynment. (Josue 1:8) Ang aton Lider, si Jesucristo, nagsiling: “Nasulat na, ‘Ang tawo mabuhi, indi lamang sa tinapay, kundi sa tagsa ka pulong nga nagaguwa sa baba ni Jehova.’ ” (Mateo 4:4) Kon nagakinahanglan kita sing pisikal nga pagkaon kada adlaw, labi pa nga nagakinahanglan kita pirme sing espirituwal nga pagkaon!

7 Nakahibalo sang iya espirituwal nga kinahanglanon, ginsugdan sang 13-anyos nga si Nicole ang pagbasa sa Biblia kada adlaw.⁠ * Karon, sa edad nga 16, nabasa na niya ang bug-os nga Biblia sing makaisa kag tunga-tunga na para sa ikaduha nga bes. Simple lang ang iya paagi. “Determinado ako sa pagbasa sing bisan isa ka kapitulo sa isa ka adlaw,” siling niya. Paano sia nabuligan sang iya adlaw-adlaw nga pagbasa sa Biblia? Nagsabat sia: “Madamo karon sing malain nga mga impluwensia. Adlaw-adlaw ako nga nagaatubang sing mga pag-ipit sa eskwelahan kag sa iban  pa nga lugar nga nagahangkat sa akon pagtuo. Ang pagbasa sa Biblia kada adlaw nagabulig sa akon agod madumduman sa gilayon ang mga sugo kag mga prinsipio sang Biblia nga nagapalig-on sa akon nga pamatukan ining mga pag-ipit. Subong resulta, nangin malapit ako sing labi pa kay Jehova kag kay Jesus.”

8. Ano ang batasan ni Jesus bahin sa sinagoga, kag paano sia mailog sang mga pamatan-on?

8 Batasan ni Jesus nga mamati kag makigbahin sa pagbasa sa Kasulatan sa sinagoga. (Lucas 4:16; Binuhatan 15:21) Daw ano ka mapuslanon para sa mga pamatan-on nga ilugon ini nga halimbawa paagi sa pagtambong sing tayuyon sa Cristianong mga miting, diin ginabasa kag ginatun-an ang Biblia! Bilang pagpasalamat sa sining mga miting, ang 14-anyos nga si Richard nagsiling: “Ang mga miting hamili sa akon. Pirme ako ginapahanumdom didto kon ano ang maayo kag malain, kon ano ang moral kag imoral, kon ano ang tulad-Cristo kag kon ano ang indi. Indi kinahanglan nga mahibaluan ko ini paagi sa mapait nga eksperiensia.” Huo, ang “pahanumdom ni Jehova masaligan, nga nagapaalam sa isa nga indi eksperiensiado.” (Salmo 19:7) Determinado man si Nicole sa pagtambong sa lima tanan ka miting sa kongregasyon kada semana. Nagahinguyang man sia sing halin sa duha tubtob tatlo ka oras sa paghanda para sa sini.​—⁠Efeso 5:​15, 16.

9. Paano ang mga pamatan-on padayon nga ‘mag-uswag sa kaalam’?

9 Ang pagkapamatan-on amo ang nagakaigo nga tion agod makakuha sing ‘ihibalo tuhoy sa lamang matuod nga Dios, kag sa isa nga ginpadala niya, si Jesucristo.’ (Juan 17:3) Mahimo may kilala ka nga mga pamatan-on nga nagahinguyang sing madamo nga oras sa pagbasa sing komiks, pagtan-aw sing telebisyon, paghampang sing video games, ukon paggamit sing Internet. Ngaa ilugon mo sila samtang mailog mo ang himpit nga halimbawa sang aton Lider? Sang bata pa sia, nalipay sia sa pagtuon tuhoy kay Jehova. Kag ano ang resulta? Bangod sang gugma niya sa espirituwal nga mga butang, “si Jesus padayon nga nag-uswag sa kaalam.” (Lucas 2:52) Kamo man padayon nga magauswag sa kaalam.

“Magpasakop sa Isa kag Isa”

10. Paano ang pamilya mangin ginhalinan sang paghidait kag kalipay?

10 Ang puluy-an mahimo nga mangin isa ka lugar nga may paghidait kag pagkakontento ukon isa ka patag-awayan nga may pinuyas kag binangig. (Hulubaton 21:19; 26:21) Ang pagbaton naton sa pagpanguna ni Cristo nagapauswag sang paghidait kag kalipay sa pamilya. Ang matuod, ang halimbawa ni Jesus amo ang huwaran para sa mga kaangtanan sa pamilya. Ang Kasulatan nagasiling: “Magpasakop kamo sa isa kag isa sa kahadlok kay Cristo. Ang mga asawa magpasakop sa ila mga bana subong nga sa Ginuo, bangod ang bana amo ang ulo sang iya asawa subong nga si Cristo man amo ang ulo sang kongregasyon, kay sia ang manluluwas sini nga lawas. . . . Mga bana, padayon nga higugmaa ang inyo mga asawa, subong nga si Cristo man naghigugma sang kongregasyon kag nagtugyan sang iya kaugalingon tungod sa sini.” (Efeso 5:21-25) Si apostol Pablo nagsulat sa kongregasyon sa Colosas: “Kamo nga mga anak, mangin matinumanon kamo sa inyo mga ginikanan sa tanan nga butang, kay kalahamut-an ini sa Ginuo.”​—⁠Colosas 3:18-20.

11. Paano mapakita sang bana nga ang pagpanguna ni Cristo matuod gid sa iya?

11 Ang pagsunod sa sining laygay nagakahulugan nga ang bana nagapanguna sa pamilya, ang iya asawa mainunungon nga nagasuporta sa iya, kag ang mga kabataan nagatuman sa ila mga ginikanan. Apang, mangin makalilipay lamang ang pagkaulo sang bana kon ginahimo ini sing nagakaigo. Ang isa ka maalamon nga bana dapat magtuon sa paghimo sang pagkaulo paagi sa pag-ilog  sa iya Ulo kag Lider, si Cristo Jesus. (1 Corinto 11:3) Bisan pa nga si Jesus sang ulihi nangin “ulo sa ibabaw sang tanan nga butang sa kongregasyon,” nagkari sia sa duta, “indi agod alagdon, kundi agod mag-alagad.” (Efeso 1:22; Mateo 20:28) Sa kaanggid nga paagi, ang Cristianong bana nagahimo sang iya pagkaulo, indi tungod sa makagod nga bentaha, kundi agod atipanon ang kaayuhan sang iya asawa kag mga kabataan​—⁠huo, sang bug-os nga pamilya. (1 Corinto 13:​4, 5) Ginatinguhaan niya nga ilugon ang diosnon nga mga kinaiya sang iya ulo, si Jesucristo. Kaangay ni Jesus, sia malulo kag mapainubuson sing tagipusuon. (Mateo 11:28-30) Wala sia nabudlayan sa pagbungat sa mga tinaga subong sang “pasayluha ako” ukon “husto ka” kon magsala sia. Ang maayo nga halimbawa sini nga bana nagapahapos para sa asawa nga mangin “kabulig,” ukon “komplemento,” kag “kaupod” niya, nagatuon gikan sa iya kag nagapangabudlay upod sa iya.​—⁠Genesis 2:20; Malaquias 2:14.

12. Ano ang magabulig sa asawa nga masunod ang prinsipio sa pagkaulo?

12 Ang asawa, sa iya bahin, dapat magpasakop sa iya bana. Apang, kon naimpluwensiahan sia sang espiritu sang kalibutan, mahimo ini magpaluya sang iya pagtamod sa prinsipio sang pagkaulo, kag indi niya maluyagan ang ideya nga magpasakop sa lalaki. Ang Kasulatan wala nagapahangop nga ang lalaki dapat mangin dominante, apang ginasugo sini ang mga asawa nga magpasakop sa ila mga bana. (Efeso 5:24) Ginapatuman man sang Kasulatan nga ang bana ukon amay amo ang may salabton sa pamilya, kag kon ang laygay sini ginasunod, nagaamot ini sa kalipay kag kahim-ong sa pamilya.​—⁠Filipos 2:5.

13. Ano nga halimbawa sang pagpasakop ang ginhatag ni Jesus para sa mga kabataan?

13 Ang mga kabataan dapat mangin matinumanon sa ila mga ginikanan. Bahin sa sini, si Jesus nagpahamtang sing maayo gid nga halimbawa. Pagkatapos sang hitabo nga nabayaan ang 12-anyos nga si Jesus sa sulod sang tatlo ka adlaw, “nagdulhog sia upod sa [iya mga ginikanan] kag nag-abot sa Nazaret, kag padayon sia nga nagpasakop sa ila.” (Lucas 2:51) Ang pagpasakop sang mga kabataan sa ila mga ginikanan nagaamot sa paghidait kag paghiusa sa pamilya. Kon ang tanan sa pamilya nagapasakop sa pagpanguna ni Cristo, nagaresulta ini sa isa ka malipayon nga pamilya.

14, 15. Ano ang magabulig sa aton nga magmadinalag-on kon nagaatubang sing mabudlay nga kahimtangan sa puluy-an? Maghatag sing halimbawa.

14 Bisan pa magautwas ang mabudlay nga mga kahimtangan sa puluy-an, ang sekreto sang kadalag-an amo ang pag-ilog kay Jesus kag ang pagbaton sa iya panuytoy. Halimbawa, ang pagpangasawa sang 35-anyos nga si Jerry kay Lana, nga iloy sang isa ka dalagita, nagtuga sing problema nga wala gid nila mahunahuna. Si Jerry nagapaathag: “Nahibaluan ko nga agod mangin isa ka maayo nga ulo, dapat ko iaplikar ang mga prinsipio sa Biblia nga nangin madinalag-on sa iban nga mga pamilya. Apang natukiban ko gilayon nga dapat ko ini iaplikar nga may labi pa nga kaalam kag paghantop.” Gintamod sia sang iya manak subong isa nga nagapabulag sa ila nga mag-iloy kag malain gid ang buot sa iya. Kinahanglan ni Jerry ang paghantop agod mahangpan nga ini nga panimuot nagaapektar sa ginasiling kag ginahimo sang bata. Paano niya gin-atubang ang kahimtangan? Si Jerry nagsabat: “Nag-ugyon kami ni Lana nga sa karon, si Lana amo ang magahimo sang katungdanan sa pagdisiplina samtang ginatukod ko ang maayo nga kaangtanan sa akon manak. Sang ulihi, ini nga paagi nagresulta sa maayo.”

15 Kon nagaatubang sing mabudlay nga mga kahimtangan sa puluy-an, kinahanglan naton ang paghantop agod mahibaluan kon ngaa amo sini ang ginahambal kag ginahulag sang mga katapo sang pamilya. Kinahanglan man naton ang kaalam agod maaplikar sing nagakaigo ang mga prinsipio sang Dios. Halimbawa, nahantop sing maathag ni Jesus kon ngaa gintandog sia sang babayi nga ginatagasan sing dugo, kag ginbulong niya sia sing maalamon kag mainawaon. (Levitico 15:25-27; Marcos 5:30-34) Ang kaalam kag paghantop mga kinaiya sang aton Lider. (Hulubaton 8:12) Malipayon kita kon maggawi kita kaangay niya.

‘Padayon nga Pangitaa Anay ang Ginharian’

16. Ano dapat ang pinakaimportante gid sa aton kabuhi, kag paano ini ginpakita ni Jesus paagi sa iya halimbawa?

16 Gin-athag ni Jesus kon ano dapat ang pinakaimportante gid sa kabuhi sang mga nagabaton  sang iya pagpanguna. Nagsiling sia: “Padayon, nian, nga pangitaa anay ang ginharian kag ang iya [sang Dios] pagkamatarong.” (Mateo 6:33) Kag paagi sa iya halimbawa, ginpakita niya sa aton kon paano ini himuon. Pagkatapos sang 40-ka-adlaw nga pagpuasa, pagpamalandong, kag pagpangamuyo sa tapos sang iya pagpabawtismo, si Jesus ginsulay. Gintan-ay sa iya ni Satanas nga Yawa ang “tanan nga ginharian sa kalibutan.” Handurawa ang nangin kabuhi kuntani ni Jesus kon ginbaton niya ang gintan-ay sang Yawa! Apang, si Cristo nagkonsentrar sa paghimo sa kabubut-on sang iya Amay. Nahibaluan man niya nga ini nga kabuhi sa kalibutan ni Satanas indi magdugay. Gilayon niya nga ginpangindian ang gintan-ay sang Yawa, nga nagasiling: “Nasulat na, ‘Si Jehova nga imo Dios ang simbahon mo, kag sa iya lamang ikaw maghimo sing sagrado nga pag-alagad.’ ” Wala madugay pagkatapos sadto, si Jesus ‘nagsugod sa pagbantala kag sa pagsiling: “Maghinulsol kamo, kay ang ginharian sang mga langit malapit na.” ’ (Mateo 4:⁠2; 8-10, 17) Sa nabilin nga bahin sang iya kabuhi sa duta, si Cristo bug-os tion nga nagwali sang Ginharian sang Dios.

17. Paano naton mapakita nga ginauna naton sa kabuhi ang mga intereses sang Ginharian?

17 Dapat naton ilugon ang aton Lider kag indi kita magpasulay sa kalibutan ni Satanas nga tamdon ang mataas-sing-sweldo nga trabaho kag karera subong ang panguna nga tulumuron sa kabuhi. (Marcos 1:17-21) Daw ano ka binuang para sa aton nga masiod sa kalibutanon nga mga paghimud-os amo nga ang mga intereses sang Ginharian mangin ikaduha na lamang! Gintugyan ni Jesus sa aton ang hilikuton nga pagbantala sing Ginharian kag paghimo sing disipulo. (Mateo 24:14; 28:​19, 20) Huo, mahimo may pamilya kita ukon iban pa nga mga responsabilidad nga atipanon, apang wala bala kita malipay nga ginagamit naton ang mga gab-i kag mga talipuspusan sang semana sa pagtuman sa aton Cristianong responsabilidad nga magbantala kag magtudlo? Kag daw ano ka makapalig-on nga sang 2001 nga tuig sang pag-alagad, mga 780,000 ang nag-alagad subong bug-os tion nga mga ministro, ukon mga payunir!

18. Ano ang nagabulig sa aton nga makasapo sing kalipay sa ministeryo?

18 Ang rekord sang mga Ebanghelyo nagalaragway kay Jesus subong isa nga nagapanghikot kag isa nga may malum-ok nga balatyagon. Sang makita ang espirituwal nga mga kinahanglanon sang mga tawo sa palibot niya, nagbatyag sia sing kaluoy sa ila kag malangkagon nga nagbulig sa ila. (Marcos 6:31-34) Ang aton ministeryo mangin makalilipay kon makigbahin kita sa sini bangod sang aton gugma sa iban kag sang aton sinsero nga handum nga buligan sila. Apang paano naton matigayon ini nga handum? “Sang tin-edyer ako,” siling sang isa ka pamatan-on nga si Jayson, “indi ko gusto nga mag-alagad sa latagon.” Ano ang nagbulig sa iya nga mapalambo ang kaluyag  sa sining hilikuton? Si Jayson nagsabat: “Sa akon pamilya, ang Sabado sang aga pirme ginahinguyang sa pag-alagad sa latagon. Maayo ini para sa akon bangod sa labi ko nga pagguwa sa ministeryo, labi ko nga nakita ang maayo nga resulta sini kag labi ko nga naluyagan ini.” Dapat man kita pirme kag makugi nga makigbahin sa ministeryo.

19. Ano dapat ang mangin determinasyon naton bahin sa pagpanguna ni Cristo?

19 Makapaumpaw kag makapaladya gid nga batunon ang pagpanguna ni Cristo. Kon himuon naton ini, ang pagkapamatan-on mangin isa ka tion sa pag-uswag sa ihibalo kag kaalam. Ang pamilya mangin isa ka ginhalinan sang paghidait kag kalipay, kag ang ministeryo isa ka hilikuton nga nagahatag sing kalipay kag kaayawan. Nian, mangin determinado gid kita nga ipakita sa aton adlaw-adlaw nga kabuhi kag sa aton mga desisyon nga ang pagpanguna ni Cristo matuod gid sa aton. (Colosas 3:​23, 24) Apang, si Jesucristo nag-aman sing pagpanguna sa isa pa ka paagi​—⁠sa Cristianong kongregasyon. Binagbinagon sang masunod nga artikulo kon paano kita makabenepisyo sa sining kahimusan.

[Nota]

^ par. 7 Ang iban nga mga ngalan gin-islan.

Madumduman Mo Bala?

• Paano kita makabenepisyo sa pagsunod sa aton gintangdo-sang-Dios nga Lider?

• Paano mapakita sang mga pamatan-on nga luyag nila sundon ang pagpanguna ni Jesus?

• Ano ang epekto sang pagpanguna ni Cristo sa pamilya sang mga nagapasakop sa sini?

• Paano mapakita sang aton ministeryo nga ang pagpanguna ni Cristo matuod gid sa aton?

[Mga Pamangkot sa Pagtinuon]

[Mga retrato sa pahina 9]

Ang pagkapamatan-on isa ka maayo nga tion sa pagkuha sing ihibalo tuhoy sa Dios kag sa iya gintangdo nga Lider

[Retrato sa pahina 10]

Ang pagpasakop sa pagpanguna ni Cristo nagapauswag sing kalipay sa pamilya

[Retrato sa pahina 12]

Ginpangita una ni Jesus ang Ginharian. Ikaw bala?