Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Husto bala nga magsiling nga ang kaluoy ni Jehova nagapahaganhagan sang iya katarungan?

Bisan pa gingamit ini nga ekspresyon, labing maayo nga likawan ini kay daw nagapahangop ini nga ang kaluoy ni Jehova nagapamag-an ukon nagapugong sang iya katarungan, nga daw subong bala nga ang iya kaluoy mas labaw pa sa matigdas nga kinaiya sang katarungan. Indi ini husto.

Ang Hebreong tinaga para sa “katarungan” mahimo man magkahulugan sing “paghukom.” Ang katarungan suod nga naangot sa pagkamatarong. Apang, ang katarungan masunson may legal nga ginapahangop samtang ang pagkamatarong wala. Matuod nga ang katarungan ni Jehova nagadalahig sa pagpadapat sing takus nga silot, apang mahimo man ini nagadalahig sa paghatag sing kaluwasan sa mga takus sini. (Genesis 18:20-​32; Isaias 56:1; Malaquias 4:2) Busa, ang katarungan ni Jehova indi dapat tamdon nga matigdas ukon nagakinahanglan nga pamag-anon.

Ang Hebreong tinaga para sa “kaluoy” mahimo magpatuhoy sa pagpakita sang pagpugong sa pagpadapat sing paghukom. Mahimo man ini magpatuhoy sa pagpakita sing kaawa, nga nagahatag sing paumpaw sa mga kubos.​—Deuteronomio 10:18; Lucas 10:29-​37.

Si Jehova isa ka Dios sang katarungan kag sang kaluoy. (Exodo 34:​6, 7; Deuteronomio 32:4; Salmo 145:9) Ang iya katarungan kag ang iya kaluoy lunsay himpit, kag nagapanghikot nga nagahisantuanay. (Salmo 116:5; Oseas 2:​19) Ang duha ka kinaiya himpit nga nagabalanse ukon nagabuligay sa isa kag isa. Busa, kon magsiling kita nga ang kaluoy ni Jehova nagapahaganhagan sang iya katarungan, dapat man naton isiling nga ang iya katarungan nagapahaganhagan sang iya kaluoy.

Si Isaias nagtagna: “Si Jehova padayon nga magahulat sa pagpakita sing kahamuot sa inyo, kag gani magatindog sia agod pakitaan kamo sing kaluoy. Kay si Jehova Dios sang paghukom [“katarungan,” The New English Bible].” (Isaias 30:18) Ginapakita diri ni Isaias nga ang katarungan ni Jehova nagaresulta sa mga buhat sang kaluoy sa baylo nga ang iya kaluoy nagapamag-an ukon nagapugong sang iya katarungan. Ginapakita ni Jehova ang kaluoy bangod matarong sia kag bangod mahigugmaon man sia.

Matuod, ang manunulat sang Biblia nga si Santiago nagsulat: “Ang kaluoy nagadaug sing madinalag-on sa paghukom.” (Santiago 2:​13b) Apang, sa konteksto indi si Jehova ang ginapatuhuyan ni Santiago kundi ang mga Cristiano nga nagapakita sing kaluoy​—halimbawa, sa mga ginapigos kag imol. (Santiago 1:27; 2:​1-9) Kon ining mga maluluy-on hukman, talupangdon ni Jehova ang ila paggawi kag maluluy-on nga patawaron sila pasad sa halad sang iya Anak. Sa amo, ang ila maluluy-on nga paggawi nagadaug sa bisan ano nga paghukom batok sa ila.​—Hulubaton 14:21; Mateo 5:7; 6:​12; 7:2.

Busa, indi husto ang magsiling nga ang paghukom ni Jehova ginapahaganhagan sang iya kaluoy sa kahulugan nga ang iya katarungan dapat pamag-anon sang kaluoy. Para kay Jehova ining duha ka kinaiya himpit ang pagkatimbang. Nagabalansehanay sila samtang ginabalanse man sila sang iban pa nga mga kinaiya ni Jehova, subong sang gugma kag kaalam.