Magdiretso sa kaundan

Magdiretso sa listahan sang kaundan

Daw Ano Ka Hamili ang Kamatuoran sa Imo?

Daw Ano Ka Hamili ang Kamatuoran sa Imo?

 Daw Ano ka Hamili ang Kamatuoran sa Imo?

“Mahibaluan ninyo ang kamatuoran, kag ang kamatuoran magahilway sa inyo.”—JUAN 8:32.

1. Paano ang paggamit ni Pilato sang tinaga nga “kamatuoran” tuhay sa paggamit sini ni Jesus?

“ANO ang kamatuoran?” Sang ginpamangkot ini ni Pilato, daw interesado lamang sia sa kamatuoran sa pangkabilugan. Si Jesus, sa pihak nga bahin, bag-o lang nagsiling: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37, 38) Indi kaangay ni Pilato, ginapatuhuyan ni Jesus ang kamatuoran gikan sa Dios.

Ang Panimuot sang Kalibutan sa Kamatuoran

2. Anong pinamulong ni Jesus ang nagapakita sang balor sang kamatuoran?

2 Si Pablo nagsiling: “Indi tanan nga tawo may pagtuo.” (2 Tesalonica 3:2) Amo man ang masiling sa kamatuoran. Bisan kon hatagan sing kahigayunan nga mahibaluan ang kamatuoran pasad sa Biblia, madamo nga tawo ang hungod nga wala  nagasapak sini. Apang, hamili gid ini! Si Jesus nagsiling: “Mahibaluan ninyo ang kamatuoran, kag ang kamatuoran magahilway sa inyo.”—Juan 8:32.

3. Ano nga paandam tuhoy sa malimbungon nga mga panudlo ang dapat pamatian naton?

3 Si apostol Pablo nagsiling nga ang kamatuoran indi masapwan sa mga pilosopiya kag mga tradisyon sang tawo. (Colosas 2:8) Sa pagkamatuod, ini nga mga panudlo malimbungon. Ginpaandaman ni Pablo ang mga Cristiano sa Efeso nga kon magtuo sila sa sini, mangin kaangay sila sa mga lapsag sa espirituwal “nga ginabolabola sang mga balod . . . sang tagsa ka hangin sang panudlo paagi sa pagdaya sang mga tawo, paagi sa pagkamalalangon sa pagpadihot sing sayop.” (Efeso 4:14) Sa karon, ang “pagdaya sang mga tawo” ginatib-ong sang propaganda sang mga nagapamatok sa kamatuoran gikan sa Dios. Ang “propaganda” ginhatagan sing kahulugan sang The New Encyclopædia Britannica subong “ang sistematiko nga panikasog sa pagmaniobra sa mga pagtuluuhan, panimuot, ukon buhat sang iban nga mga tawo.” Malalangon nga ginapatiko sini nga propaganda ang kamatuoran nga mangin kabutigan kag ginasakdag ang kabutigan subong kamatuoran. Agod masapwan ang kamatuoran walay sapayan sining malalangon nga mga pag-ipit, dapat maukod nga usisaon naton ang Kasulatan.

Ang mga Cristiano kag ang Kalibutan

4. Sin-o ang mahimo makatigayon sing kamatuoran, kag ano ang salabton sang mga nagabaton sini?

4 Ginapatuhuyan ang mga nangin disipulo niya, si Jesucristo nangamuyo kay Jehova: “Pakabalaana sila paagi sa kamatuoran; ang imo pulong kamatuoran.” (Juan 17:17) Ini sila pakabalaanon, ukon painon, sa katuyuan nga alagaron si Jehova kag ipakilala ang iya ngalan kag ibantala ang iya Ginharian. (Mateo 6:9, 10; 24:14) Bisan pa indi tanan nga tawo may yara sini, ang kamatuoran gikan kay Jehova matigayon sang tanan nga nagapangita sini subong wala bayad nga dulot, ano man ang ila nasyonalidad, rasa, ukon kultura. Si apostol Pedro nagsiling: “Nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”—Binuhatan 10:34, 35.

5. Ngaa masami nga ginahingabot ang mga Cristiano?

5 Ginapaambit sang mga Cristiano ang kamatuoran sang Biblia sa iban apang wala ini ginabaton sa tanan nga duog. Si Jesus nagpaandam: “Itugyan kamo sang mga tawo sa kapipit-an kag pamatyon kamo, kag mangin sentro kamo sang pagdumot sang tanan nga pungsod tungod sa akon ngalan.” (Mateo 24:9) Nagakomento sa sining bersikulo, ang taga-Ireland nga klerigo nga si John R. Cotter nagsulat sang 1817: “Sa baylo nga ang mga tawo magpasalamat sa mga panikasog [sang mga Cristiano] nga repormahon ang kabuhi sang katawhan paagi sa ila pagbantala, dumtan kag hingabuton nila ang mga disipulo bangod sang pagbuyagyag sang ila kalautan.” Ini nga mga manughingabot wala ‘magbaton sang gugma sa kamatuoran agod maluwas sila.’ Bangod sini, “ginatugutan sang Dios nga manghikot ang kasaypanan sa ila, agod nga magpati sila sa kabutigan, agod nga sila tanan mahukman bangod wala sila magpati sa kamatuoran kundi nahamuot sa pagkadimatarong.”—2 Tesalonica 2:10-12.

6. Ano nga mga kailigbon ang indi dapat palambuon sang Cristiano?

6 Ginalaygayan ni apostol Juan ang mga Cristiano nga nagakabuhi sa sining di-mainabyanon nga kalibutan: “Indi ninyo paghigugmaa ang kalibutan ukon ang mga butang sa kalibutan. . . . Ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa—wala maghalin sa Amay, kundi naghalin sa kalibutan.” (1 Juan 2:15, 16) Sa pagsiling nga “tanan nga butang,” wala sing ginpwera si Juan. Bangod sini indi naton dapat palambuon ang pagkaibog sa bisan anong butang nga mahatag sining kalibutan nga magapahilayo sa aton sa kamatuoran. Ang pagpamati sa laygay ni Juan may daku gid nga epekto sa aton kabuhi. Paano?

7. Paano ang ihibalo sa kamatuoran nagapahulag sa mga matarong sing tagipusuon?

7 Sang tuig 2001, ang mga Saksi ni Jehova sa bug-os kalibutan nagdumala kada bulan sing kapin sa apat ka milyon kag tunga ka pagtuon sa Biblia sa puluy-an, nagatudlo sa mga indibiduwal kag mga grupo sang mga ginapatuman sang Dios para sa kabuhi. Subong resulta, 263,431 ka tawo ang ginbawtismuhan. Ang kapawa sang kamatuoran nangin hamili sa sining bag-o nga mga disipulo, kag ginsikway nila ang malain nga mga pagpakig-upod kag ang imoral, nagapakahuya-sa-Dios nga mga dalanon nga lapnag sa sining kalibutan. Sugod sang ginbawtismuhan, padayon sila nga nagakabuhi  suno sa mga talaksan nga ginpahamtang ni Jehova para sa tanan nga Cristiano. (Efeso 5:5) Subong bala sini ka hamili ang kamatuoran sa imo?

Si Jehova Nagaulikid sa Aton

8. Paano si Jehova nagahulag sa aton dedikasyon, kag ngaa maalamon nga ‘pangitaon anay ang ginharian’?

8 Walay sapayan sang aton pagkadihimpit, mainayuhon nga ginabaton ni Jehova ang aton dedikasyon, nagaduko, kon sa aton pa, agod buyukon kita sa iya. Sa amo, ginatudluan niya kita sa pagbayaw sang aton mga tulumuron kag mga handum. (Salmo 113:6-8) Sa amo man nga tion, ginatugutan kita ni Jehova nga matigayon ang personal nga kaangtanan sa iya, kag nagasaad sia nga atipanon niya kita kon ‘padayon naton nga ginapangita anay ang ginharian kag ang iya pagkamatarong.’ Kon ginahimo naton ini kag ginaamligan ang aton kaugalingon sa espirituwal nga paagi, sia nagasaad: “Ining tanan iban pa nga mga butang idugang sa inyo.”—Mateo 6:33.

9. Sin-o “ang matutom kag mainandamon nga ulipon,” kag nagagamit sini nga “ulipon,” paano si Jehova nagaulikid sa aton?

9 Ginpili ni Jesucristo ang iya 12 ka apostoles kag ginpasad ang pundasyon para sa kongregasyon sang hinaplas nga mga Cristiano nga gintawag ang “Israel sang Dios.” (Galacia 6:16; Bugna 21:9, 14) Ginlaragway ini sang ulihi subong “ang kongregasyon sang buhi nga Dios, isa ka haligi kag pamakod sang kamatuoran.” (1 Timoteo 3:15) Ginpakilala ni Jesus ang mga katapo sang amo nga kongregasyon subong “ang matutom kag mainandamon nga ulipon” kag subong “ang matutom nga tulugyanan, ang isa nga mainandamon.” Ining matutom nga alagad, siling ni Jesus, amo ang may salabton sa paghatag sa mga Cristiano ‘sang ila pagkaon sa nagakaigo nga tion.’ (Mateo 24:​3, 45-​47; Lucas 12:​42) Kon wala sing pagkaon mapatay kita sa gutom. Sa amo man nga paagi, kon indi kita magkaon sing espirituwal nga pagkaon, magaluya kita kag mapatay sa espirituwal. Busa, ang pagluntad sang “matutom kag mainandamon nga ulipon” isa pa ka pamatuod nga si Jehova nagaulikid sa aton. Kabay nga apresyahon gid naton ang hamili nga espirituwal nga pagkaon nga ginahatag sa aton paagi sa sini nga “ulipon.”—Mateo 5:3.

10. Ngaa importante nga magtambong kita sing regular sa mga miting?

10 Ang espirituwal nga pagkaon nagalakip sang  personal nga pagtuon. Nagalakip man ini sang pagpakig-upod sa iban nga mga Cristiano kag sang pagtambong sa mga miting sang kongregasyon. Madumduman mo bala sing eksakto kon ano ang imo ginkaon sang nagligad nga anom ka bulan, ukon bisan sang nagligad lamang nga anom ka semana? Ayhan indi na. Apang, ano man ang imo ginkaon naghatag ini sing sustansia nga kinahanglan mo agod mabuhi ka. Kag mahimo nga nagkaon ka sing amo gihapon nga pagkaon kutob sadto. Amo man sa espirituwal nga pagkaon nga ginaaman sa aton Cristianong mga miting. Ayhan indi naton madumduman ang tanan nga detalye sang nabatian naton sa mga miting. Kag mahimo nga madamong beses nga ginhatag ang amo gihapon nga impormasyon. Walay sapayan sini, espirituwal ini nga pagkaon, nga importante sa aton kaayuhan. Ang aton mga miting pirme nagahatag sing espirituwal nga sustansia, nga ginahatag sa nagakaigo nga tion.

11. Ano ang aton mga salabton kon nagatambong sa Cristianong mga miting?

11 Ang pagtambong sa Cristianong mga miting nagahatag man sing salabton sa aton. Ang mga Cristiano ginalaygayan nga ‘magpalig-unay sa isa kag isa,’ nagapukaw sa mga katapo sang kongregasyon sa “gugma kag sa maayong mga buhat.” Ang aton paghanda, pagtambong, kag pagpakigbahin sa tanan nga Cristianong miting nagapabakod sang aton pagtuo kag nagapalig-on sa iban. (Hebreo 10:23-25) Subong sang magagmay nga kabataan nga pislian sa pagkaon, ang iban mahimo nagakinahanglan sing dalayon nga pagpalig-on agod magkaon sa espirituwal. (Efeso 4:13) Mahigugmaon nga ihatag ini nga pagpalig-on kon kinahanglanon agod nga magtubo sila nga hamtong nga mga Cristiano, nga tuhoy sa ila si apostol Pablo nagsulat: “Ang pagkaon nga matig-a para sa hamtong nga mga tawo, sa ila nga paagi sa paggamit nahanas ang ila mga ikasarang sa paghantop nga makilala ang husto kag sayop.”—Hebreo 5:14.

Pag-atipan sa Aton Kaugalingon sa Espirituwal

12. Sin-o ang may panguna nga salabton sa aton pagpabilin sa kamatuoran? Ipaathag.

12 Ang aton tiayon ukon ang aton mga ginikanan sarang makapalig-on sa aton sa dalanon sang kamatuoran. Subong man, ang mga gulang sa kongregasyon sarang makabantay sa aton subong bahin sang panong nga ila ginaatipan. (Binuhatan 20:28) Apang sin-o ang may panguna nga salabton agod makapadayon kita sa aton dalanon sang kabuhi nga napasad sa kamatuoran? Salabton gid ini sang tagsatagsa sa aton. Kag salabton naton ini maayo man ukon mabudlay ang mga kahimtangan. Binagbinaga ang masunod nga mga hitabo.

13, 14. Subong gin-ilustrar sa isa ka eksperiensia may kaangtanan sa tinday nga karnero, paano kita makakuha sing kinahanglanon nga espirituwal nga bulig?

13 Sa Scotland ang pila ka tinday nga mga karnero nagahalab sing hilamon sang ang isa sa ila nakalab-ot sa higad sang bungyod kag nahulog sa alipukpukan sang isa ka bato sa ubos. Wala ini maano, apang hinadlukan ini kag indi na makasaka pabalik. Gani nag-ima ini sing masinulub-on. Nabatian ini sang iya inang, kag gani nag-ima man ini tubtob nga nag-abot ang manugbantay kag ginkuha ang tinday nga karnero.

14 Talupangda ang pagpasunod sang mga hitabo. Ang tinday nga karnero nag-ima sa pagpangayo sing bulig, kag ang inang nag-ima man, kag ang alisto nga manugbantay insigida nga naghulag agod luwason ini. Kon ang tinday pa nga sapat kag ang inang sini makamutik sang katalagman kag insigida nga nangayo sing bulig, indi bala nga dapat man kita mangayo sing bulig kon masandad kita sa espirituwal ukon makaatubang sang wala ginapaabot nga mga katalagman gikan sa kalibutan ni Satanas? (Santiago 5:14, 15; 1 Pedro 5:8) Dapat gid, ilabi na kon kulang kita sing eksperiensia bangod lamharon pa kita ukon bangod bag-uhan pa lang kita sa kamatuoran.

Ang Pagsunod sa Panuytoy sang Dios Nagahatag sing Kalipay

15. Ano ang nabatyagan sang isa ka babayi sang nagsugod sia sa pagpakig-upod sa Cristianong kongregasyon?

15 Binagbinaga ang balor sang paghangop sa Biblia kag ang kalinong sa hunahuna nga ginahatag sini sa mga nagaalagad sa Dios sang kamatuoran. Ang isa ka 70-anyos nga babayi nga nagasimba sa Church of England sa iya bug-os nga kabuhi nagpasugot nga magtuon sa Biblia upod sa isa sang mga Saksi ni Jehova. Wala magdugay natun-an niya nga ang ngalan sang Dios amo si Jehova kag nagbuylog sa pagsiling sing “Amen” sa tinagipusuon nga pangpubliko nga mga pangamuyo sa lokal nga Kingdom Hall. Puno gid sing balatyagon nga nagsiling sia: “Sa baylo nga ilaragway ang  Dios subong indi mapalapitan sang mga tawo lamang, daw gindala ninyo sia sa tunga naton mismo kaangay sang isa ka pinalangga nga abyan. Karon ko pa lang ini maeksperiensiahan.” Mahimo nga indi gid malipatan sining pinalangga nga interesado nga babayi ang una nga epekto sang kamatuoran sa iya. Kabay nga kita man, indi gid malipat kon daw ano ka hamili sa aton ang kamatuoran sang una nga nabaton naton ini.

16. (a) Ano ang mahimo matabo kon ang pagganar sing kuwarta amo ang aton panguna nga tulumuron? (b) Paano naton matigayon ang matuod nga kalipay?

16 Madamo ang nagapati nga kon madamo sila sing kuwarta, mangin mas malipayon sila. Apang, kon ang pagganar sing kuwarta amo ang aton panguna nga tulumuron sa kabuhi, mahimo kita mag-antos sing “daku gid nga kasakit sa hunahuna.” (1 Timoteo 6:​10, Phillips) Binagbinaga kon daw ano ka damo ang nagabakal sing mga tiket sa loterya, nagagasto sing kuwarta sa mga sugalan, ukon nagapasimpalad sa stock market, nagadalamguhanon nga makamanggad sila. Diutay lang gid ang nakamanggad subong ginalauman nila. Kag masami nga natukiban pa gani sang mga nakatigayon sini nga ang ila hinali nga manggad wala nagahatag sing kalipay. Sa baylo, ang dayon nga kalipay nagagikan sa paghimo sa kabubut-on ni Jehova, sa pagpanghikot upod sa Cristianong kongregasyon nga may pagtuytoy sang balaan nga espiritu ni Jehova kag bulig sang iya mga anghel. (Salmo 1:​1-3; 84:​4, 5; 89:15) Kon himuon naton ini, mahimo nga maagom naton ang wala ginapaabot nga mga pagpakamaayo. Hamili gid bala ang kamatuoran sa imo agod magdala sining mga pagpakamaayo sa imo kabuhi?

17. Ano ang ginapakita sang pagdayon ni Pedro upod kay Simon, nga isa ka manugpanit, tuhoy sa panimuot sang apostol?

17 Binagbinaga ang eksperiensia ni apostol Pedro. Sang tuig 36 C.E., naglakbay sia subong misyonero sa Patag sang Saron. Naghapit sia sa Lida, diin gin-ayo niya ang paralisado nga si Eneas kag dayon nagpadulong sa pantalan sang Joppe. Ginbanhaw niya didto si Dorcas. Ang Binuhatan 9:​43 nagasugid sa aton: “Sa sulod sang madamo nga adlaw nagpabilin sia sa Joppe upod sa isa nga si Simon, nga manugpanit.” Ining malip-ot nga paghinambit nagapakita sang pagkawalay pinasulabi ni Pedro samtang nag-alagad sia sa mga tawo sa amo nga siudad. Paano? Ang iskolar sa Biblia nga si Frederic W. Farrar nagsulat: “Sa balay sang isa ka manugpanit wala sing estrikto kag makugi nga sumulunod sang Oral [Mosaiko] nga Kasuguan ang mabuyok sa pagdayon. Ang adlaw-adlaw nga pagkuti sa mga panit kag mga bangkay sang nanuhaytuhay nga mga sapat nga kinahanglan sa sining palamugnan, kag ang mga materyales nga kinahanglan sa sini, nagahimo sini nga di-putli kag makangilil-ad sa mga mata sang mga estrikto sa kasuguan.” Bisan pa ang “balay [ni Simon] sa higad sang dagat” malayo sa iya ulubrahan, si Simon may ‘palamugnan nga ginakabig nga makangilil-ad kag sa amo nagapanubo sang pagtahod-sa-kaugalingon sang tanan nga nagahimo sini,’ siling ni Farrar.—Binuhatan 10:6.

18, 19. (a) Ngaa naligban si Pedro sa palanan-awon nga nabaton niya? (b) Anong wala ginapaabot nga pagpakamaayo ang nabaton ni Pedro?

18 Ang walay pinasulabi nga si Pedro gin-abiabi ni Simon, kag nakabaton didto si Pedro sing wala ginapaabot nga panuytoy gikan sa Dios. Nakakita sia sing palanan-awon nga sa sini ginsugo sia nga kaunon ang mga butang nga di-matinlo suno sa Judiyong kasuguan. Namalibad si Pedro nga wala pa gid sia ‘makakaon sing bisan anong butang nga nadagtaan kag di-matinlo.’ Apang makatlo nga ginsilingan sia: “Indi na pagtawga nga nadagtaan ang mga butang nga gintinluan sang Dios.” Halangpunon nga ‘si Pedro naligban gid kon ano ang kahulugan sang palanan-awon nga nakita niya.’​—Binuhatan 10:​5-​17; 11:​7-​10.

19 Wala makahibalo si Pedro nga sang adlaw antes sini sa Cesarea, nga 50 kilometros ang kalayuon, isa ka Gentil nga si Cornelio ang may yara man palanan-awon. Ginsugo sang anghel ni Jehova si Cornelio nga magpadala sing mga alagad  agod kadtuan si Pedro sa balay ni Simon nga manugpanit. Ginpadala ni Cornelio ang iya mga alagad sa balay ni Simon, kag nag-upod si Pedro sa ila pabalik sa Cesarea. Ginbantalaan niya didto si Cornelio kag ang iya mga paryente kag mga abyan. Bilang resulta, sila ang una nga di-sirkunsidado nga Gentil nga mga tumuluo nga nakabaton sing balaan nga espiritu subong mga manunubli sang Ginharian. Bisan pa ang mga lalaki di-sirkunsidado, ang tanan nga namati sa pinamulong ni Pedro ginbawtismuhan. Nagbukas ini sing dalan para sa mga tawo sang mga pungsod, nga ginkabig nga di-matinlo gikan sa Judiyong pagtamod, nga mangin mga katapo sang Cristianong kongregasyon. (Binuhatan 10:​1-​48; 11:18) Daw ano ka tumalagsahon nga pribilehiyo para kay Pedro—ang tanan bangod ang kamatuoran hamili sa iya kag nagtiklod sa iya nga pamatian ang panuytoy ni Jehova kag nanghikot nga may pagtuo!

20. Ano nga bulig gikan sa Dios ang ginahatag sa aton kon ginauna naton ang kamatuoran sa aton kabuhi?

20 Si Pablo nagalaygay: “Sa paghambal sing kamatuoran, paagi sa gugma magtubo kita sa tanan nga butang padulong sa iya nga amo ang ulo, si Cristo.” (Efeso 4:15) Huo, ang kamatuoran magahatag sa aton sing di-matupungan nga kalipay karon kon unahon naton ini sa aton kabuhi kag tugutan si Jehova paagi sa iya balaan nga espiritu sa pagtuytoy sa aton mga tikang. Dumduma man ang suporta sang balaan nga mga anghel sa aton pag-ebanghelyo nga hilikuton. (Bugna 14:​6, 7; 22:⁠6) Pribilehiyo gid naton nga matigayon ini nga suporta sa hilikuton nga ginasugo sa aton ni Jehova nga himuon! Ang paghupot sing integridad magadul-ong sa aton sa pagdayaw kay Jehova, ang Dios sang kamatuoran, tubtob sa walay katubtuban. May butang pa bala nga mas hamili sa sini?—Juan 17:3.

Ano ang Aton Natun-an?

• Ngaa madamo ang wala nagabaton sa kamatuoran?

• Paano dapat tamdon sang mga Cristiano ang mga butang sa kalibutan ni Satanas?

• Ano dapat ang mangin panimuot naton sa mga miting, kag ngaa?

• Ano ang aton salabton sa pag-atipan sa aton kaugalingon sa espirituwal?

[Mga Pamangkot sa Pagtinuon]

[Mapa/Retrato sa pahina 18]

(Para sa aktual nga pormat, tan-awa ang publikasyon)

GREAT SEA

Caesarea

PLAIN OF SHARON

Joppa

Lydda

Jerusalem

[Retrato]

Ginsunod ni Pedro ang panuytoy sang Dios kag nag-ani sia sing wala ginapaabot nga mga pagpakamaayo

[Credit Line]

Map: Mountain High Maps® Copyright © 1997 Digital Wisdom, Inc.

[Retrato sa pahina 13]

Si Jesus nagpanaksi sa kamatuoran

[Retrato sa pahina 15]

Kaangay sa pisikal nga pagkaon, ang espirituwal nga pagkaon importante sa aton kaayuhan