Magdiretso sa kaundan

Magdiretso sa listahan sang kaundan

Ang Handa nga Espiritu Nagadala sa mga Tawo sa Gilead

Ang Handa nga Espiritu Nagadala sa mga Tawo sa Gilead

 Ang Handa nga Espiritu Nagadala sa mga Tawo sa Gilead

ANG Watchtower Bible School of Gilead nagahanas sa dedikado nga mga lalaki kag mga babayi para sa hilikuton nga pagmisyonero sa iban nga pungsod. Sin-o ang nagakabagay nga mag-eskwela sa Gilead? Yadtong may handa nga espiritu. (Salmo 110:3) Napamatud-an gid ini sang Septiembre 8, 2001, sang naggradwar ang ika-111 nga klase.

Ang pila ka estudyante sa sini nga klase kinabubut-on na nga nagbiya sang pamilya, mga abyan, kag tumandok nga pungsod agod mag-alagad kon diin mas daku ang kinahanglanon. Sa paghimo sini, gintilawan nila ang ila kaugalingon kon bala makahimo sila sing mga pagbag-o agod magkabuhi sa tuhay nga kahimtangan. Halimbawa, ginhanda nanday Richer kag Nathalie ang ila kabuhi agod magsaylo sa Bolivia, sanday Todd kag Michelle sa Dominican Republic, kag sanday David kag Monique sa isa ka pungsod sa Asia sa pagpalapnag sing maayong balita sang Ginharian sang Dios. Ang iban nga mga estudyante nag-alagad na sa Nicaragua, Ecuador, kag Albania.

Ginpalig-on si Christy nga magtuon sing Espanyol sa hayskul, sa amo naghanda ini sa iya sa paghinguyang sang duha ka tuig sa Ecuador antes namana. Ang iban nakig-upod sa dumuluong-sing-lenguahe nga mga kongregasyon sa ila tumandok nga mga pungsod. Sa pag-atubang sa nagkalainlain nga mga hangkat, ginpakita nanday Saul kag Priscilla ang handa nga espiritu paagi sa pagpanikasog sing lakas nga mapauswag ang ila paghambal sing Ingles antes sila mag-eskwela.

Madasig nga nagligad ang 20 ka semana sang paghanas para sa pagmisyonero. Nag-abot ang adlaw sang gradwasyon, kag ang mga estudyante kaupod sa ila mga abyan kag pamilya, nagpamati sa maalamon nga mga laygay kag nagapaalam nga mga pulong sang pagpalig-on.

Ang tsirman sang programa amo si Theodore Jaracz, isa ka gradwado sang ikapito nga klase sang Gilead School, nga nagaalagad na karon subong isa ka miembro sang Nagadumala nga Hubon sang mga Saksi ni Jehova. Ang iya nagabukas nga pamulongpulong nagapadaku sang katunayan nga subong isa ka organisasyon, wala naton malipatan ang tulumuron sang paghanas sa mga estudyante sa Gilead, nga amo ang pagbantala sing maayong balita sang Ginharian sa bug-os napuy-an nga duta. (Marcos 13:10) Ginsangkapan sang Gilead ang kalipikado nga mga estudyante sa paghimo sining pagbantala nga hilikuton sa mas daku nga kasangkaron sangsa ginhimo nila anay kag sa mga duog sa kalibutan diin kinahanglan gid ang nahanas nga mga misyonero. Ginlaygayan ni Utod Jaracz ang mga estudyante nga himuslan ang paghanas sa ila sa Gilead samtang ginabuylugan nila karon ang mga misyonero nga nagaalagad sa 19 ka pungsod nga padalhan sa mga gradwado.

Sibu-sa-Tion nga Laygay Para sa mga Manuggradwar

Nagsunod ang serye sang mga pamulongpulong. Si William Van De Wall, nga miembro sang Komite sang Sanga sa Estados Unidos, nagpamulongpulong sa topiko nga “Kakugi sa Pagmisyonero​​—⁠Isa ka Tanda Sang Matuod nga mga Cristiano.” Ginpatalupangod niya ang sugo nga “maghimo sing mga disipulo,” nga ginrekord sa Mateo 28:​19, 20, kag ginpalig-on niya ang mga estudyante: “Iluga ninyo si Jesus, nga naghimo sang iya misyonero nga hilikuton upod ang kakugi kag kapagsik.” Agod buligan ang palaabuton nga mga misyonero nga huptan ang ila kakugi sa hilikuton nga pagmisyonero, ginpalig-on niya sila: “Sunda ang praktikal nga iskedyul; hupti ang maayo nga batasan sang personal nga pagtuon, nga nagapakigdungan  pirme sa teokratiko nga mga butang; kag padayon nga hatagi sing igtalupangod ang mga rason kon ngaa yari ka sa imo asaynment.”

Ang masunod sa programa amo si Guy Pierce, nga miembro sang Nagadumala nga Hubon. Ginpasangkad niya ang tema nga “Padayon nga Palambua ang ‘Inyo Ikasarang sa Pagpangatarungan.’ ” (Roma 12:1) Naghatag sia sing praktikal nga laygay sa manuggradwar nga klase, ginpalig-on sila nga gamiton ang ila hatag-Dios nga ikasarang sa paghunahuna kag pagpangatarungan. “Padayon nga pamalandungi ang ginahambal ni Jehova sa inyo paagi sa iya Pulong. Magaamlig ini sa inyo,” siling niya. (Hulubaton 2:11) Si Utod Pierce naglaygay man sa klase nga indi mangin dogmatiko sa ila pagtamod agod indi nila maupangan ang ila “ikasarang sa pagpangatarungan.” Sa pagkamatuod, ining sibu-sa-tion nga mga pahanumdom mangin mabuligon samtang ang mga manuggradwar magaalagad subong mga misyonero.

Ang masunod nga ginpakilala sang tsirman amo ang isa sa mga instruktor sang Gilead, si Lawrence Bowen, nga nagpamulongpulong sa tema nga “Mamat-od nga Indi Paghibaluon ang Bisan Ano nga Butang.” Ginpatalupangod niya nga may kahilabtanan sa iya hilikuton nga pagmisyonero sa Corinto, si apostol Pablo “namat-od nga indi paghibaluon ang bisan ano nga butang . . . luwas kay Jesucristo,  kag sia nga ginlansang.” (1 Corinto 2:2) Nahibaluan ni Pablo nga ginasakdag sang pinakamabaskog nga kusog sa uniberso, nga amo ang balaan nga espiritu, ang mensahe nga ginpabanaag sa bug-os nga Biblia: ang pagbindikar sa pagkasoberano ni Jehova paagi sa ginsaad nga Binhi. (Genesis 3:15) Ang 48 ka estudyante nga naggradwar ginpalig-on nga mangin katulad kay Pablo kag kay Timoteo kag mangin madinalag-on subong mga misyonero, nagapabilin sa “sulundan sang makapapagros nga mga pulong.”​​—⁠2 Timoteo 1:⁠13.

“Pasalamati ang Inyo Pribilehiyo, nga Isa ka Dulot Gikan sa Dios” amo ang tema sang katapusan sa serye sang nagabukas nga mga pamulongpulong. Ginpahangop ni Wallace Liverance, manugrehistro sa Gilead School, sa mga manuggradwar nga ang mga pribilehiyo sa pag-alagad isa ka pagpakita sang di-bagay nga kaayo sang Dios, indi isa ka butang nga nagakabagay sa ila ukon naangkon nila. Nagagamit sang halimbawa ni apostol Pablo, si Utod Liverance nagsiling: “Ang pagpili ni Jehova kay Pablo nga mangin iya apostol sa mga pungsod wala ginpamat-uran paagi sa mga buhat, amo nga daw masiling nga naangkon ni Pablo ang kinamatarong sa sina nga asaynment ukon nga takus sia sa sini. Wala ini nagadepende sa kadugayon ukon eksperiensia. Sa tawhanon nga pagtamod, daw subong bala nga mas makatarunganon kon si Bernabe ang ginpili. Wala ini ginbase sa personal nga ikasarang; si Apolos hayag nga mas matanlas sangsa kay Pablo. Isa ini ka pagpakita sang di-bagay nga kaayo sang Dios.” (Efeso 3:​7, 8) Ginpalig-on ni Utod Liverance ang mga manuggradwar nga gamiton ang ila dulot, ukon pribilehiyo sa pag-alagad, sa pagbulig sa iban nga mangin mga abyan sang Dios kag makabaton sang “dulot nga ginahatag sang Dios . . . , ang kabuhi nga walay katapusan paagi kay Cristo Jesus nga aton Ginuo.”​​—⁠Roma 6:⁠23.

Pagkatapos sini, gindumalahan ni Mark Noumair, isa man ka instruktor sa Gilead, ang isa ka mapagsik nga pagbinagbinag upod sa pila ka estudyante sa tema nga “Ang Paghanda Nagadul-ong sa Maayo nga mga Resulta.” (Hulubaton 21:5) Gin-ilustrar sang mga eksperiensia nga kon ang isa ka ministro nagahanda sing maayo para sa ministeryo, ilabi na paagi sa paghanda sang iya tagipusuon, magapakita sia sing tunay nga kabalaka sa mga tawo. Indi gid sia maubusan sing inughambal. Sa baylo, magahambal sia kag magahimo sing mga butang nga makabulig sa ila sa espirituwal. “Amo ini ang sekreto agod mangin isa ka madinalag-on nga misyonero,” siling ni Utod Noumair, nga ginasugid ang iya mismo eksperiensia subong misyonero sa Aprika.

Misyonero nga Pag-alagad—⁠Isa ka Makaalayaw nga Karera

Gin-interbyu man nanday Ralph Walls kag Charles Woody ang pila ka eksperiensiado nga mga misyonero, nga yadto man sa Patterson Educational Center para sa pinasahi nga paghanas. Ginpadaku sa mga interbyu nga ang gugma sa mga tawo amo ang nagahatag sing kalipay sa misyonero nga pag-alagad. Makapasalig gid para sa mga estudyante kag sa ila mga pamilya kag mga abyan nga nagtambong ang pagpamati sa sining eksperiensiado nga mga misyonero samtang ila mismo ginapaathag kon ngaa ang misyonero nga pag-alagad isa ka makaalayaw nga karera.

Si John E. Barr, nga nagaalagad sa Nagadumala nga Hubon, ang naghatag sang panguna nga pamulongpulong sadto nga adlaw, nga may tig-ulo “Mag-amba kay Jehova Sing Isa ka Bag-o nga Ambahanon.” (Isaias 42:10) Ginpaathag ni Utod Barr nga ang ekspresyon nga “isa ka bag-o nga ambahanon” makita sa Biblia sing siam ka beses. Nagpamangkot sia, “Tuhoy sa ano ining bag-o nga ambahanon?” Nian nagsabat sia: “Ginapakita sang konteksto nga ang bag-o nga ambahanon ginaamba bangod sang bag-o nga mga hitabo sa pagpakita sang pagkasoberano ni Jehova.” Ginpalig-on niya ang mga estudyante nga magpadayon sa pagbuylog sang ila mga tingog sa pag-amba sang mga pagdayaw sa madinalag-on nga Ginharian sang Dios sa kamot sang Mesianikong Hari, si Cristo Jesus. Ginsambit ni Utod Barr nga ang paghanas nga ila nabaton sa Gilead nagbulig sa ila nga mahangpan sing labi pa sangsa nagligad ang nanuhaytuhay nga bahin sining “bag-o nga ambahanon.” “Ginapadaku sang eskwelahan ang kinahanglanon nga ‘mag-amba’ kamo sing mga pagdayaw kay Jehova nga nagapakigbagay sa inyo mga kauturan bisan diin man kamo magakadto; pirme palambua ang paghiusa upod sa iban sa inyo mga asaynment.”

Sa tapos mapanghatag sa mga estudyante ang ila mga diploma, ginbasa sang humalambal sang klase ang isa ka sulat sang hugot nga pagpasalamat sa paghanas nga ila nabaton sa Gilead.

Mapasangkad mo bala ang imo pag-alagad sa Dios kag himuon ini nga mabungahon? Kon amo, ukuri ang imo hilikuton subong sang ginhimo sining manuggradwar nga mga estudyante. Amo ini ang nakabulig nga makalipikar sila sa patag sang pagmisyonero. Daku nga kalipay ang masapwan kon ang isa malipayon nga nagahalad sang iya kaugalingon sing kinabubut-on sa pag-alagad sa Dios.​​—⁠Isaias 6:8.

[Kahon sa pahina 25]

ESTADISTIKA SANG KLASE

Kadamuon sang mga pungsod nga gintiglawas: 10

Kadamuon sang mga pungsod nga ginpadalhan: 19

Kadamuon sang mga estudyante: 48

Promedyo nga edad: 33.2

Promedyo nga tuig sa kamatuoran: 16.8

Promedyo nga tuig sa bug-os tion nga ministeryo: 12.6

[Retrato sa pahina 26]

Ika-111 nga Naggradwar nga Klase sang Watchtower Bible School of Gilead

Sa listahan sa ubos, ang mga idas nanumerahan halin sa atubangan pa likod, kag ang mga ngalan ginalista halin sa wala pa tuo sa tagsa ka idas.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel,  F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Sommerud, J.; Toukkari, S.; Szilvassy, P.