Magdiretso sa kaundan

Magdiretso sa listahan sang kaundan

Si Enoc—Naglakat Upod sa Dios sa Di-diosnon nga Kalibutan

Si Enoc—Naglakat Upod sa Dios sa Di-diosnon nga Kalibutan

 Si Enoc—Naglakat Upod sa Dios sa Di-diosnon nga Kalibutan

NANGATARUNGAN ang Yawa nga mapatalikod niya ang tanan nga tawo gikan sa Dios, kag kon kaisa daw subong bala nga nagmadinalag-on sia. Halos kapin sa lima ka siglo sa tapos mapatay si Abel, wala sing isa ang nagpakilala sang iya kaugalingon nga matutom nga alagad ni Jehova. Sa kabaliskaran, ang makasasala kag di-diosnon nga paggawi nangin kinaandan.

Sa amo sini nga panahon sang pagkalusod sa espirituwal nga kahimtangan nga si Enoc nagkabuhi sa duta. Gintalana sang kronolohiya sang Biblia ang iya pagkatawo sang 3404 B.⁠C.⁠E. Indi kaangay sang iya mga kontemporaryo, si Enoc isa ka tawo nga kalahamut-an sa Dios. Ginlakip sia ni apostol Pablo sa tunga sang mga alagad ni Jehova nga ang pagtuo isa ka halimbawa sa mga Cristiano. Sin-o si Enoc? Ano nga mga kabudlayan ang iya naatubang? Paano niya ini nalandas? Kag ano ang kaangtanan sang iya integridad sa aton?

Sa mga adlaw ni Enos, halos apat ka siglo antes sang panahon ni Enoc, “ang pagtawag sa ngalan ni Jehova ginsugdan.” (Genesis 4:26) Ang balaan nga ngalan sang Dios gingamit na kutob pa sang pagsugod sang maragtas sang tawo. Busa, indi ang pagtawag kay Jehova nga may pagtuo kag putli nga pagsimba ang nagsugod sang buhi pa si Enos. Ang pila ka Hebreo nga mga iskolar nagasiling nga ang Genesis 4:​26 dapat mabasa sing “nagsugod sing mapasipalahon” ukon “nian ang pagpasipala nagsugod.” Mahimo gin-aplikar sang mga tawo ang ngalan ni Jehova sa ila kaugalingon ukon sa iban nga mga tawo nga paagi sa ila, pakunokuno sila nga nagapalapit sa Dios sa pagsimba. Ukon ayhan gin-aplikar nila ang iya ngalan sa mga idolo.

‘Si Enoc Naglakat Upod sa Matuod nga Dios’

Bisan pa napalibutan si Enoc sang pagkadi-diosnon, “padayon [sia] nga naglakat upod sa matuod nga Dios,” si Jehova. Wala ginhinambit nga ang iya mga katigulangan​​—⁠sanday Seth, Enos, Kenan, Mahalalel, kag Jared​​—⁠naglakat upod sa Dios. Wala nila ginhimo ang pareho sa ginhimo ni Enoc, nga ang dalanon sang kabuhi maathag nga nagpatuhay sa iya sa ila.​​—⁠Genesis 5:​3-​27.

Ang paglakat upod kay Jehova nagapakita sang pagkasunado kag pagkasuod sa Dios nga posible lamang bangod si Enoc nagkabuhi nahisuno sa kabubut-on sang Dios. Nahamuot si Jehova sa debosyon ni Enoc. Sa pagkamatuod, ang Griego nga Septuagint nagasiling nga “si Enoc kalahamut-an” sa Dios, panghunahuna nga ginpabutyag man ni apostol Pablo.​​—⁠Genesis 5:​22; Hebreo 11:5.

Importante gid sa maayong kaangtanan ni Enoc kay Jehova amo ang iya pagtuo. Napakita gid niya ang pagtuo sa ginsaad nga “binhi” sang “babayi” sang Dios. Kon personal nga kilala niya si Adan, mahimo nga nakatigayon si Enoc sing pila ka impormasyon tuhoy sa pagpakig-angot sang Dios sa unang mag-asawa sa Eden. Ang iya ihibalo sa Dios naghimo kay Enoc nga ang sahi sang tawo nga “hanuot nga nagapangita sa iya.”​​—⁠Genesis 3:​15; Hebreo 11:​6, 13.

Sa bahin ni Enoc kag naton, ang maayong kaangtanan kay Jehova nagakinahanglan sing labaw pa sa ihibalo lamang sa Dios. Kon ginapabaloran gid naton ang kaangtanan sa isa ka tawo, indi bala nga ang iya pagtamod nagaapektar sang aton mga hunahuna kag mga aksion? Ginalikawan naton ang mga tinaga ukon mga aksion nga makaguba sina nga pag-abyanay. Kag kon ginahunahuna  naton nga maghimo sing pila ka pagbalhin sa aton mga kahimtangan, indi man bala nga binagbinagon naton kon paano ini makaapektar sa sina nga kaangtanan?

Ang handum nga huptan ang suod nga kaangtanan upod sa Dios mahimo man makaapektar sang aton ginahimo. Ang isa ka kinahanglanon amo ang sibu nga ihibalo sa kon ano ang iya nahamut-an kag di-nahamut-an. Nian dapat kita magpatuytoy sa sini nga ihibalo, nagapanikasog nga pahamut-an sia sa hunahuna kag sa buhat.

Huo, agod makalakat upod sa Dios, dapat naton sia pahamut-an. Amo sini ang ginhimo ni Enoc sa sulod sang ginatos ka tuig. Sa pagkamatuod, ang porma sang Hebreong berbo nga nagapakita nga si Enoc “naglakat” upod sa Dios, nagapahangop sing sulitsulit, padayon nga aksion. Ang isa pa ka matutom nga tawo nga ‘naglakat upod sa Dios’ amo si Noe.​​—⁠Genesis 6:9.

Si Enoc isa ka de-pamilya nga tawo nga may isa ka asawa kag nangin amay sang “mga anak nga lalaki kag mga babayi.” Ang isa sang iya mga anak nga lalaki amo si Metusela. (Genesis 5:​21, 22) Ayhan ginhimo ni Enoc ang tanan niya nga masarangan agod dumalahan ang iya panimalay sa isa ka maayong paagi. Apang, bangod ginapalibutan sang pagkadi-diosnon, indi mahapos para sa iya ang pag-alagad sa Dios. Si Lamec, nga amay ni Noe, mahimo amo lamang ang iya kontemporaryo nga nagpakita sing pagtuo kay Jehova. (Genesis 5:​28, 29) Apang, maisugon nga ginhimo ni Enoc ang matuod nga pagsimba.

Ano ang nakabulig kay Enoc nga magpabilin nga matutom sa Dios? Walay duhaduha nga wala sia makig-upod sa mga nagapasipala sa ngalan ni Jehova ukon sa iban pa nga di-takus nga mga kaupod para sa isa ka sumilimba sang Dios. Ang pagpangamuyo kay Jehova sing bulig mahimo man nagpabakod sang determinasyon ni Enoc nga likawan ang ano man nga butang nga indi kalahamut-an sa iya Manunuga.

Ang Tagna Batok sa Di-diosnon

Ang paghupot sing mataas nga mga talaksan mabudlay gid kon ginapalibutan kita sing di-diosnon nga mga tawo. Apang ginpahayag man ni Enoc ang isa ka wala nagakompromiso nga mensahe sang paghukom batok sa malauton. Gintuytuyan sang espiritu sang Dios, matagnaon nga  nagpahayag si Enoc: “Tuluka! Si Jehova nag-abot upod ang iya balaan nga linaksa, sa pagpatuman sang paghukom batok sa tanan, kag sa paghukom sa tanan nga di-diosnon nahanungod sa tanan nila nga di-diosnon nga mga buhat nga ginhimo nila sa di-diosnon nga paagi, kag nahanungod sa tanan makakilibang nga mga butang nga ginpamulong sang di-diosnon nga mga makasasala batok sa iya.”​​—⁠Judas 14, 15.

Ano ang epekto sining mensahe sa malaut nga mga di-tumuluo? Rasonable lamang ang paghaumhaum nga ining matigdas nga mga tinaga naghimo kay Enoc nga di-kalahamut-an, ayhan nagpukaw sing mga pagyubit, pagyaoyao, kag mga pagpamahog. Ayhan luyag sang iban nga pahipuson sia paagi sa pagpatay sa iya. Apang, wala mahadlok si Enoc. Nahibaluan niya ang natabo sa matarong nga si Abel, kag kaangay niya, determinado si Enoc nga mag-alagad sa Dios, bisan ano man ang matabo.

“Ginkuha Sia Sang Dios”

Maathag nga si Enoc yara gid sa katalagman nga mapatay sang “ginkuha sia sang Dios.” (Genesis 5:24) Wala gintugutan ni Jehova ang iya matutom nga manalagna nga mag-antos sa mga kamot sang masingki nga mga kaaway. Suno kay apostol Pablo, “Si Enoc ginliton agod nga indi makakita sing kamatayon.” (Hebreo 11:5) Madamo ang nagsiling nga wala mapatay si Enoc​​—⁠nga gindala sia sang Dios sa langit, diin padayon sia nga nagkabuhi. Apang, si Jesus maathag nga nagsiling: “Walay tawo nga nakasaka sa langit kundi ang nanaug gikan sa langit, ang Anak sang tawo.” Si Jesus amo ang “nauna” sang tanan nga nagsaka sa langit.​​—⁠Juan 3:​13; Hebreo 6:​19, 20.

Gani, ano ang natabo kay Enoc? Ang ‘pagliton sa [iya] agod nga indi makakita sang kamatayon’ mahimo nagakahulugan nga ginbutang sia sang Dios sa isa ka matagnaon nga palanan-awon kag nian ginkuha sang Dios ang iya kabuhi samtang yara sia sa sina nga kahimtangan. Sa idalom sining mga kahimtangan, wala maeksperiensiahan ni Enoc ang mga kasakit sang kamatayon. Nian ‘indi sia masapwan bisan diin,’ ayhan bangod gintago ni Jehova ang iya lawas, subong sang ginhimo niya sa lawas ni Moises.​​—⁠Deuteronomio 34:​5, 6.

Si Enoc nagkabuhi sing 365 ka tuig​​—⁠nga indi subong kalawig sa kalabanan sang iya mga kontemporaryo. Apang ang importante nga butang para sa mga nagahigugma kay Jehova amo nga nagaalagad sila sa iya sing matutom tubtob sa katapusan sang ila kabuhi. Nahibaluan naton nga si Enoc naghimo sini bangod “sang wala pa sia ginliton napamatud-an niya nga ginpahamut-an niya sing maayo ang Dios.” Wala ginasugid sang Kasulatan kon paano ini ginpaalinton ni Jehova kay Enoc. Walay sapayan sina, antes mapatay si Enoc, ginpasalig sa iya ang kahamuot sang Dios, kag makapat-od gid kita nga dumdumon sia ni Jehova sa pagkabanhaw.

Iluga ang Pagtuo ni Enoc

Mailog naton sing nagakaigo ang pagtuo sang mga tawo nga debotado sa Dios. (Hebreo 13:7) Bangod sa pagtuo, nag-alagad si Enoc subong ang nahauna nga matutom nga manalagna sang Dios. Ang kalibutan sang panahon ni Enoc kaangay man sa panahon naton​​—⁠masingki, malain, kag di-diosnon. Apang, tuhay si Enoc. May matuod sia nga pagtuo kag nangin halimbawa sa diosnon nga debosyon. Huo, ginhatagan sia ni Jehova sing isa ka mabug-at nga mensahe sang paghukom nga ipahayag, apang ginpabakod man niya sia nga ibantala ini. Maisugon nga ginhimo ni Enoc ang iya komisyon, kag gin-amligan sia sang Dios gikan sa pagpamatok sang kaaway.

Kon magtuo kita subong sang pagtuo nga ginpakita ni Enoc, pabakuron kita ni Jehova sa pagpahayag sang iya mensahe sa sining katapusan nga mga adlaw. Buligan niya kita nga maatubang sing maisugon ang pagpamatok, kag ang aton diosnon nga debosyon magahimo sa aton nga tuhay gikan sa di-diosnon. Ang pagtuo magabulig sa aton sa paglakat upod sa Dios kag sa paggawi sa paagi nga magapahalipay sang iya tagipusuon. (Hulubaton 27:11) Paagi sa pagtuo, ang matarong nga si Enoc nagmadinalag-on sa paglakat upod kay Jehova sa di-diosnon nga kalibutan, kag gani kita man.

[Retrato sa pahina 31]

Maisugon nga ginpahayag ni Enoc ang mensahe ni Jehova