Magdiretso sa kaundan

Magdiretso sa listahan sang kaundan

Madumduman Mo Bala?

Madumduman Mo Bala?

 Madumduman Mo Bala?

Naapresyar mo bala ang pagbasa sang ulihi nga mga guwa sang Ang Lalantawan? Bueno, tan-awa kon masabat mo ang masunod nga mga pamangkot:

• Ngaa ang mga pamangkot nga ginpautwas sa Job kapitulo 38 nagakabagay binagbinagon bisan karon?

Madamo sa makatilingala nga mga binuhatan nga ginpatalupangod sang Dios ang indi mahangpan sing bug-os bisan sang moderno nga mga sientipiko. Nalakip sa sini kon paano ang grabidad nagahupot sang duta sa orbita, kon ano gid ang kapawa, kon ngaa wala sing katapusan ang pagkananarisari sang mga tinipik nga niebe, kon paano mahuman ang mga tinulo sang ulan, kag kon paano nadalahig ang enerhiya sa mga unos nga may daguob kag kilat.​—⁠4/15, pahina 4-11.

Ano nga mga halimbawa sa Biblia ang makabulig sa aton nga malandas ang negatibo nga mga balatyagon?

Sanday Asaf, Baruc, kag Noemi nag-atubang sang mga tinion sang pagluya sang buot ukon sang iban pa negatibo nga mga balatyagon, kag ang Makasulatanhon nga rekord sa paglandas nila sing madinalag-on sa sini nga mga kahimtangan makabulig sa aton.​—⁠4/15, pahina 22-4.

Ano ang pila ka praktikal nga mga paagi nga makabulig sa Cristianong mga balo?

Ang mga abyan mahimo magtanyag sing bulig sa mainayuhon kag maathag nga paagi. Ang mga katapo sang pamilya ukon iban pa mahimo makatanyag sing pinansial ukon materyal nga bulig, diin may matuod nga kinahanglanon. Ang mga masigka-Cristiano makabulig man paagi sa pagtanyag sing mahigugmaon nga bulig sang pag-abyanay, nagaaman sing espirituwal nga pagsakdag kag paglugpay.​—⁠5/1, pahina 5-7.

Ngaa importante ang pagminyo “lamang sa Ginuo,” subong ginalaygay sa 1 Corinto 7:39?

Ang pagminyo sa mga di-tumuluo masami napamatud-an nga makahalalit. Dugang pa, ang pagsunod sa sini nga laygay sang Dios isa ka pagpakita sing katutom kay Jehova nga Dios. Kon ginasunod naton ang Pulong sang Dios, ang aton tagipusuon wala nagatagudili sa aton. (1 Juan 3:​21, 22)​​—⁠5/15, pahina 20-1.

Sanglit si Jehova amo ang isa nga makapatawad sang aton mga sala, ngaa ginatu-ad pa sang mga Cristiano ang serioso nga mga sala sa mga gulang sa kongregasyon?

Huo, ang pagpatawad ni Jehova sa serioso nga mga sala amo ang kinahanglan nga pangabayon sang isa ka Cristiano. (2 Samuel 12:13) Apang subong nga ginbuligan ni manalagna Natan si David, ang hamtong nga mga gulang sa kongregasyon mahimo makabulig sa mahinulsulon nga mga makasasala. Ang pagpalapit sa mga gulang sa kongregasyon nahisuno sa panuytoy nga ginhatag sa Santiago 5:​14, 15.​—⁠6/1, pahina 31.

Ano ang pamatuod nga dapat naton atipanon ang mga ilo kag balo nga mga babayi nga nagakinahanglan?

Ang maragtason nga rekord nagapakita nga ang pag-aman sini nga bulig tanda sang matuod nga pagsimba sa tunga sang dumaan nga mga Hebreo kag sang unang mga Cristiano. (Exodo 22:​22, 23; Galacia 2:​9, 10; Santiago 1:27) Ginlakip ni apostol Pablo sa Kasulatan ang maathag nga mga instruksion para sa mga Cristiano agod atipanon ang nagakinahanglan nga balo nga mga babayi. (1 Timoteo 5:3-16)​—⁠6/15, pahina 10-11.

Ano ang yabi sa isa ka malipayon kag makahulugan nga kabuhi?

Dapat naton palambuon kag huptan ang isa ka maayo nga kaangtanan kay Jehova, ang aton langitnon nga Amay. Ang pagtuon sang Biblia isa ka importante nga bulig sa paghimo naton sini.​—⁠7/1, pahina 4-5.

Ang tagsa bala ka tawo may yara di-mamalatyon nga espiritu nga wala nagakapatay?

Bisan pa ang pila ka tawo nagapati nga ang espiritu​—⁠indi ang kalag⁠​—⁠amo ang di-mamalatyon, ang Biblia wala nagasakdag sini nga ideya. Ginapakita sini nga kon ang tawo mapatay, nagabalik sia sa yab-ok kag wala na nagaluntad. Apang ang Dios may ikasarang nga ipasag-uli sia sa kabuhi, gani ang bisan ano man nga paglaum para sa palaabuton nga kabuhi, paagi sa pagkabanhaw, nasandig sa Dios. (Manugwali 12:7)​—⁠7/15, pahina 3-6.

Diin si Daniel sang ang tatlo ka Hebreo gintilawan sa kapatagan sang Dura?

Wala ginasugid sang Biblia. Mahimo nga indi obligado si Daniel nga magkadto didto bangod sang iya ranggo, ukon mahimo nga wala sia didto bangod sang opisyal nga hilikuton. Apang makasalig kita nga wala sia nagkompromiso sang iya katutom kay Jehova.​—⁠8/1, pahina 31.