Magdiretso sa kaundan

Magdiretso sa listahan sang kaundan

Mga Kahoy Nga Nagapabilin sa Malawig nga Tion

Mga Kahoy Nga Nagapabilin sa Malawig nga Tion

 Mga Kahoy Nga Nagapabilin sa Malawig nga Tion

Ang isa ka pil-as daw indi maayo himuon nga imo puluy-an, ilabi na kon nahamtang ini sa mataas gid nga mga bukid. Apang walay sapayan sang hayag nga mga disbentaha, ang pila ka kahoy nga alpine nagakapyot sing mabakod sa sini nga mga pil-as kag nagapabilin bisan sa sobra nga tigtulugnaw kag sa tigpalamangag sang tig-ilinit.

SA MASAMI, ining mabakod nga mga kahoy indi subong kataas sa mga pareho sini sing sahi sa ubos. Ang mga puno sini nagabalighot kag nagalubid kag medyo arikutoy ang pagdaku sini. Ang iban daw kaangay sang natural nga mga bonsai​—⁠nga ginkortehan kag ginhagbasan sang di-maayo nga panahon kag sang diutay nga duta nga gintubuan sini.

Sanglit nagapabilin sila sa isa sang pinakamalain nga palibot sa duta, mahimo isiling mo nga ini nga mga kahoy malip-ot lang sing kabuhi. Apang indi ina matuod. Ginasiling sang iban nga ang Methuselah, isa ka bristlecone nga pino nga nagatubo sa kataason nga 3,000 metros sa White Mountains sa California, 4,700 ka tuig ang edad. Ginsambit sang The Guinness Book of Records 1997 ini nga sahi subong ang pinakatigulang nga nagakabuhi nga kahoy sa aton planeta. Si Edmund Schulman, nga nagtuon sa sining madugay na nga mga kahoy, nagpaathag: “Ang bristlecone nga pino . . . daw nagapabilin nga buhi bangod sang mabudlay nga kahimtangan. Ang iban pa nga mas madugay na [nga kahoy nga pino] sa White Mountains makita halos 3,000 metros sa mamala kag batuhon nga kahanayakan.” Natukiban man ni Schulman nga ang pinakagulang nga mga kahoy sang iban nga pino nagatubo man sa mabudlay nga mga kahimtangan.

Bisan pa dapat sini batason ang kabudlayan, ining mabakod nga mga kahoy nagabenepisyo gid sa duha sini ka bentaha. Ang nabaw-ing nga nahamtangan sini, diin maiwat ang mga tanom, nagaamlig sa sini batok sa mga sunog sa kagulangan, nga isa sang pinakadaku nga mga katalagman sa gulang na nga mga kahoy. Kag ang mga gamot sini mabakod gid nga nagakapyot sa pil-as amo nga linog lang ang makahalin sini.

Sa Biblia ang matutom nga mga alagad sang Dios ginapaanggid sa mga kahoy. (Salmo 1:​1-3; Jeremias 17:​7, 8) Mahimo man sila mag-atubang sing kabudlayan bangod sang ila mga kahimtangan. Ang paghingabot,  di-maayo nga panglawas, ukon nagapigos nga kaimulon mahimo magtilaw sing daku sang ila pagtuo, ilabi na kon ang mga pagtilaw nagapadayon sing tinuig. Apang, ang ila Manunuga, nga nagdesinyo sang mga kahoy nga nakabato sing maayo sa mabudlay nga kahimtangan, nagapasalig sa iya mga sumilimba nga buligan niya sila. Ang Biblia nagasaad sa mga nagapabilin nga malig-on: “Palig-unon niya kamo, pabakuron niya kamo.”​—⁠1 Pedro 5:​9, 10.

‘Ang pagpabilin nga malig-on, ukon pagpadayon’ amo ang ginapahangop sang Griegong berbo nga masami nga ginabadbad nga “pagbatas” sa Biblia. Subong sang mga kahoy nga alpine, ang maayo nga pagpanggamot amo ang yabi sa pagbatas. Sa bahin sang mga Cristiano, kinahanglan nga nakapanggamot sila sing malig-on kay Jesucristo agod magpabilin nga malig-on. “Sa bagay nga ginbaton ninyo si Cristo Jesus nga Ginuo,” sulat ni Pablo, “magpadayon kamo sa paglakat nga nahiusa sa iya, nga nakapanggamot kag natukod sa iya kag napalig-on sa pagtuo, subong sang gintudlo sa inyo, nga nagaawas sa pagtuo sa pagpasalamat.”​—⁠Colosas 2:​6, 7.

Nahangpan ni Pablo nga kinahanglan ang mabakod nga pagpanggamot sa espirituwal. Nakigsumpong mismo sia sa isa ka “ungon sa unod,” kag nagbatas sia sing mapintas nga paghingabot sa bug-os niya nga ministeryo. (2 Corinto 11:​23-​27; 12:⁠7) Apang natukiban niya nga paagi sa kusog sang Dios nakabatas sia. “Sa tanan nga butang may kusog ako bangod sa iya nga nagahatag sing gahom sa akon,” siling niya. ​—⁠Filipos 4:13.

Subong sang ginapakita sang halimbawa ni Pablo, ang madinalag-on nga pagbatas sang Cristiano wala nagadepende sa maayo nga mga kahimtangan. Kaangay sang mga kahoy nga alpine nga madinalag-on nga nakabato sa mga bagyo sa sulod sang mga siglo, makapabilin kita nga malig-on sa pagtuo kon nakapanggamot kita kay Cristo kag nagasandig sa gahom nga ginahatag sang Dios. Dugang pa, kon magbatas kita tubtob sa katapusan, may paglaum kita nga maeksperiensiahan ang katumanan sang isa pa ka saad sang Dios: “Subong sang mga adlaw sang kahoy mangin amo ang mga adlaw sang akon katawhan.”​—⁠Isaias 65:22; Mateo 24:13.