Magdiretso sa kaundan

Magdiretso sa listahan sang kaundan

Ini Bala ang Pinakamaayo nga Karera Para sa Imo?

Ini Bala ang Pinakamaayo nga Karera Para sa Imo?

 Ini Bala ang Pinakamaayo nga Karera Para sa Imo?

KON ikaw isa ka bawtismado nga Cristiano, walay duhaduha nga ginahimo mo ang kabubut-on sang Dios bangod sang imo gugma sa iya. Isa pa, mahimo nga dedikado gid ikaw sa ministeryo. Kon sa bagay, ginsugo ni Jesucristo ang tanan niya nga sumulunod nga maghimo sing mga disipulo. (Mateo 28:​19, 20) Huo, mahimo nga nagatrabaho ka karon agod suportahan ang imo kaugalingon. Apang subong sumulunod ni Jesus kag isa sang mga Saksi ni Jehova, una sa tanan ikaw isa ka Cristianong ministro​—⁠isa nga ginauna sa kabuhi ang pagbantala sa Ginharian.​—⁠Mateo 24:⁠14.

Ayhan mga beintehon na ang imo edad. Ayhan napamensaran mo na sing maayo kon ano nga dalanon ang himud-usan mo sa kabuhi. Sa pagtulutimbang sa mga pililian nga bukas sa imo, mahimo nga importante sa imo ang personal nga kaayawan.

Kon amo, binagbinaga ang ginsiling ni Jørgen nga taga-Denmark tuhoy sa pagpili nga ginhimo niya. Ginlaragway ini ni Jørgen subong “isa ka maayo gid nga dalanon sang kabuhi diin makakonsentrar ka sa pinakaimportante nga hilikuton.” Si Eva, isa ka 31-anyos nga babayi sa Gresya, nagsiling: “Kon ipaanggid ko ang akon kabuhi sa iya sang akon mga katubotubo, pirme ko masiling nga ini mas makahulugan, mas makaalayaw, kag mas makalilipay.” Ano nga karera ang nagahatag sing amo sini nga kaayawan? Paano mo matigayon ini nga dalanon sang pagkabuhi?

Ginatuytuyan Ka Bala Sang Dios?

Mahimo nga mabudlay gid ang magpili sing karera. Sa pagkamatuod, luyag sang iban nga ipakita na lang kuntani sang Dios kon ano gid ang luyag niya nga ipahimo sa ila.

Sang si Moises didto anay sa Midian, ginsugo sia ni Jehova nga magbalik sa Egipto kag tuytuyan ang mga Israelinhon gikan sa pagkaulipon. (Exodo 3:​1-​10) Ang anghel sang Dios nagpakita kay Gideon, nga gintangdo sa pagluwas sang Israel gikan sa pagpigos. (Hukom 6:​11-14) Nagabantay si David sang mga karnero sang ginsugo sang Dios si Samuel nga haplasan sia subong masunod nga hari sang Israel. (1 Samuel 16:​1-​13) Wala kita ginatuytuyan sa amo sina nga mga paagi karon. Sa baylo, kinahanglan naton tulutimbangon ang mga bagay kag desisyunan kon paano gamiton ang aton hatag-Dios nga mga ikasarang.

Ginbuksan ni Jehova ang “isa ka daku nga ganhaan nga nagatuytoy padulong sa hilikuton” para sa pamatan-on nga mga Cristiano karon. (1 Corinto 16:⁠9) Ngaa? Sang nagligad nga dekada, ang kadamuon sang mga manugbantala sang Ginharian nagdugang sing kapin sa 2,125,000 kag nangin kapin na sa 6,000,000 sa bug-os nga kalibutan. Sin-o ang nagabulig sa pag-aman sing minilyon ka Biblia, libro, brosyur, magasin, kag tract nga kinahanglanon para sa espirituwal nga pagkaon kag para sa bug-os kalibutan nga pagbantala sing maayong balita? Ining ginpakamaayo nga pribilehiyo ginaagom sang mga katapo sang bug-os kalibutan nga pamilya Bethel.

Isa ka Makaalayaw nga Kabuhi

Ang Bethel nagakahulugan sing “Balay sang Dios,” kag ang mga puluy-an Bethel amo ang mga duog nga ginapuy-an sang Cristianong mga boluntaryo nga nagaalagad sa ulong-talatapan kag sa mga sanga talatapan sang Watch Tower Society. (Genesis 28:​19, footnote) Ang mga pamilya Bethel karon mapaanggid sa organisado kaayo nga ‘mga panimalay nga ginapabakod paagi sa kaalam’ kag ginpasad sa gugma kay Jehova.​—⁠Hulubaton 24:⁠3.

Ano ang masiling tuhoy sa tulad-pamilya nga kahimtangan sa Bethel? Ang isa ka 25-anyos nga katapo sang pamilya Bethel sa Estonia nagsiling: “Nalipay ako nga makaupod ang mga abyan ni Jehova sa tanan nga tion. Amo gihapon ini ang labing bilidhon nga bahin sang pag-alagad sa Bethel para sa akon.”​—⁠Salmo 15:​1, 2.

Sa bug-os nga kalibutan, mga 19,500 ka indibiduwal ang may pribilehiyo karon nga mag-alagad  sa Bethel. (Salmo 110:⁠3) Sa Estados Unidos, 46 porsiento sang mga yara sa Bethel ang nagaedad sing 19 tubtob 29. Kaangay ni Isaias, nagsiling sila: “Yari ako! Ipadala ako.” (Isaias 6:⁠8) Si Isaias​—⁠nga dedikado na kay Jehova⁠​—⁠​nagboluntaryo para sa dugang pa nga pribilehiyo sa pag-alagad. Mahimo gid nga nagkahulugan ini sang pagsakripisyo sang pila ka personal nga kasulhayan. Ang mga nagaalagad sa Bethel nagbiya sang ila puluy-an kag naandan nga mga kahimtangan, subong man sang ila iloy, amay, mga utod nga lalaki kag babayi, kag mga abyan. Kinabubut-on nga ginahimo ini nga mga sakripisyo ‘bangod sa maayong balita.’​—⁠Marcos 10:​29, 30.

Daw ano naman nga mga pagpakamaayo sa espirituwal ang yara sa Bethel! Isa ka lamharon nga katapo sang pamilya Bethel sa Rusya ang nagpaathag: “Paagi sa pagsakripisyo sa kaugalingon, madamo kita sing matun-an nga magabulig sa aton nga magkabuhi sa bag-ong kalibutan. Masiling ko nga sa akon bahin ang mga pagpakamaayo ni Jehova mas madamo sangsa mga sakripisyo ko.”​—⁠Malaquias 3:⁠10.

Kabuhi sa Bethel

Kamusta ang kabuhi sa Bethel? Ang mga katapo sang pamilya Bethel nagaugyon nga ini maayo kag makaalayaw, makakulunyag pa gani. Si Jens, nga 43 anyos, nalipay sa pag-alagad sa Bethel. Ngaa? Sia nagsiling: “Bangod sang balatyagon nga bahin kami sang isa ka daku nga panikasog sa pagtuman sa isa ka importante nga hilikuton. Makita ko ang kasangkaron kag pagkaimportante sang hilikuton ni Jehova.”

Halin Lunes tubtob Sabado, ang adlaw sa Bethel nagaumpisa sa morning worship (agahan nga pagsimba). Isa ini ka paghinun-anon sa Biblia, nga ginadumalahan sang isa ka eksperiensiado nga gulang. Kon Lunes sang gab-i isa ka oras ang ginahugod sa pagtuon sang pamilya sa Biblia sa bulig sang Ang Lalantawan, nga ginasundan kon kaisa sang isa ka pamulongpulong pasad sa isa ka tema sa Kasulatan nga nagakabagay gid sa pamilya Bethel.

Ano ang ginahimo sang isa sa una niya nga pag-abot sa Bethel? Agod mangin pamilyar ang bag-o nga mga katapo sa kabuhi sa Bethel, ang hamtong nga mga utod nga lalaki sang pamilya nagahatag sing mga pamulongpulong nga nagabinagbinag sa nanuhaytuhay nga mga bahin sang pag-alagad sa Bethel. Sa sulod sang pila ka semana sa nahauna nga tuig, nagatuon ang bag-o nga katapo sang pamilya Bethel sa isa ka ekselente nga eskwelahan kada semana nga gindesinyo agod pasangkaron ang iya paghangop sa Kasulatan. Ginasunod man sang bag-o nga mga gintawag ang pinasahi nga programa sa pagbasa sing Biblia. Sa ila nahauna nga tuig sang pag-alagad sa Bethel, ginabasa sang bag-o nga mga katapo sang pamilya ang bug-os nga Biblia.

Ano ang epekto sining tanan nga paghanas? Si Joshua, isa ka 33-anyos nga katapo sang pamilya Bethel sa Hong Kong, nagsabat: “Ginpadalom pa gid sang Bethel ang akon apresasyon kay Jehova. Makapakig-upod ako sa madamong eksperiensiado nga kauturan nga naghinguyang sang daku nga bahin sang ila kabuhi sa pag-alagad kay Jehova. Naluyagan ko gid ilabi na ang espirituwal nga mga programa, subong sang morning worship kag Pagtuon sa Lalantawan sang pamilya. Dugang pa, naluyagan ko ang mahim-ong kag simple nga paagi sang pagkabuhi. Nagahilway ini sa akon sa di-kinahanglanon nga kabalaka. Natun-an ko man kon paano lubaron ang mga problema sa Cristianong paagi, kag pirme ini napamatud-an nga mapuslanon.”

Ginagamit sang mga katapo sang pamilya Bethel ang daku nila nga tion kag panikasog sa paghimo sang butang nga ginboluntaryo nila nga himuon. Ini amo ang paggamit sang ila pisikal kag mental nga ikasarang sa paghimo sang hilikuton nga gin-asayn sa ila sa Bethel. Madamo nga butang ang dapat himuon. Ang iban nagapaandar sang mga printing press ukon nagatrabaho sa bindery, nagahimo sing mga libro nga ginapadala sa madamong kongregasyon. Ang iban nagatrabaho sa kusina, sa hulot-kalan-an, ukon sa lalabhan. Ang mga hilikuton nagalakip sang pagpaninlo, pagpanguma, pagtukod, kag madamo pa. Ang iban may responsabilidad nga atipanon ang mga kagamitan sa sini nga mga departamento. Ang iban nagaaman sing pag-atipan sa kapagros ukon nagatrabaho sa opisina. Ang tanan nga hilikuton sa Bethel may makalilipay nga mga hangkat kag makaalayaw gid. Ang hilikuton nga ginahimo sa Bethel makalilipay ilabi na bangod ginapauswag sini ang intereses sang Ginharian kag ginahimo ini bangod sang gugma sa Dios.

Ang mga katapo sang pamilya Bethel ginatangdo sa pagpakig-upod sa mga kongregasyon, diin  maeksperiensiahan nila sing direkta ang kapuslanan sang ila hilikuton. Nagatambong sila sa mga miting sang kongregasyon kag nagapakigbahin sa pagbantala nga hilikuton. Subong resulta, napalambo sang mga katapo sang pamilya Bethel ang mabakod nga kaangtanan sa ila mga kauturan sa lokal nga mga kongregasyon.​—⁠Marcos 10:​29, 30.

Si Rita, isa ka katapo sang pamilya Bethel sa Britanya, nagsiling: “Mapinasalamaton gid ako sa kongregasyon! Kon yara ako sa mga miting kag sa ministeryo, nagabakod gid ang akon pagtuo nga makita didto ang pinalangga nga mga kauturan nga lalaki, babayi, kabataan, kag mga tigulang! Ano man ang matabo, didto sila. Nagabulig ina sa akon nga labi pa nga magmakugi sa akon pag-alagad sa Bethel.”

Ang kabuhi sa Bethel indi puro trabaho, miting, pag-alagad sa latagon, kag pagtuon. May mga tion man sa paglingawlingaw ang pamilya. Sa pulupanag-on, may yara makalilingaw kag makapabakod sa espirituwal nga mga programa sa “Family Night,” nga nagahatag sing kahigayunan nga makita ang mga kinaadman sang madamo kag mahibaluan ang makapalig-on nga mga butang sa kabuhi sang iban nga nagaalagad sa Bethel. Makalilipay man ang maayo kag makapalig-on nga mga pagpakig-upod sa iban. Mahimo ginaaman ang pila ka pasilidad sa paglingawlingaw, subong man ang mga librarya para sa personal nga pagbasa kag pagpanalawsaw. Kag indi dapat kalimtan amo ang masadya nga pagsugilanunay sa latok kalan-an kon tigkalaon.

Si Tom, nga isa ka katapo sang pamilya Bethel sa Estonia, nagsiling: “Isa ka bloke lang kalayo ang dagat sa Bethel, kag malapit lang ang isa ka matahom nga kagulangan diin nagadayandayan kami sang akon asawa. Nagahampang man ako kon kaisa sing golf, hockey, kag tennis upod sa akon mga abyan sa kongregasyon kag sa Bethel. Kag kon maayo ang tiempo, nagabisikleta kami.”

Paano Ka Mangin Kalipikado?

Siempre pa, ang Bethel isa gid ka lugar diin ang hamtong nga mga Cristiano nagahimo sing sagrado nga pag-alagad kay Jehova kag nagapangabudlay para sa mga masigkatumuluo sa bug-os nga kalibutan. Agod mangin katapo sang pamilya Bethel, may yara pila ka kalipikasyon. Ano ang himuon  mo agod mangin kalipikado sa pag-alagad sa Bethel?

Kaangay ni Timoteo, nga nag-alagad kaupod ni apostol Pablo, ang mga ginaaprobahan sa pag-alagad sa Bethel dapat nga may maayo nga tindog sa kongregasyon. (1 Timoteo 1:⁠1) “Ginsugid [si Timoteo] nga maayo sang mga kauturan sa Listra kag Iconio.” (Binuhatan 16:⁠2) Bisan lamharon pa sia, nahibaluan ni Timoteo ang Kasulatan kag may maayo sia nga pundasyon sa kamatuoran. (2 Timoteo 3:​14, 15) Sing kaanggid, ang mga ginaaprobahan sa pag-alagad sa Bethel ginapaabot nga may ihibalo sa Biblia.

Ang mga katapo sang pamilya Bethel dapat may nagasakripisyo-sa-kaugalingon nga espiritu. Hayag gid ang espiritu ni Timoteo sa pagsakripisyo sa kaugalingon kag ang iya kahanda sa pag-una sa intereses sang Ginharian amo nga nakasiling si Pablo tuhoy sa iya: “Wala na sing iban pa nga may disposisyon kaangay sa iya nga magaulikid sing tunay sa  mga butang nga may kaangtanan sa inyo. Kay sila tanan nagapangita sang ila kaugalingon nga kaayuhan, indi ang iya ni Cristo Jesus. Apang nakahibalo kamo sang pamatuod nga ginhatag niya tuhoy sa iya kaugalingon, nga subong nga anak upod sa amay nag-alagad sia upod ko sa kauswagan sang maayong balita.”​—⁠Filipos 2:​20-22.

Kinahanglan sa pag-alagad sa Bethel ang espirituwal nga mga lalaki kag mga babayi. Bangod sang mga kahimusan nga ginhimo para sa mga katapo sang pamilya Bethel, nagauswag sila sa espirituwal paagi sa pagtuon sa Biblia, tayuyon nga pagtambong sa Cristianong mga miting kag pag-alagad sa latagon, kag pagpakig-upod sa hamtong nga mga Cristiano. Sa amo ginabuligan ang mga yara sa Bethel nga sundon ang laygay ni Pablo: “Magpadayon kamo sa paglakat nga nahiusa [kay Cristo Jesus], nga nakapanggamot kag natukod sa iya kag napalig-on sa pagtuo, subong sang gintudlo sa inyo, nga nagaawas sa pagtuo sa pagpasalamat.”​—⁠Colosas 2:​6, 7.

Bangod sang kinaugali sang hilikuton sa Bethel, ang mga ginahatagan sini nga pribilehiyo sang pag-alagad dapat mabaskog sa pisikal kag may maayo nga panglawas. Kon nalab-ot mo ang mga kalipikasyon nga ginsambit namon, nagaedad sing 19 anyos ukon mas magulang pa, kag bawtismado sa di-magkubos isa ka tuig, ginapalig-on namon ikaw nga binagbinagon ang pag-alagad sa Bethel.

Tanan Kita May Bahin

Subong mga Cristiano, pat-od gid nga luyag naton tanan nga unahon sa kabuhi ang intereses sang Ginharian kag mangin bug-os kalag sa aton pag-alagad kay Jehova. (Mateo 6:​33; Colosas 3:23) Mapalig-on man naton ang mga nagaalagad sa Bethel nga padayunon ang paghimo sing sagrado nga pag-alagad didto. Kag ang pamatan-on nga mga kauturan nga kalipikado sa pag-alagad sa Bethel ilabi na nga dapat palig-unon nga lab-uton ining ginpakamaayo nga pribilehiyo.

Ang pag-alagad sa Bethel isa ka makaalayaw sa espirituwal nga dalanon sang pagkabuhi​—⁠isa nga mahimo gid nga amo ang pinakamaayo nga karera para sa imo. Amo ini para kay Nick, nga nagsugod sa pag-alagad sa Bethel sa edad nga 20. Sa tapos sang napulo ka tuig nga pag-alagad sa Bethel, sia nagsiling: “Pirme ako nagapangamuyo kay Jehova agod pasalamatan sia tungod sa iya di-bagay nga kaayo. Ano pa ang mahimo nga pangayuon ko? Diri, ginapalibutan kami sang matutom nga mga Cristiano nga nagahimo sang ila bug-os nga masarangan sa pag-alagad kay Jehova.”

[Kahon/Retrato sa pahin 22]

ANO ANG SARANG MAHIMO SANG MGA GULANG KAG MGA GINIKANAN?

Ang mga gulang kag nagalakbay nga mga manugtatap dapat magpalig-on ilabi na sa mga pamatan-on nga lalaki nga mag-aplay sa Bethel. Sining karon lang, ginpakita sang isa ka di-pormal nga pagsurbe sa batan-on nga mga katapo sang pamilya Bethel nga 34 porsiento sa ila ang una nga ginpalig-on sang Cristianong mga manugtatap nga himuon nga tulumuron ang pag-alagad sa Bethel. Huo, mahimo nga mahidlaw sa ila ang ila lokal nga kongregasyon. Apang maayo nga dumdumon nga samtang pat-od gid nga may maayo nga impluwensia si Timoteo sa iban pa nga mga pamatan-on sa Listra kag Iconio, wala sia ginpunggan sang mga gulang nga mag-alagad upod kay Pablo. Wala sila maghinakop nga ang pag-upod ni Timoteo sa apostol mangin daku nga kadulaan sa ila kongregasyon.​—⁠1 Timoteo 4:⁠14.

Dapat tinguhaan ilabi na sang Cristianong mga ginikanan nga mangin positibo nga impluwensia sila sa ila kabataan sa sini nga butang. Sa pagsurbe nga bag-o lang ginsambit, 40 porsiento sang mga ginpamangkot ang nagsiling nga ang ila mga ginikanan amo ang panguna nga ginhalinan sang pagpalig-on sa pagsulod sa pag-alagad sa Bethel. Ang isa ka utod nga babayi nga nagaalagad sa Bethel sa pila pa lamang ka tuig nagsiling: “Ang kabuhi sang akon mga ginikanan sa pag-alagad kay Jehova isa ka mabaskog nga pagpalig-on sa akon nga mag-alagad sa Bethel. Bangod nakita ko ang ila halimbawa sa bug-os tion nga pag-alagad, nahibaluan ko nga ini na ang pinakamaayo kag labing makaalayaw nga dalanon sang pagkabuhi nga dapat pilion.”

[Kahon sa pahin 24]

GINAAPRESYAR NILA ANG PAG-ALAGAD SA BETHEL

“Ginapakabahandi ko ang akon pag-alagad sa Bethel. Makaalayaw mahibaluan nga ginaalagad ko si Jehova sa bug-os nga adlaw kag amo gihapon ini ang akon himuon sa buwas, sa masunod nga buwas, kag padayon. Nagahatag ini sa akon sing maayo nga konsiensia kag nagapuno sa akon sing positibo nga mga panghunahuna.”

“Ang Bethel amo ang duog diin mahugod mo ang tanan mo nga tion kag kusog sa pag-alagad kay Jehova nga wala sing sablag. Nagahatag ini sing nasulod nga kalipay. Apang makita mo man ang organisasyon ni Jehova sa tuhay naman nga pagtamod. Magabatyag ka nga mas malapit sa sentro sang hilikuton sina nga organisasyon, kag makakulunyag gid ini.”

“Ang pag-alagad sa Bethel amo ang pinakamaayo nga butang nga nahanabo sa akon. Wala untat ang edukasyon diri. Kag diri ang edukasyon, indi sa akon kaugalingon nga hinimuan, kundi kay Jehova. Ang akon hilikuton diri indi gid mangin walay pulos.”

“Sa paggamit sang akon mga kinaadman sa Bethel, nangin kontento ako kag may kalinong bangod ginagamit ini para kay Jehova kag para sa mga kauturan.”

“Wala gid ako makakita sing matuod nga kaayawan kag kalipay sa akon anay nga karera. Madamong tinuig na nga handum ko nga magpangabudlay upod sa akon mga kauturan kag para sa ila. Amo ini kon ngaa nagsulod ako sa Bethel. Nakasapo ako sing daku nga kaayawan sa paghibalo nga ang tanan ko nga panikasog magabulig sa iban sa espirituwal kag magahatag sing kadayawan kay Jehova.”