Magdiretso sa kaundan

Magdiretso sa listahan sang kaundan

Malandas Mo ang Pagluya sing Buot!

Malandas Mo ang Pagluya sing Buot!

 Malandas Mo ang Pagluya sing Buot!

ISA ka maalam nga tawo ang nagsulat anay: “Nagaluya bala ang imo buot sa adlaw sang kapiutan? Ang imo kusog mangin diutay.” (Hulubaton 24:10) Kon naagihan mo na nga maluyahan sing buot, mahimo gid nga magaugyon ka sa sina nga pinamulong.

Wala sing isa nga indi maapektuhan sang pagluya sing buot. Ang haganhagan nga pagluya sing buot mahimo maglawig sing isa ukon duha ka adlaw kag dayon nagakadula. Apang kon nadalahig ang pagkasaklaw ukon paghinakit, ang problema mahimo nga mas malawig. Ang iban nga mga Cristiano nga nangin matutom sa sulod sang tinuig naluyahan gid sing buot amo nga nag-untat pa gani sila sa pagtambong sa mga miting sang kongregasyon kag sa pagpakigbahin sa ministeryo sa latagon.

Kon naluyahan ka sing buot, magpakalig-on! Madinalag-on nga nalandas sang matutom nga mga alagad sang una nga mga panahon ang pagluya sing buot, kag sa bulig sang Dios, malandas mo man ini.

Kon Masaklaw sang Iban ang Imo Balatyagon

Indi ka makapaabot nga maamligan gikan sa tagsa ka wala pasunaid nga pulong ukon wala patugsiling nga buhat. Apang, mahimo nga indi mo pagtugutan nga tublagon sang mga di-kahimpitan sang iban ang imo pag-alagad kay Jehova. Kon nasaklaw sang iban ang imo balatyagon, ayhan masapwan mo nga mabuligon nga binagbinagon kon paano gin-atubang ni Ana, nga iloy ni Samuel, ang makapaluya-sing-buot nga kahimtangan.

Luyag gid ni Ana nga makaanak, apang baw-as sia. Ang ikaduha nga asawa sang iya bana, nga si Penina, nag-anak na sing mga anak nga lalaki kag babayi. Sa baylo nga magpasunaid sa kahimtangan ni Ana, gintamod sia ni Penina subong isa ka karibal kag ginpakita ini nga panimuot sa iya amo nga si Ana ‘naghibi kag wala magkaon.’​​—⁠1 Samuel 1:​2, 4-7.

Isa ka adlaw nagkadto si Ana sa tabernakulo agod mangamuyo. Natalupangdan ni Eli, ang mataas nga saserdote sang Israel, ang iya bibig nga nagakutibkutib. Wala makahibalo nga nagapangamuyo si Ana, naghinakop si Eli nga basi hubog sia. “Tubtob san-o nga maghinubog ka?” siling niya. “Kuhaa ang imo alak gikan sa imo.” (1 Samuel 1:​12-​14) Mahanduraw mo bala kon ano ayhan ang ginbatyag ni Ana? Nagkadto sia sa tabernakulo agod mapalig-on. Pat-od nga wala niya ginpaabot nga butangbutangan sia sang isa sang labing maimpluwensia nga mga tawo sa Israel!

Ini nga kahimtangan mahapos kuntani bangdan nga maluyahan gid sing buot si Ana. Mahimo nga nagbiya sia kuntani gilayon sa tabernakulo, nga nagapanumpa nga indi na gid magbalik tubtob nagaalagad didto si Eli subong mataas nga saserdote. Apang, maathag nga ginpabaloran ni Ana ang iya kaangtanan kay Jehova. Nahibaluan niya nga indi sia mahamuot kon himuon niya ini. Ang tabernakulo amo ang sentro sang putli nga pagsimba. Ginbutang didto ni Jehova ang iya ngalan. Kag bisan indi sia himpit, si Eli pinili nga tiglawas ni Jehova.

Ang diosnon nga reaksion ni Ana sa butangbutang ni Eli nagahatag sing maayo gid nga halimbawa para sa aton karon. Wala niya gintugutan nga butangbutangan sia, apang nagsabat sia sing matinahuron gid. “Indi, ginuo ko!” sabat niya. “Ako isa ka babayi nga masinulub-on sa espiritu; kag wala ako makainom sing alak kag makahulubog nga ilimnon, kundi ginabubo ko ang akon kalag sa atubangan ni Jehova. Indi pagkabiga ang imo ulipon nga babayi nga isa ka wala-pulos nga babayi, kay bangod sa kadakuon sang akon kabalaka kag kalisdanan amo nga nagapamulong ako tubtob karon.”​—⁠1 Samuel 1:​15, 16.

Nangatarungan bala si Ana? Huo. Apang, nakighambal sia sing mataktikanhon kay Eli, wala mangahas nga mulayon sia tungod sa iya sayop nga panumbungon. Gani, nagsabat man sa iya si Eli  sing mainayuhon, nga nagasiling: “Lakat ka sa paghidait, kag kabay nga ihatag sang Dios sang Israel ang imo pangabay nga ginpangayo mo sa iya.” Sang nahusay na ang problema, si Ana “naglakat kag nagkaon, kag ang iya nawong wala na nabalaka.”​—⁠1 Samuel 1:​17, 18.

Ano ang matun-an naton gikan sa sining kasaysayan? Gilayon nga naghulag si Ana agod tadlungon ang di-paghangpanay, apang ginhimo niya ini nga may tudok nga pagtahod. Subong resulta, natipigan niya ang maayo nga kaangtanan kay Jehova kag kay Eli. Daw ano kasunson nga matapna sang maayo nga komunikasyon kag sang diutay nga taktika ang pagdaku pa sang magagmay nga mga problema!

Dapat kilalahon nga ang paghusay sa mga di-paghangpanay sa iban nagakinahanglan sing pagkamapainubuson kag pagkamapasibusibuon sa duha ka bahin. Kon ang isa ka masigkatumuluo wala nagahulag sa imo mga panikasog nga husayon ang di-paghangpanay, mahimo mo itugyan ang mga butang kay Jehova, nagasalig nga lubaron niya ini sa iya kaugalingon nga tion kag sa iya kaugalingon nga paagi.

Nawasi Mo Bala ang Isa ka Pribilehiyo sa Pag-alagad?

Ang iban ginapung-awan bangod kinahanglan nila buy-an ang isa ka hamili nga pribilehiyo sa pag-alagad sa Dios. Nalipay sila sa pagpangalagad sa ila mga kauturan, kag sang nadula ang pribilehiyo, nagbatyag sila nga indi na sila mapuslanon kay Jehova ukon sa iya organisasyon. Kon amo sina ang imo ginabatyag, mahimo mo matigayon ang paghantop paagi sa pagbinagbinag sa halimbawa sang manunulat sang Biblia nga si Marcos, nga gintawag man nga Juan Marcos.​—⁠Binuhatan 12:⁠12.

Nag-upod si Marcos kanday Pablo kag Bernabe sa ila una nga paglakbay bilang mga misyonero, apang sa tion sang ila paglakbay, nagbiya sia sa ila kag nagbalik sa Jerusalem. (Binuhatan 13:13) Sang ulihi, luyag ni Bernabe nga paupdon nila si Marcos sa isa pa ka paglakbay. Apang, ang Biblia nagasiling: “Wala ginhunahuna ni Pablo nga nagakaigo nga paupdon sia sa ila, sanglit nagbiya sia sa ila sa Pamfilia kag wala mag-upod sa ila sa hilikuton.” Wala mag-ugyon si Bernabe. “Tungod sini,” padayon sang kasaysayan, “natabo ang pagsilabo sang kaakig, amo nga nagbulagay [sanday Pablo kag Bernabe]; kag gin-upod ni Bernabe si Marcos kag naglayag padulong sa Cipre. Ginpili ni Pablo si Silas kag naglakat.”​—⁠Binuhatan 15:​36-40.

Mahimo nga nahanusbo gid si Marcos sa paghibalo nga ang talahuron nga si apostol Pablo indi luyag mangabudlay upod sa iya kag ang binais tuhoy sa iya kalipikasyon nagresulta sa pagbulagay nanday Pablo kag Bernabe. Apang indi pa ini ang katapusan.

Kinahanglan gihapon ni Pablo kag ni Silas ang isa ka kaupod sa paglakbay. Sang nag-abot sila sa Listra, nakakita sila sang inugbulos kay Marcos, ang isa ka lamharon nga lalaki nga si Timoteo. Karon mahimo nga duha ukon tatlo pa lang ka tuig nga nabawtismuhan si Timoteo sang ginpili sia. Sa pihak nga bahin, si Marcos nakig-upod na sa Cristianong kongregasyon kutob sang nagsugod ini​—⁠sa katunayan, mas madugay pa sangsa kay Pablo. Apang, si Timoteo ang nakabaton sang pribilehiyo.⁠—​Binuhatan 16:​1-3.

Ano ang reaksion ni Marcos sang nahibaluan niya nga ginbuslan sia sang mas lamharon, kubos ka eksperiensiado nga lalaki? Wala sing ginasugid ang Biblia. Apang, ginapakita sini nga nagpabilin nga aktibo si Marcos sa pag-alagad kay Jehova. Ginhimuslan niya ang mga pribilehiyo nga natigayon niya. Bisan pa wala sia makaalagad upod kanday Pablo kag Silas, nakalakbay sia upod kay Bernabe padulong sa Cipre, nga amo ang teritoryo ni Bernabe. Nag-alagad man si Marcos upod kay Pedro sa Babilonia. Sang ulihi, nakahigayon sia nga magpangabudlay upod kay Pablo​—⁠kag kay Timoteo⁠​—⁠​sa Roma. (Colosas 1:​1; 4:​10; 1 Pedro 5:13) Sang ulihi gin-inspirar pa gani si Marcos sa pagsulat sing isa sa apat ka Ebanghelyo!

May mapuslanon nga leksion sa tanan sini. Wala mabalaka sing sobra si Marcos tuhoy sa nawasi nga pribilehiyo amo nga wala na niya maapresyar ang mga pribilehiyo nga matigayon pa niya. Nagpadayon nga masako si Marcos sa pag-alagad kay Jehova, kag ginpakamaayo sia ni Jehova.

Gani kon nawasi mo ang isa ka pribilehiyo, indi maluyahan sing buot. Kon huptan mo ang positibo nga panimuot kag padayon nga magmasako, mahimo ihatag sa imo ang iban nga mga pribilehiyo. May madamo nga hilimuon sa hilikuton sang Ginuo.​—⁠1 Corinto 15:⁠58.

 Isa ka Matutom nga Alagad ang Naluyahan sing Buot

Indi mahapos ang pagpakig-away sing lakas para sa pagtuo. Kon kaisa, mahimo ka maluyahan sing buot. Nian mahimo nga konsiensiahon ka pa gani bangod ginaluyahan ka sing buot, nagahinakop nga ang isa ka matutom nga alagad sang Dios indi dapat magbatyag sing subong sini. Hunahunaa si Elias, isa sang talalupangdon nga mga propeta sang Israel.

Sang nabalitaan ni Reyna Jesebel sang Israel, isa ka panatiko nga tagsakdag sang pagsimba kay Baal, nga ginpatay ni Elias ang mga manalagna ni Baal, nanumpa sia nga ipapatay si Elias. Nakaatubang na si Elias sang mga kaaway nga daku pa kay Jesebel, apang hinali lang nga naluyahan gid sia sing buot amo nga luyag na lang niya mapatay. (1 Hari 19:​1-4) Ngaa natabo ina? May nalipatan sia.

Nalipat si Elias nga magdangop kay Jehova subong amo ang Tuburan sang iya kusog. Sin-o ang naghatag sing gahom kay Elias sa pagbanhaw sa mga patay kag sa pag-atubang sa mga manalagna ni Baal? Si Jehova. Pat-od gid nga hatagan sia ni Jehova sing kusog agod maatubang ang kaakig ni Reyna Jesebel.​​—⁠1 Hari 17:​17-​24; 18:​21-​40; 2 Corinto 4:⁠7.

Ang bisan sin-o mahimo nga malingkang sing makadali sa iya pagsalig kay Jehova. Kaangay ni Elias, kon kaisa mahimo mo tamdon sing tawhanon ang isa ka problema sa baylo nga gamiton “ang kaalam nga gikan sa hitaas” sa pag-atubang sini. (Santiago 3:17) Apang, wala ginpabay-an ni Jehova si Elias tungod sining umalagi nga pagkalimot.

Nalagyo si Elias pakadto sa Beer-seba kag dayon sa kahanayakan, diin ginhunahuna niya nga wala sing makakita sa iya. Apang nakita sia ni Jehova. Nagpadala sia sing anghel agod lugpayan sia. Ginpat-od sang anghel nga may bag-o nga linuto nga tinapay nga makaon si Elias kag makaparepresko nga tubig nga mainom. Sa tapos makapahuway si Elias, ginsugo sia sang anghel nga maglakbay sing halos 300 kilometros padulong sa Bukid Horeb, diin palig-unon pa sia ni Jehova.​—⁠1 Hari 19:​5-8.

Sa Bukid Horeb, nasaksihan ni Elias ang isa ka makapalig-on-pagtuo nga pagpahayag sang gahom ni Jehova. Nian, sa isa ka malulo kag mahinay nga tingog, ginpasalig sia ni Jehova nga wala sia nagaisahanon. Si Jehova kaupod niya, kag 7,000 ka kauturan niya ang kaupod man niya, bisan pa wala sini makahibalo si Elias. Sang ulihi, gintangduan sia ni Jehova sing hilikuton. Wala niya ginsikway si Elias subong iya manalagna!​​—⁠1 Hari 19:​11-​18.

Matigayon ang Bulig

Kon nagabatyag ka sing haganhagan nga pagluya sing buot sa pulupanag-on, mahimo masapwan mo nga magaayo ang imo pamatyag kon magpahuway ka sing dugang ukon magkaon sing masustansia nga pagkaon. Natalupangdan anay ni Nathan H. Knorr, nga nag-alagad subong katapo sang Nagadumala nga Hubon sang mga Saksi ni Jehova tubtob napatay sia sang 1977, nga ang dalagku nga mga problema masunson nga nagahaganhagan pagkatapos sang bastante nga tulog sa gab-i. Apang, kon nagapadayon ang problema, ini nga remedyo mahimo nga indi bastante​—⁠kinahanglan mo ang bulig sa pagpakig-away sa pagluya sing buot.

Si Jehova nagpadala sing anghel agod pabakuron si Elias. Sa karon, ang Dios nagahatag sing pagpalig-on paagi sa mga gulang kag iban pa nga hamtong nga mga Cristiano. Ang mga gulang “mangin subong [gid] sang palalipdan sa hangin.” (Isaias 32:​1, 2) Apang agod makakuha sing pagpalig-on gikan sa ila, mahimo nga kinahanglan mo himuon ang una nga tikang. Sang naluyahan sing buot si Elias, naglakbay sia padulong sa Bukid Horeb agod batunon ang instruksion gikan kay Jehova. Nagabaton kita sing nagapabakod nga instruksion paagi sa Cristianong kongregasyon.

Kon batunon naton ang bulig kag maisugon nga atubangon ang mga pagtilaw, subong sang pagkasaklaw ukon pagwasi sing mga pribilehiyo, nagadampig kita kay Jehova sa isa ka importante nga hulusayon. Ano nga hulusayon? Si Satanas nangatarungan nga ginaalagad lamang sang mga tawo si Jehova bangod sang intereses sa kaugalingon. Wala ginapanghiwala ni Satanas nga magaalagad kita sa Dios kon maayo ang lakat sang tanan sa aton kabuhi, apang nangatarungan sia nga magauntat kita sa pag-alagad sa Dios kon may mga problema kita. (Job, kapitulo 1 kag 2) Paagi sa di-malingkang nga pagpadayon sa pag-alagad kay Jehova walay sapayan sang pagluya sing buot, makabulig kita sa pagsabat sa mapasipalahon nga panumbungon sang Yawa.​—⁠Hulubaton 27:⁠11.

Sanday Ana, Marcos, kag Elias may mga problema  nga nagkuha sing makadali sang ila kalipay. Apang, ginlandas nila ang ila mga problema kag nagkabuhi sing mabungahon. Paagi sa bulig ni Jehova, malandas mo man ang pagluya sing buot!