Magdiretso sa kaundan

Magdiretso sa listahan sang kaundan

Ang Latvia Nagabaton sang Maayong Balita

Ang Latvia Nagabaton sang Maayong Balita

 Report sang mga Manugbantala sang Ginharian

Ang Latvia Nagabaton sang Maayong Balita

MAATHAG nga ginapakita sang Biblia nga kabubut-on sang Dios nga “ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:⁠4) Nagapamati na karon ang mga gindingutan anay sang kahigayunan nga makabati sang maayong balita sa sulod sang madamong tinuig! Sa Latvia, kaangay sa iban pa nga bahin sang kalibutan, ang mga tawo sang tanan nga pangidaron kag nanuhaytuhay nga mga ginhalinan nagabaton sang mensahe, subong sang ginapakita sa masunod nga mga eksperiensia.

• Sa Rēzekne, isa ka banwa sa nasidlangan nga Latvia, ang isa ka iloy kag ang iya tin-edyer nga anak nga babayi nagpatudlo sa isa ka babayi sa dalan kon paano sila makalab-ot sa ila kaladtuan. Sa tapos mahatag sa ila ang husto nga direksion, gin-agda sila sang babayi, nga isa sang mga Saksi ni Jehova, sa mga miting sang mga Saksi.

Bangod relihioso ang mag-iloy, namat-od sila nga magtambong sa miting. Sa dalan, namat-od sila nga kon may makita sila nga bisan ano man nga di-nagakaigo didto, magabiya sila sa gilayon. Apang, tuman gid ka makawiwili sang miting amo nga wala gid magsulod sa ila hunahuna ang magbiya. Ginbaton nila ang gintanyag nga pagtuon sa Biblia kag nagsugod sa pagtambong sa mga miting sing tayuyon. Sa sulod lamang sang tatlo ka bulan, ginpabutyag nila ang ila handum nga magbuylog sa hilikuton nga pagbantala kag nagahulat sa tion nga mabawtismuhan.

• Sa isa ka siudad sa katundan nga Latvia, nasugilanon sang isa ka Saksi ang 85-anyos nga si Anna, nga nagpakita sing matuod nga interes kag nagbaton sing pagtuon sa Biblia. Ginpamatukan gid sia sang iya anak nga babayi kag sang iban pa nga katapo sang pamilya. Apang wala gintugutan ni Anna ina nga pagpamatok ukon ang iya katigulangon kag mapigaw nga panglawason nga makaupang sa iya sa pagpadayon sang iya pagtuon sa Biblia.

Isa ka adlaw, ginsilingan ni Anna ang iya anak nga magapabawtismo sia. “Kon magpabawtismo ka, paistaron ko ikaw sa isa ka balay-alatipanan sang mga tigulang,” sabat sang anak ni Anna. Apang, ini nga pamahog wala makapugong kay Anna. Bangod sang iya pisikal nga kondisyon, ginbawtismuhan sia sa iya mismo puluy-an.

Ano ang reaksion sang anak ni Anna sa sini? Nagbag-o ang iya panimuot, kag naghanda sia sing espesyal nga pagkaon para sa iya iloy pagkatapos sang bawtismo. Pagkatapos sini ginpamangkot niya ang iya iloy, “Karon nga nabawtismuhan ka na, ano ang pamatyag mo?” Ang sabat ni Anna? “Kaangay sang isa ka bag-ong bun-ag!”

• Sang Disiembre 1998, nasugilanon sang duha ka Saksi ang isa ka retirado nga opisyal sang soldado sang anay Unyon Sobyet. Bangod nagatuo sia sa Manunuga, ginbaton niya ang isa ka pagtuon sa Biblia, kag ang iya asawa nagbuylog sang ulihi. Madasig sila nga nag-uswag kag wala magdugay nangin di-bawtismado sila nga mga manugbantala. Sang masunod nga tig-ilinit, ginbawtismuhan ang soldado anay. Ang daku nga gugma sini nga mag-asawa sa espirituwal nga mga butang nangin isa ka pagpalig-on sa tanan sa kongregasyon. Subong man, nagbulig sila sa pagkay-o sang isa ka puluy-an nga mangin isa ka matahom nga Kingdom Hall.