Magdiretso sa kaundan

Magdiretso sa listahan sang kaundan

Ang Isa ka Optiko Nagasab-ug sing Binhi

Ang Isa ka Optiko Nagasab-ug sing Binhi

 Ang Isa ka Optiko Nagasab-ug sing Binhi

ANO ang kaangtanan sang mga panikasog sang isa ka optiko sa Lviv, Ukraine sa pagporma sang isa ka Ruso-sing-hambal nga kongregasyon sang mga Saksi ni Jehova sa Haifa, Israel, mga 2,000 kilometros kag pila ka pungsod ang kalayuon? Isa ini ka sugilanon nga nagapakita sang pagkamakatarunganon sang ginasiling sang Biblia sa Manugwali 11:​6: “Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot; kay wala ka makahibalo kon diin ini magauswag.”

ANG amon sugilanon nagsugod sang 1990, sang ang isa ka lamharon nga babayi nga si Ella, nga isa ka Judiyo, nagpuyo sa Lviv. Si Ella kag ang iya pamilya nagahanda na sadto nga magsaylo sa Israel. Wala lamang madugay antes sang ila paghalin, si Ella naghimo sing iskedyul nga magpatan-aw sa optiko nga isa sang mga Saksi ni Jehova. Sadto nga tion, ginadumilian ang hilikuton sang mga Saksi ni Jehova sa Ukraine. Walay sapayan sina, ginpaambit sang  optiko ang iya pasad-sa-Biblia nga mga pagpati kay Ella. Nakibot sia sang nagsiling ang optiko nga ang Dios may ngalan. Nagpukaw ina sa handum ni Ella nga mahibaluan ang tuhoy sini, kag nagsunod ang isa ka maayo nga paghambalanay sa Biblia.

Naluyagan gid ni Ella ang paghambalanay amo nga nangabay sia liwat sang masunod nga semana kag sing isa pa pagkatapos sadto. Nagatubo na ang iya interes, apang may problema. Madasig nga nagahilapit ang tion para sa pamilya nga magbiya pakadto sa Israel. Apang madamo pa sing dapat mahibaluan si Ella! Agod himuslan sing labi pa ang nabilin nga tion, nagpangabay sia sing isa ka pagtuon sa Biblia adlaw-adlaw tubtob sa paghalin niya. Bisan pa wala mapadayon ni Ella ang iya pagtuon sang una sia nga nag-abot sa Israel, nanggamot ang binhi sang kamatuoran sa iya tagipusuon. Sang katapusan nga bahin sang tuig, hanuot niya liwat nga gintun-an ang Biblia.

Nagdabdab ang inaway sa Persian Gulf, kag ang Israel ginbombahan sing missile sang Iraq. Amo ini ang masunson nga ginahambalan. Isa ka adlaw sa supermarket, nabatian ni Ella ang isa ka pamilya nga nagahambal sing Ruso nga katulad man niya nga bag-ong imigrante. Bisan nga nagatuon pa lang sia sa Biblia, ginpalapitan ni Ella ining pamilya kag ginpaambit sa ila ang saad sang Biblia nga isa ka mahidaiton nga kalibutan. Subong resulta, ang lola, si Galina; ang iloy, si Natasha; ang anak nga lalaki, si Sasha, (Ariel); kag ang anak nga babayi, si Ilana, tanan nagbuylog kay Ella sa iya pagtuon sa Biblia.

Si Sasha amo ang una nga katapo sang pamilya nga nabawtismuhan​—⁠walay sapayan sang madamong pagtilaw. Bisan pa isa ka honor student, ginpahalin sia sa eskwelahan bangod indi magtugot ang iya Cristianong konsiensia nga maghanas sia bilang paghanda sa pagsoldado, nga isa ka ginapatuman nga bahin sang kurikulum sang eskwelahan. (Isaias 2:​2-4) Ang kaso ni Sasha naglab-ot sa Mataas nga Korte sang Israel sa Jerusalem, nga dalayawon nga nagmando nga pabalikon si Sasha agod matapos niya ang pag-eskwela. Ang kaso nagbantog sa bug-os nga pungsod. Busa, madamo nga Israelinhon ang nakahibalo sang mga pagtuluuhan sang mga Saksi ni Jehova.⁠ *

Pagkatapos sang iya gradwasyon sa hayskul, si Sasha nagsulod sa bug-os tion nga pagministeryo sang mga Saksi ni Jehova. Sa karon isa sia ka espesyal payunir kag gulang sa kongregasyon. Ang iya manghod nga babayi, nga si Ilana, nagbuylog man sa iya sa bug-os tion nga pagministeryo. Ang ila iloy kag ang ila lola, bawtismado na nga mga Saksi. Ang binhi nga ginsab-ug sang isa ka optiko padayon nga nagapamunga gihapon!

Samtang, si Ella padayon nga nag-uswag sa espirituwal kag sang ulihi nagbantala sa pamalaybalay. Sa primero gid niya nga ganhaan, nasugilanon ni Ella si Faina, nga bag-o lang nag-abot halin sa Ukraine. Ginapung-awan si Faina. Nahibaluan ni Ella sang ulihi nga antes sang pagpanuktok niya sa ganhaan ni Faina, ang ginapung-awan nga babayi nangamuyo sa Dios: “Indi ko kilala kon sin-o ka, apang kon nabatian mo ako, buligi ako.” Mapagsik sila nga naghambalanay ni Ella. Madamo sing pamangkot si Faina kag mahalungon nga ginbinagbinag niya ang mga sabat sa iya. Sang ulihi, nakumbinsi sia nga ang mga Saksi ni Jehova nagatudlo sang kamatuoran gikan sa Biblia. Ginpasibu niya ang iya programa sa pagtuon sa unibersidad agod makahinguyang sia sing kapin pa nga tion sa kongregasyon kag sa pagbantala nga hilikuton. Sang Mayo 1994, nagpabawtismo si Faina. Nagpayunir man sia, nga ginasuportahan ang iya kaugalingon paagi sa part-time nga pagtrabaho sa patag sang kompyuter.

 Sang Nobiembre 1994, samtang nagapakigbahin sa hilikuton nga pagbantala, hinali nga nagpalangluya si Ella. Nagkadto sia sa ospital kag nakita sa eksamin nga may nagadugo nga ulser sia sa tinai. Sang pagkagab-i ang hemoglobin ni Ella nagnubo sa 7.2. Ang isa ka gulang sa kongregasyon ni Ella, ang tsirman sang lokal nga Hospital Liaison Committee (HLC), naghatag sa mga doktor sang impormasyon tuhoy sa lainlain nga mga pamaagi sa pagbulong nga wala nagakinahanglan sang paggamit sing dugo.⁠ * Nagmadinalag-on ang operasyon nga wala nagagamit sing dugo, kag nag-ayo si Ella.​​—⁠Binuhatan 15:​28, 29.

Si Karl, nga gynecologist ni Ella, isa ka Judiyo nga natawo sa Alemanya, nagdayaw gid. Nian nadumduman niya nga ang iya mga ginikanan, nga nakalampuwas sadto sa Holocaust, may nakilala nga mga Saksi ni Jehova sa kampo konsentrasyon. Madamo sing ginpamangkot si Karl. Bisan pa nga tuman kasako sa iya trabaho subong doktor, may tion si Karl para sa iya regular nga pagtuon sa Biblia. Pagkadason nga tuig, nagatambong na sia sa semanal nga Cristianong mga miting.

Ano ang resulta sang binhi nga ginsab-ug sang isa ka optiko? Nahibaluan na naton ang natabo kay Sasha kag sa iya pamilya. Kon tuhoy kay Ella, isa na sia ka espesyal payunir. Ang iya bata nga babayi, nga si Eina, nga bag-o lang nakatapos sa hayskul, nagasugod sang iya mismo karera subong payunir. Si Faina isa man ka espesyal payunir. Kon tuhoy naman kay Karl, ang genecologist ni Ella, isa na sia karon ka bawtismado nga Saksi kag ministeryal nga alagad, nga nagapaambit sang nagabulong nga gahom sang kamatuoran sa Biblia sa iya mga pasyente kag sa iban pa.

Ang diutay nga grupo sang mga imigrante nga Ruso sing hambal nga nagsugod subong bahin sang Hebreo nga Kongregasyon sa Haifa nangin makugi na karon nga Ruso nga kongregasyon nga may kapin sa 120 ka manugbantala sang Ginharian. Sing bahin, ini nga pag-uswag natabo bangod ginhimuslan sang isa ka optiko sa Lviv ang higayon nga isab-ug ang binhi!

[Mga nota]

^ par. 6 Para sa dugang nga mga detalye, tan-awa ang Nobiembre 8, 1994, nga guwa sang Awake!, pahina 12-​15.

^ par. 9 Ang HLC nagarepresentar sa mga Saksi ni Jehova sa bug-os nga kalibutan, nga nagabulig sa komunikasyon sa ulot sang pasyente kag talapuanan sang ospital. Nagahatag man sila sing impormasyon tuhoy sa alternatibo nga pagbulong pasad sa pinakabag-o nga pagpanalawsaw sa pagbulong.

[Mapa sa pahina 29]

(Para sa aktual nga pormat, tan-awa ang publikasyon)

UKRAINE

ISRAEL

[Credit Line]

Mountain High Maps® Copyright © 1997 Digital Wisdom, Inc.

[Retrato sa pahina 30]

Si Ella kag ang iya bata nga babayi nga si Eina

[Retrato sa pahina 31]

Ang malipayon nga grupo sang nagahambal-sing-Ruso nga mga Saksi sa Haifa. Wala pa tuo: Sanday Sasha, Ilana, Natasha, Galina, Faina, Ella, Eina, kag Karl