Magdiretso sa kaundan

Magdiretso sa listahan sang kaundan

Ginahigugma Mo Bala sing Lakas ang mga Pahanumdom ni Jehova?

Ginahigugma Mo Bala sing Lakas ang mga Pahanumdom ni Jehova?

 Ginahigugma Mo Bala sing Lakas ang mga Pahanumdom ni Jehova?

“Gintuman sang akon kalag ang imo mga pahanumdom, kag ginahigugma ko ini sing lakas.”—SALMO 119:167.

1. Diin kita ilabi na nga makakita sing sulitsulit nga mga pagsambit sang mga pahanumdom ni Jehova?

LUYAG ni Jehova ang iya katawhan nga mangin malipayon. Siempre pa, agod maagom ang matuod nga kalipay, dapat kita maglakat sa kasuguan sang Dios kag magtuman sang iya mga sugo. Agod matigayon ina, nagahatag sia sa aton sing mga pahanumdom. Sulitsulit ini nga ginsambit sa Kasulatan, ilabi na sa Salmo 119, nga ayhan ginsulat sang lamharon nga si Prinsipe Eze­quias sang Juda. Ining matahom nga ambahanon nagasugod sa mga pulong: “Malipayon ang walay kasawayan sa ila dalanon, ang mga nagalakat sa kasuguan ni Jehova. Malipayon ang mga nagatuman sang iya mga pahanumdom; nga nagapangita sa iya sa bug-os nga tagipusuon.”—Salmo 119:1, 2.

2. Paano ang mga pahanumdom sang Dios may kaangtanan sa kalipay?

2 ‘Nagalakat kita sa kasuguan ni Jehova’ paagi sa pagkuha sing sibu nga ihibalo tuhoy sa iya Pulong kag paagi sa pag-aplikar sini sa kabuhi. Apang, sanglit mga di-himpit kita, nagakinahanglan kita sing mga pahanumdom. Ang Hebreong tinaga nga ginbadbad nga “mga pahanumdom” nagapahangop nga ginabalik sang Dios sa aton hunahuna ang iya mga kasuguan, sugo, pagsulundan, mando, kag palatukuran. (Mateo 10:18-20) Magapabilin lamang kita nga malipayon kon padayon naton nga ginatuman ining mga pahanumdom, kay nagabulig ini sa aton nga malikawan ang espirituwal nga mga siod nga nagaresulta sa kalamidad kag kasubo.

Magkapyot sa mga Pahanumdom ni Jehova

3. Pasad sa Salmo 119:60, 61, sa ano kita makasalig?

3 Ang mga pahanumdom sang Dios hamili sa salmista nga nag-amba: “Nagdalidali ako, kag wala magpalantang sa pagtuman sang imo mga sugo. Ang mga lubid sang mga malauton nagapos sa akon. Wala ako malipat sang imo kasuguan.” (Salmo 119:60, 61) Ang mga pahanumdom ni Jehova nagabulig sa aton nga mabatas ang paghingabot bangod nagasalig kita nga bugtuon sang aton langitnon nga Amay ang mga lubid sang pagpugong nga ginahigot sang mga kaaway sa aton. Sa gintalana nga tion, ginahilway niya kita sa sinang mga sablag agod matuman naton ang pagbantala-sing-Ginharian nga hilikuton.—Marcos 13:10.

4. Paano kita dapat maghulag sa mga pahanumdom sang Dios?

 4 Kon kaisa, ginatadlong kita sang mga pahanumdom ni Jehova. Kabay nga pirme naton apresyahon ini nga pagtadlong, kaangay sang salmista. Mapangamuyuon sia nga nagsiling sa Dios: “Ang imo mga pahanumdom akon naluyagan . . . Ginahigugma ko ang imo mga pahanumdom.” (Salmo 119:24, 119) Mas madamo karon sing pahanumdom ang Dios sa aton sangsa salmista. Ang ginatos sang mga ginbalikwat gikan sa Hebreong Kasulatan nga mabasa sa Griegong Kasulatan nagapahanumdom sa aton indi lamang sang mga instruksion ni Jehova sa iya katawhan sa idalom sang Kasuguan kundi sang iya man mga katuyuan nahanungod sa Cristianong kongregasyon. Kon nakita sang Dios nga nagakaigo nga pahanumdumon kita sang mga butang may kaangtanan sa iya mga kasuguan, nagapasalamat kita tungod sina nga panuytoy. Kag paagi sa ‘pagkapyot sa mga pahanumdom ni Jehova,’ malikawan naton ang makasasala nga mga pagsulay nga wala nagapahamuot sa aton Manunuga kag nagakuha sa aton sing kalipay.—Salmo 119:31.

5. Paano naton mahigugma sing lakas ang mga pahanumdom ni Jehova?

5 Daw ano ka daku naton dapat higugmaon ang mga pahanumdom ni Jehova? “Gintuman sang akon kalag ang imo mga pahanumdom, kag ginahigugma ko ini sing lakas,” amba sang salmista. (Salmo 119:167) Mahigugma naton sing lakas ang mga pahanumdom ni Jehova kon ginatamod kag ginabaton naton ini subong paandam sang isa ka Amay nga nagaulikid gid sa aton. (1 Pedro 5:6, 7) Kinahanglan naton ang iya mga pahanumdom, kag ang aton gugma sa sini magalambo kon mahangpan naton kon paano ini nagabulig sa aton.

Kon Ngaa Kinahanglan Naton ang mga Pahanumdom Sang Dios

6. Ano ang isa ka rason kon ngaa kinahanglan naton ang mga pahanumdom ni Jehova, kag ano ang magabulig sa aton nga madumduman ini?

6 Ang isa ka rason kon ngaa kinahanglan naton ang mga pahanumdom ni Jehova amo nga bangod malipaton kita. Ang The World ­Book En­cy­clopedia nagasiling: “Sa kabilugan, nalipatan sang mga tawo ang madamo pa nga impormasyon samtang nagalipas ang tion. . . . Ayhan naagihan mo na nga indi madumduman ang ngalan ukon ang iban pa nga impormasyon nga halos yara na sa punta sang imo dila. . . . Ining umalagi nga pagkalipat, nga masunson nagakatabo, ginatawag nga kapaslawan sa pagdumdom (re­triev­al fail­ure). Ginapaanggid ini sang mga sientipiko sa pagpanikasog nga makita ang isa ka nadula nga butang sa magamo nga hulot. . . . Ang isa ka maayo nga paagi agod mapat-od nga madumduman ang isa ka impormasyon amo ang tun-an ini pagkatapos nga ginahunahuna mo nga nahibaluan mo na gid ini sing maayo.” Ang maukod nga pagtuon kag pagsulit magabulig sa aton nga madumduman ang mga pahanumdom sang Dios kag masunod ini para sa aton kaugalingon nga kaayuhan.

7. Ngaa ang mga pahanumdom sang Dios mas kinahanglan karon sangsa nagligad?

7 Mas kinahanglan naton karon sangsa nagligad ang mga pahanumdom ni Jehova bangod ang kalautan naglab-ot na sa pinakagrabe nga kadakuon sa maragtas sang tawo. Kon talupangdon naton ang  mga pahanumdom sang Dios, matigayon naton ang paghantop nga kinahanglan agod indi masulay sang malaut nga mga dalanon sang kalibutan. “Nakatigayon ako sing kapin pa nga paghantop sangsa tanan ko nga manunudlo,” siling sang salmista, “bangod ang imo mga pahanumdom ginahunahuna ko. Nagagawi ako nga may labi nga paghangop sangsa tigulang nga mga lalaki, bangod gintuman ko ang imo mga sugo. Gikan sa tagsa ka malain nga banas ginpunggan ko ang akon mga tiil, sa tuyo nga matuman ko ang imo pulong.” (Salmo 119:99-101) Paagi sa pagtuman sa mga pahanumdom sang Dios, magapahilayo kita sa “tagsa ka malain nga banas” kag magalikaw nga mangin subong sang kadam-an sang katawhan, nga ‘ginadulman sa painuino, kag nahamulag sa kabuhi nga iya sang Dios.’—Efeso 4:17-19.

8. Paano kita masangkapan sing labi agod maatubang ang mga pagtilaw sa pagtuo sing madinalag-on?

8 Ang mga pahanumdom sang Dios kinahanglan man bangod nagapabakod ini sa aton nga mabatas ang aton madamo nga pagtilaw sa sining “tion sang katapusan.” (Daniel 12:4) Kon wala ini nga mga pahanumdom mangin “malipaton nga manugpamati” kita. (Santiago 1:25) Apang ang maukod nga personal kag pangkongregasyon nga pagtuon sa Kasulatan sa bulig sang mga publikasyon gikan sa “matutom kag mainandamon nga ulipon” magabulig sa aton nga maatubang ang mga pagtilaw sang pagtuo sing madinalag-on. (Mateo 24:45-47) Ining espiri­tuwal nga mga aman nagabulig sa aton nga mahangpan kon ano ang dapat naton himuon agod pahamut-an si Jehova kon masalapuan naton ang aton kaugalingon sa mabudlay nga mga kahimtangan.

Ang Importante nga Papel Sang Aton mga Miting

9. Sin-o ang “dulot nga mga lalaki,” kag paano nila ginabuligan ang mga masigkatumuluo?

9 Ang aton pagkinahanglan sing mga pahanumdom sang Dios ginaaman sa isa ka bahin sa Cristianong mga miting, diin ang instruksion ginahatag sang gintangdo nga mga kauturan nga lalaki. Si apostol Pablo nagsulat nga sang si Jesus ‘nagkayab sa hitaas nagdala sia sing mga bihag; naghatag sia sing dulot nga mga lalaki.’ Si Pablo nagdugang: “Ginhatag [ni Cristo] ang iban subong mga apostoles, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo, sa tuyo nga pasibuon liwat ang mga balaan, para sa ministeryal nga hilikuton, para sa pagpalig-on sa lawas ni Cristo.” (Efeso 4:8, 11, 12) Daku gid ang aton pasalamat nga ginapatuhoy sining “dulot nga mga lalaki”—ang gintangdo nga mga gulang—ang aton igtalupangod sa mga pahanumdom ni Jehova kon magtipon kita sing tingob para sa pagsimba!

10. Ano ang panguna nga punto sang Hebreo 10:24, 25?

10 Ang pagpasalamat sa mga aman sang Dios magapahulag sa aton nga tambungan ang aton lima ka miting sa kongregasyon kada semana. Ang kinahanglanon nga magtipon sing tingob sing tayuyon ginpadaku ni Pablo. Sia nagsulat: “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon sing tingob, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.”—Hebreo 10:24, 25.

11. Paano ang tagsa sang aton semanal nga mga miting nagabulig sa aton?

11 Ginapasalamatan mo bala kon ano ang mahimo sang aton mga miting para sa aton? Ang  semanal nga Pagtinuon sa Lalantawan nagapabakod sang aton pagtuo, nagabulig sa aton sa pagtuman sang mga pahanumdom ni Jehova, kag nagapabakod sa aton batok sa “espiritu sang kalibutan.” (1 Corinto 2:12; Binuhatan 15:31) Sa Miting Publiko, ang mga humalambal nagahatag sang instruksion gikan sa Pulong sang Dios, pati na sang mga pahanumdom ni Jehova kag sang dalayawon nga “mga pulong [ni Jesus] sang kabuhi nga walay katapusan.” (Juan 6:68; 7:46; Mateo 5:1–7:29) Ang aton mga ikasarang sa pagtudlo ginapauswag sa Teokratikong Eskwelahan sa Pagministro. Ang Miting sa Serbisyo mapuslanon gid sa pagbulig sa aton nga mapauswag ang aton pagtanyag sing maayong balita sa pamalaybalay, sa mga pagduaw liwat, sa mga pagtuon sang Biblia sa puluy-an, kag sa iban pa nga mga bahin sang aton ministeryo. Ang mas magamay nga grupo sang Pagtinuon Sang Kongregasyon sa Libro nagahatag sa aton sing daku pa nga kahigayunan agod makahatag sing mga komento nga masunson nagadalahig sang mga pahanumdom sang Dios.

12, 13. Paano ang katawhan sang Dios sa isa ka pungsod sa Asia nagpakita sing apresasyon para sa Cristianong mga miting?

12 Ang tayuyon nga pagtambong sa mga miting sang kongregasyon nagapahanumdom sa aton sang mga mando sang Dios kag nagabulig sa aton nga magpabilin nga mabaskog sa espirituwal walay sapayan sang inaway, kapurauton, kag iban pa nga mga pagtilaw sa aton pagtuo. Ang pagkaimportante sang mga miting hanuot nga nabatyagan sang mga 70 ka Cristiano sa isa ka pungsod sa Asia nga gintabog sa ila mga puluy-an kag napilitan sa pagpuyo sa kagulangan. Bangod determinado nga magpadayon sa pagtipon sing tingob sing tayuyon, nagbalik sila sa ila ginguba-sang-inaway nga banwa, ginpanguha kon ano ang nabilin sa Kingdom Hall, kag ginpatindog ini liwat sa kagulangan.

13 Sa tapos mabatas ang mga tinuig sang inaway sa isa pa ka bahin sang amo man nga pungsod, ang katawhan ni Jehova nagaalagad gihapon sing makugi. Ang isa sang mga gulang sa sina nga duog ginpamangkot: “Ano gid ang nakabulig agod magtipon sing tingob ang mga kauturan?” Ang sabat niya? “Sa 19 ka tuig, wala kami sing ginkanselar nga miting. Kon kaisa bangod sang pagpamomba ukon sang iban pa nga mga kabudlayan, ang pila ka utod indi makakadto sa duog nga ginatipunan, apang wala gid kami sing ginkanselar nga isa ka miting.” Ginaapresyar gid sining pinalangga nga mga kauturan ang importansia sang ‘indi pagpabaya sang aton pagtilipon sing tingob.’

14. Ano ang matun-an naton gikan sa kinabatasan sang tigulang nga si Ana?

14 Ang 84-anyos nga balo nga si Ana “wala gid nagapalya sa templo.” Subong resulta, yara sia sang ang lapsag nga si Jesus gindala anay didto wala madugay nga natawo sia. (Lucas 2:36-38) Determinado ka bala nga indi magpalya sa mga miting? Ginapanikasugan mo gid bala nga tambungan ang tanan nga sesyon sang aton mga asambleya kag mga  kombension? Ang mapuslanon nga espirituwal nga instruksion nga nabaton sa sining mga pagtilipon nagahatag sa aton sing maathag nga pamatuod nga ang aton langitnon nga Amay nagaulikid sa iya katawhan. (Isaias 40:11) Ini nga mga okasyon nagapauswag man sang kalipay, kag ang pagtambong naton nagapakita sang aton apresasyon para sa mga pahanumdom ni Jehova.—Nehemias 8:5-8, 12.

Ginahimo nga Tuhay Paagi sa mga Pahanumdom ni Jehova

15, 16. Paano ang pagtuman sang mga pahanumdom ni Jehova nagaapektar sang aton paggawi?

15 Ang pagtuman sa mga pahanumdom sang Dios nagabulig sa aton nga mangin tuhay sa sining malauton nga kalibutan. Halimbawa, ang pagpamati sa mga pahanumdom sang Dios nagapugong sa aton sa paghimo sing seksuwal nga imoralidad. (Deuteronomio 5:18; Hulubaton 6:29-35; Hebreo 13:4) Ang pagsulay nga magbutig, mangin di-bunayag, ukon magpangawat madinalag-on nga mapunggan paagi sa pagtuman sa mga pahanumdom sang Dios. (Exodo 20:15, 16; Levitico 19:11; Hulubaton 30:7-9; Efeso 4:25, 28; Hebreo 13:18) Ang pagtuman sa mga pahanumdom ni Jehova nagapugong man sa aton gikan sa pagtimalos, paghupot sing aligutgot, ukon pagpasipala kay bisan ­sin-o.—Levitico 19:16, 18; Salmo 15:1, 3.

16 Paagi sa pagpamati sa mga pahanumdom sang Dios, nagapabilin kita nga ginpakabalaan, ukon ginhimo nga tuhay, para sa pag-alagad sa iya. Kag daw ano gid ka importante nga mahamulag sa sining kalibutan! Sa pangamuyo kay Jehova sang katapusan nga gab-i sang iya dutan-on nga kabuhi, si Jesus nagpangabay tungod sa iya mga sumulunod: “Ginhatag ko sa ila ang imo pulong, apang ang kalibutan nagdumot sa ila, bangod indi sila bahin sang kalibutan, subong nga ako indi bahin sang kalibutan. Nagapangabay ako sa imo, indi agod kuhaon sila gikan sa kalibutan, kundi agod bantayan sila bangod sa isa nga malaut. Indi sila bahin sang kalibutan, subong nga ako indi bahin sang kalibutan. Pakabalaana sila paagi sa kamatuoran; ang imo pulong kamatuoran.” (Juan 17:14-17) Padayon naton nga pakabahandion ang Pulong sang Dios, nga nagahimo sa aton nga tuhay para sa iya sagrado nga pag-alagad.

17. Ano ang mahanabo kon indi naton pagsapakon ang mga pahanumdom sang Dios, gani ano ang dapat naton himuon?

17 Subong mga alagad ni Jehova, luyag naton magpabilin nga kalahamut-an para sa pag-alagad sa iya. Apang, kon indi naton pagsapakon ang mga pahanumdom sang Dios, mahimo kita maapektuhan sang espiritu sining kalibutan, nga ginapasanyog sa kalabanan nga hambal sini, literatura, kalingawan, kag paggawi. Kag pat-od gid nga indi naton luyag nga mangin mga mahigugmaon sang kuwarta, mga bugalon, mga palabilabihon, mga di-mapasalamaton, mga di-matutom, mga mabangis, mga matig-a sing ulo, mga nagahabok sa pagpadayaw, mga mahigugmaon sang kinasadya sa baylo nga mahigugmaon sa Dios—sa pagsambit sang pila lamang sang mga kinaiya nga ginapadayag sang mga nahamulag gikan sa Dios. (2 Timoteo 3:1-5) Sanglit madugay na kita nga nagakabuhi sa katapusan nga mga adlaw sining malauton nga sistema sang mga butang, padayon kita nga magpangamuyo sing bulig sa Dios agod padayon naton nga matuman ang mga pahanumdom  ni Jehova kag sa amo ‘magpabilin nga nagabantay suno sa iya pulong.’—Salmo 119:9.

18. Ang pagtuman sa mga pahanumdom sang Dios magatiklod sa aton sa paghimo sing anong positibo nga mga tikang?

18 Ang mga pahanumdom ni Jehova wala lamang nagapaalisto sa aton sa mga butang nga indi naton dapat himuon. Ang pagtuman sa iya mga pahanumdom magatiklod sa aton sa pagpanghikot sing positibo, nagapahulag sa aton sa pagsalig kay Jehova sing bug-os kag sa paghigugma sa iya upod ang aton bug-os nga tagipusuon, kalag, hunahuna, kag kusog. (Deuteronomio 6:5; Salmo 4:5; Hulubaton 3:5, 6; Mateo 22:37; Marcos 12:30) Ang mga pahanumdom sang Dios nagapahulag man sa aton nga higugmaon ang aton isigkatawo. (Levitico 19:18; Mateo 22:39) Ilabi na nga ginapakita naton ang gugma sa Dios kag sa isigkatawo paagi sa paghimo sing kabubut-on sang Dios kag sa pagpaambit sa iban sang nagahatag-kabuhi nga “ihibalo sang Dios.”—Hulubaton 2:1-5.

Ang Pagtuman sa mga Pahanumdom ni Jehova Nagakahulugan Sing Kabuhi!

19. Paano naton mapakita sa iban nga praktikal kag mapuslanon nga pamatian ang mga pahanumdom ni Jehova?

19 Kon tumanon naton ang mga pahanumdom ni Jehova kag buligan ang iban nga himuon ini, maluwas naton ang aton kaugalingon kag ang mga nagapamati sa aton. (1 Timoteo 4:16) Paano naton mapakita sa iban nga ang pagpamati sa mga pahanumdom ni Jehova praktikal kag mapuslanon gid? Paagi sa pag-aplikar sang mga prinsipio sang Biblia sa aton mismo kabuhi. Sa amo ang mga “husto nga napahamtang para sa kabuhi nga walay katapusan” may pamatuod nga ang dalanon nga ginpahamtang sa Pulong sang Dios amo gid ang pinakamaayo nga dapat sundon. (Binuhatan 13:48) Makita man nila nga ‘ang Dios yara gid sa tunga naton’ kag mapahulag sa pagbuylog sa aton sa pagsimba sa Soberanong Ginuo nga si Jehova.—1 Corinto 14:24, 25.

20, 21. Ang mga pahanumdom sang Dios kag ang iya espiritu nagabulig sa aton sa paghimo sing ano?

20 Paagi sa pagpadayon sa pagtuon sa Kasulatan, sa pag-aplikar sang aton natun-an, kag paghimulos sing bug-os sa espirituwal nga mga aman ni Jehova, mahigugma naton sing lakas ang iya mga pahanumdom. Kon pamatian, ining mga pahanumdom magabulig sa aton agod masuklob ang “bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:20-24) Ang mga pahanumdom ni Jehova kag ang iya balaan nga espiritu magabulig sa aton agod mapakita ang gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon—mga kinaiya nga indi gid kaangay sa mga kinaiya sang kalibutan nga yara sa gahom ni Satanas! (Galacia 5:22, 23; 1 Juan 5:19) Busa, makapasalamat kita nga ginapahanumdom kita sang mga kasuguan ni Jehova sa tion man sang aton personal nga pagtuon sing Biblia, paagi sa gintangdo nga mga gulang, kag sa aton mga miting, mga asambleya, kag mga kombension.

21 Bangod ginatuman naton ang mga pahanumdom ni Jehova, mahimo kita magkasadya, bisan pa nagaantos tungod sa pagkamatarong. (Lucas 6:22, 23) Nagalaum kita nga luwason kita sang Dios gikan sa labing makatalagam nga mga kahimtangan. Importante gid ina ilabi na karon nga ang tanan nga pungsod ginatipon para sa “inaway sang daku nga adlaw sang Dios nga Labing Gamhanan” sa Har–Magedon.—Bugna 16:14-16.

22. Ano ang dapat nga mangin determinasyon naton may kaangtanan sa mga pahanumdom ni Jehova?

22 Agod mabaton naton ang di-bagay nga dulot sang kabuhi nga walay katapusan, dapat naton higugmaon sing lakas ang mga pahanumdom ni Jehova kag tumanon ini sing bug-os tagipusuon. Busa kabay nga may espiritu kita sang salmista nga nag-amba: “Ang pagkamatarong sang imo mga pahanumdom tubtob sa tion nga walay latid. Ipahangop sa akon, agod magapabilin ako nga buhi.” (Salmo 119:144) Kag kabay nga ipakita naton ang determinasyon nga maathag sa mga pulong sang salmista: “Nagpanawag ako sa imo [Jehova]. O luwasa ako! Kag tumanon ko ang imo mga pahanumdom.” (Salmo 119:146) Huo, paagi sa pulong kag buhat, pamatud-an naton nga ginahigugma gid naton sing lakas ang mga pahanumdom ni Jehova.

Paano Mo Sabton?

• Paano gintamod sang salmista ang mga pahanumdom ni Jehova?

• Ngaa kinahanglan naton ang mga pahanumdom sang Dios?

• Ano nga papel ang ginatungdan sang aton mga miting may kaangtanan sa mga pahanumdom sang Dios?

• Paano ang mga pahanumdom ni Jehova nagahimo sa aton nga tuhay sa sining kalibutan?

[Mga Pamangkot sa Pagtinuon]

[Retrato sa pahina 15]

Ginhigugma sing lakas sang salmista ang mga pahanumdom ni Jehova

[Mga retrato sa pahina 16, 17]

Nagasunod sang halimbawa ni Ana, ginapat-od bala ninyo nga indi magpalya sa mga miting?

[Retrato sa pahina 18]

Ang pagpamati sa mga pahanumdom ni Jehova nagahimo sa aton nga tuhay subong matinlo kag kalahamut-an para sa pag-alagad sa iya