Magdiretso sa kaundan

Magdiretso sa listahan sang kaundan

Paano Mo Ginatakus ang Kadalag-an?

Paano Mo Ginatakus ang Kadalag-an?

 Paano Mo Ginatakus ang Kadalag-an?

GINHATAGAN sing kahulugan sang isa ka diksionaryo ang kadalag-an subong “ang pagtigayon sing manggad, kahamuot, ukon pagkaprominente.” Kompleto na bala ina nga kahulugan? Matakus lamang bala ang kadalag-an paagi sa manggad, kahamuot, ukon pagkaprominente? Antes ka magsabat, binagbinaga ini: Wala sing natigayon nga materyal nga manggad si Jesucristo sa bug-os niya nga kabuhi. Wala niya natigayon ang kahamuot sang kalabanan nga tawo; kag wala man sia ginhangad sang mga nagapahamtang sing pagsulundan sang panahon niya. Apang, si Jesus isa ka madinalag-on nga tawo. Ngaa?

Samtang yari sa duta, si Jesus “manggaranon sa Dios.” (Lucas 12:21) Sang ginbanhaw sia, ginpadyaan sia sang Dios sing purongpurong sang “himaya kag kadungganan.” Ginbayaw ni Jehova ang iya Anak “sa mataas gid nga posisyon kag mainayuhon nga ginhatagan sia sing ngalan nga labaw sa tanan iban pa nga ngalan.” (Hebreo 2:9; Filipos 2:9) Ang dalanon sang kabuhi ni Jesus nagpahalipay sang tagipusuon ni Jehova. (Hulubaton 27:11) Madinalag-on ang iya kabuhi sa duta bangod natuman ang katuyuan sini. Ginhimo ni Jesus ang kabubut-on sang Dios kag ginpadunggan ang Iya ngalan. Ginpadunggan naman sang Dios si Jesus  sing manggad, kahamuot, kag pagkaprominente nga indi gid maeksperiensiahan sang isa nga may mataas nga tinun-an, sang isa nga kilala sa politika, ukon sa isport. Si Jesus amo gid ang pinakamadinalag-on nga tawo nga nagkabuhi sa duta. Nahisayran sang Cristianong mga ginikanan nga kon sundon sang ila kabataan ang mga tikang ni Cristo, nga mangin manggaranon sa Dios kaangay ni Jesus, magaani sila sing bugana nga mga pagpakamaayo karon kag magaagom sing indi mahanduraw nga mga padya sa magaabot nga sistema sang mga butang. Wala na sing mas maayo pa nga paagi agod masunod sang isa ka pamatan-on ang mga tikang ni Cristo sangsa himuon ang ginhimo ni Jesus—paagi sa pagpakigbahin sa bug-os tion nga ministeryo kon posible ini.

Apang, sa iban nga mga kultura, kinaandan nga kinabatasan para sa mga pamatan-on ang indi pagsulod sa bug-os tion nga ministeryo. Kon makatapos na sa pag-eskwela ang isa ka pamatan-on nga lalaki, mahimo sia paabuton nga magtrabaho sing bug-os tion, magpangasawa, kag magpangabuhi sing kinaandan. Kon kaisa, ang mga pamatan-on nga may amo sina nga ginhalinan sayop nga nagapangalag-ag sa pagsulod sa bug-os tion nga ministeryo. (Hulubaton 3:27) Ngaa? Bangod sang pag-ipit, nagapauyon sila sa kinaandan nga mga talaksan sang kultura. Amo sina ang natabo kay Robert. *

Kon ang Kultura kag Konsiensia Nagasumpakilay

Nagdaku si Robert subong isa sang mga Saksi ni Jehova. Sang tin-edyer pa sia, indi gid maayo ang iya paggawi kag mga kaupdanan. Nabalaka gid ang iya iloy sa iya. Gani, ginpangabay sang iya iloy ang isa ka payunir, isa ka bug-os tion nga ministro sang mga Saksi ni Jehova, agod palig-unon sia. Ginpaathag ni ­Robert ang masunod nga natabo.

“Gin-apresyar ko gid ang ginpakita sa akon nga interes sang payunir nga utod nga lalaki. Bangod sang iya maayo nga halimbawa, luyag ko himuon ang pagpayunir subong isa ka karera sa gilayon nga makatapos ako sa pag-eskwela. Amo sadto nga nabalaka liwat si Nanay—apang tungod sa lain nga rason. Kay man, sa amon kultura wala kaso para sa isa ka babayi nga magpayunir sa gilayon pagkatapos makaeskwela, apang ang isa ka lalaki ginapaabot nga mangin malig-on anay sa pinansial, kag ugaling lamang niya hunahunaon ang pagpayunir.

“Nakatuon ako sing palangitan-an kag nagpundar sang kaugalingon nga negosyo. Wala magdugay nawili ako sa pagnegosyo kag nangin rutina na lamang ang pagtambong sa mga miting kag ang pagbantala. Gintublag ako sang akon konsiensia—nahibaluan ko nga mahimo ko maalagad si Jehova sing kapin pa. Apang, isa gid ka daku nga panikasog nga makapanginpadlos sa ginapaabot sang iban sa akon, apang malipayon ako nga ginhimo ko ini. Minyo na ako karon, kag duha ka tuig na kami nga nagapayunir sang akon asawa. Sining karon lang, gintangdo ako subong ministeryal nga alagad sa kongregasyon. Masiling ko sing tampad nga malipayon gid ako karon nga nagaalagad kay Jehova upod ang akon bug-os nga tagipusuon, tubtob sa akon bug-os nga masarangan.” Sulitsulit nga ginapalig-on sini nga magasin ang mga pamatan-on nga magtuon sing palangitan-an ukon magpalambo sing mapuslanon nga mga kalipikasyon—samtang nagaeskwela pa kon mahimo. Sa ano nga katuyuan? Agod magmanggaranon? Indi. Ang panguna nga rason amo nga agod masuportahan nila ang ila kaugalingon sing nagakaigo subong mga hamtong kag maalagad si Jehova sa ila bug-os nga masarangan, ilabi na sa bug-os tion nga ministeryo. Apang, ang masami nga nagakatabo amo nga ang mga pamatan-on nabuyo sa paghimud-os sa isa ka sekular nga karera sa bagay nga ang ministeryo nangin indi na tanto ka importante. Ang iban wala gid nagahunahuna sa pagsulod sa bug-os tion nga pag-alagad. Ngaa?

 May matun-an kita sa ginsiling ni Robert. Sang may natun-an na sia nga palangitan-an, nagpundar sing negosyo si ­Robert. Wala magdugay, yara sia sa makatalaka nga rutina nga wala sing pasingadtuan. Tuyo niya nga mangin malig-on sa pinansial. Apang may yara gid bala sa sulod ukon sa guwa sang Cristianong kongregasyon nga bug-os nga nakatigayon sina nga tulumuron? Dapat panikasugan sang mga Cristiano nga mangin masaligan sa pinansial, maukod nga nagatatap sang ila pinansial nga mga obligasyon; apang dapat nila batunon nga sa sining walay kapat-uran nga mga tion, pila gid lamang ang nakalab-ot sa kahimtangan nga makabig gid nila ang ila kaugalingon nga malig-on sa pinansial. Amo sina kon ngaa makalipay gid sa mga Cristiano ang panaad ni Jesus nga mabasa sa Mateo 6:33.

Nalipay si Robert nga ginsunod niya ang mga handum sang iya tagipusuon sa baylo sang dikta sang iya kultura. Sa karon, malipayon sia sa bug-os tion nga pag-alagad. Huo, ang bug-os tion nga ministeryo isa ka dungganon nga karera. May kalinong sa kaugalingon si ­Robert bangod ginaalagad niya si Jehova, subong siling niya, ‘sa iya bug-os nga masarangan.’

Gamita Sing Labing Maayo ang Imo mga Kinaadman

Madamo sing may kinaadman nga tawo sa tunga sang mga Saksi ni Jehova. Ang iban maalam kaayo; ang iban naman may kinaadman sa pisikal nga mga buluhaton. Ining tanan nga dulot naghalin kay Jehova, nga nagahatag “sa tanan nga tawo sing kabuhi kag sing ginhawa kag sing tanan nga butang.” (Binuhatan 17:25) Kon wala sing kabuhi, wala sing pulos ining tanan nga dulot.

Gani, nagakaigo lamang nga gamiton naton ang aton dedikado nga kabuhi sa pag-alagad kay Jehova. Amo sina ang ginpamat-od nga himuon sang isa ka may kinaadman nga pamatan-on nga lalaki. Nagkabuhi sia sadtong unang siglo C.E. Subong katapo sang isa ka prominente nga pamilya, nagdaku sia sa bantog nga siudad sang Tarsus sa Cilicia. Bisan pa natawo nga Judiyo, napanubli niya ang Romano nga pagkabanwahanon gikan sa iya amay. Bangod sina madamo sia sing kinamatarong kag pribilehiyo. Sang naghamtong na sia, nagtuon sia sing Kasuguan sa isa sang labing kilala nga “mga propesor” sadto nga panahon—si Gamaliel. Daw sa dili madugay matigayon na niya ang ‘manggad, kahamuot, kag pagkaprominente.’—Binuhatan 21:39; 22:3, 27, 28.

Sin-o ining pamatan-on nga lalaki? Saulo ang iya ngalan. Apang nangin Cristiano si Saulo kag sang ulihi nangin si apostol Pablo. Ginpahigad niya ang iya nahauna nga mga handum kag ginhugod ang iya bug-os nga kabuhi sa pag-alagad kay Jehova subong isa ka Cristiano. Nakilala si Pablo, indi subong isa ka bantog nga abogado, kundi subong makugi nga manugbantala sing maayong balita. Sa tapos mahinguyang ang halos 30 ka tuig subong isa ka misyonero, nagsulat si Pablo sa iya mga abyan sa Filipos. Ginrepaso niya sa sini ang pila sang iya mga hinimuan antes sia nangin Cristiano, kag nian nagsiling sia: “Tungod [kay Jesucristo] ginbaton ko ang kadulaan sang tanan nga butang kag ginabilang ko ini nga mga sagbot, agod nga maagom ko si Cristo.” (Filipos 3:8) Wala, wala gid nanugon si Pablo kon paano niya gingamit ang iya kabuhi!

Kamusta naman ang paghanas nga nabaton ni Pablo kay Gamaliel? Napuslan gid bala niya ini? Huo! Sa pila ka beses nakabulig sia “sa pagpangapin kag sa legal nga pagpalig-on sa maayong balita.” Apang ang panguna nga hilikuton ni Pablo amo ang mangin manugbantala sing maayong balita—isa ka butang nga wala gid matudlo sang iya nauna nga pagtuon.—Filipos 1:7; Binuhatan 26:24, 25.

Amo man sa karon, ginagamit sang iban ang ila mga dulot kag kinaadman kag bisan ang ila edukasyon sa pagpauswag sang mga intereses sang Ginharian. Si Amy, halimbawa, may titulo sang unibersidad sa komersio kag isa pa ka titulo sa abogasiya. May yara sia anay daku sing suweldo nga trabaho sa isa ka law firm (kompanya sang mga abogado), apang karon nagaalagad sia subong isa ka wala sing suweldo nga boluntaryo nga ministro sa isa sang mga sanga talatapan sang Watch ­Tower So­ciety. Amo sini ang paglaragway ni Amy sa iya kabuhi karon: “Nagapati ako nga ginhimo ko ang pinakamaayo nga desisyon sa kabuhi. . . . Wala gid ako sing handum nga ibaylo ang akon kahimtangan sa akon mga katubotubo sa unibersidad. Nalipay gid ako sa akon ginpili nga dalanon. Natigayon ko ang tanan ko nga kinahanglanon kag luyag—isa ka kontento, malipayon nga kabuhi kag isa ka makaalayaw kag makalilipay nga karera.”

Ginpili ni Amy ang dalanon nga naghatag sa iya sing kalinong sa hunahuna, kaayawan, kag pagpakamaayo ni Jehova. Pat-od nga amo gid sini ang luyag sang Cristianong mga ginikanan para sa ila mga anak!

 Kadalag-an sa Cristianong Ministeryo

Sa pagkamatuod, kinahanglan ang nagakaigo nga pagtamod sa kadalag-an mismo sa Cristianong ministeryo. Madali kita magbatyag nga madinalag-on kon naghinguyang kita sing makalilipay nga tion sa pag-alagad sa latagon, nakapahamtang sing mga literatura sa Biblia ukon nakasugilanon sing makawiwili sa mga tagbalay tuhoy sa Biblia. Apang kon talagsa lang kita makakita sing isa nga nagapamati, mahimo kita masulay sa paghinakop nga ginauyangan lamang naton ang aton tion. Apang, dumduma nga ang isa sang mga kahulugan sang kadalag-an amo ‘ang pagtigayon sing kahamuot.’ Kay sin-o kahamuot ang luyag naton matigayon? Siempre, kay Jehova. Mabaton naton ini mamati man ukon indi ang mga tawo sa aton mensahe. Gintudluan ni Jesus ang iya mga disipulo sing isa ka epektibo nga leksion may kaangtanan sini.

Madumduman mo nga ginpadala ni Jesus ang 70 ka manugbantala sang Ginharian “sa tagsa ka siudad kag duog nga iya kadtuan.” (Lucas 10:1) Magabantala sila sa mga banwa kag minuro nga indi kaupod si Jesus. Bag-o ini nga eksperiensia para sa ila. Gani, ginhatagan sila ni Jesus sing detalyado nga instruksion antes sila ipadala. Kon makasumalang sila sing “abyan sang paghidait,” panaksihan nila sia sing maayo nahanungod sa Ginharian. Apang, kon sikwayon sila, dapat sila magpadayon sa ila hilikuton, nga wala nabalaka. Ginpaathag ni Jesus nga yadtong nagpangindi sa pagpamati sa ila, sa kamatuoran, nagsikway mismo kay Jehova.—Lucas 10:4-7, 16.

Sang matapos sang 70 ang ila tulumanon nga pagbantala, nagreport sila kay Jesus “nga may kalipay, nga nagasiling: ‘Ginuo, bisan pa ang mga demonyo nagpasakop sa amon paagi sa paggamit sang imo ngalan.’” (Lucas 10:17) Mahimo gid nga makakulunyag para sa sadtong di-himpit nga mga tawo nga magpaguwa sing gamhanan nga espiritu nga mga tinuga! Apang, ginpaandaman ni Jesus ang iya nakunyag nga mga disipulo: “Indi kamo magkalipay sa sini, nga napasakop sa inyo ang mga espiritu, apang magkalipay bangod ang inyo mga ngalan nasulat na sa mga langit.” (Lucas 10:20) Mahimo nga wala pirme sing gahom ang 70 sa pagtabog sa mga demonyo, kag wala man sila pirme nakatigayon sing maayo nga mga resulta sa ministeryo. Apang kon magpabilin sila nga matutom, pirme nila matigayon ang kahamuot ni Jehova.

Ginaapresyar Mo Bala ang Bug-os Tion nga mga Alagad?

Ginsilingan anay sang isa ka pamatan-on nga lalaki ang isa ka Cristianong gulang: “Kon makagradwar na ako sa hayskul, tinguhaan ko nga makakita sing trabaho. Kon indi gani ako makakita sing trabaho, nian binagbinagon ko ang pagsulod sa isa ka porma sang bug-os tion nga pag-alagad.” Apang, indi ina ang pagtamod sang kalabanan nga nagsulod sa payunir nga ministeryo. Agod makapayunir, ginbiyaan sang iban ang mga kahigayunan nga matigayon ang mga karera nga may daku nga suweldo. Wala ginbaton sang iban ang makakulunyag nga mga oportunidad sa edukasyon. Kaangay ni apostol Pablo, nagsakripisyo sila, apang kaangay nanday Pablo, ­Robert, kag Amy, wala sila naghinulsol sa ila desisyon. Ginaapresyar nila ang ila pribilehiyo nga magamit ang ila mga dulot sa pagdayaw kay Jehova, nga takus sang pinakamaayo nga ila mahatag.

Bangod sang lainlain nga mga rason, madamong matutom nga mga Saksi ni Jehova ang indi makapayunir. Ayhan may Makasulatanhon sila nga mga obligasyon nga dapat tatapon. Apang, kon ginaalagad nila ang Dios sa ila bug-os nga ‘tagipusuon, kalag, kag hunahuna,’ nahamuot si Jehova sa ila. (Mateo 22:37) Bisan pa indi sila makapayunir, ginakilala nila nga yadtong nagapayunir nakapili sing maayo nga karera.

Si apostol Pablo nagsulat: “Indi na kamo magpadihon suno sa sining sistema sang mga butang.” (Roma 12:2) Nahisuno sa laygay ni Pablo, indi naton dapat pagtugutan ang mga talaksan sa kultura kag sekular sini nga sistema nga magdihon sang aton hunahuna. Makapayunir ka man ukon indi, himua ang pag-alagad kay Jehova nga pinakaimportante sa imo kabuhi. Magamadinalag-on ka basta ginakahamut-an ka ni Jehova.

[Nota]

^ par. 4 Gin-islan ang mga ngalan.

[Retrato sa pahina 19]

Indi pagtuguti nga mabuyo sa makatalaka nga rutina nga wala sing pasingadtuan