Magdiretso sa kaundan

Magdiretso sa listahan sang kaundan

Duta—Isa Lamang Bala ka Duog Tililawan?

Duta—Isa Lamang Bala ka Duog Tililawan?

 Duta—Isa Lamang Bala ka Duog Tililawan?

DAW ano gid nga kalipay! Nakapasar sia. Ang estudyante nga nagkuha sing mabudlay nga pasinawan sa sulod sang duha ka semana nakabaton sang ulihi sing isa ka makalilipay nga report. Makatrabaho na sia karon subong sang luyag gid niya.

Amo man sina ang pagtamod sang madamo nga tawo sa kabuhi sa duta. Ginakabig nila ini subong panguna lamang nga pagtilaw nga dapat maeksperiensiahan sang tanan. Yadtong “makapasar” nagapadayon sa mas maayo pa nga butang sa dagway sang Pihak nga Kinabuhi. Sa pagkamatuod, masubo gid kon ang karon nga kabuhi—isa lamang ka pagluntad para sa madamo—amo ang labing maayo nga malauman sang mga tawo. Bisan pa nga mapagros kag manggaranon sa kalabanan nga bahin sang iya kabuhi, ang karakter sang Biblia nga si Job nagsiling: “Ang tawo, nga natawo sa babayi, malip-ot sing kabuhi kag puno sing kagamo.”—Job 14:1.

Nagabinagbinag sang panghunahuna sang madamo, ang New Cath­ol­ic En­cy­clo­pedia nagsiling: “Ang himaya sa langit amo ang kapalaran nga ginatuyo sang Dios sa tawo. . . . Ang kalipay sang tawo mahimo tamdon nga nasandig lamang sa pag-agom niya sing bug-os nga kalipay sa langit.” Ang isa ka surbe sining karon lang sang ­Church of ­Christ sa Estados Unidos nagsiling nga 87 porsiento sang mga ginsurbe ang nagapati nga mahimo sila makapalangit kon mapatay sila.

Madamo nga di-Cristiano ang nagalaum man nga magtaliwan sa duta pakadto sa mas maayo nga duog pagkapatay. Ang mga Muslim, halimbawa, nagalaum sa pagkadto sa paraiso sa langit. Ang mga sumulunod sang ­Pure ­Land nga mga sekta sang Budhismo sa Tsina kag Japan nagapati nga paagi sa wala katapusan nga pagbungat sang “Ami­tabha,” ang ngalan ni Bud­dha sang Wala Latid nga Kapawa, matawo liwat sila sa Pure Land, ukon Nakatundan nga Paraiso, diin magakabuhi sila sing tuman ka malipayon.

Sing makawiwili, wala ginapakita sang Biblia, ang ginbadbad kag ginpanagtag sing pinakalapnag nga balaan nga libro sa kalibutan, ang duta subong isa ka duog nga gikan sini dapat magpalagyo, isa ka sahi sang tungtungan nga bato padulong sa pag-uswag. Halimbawa, ini nagasiling: “Ang mga matarong magapanag-iya sang duta, kag magapuyo sila sing dayon sa sini.” (Salmo 37:29) Makita man sa Biblia ang bantog nga pulong ni Jesus: “Bulahan ang mga mahagop: kay sila magapanubli sang duta.”—Mateo 5:5, King James Version.

Ang kinaandan nga pagtamod nga ang pagpuyo naton sa duta umalagi lamang nagapahangop nga ang kamatayon ganhaan padulong sa isa ka malipayon nga pagpuyo sa pihak nga kinabuhi. Kon amo, ang kamatayon isa gid ka pagpakamaayo. Apang amo bala sina ang kinaandan nga pagtamod sang mga tawo sa kamatayon, ukon ginatinguhaan nila nga palawigon ini nga kabuhi? Ginapakita sang eksperiensia nga kon ang mga tawo nagaagom sing maayo nga panglawas kag kalig-unan, indi nila luyag mapatay.

Walay sapayan sina, bangod ang kabuhi sa duta puno sing kalainan kag pag-antos, ginatamod gihapon sang madamo ang langit subong ang lamang nga duog agod masalapuan ang matuod nga paghidait kag kalipay. Ang langit isa lamang bala ka duog sang makalilipay nga paghidait, nga luwas gid sa kalainan kag kagamo? Kag sa langit lamang bala ang Pihak nga Kinabuhi? Mahimo ikaw makibot sa mga sabat sang Biblia. Padayuna palihug ang pagbasa.