Magdiretso sa kaundan

Magdiretso sa listahan sang kaundan

Pagsab-ug sing mga Binhi sang Kamatuoran sang Ginharian

Pagsab-ug sing mga Binhi sang Kamatuoran sang Ginharian

 Pagsab-ug sing mga Binhi sang Kamatuoran sang Ginharian

“Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot.”MANUGWALI 11:6.

1. Sa anong kahulugan ang mga Cristiano nagasab-ug sing binhi sa karon?

ANG panguma importante gid sa dumaan nga katilingban sang mga Hebreo. Amo ina kon ngaa ginlakip ni Jesus, nga naghinguyang sang iya bug-os nga kabuhi subong isa ka tawo sa Ginsaad nga Duta, ang tema tuhoy sa panguma sa iya mga ilustrasyon. Halimbawa, ginpaanggid niya ang pagbantala sing maayong balita sang Ginharian sang Dios sa pagsab-ug sing binhi. (Mateo 13:​1-9, 18-23; Lucas 8:​5-15) Tubtob karon, nagapuyo man kita sa katilingban nga nagapanguma ukon wala, ang pagsab-ug sing espirituwal nga binhi amo ang labing importante nga hilikuton nga ginahimo sang mga Cristiano.

2. Daw ano ka importante ang aton hilikuton nga pagbantala, kag anong pila ka butang ang ginahimo karon agod matuman ini?

2 Ang pagpakigbahin sa pagsab-ug sing kamatuoran sang Biblia sa sining tion sang katapusan isa ka daku nga pribilehiyo. Ang Roma 10:​14, 15 nagapabutyag sang pagkaimportante sini nga hilikuton: “Kag, paano bala ang pagkabati nila kon walay manugwali? Paano naman sila makabantala kon wala sila ginpadala? Subong sang nasulat: ‘Daw  ano katahom sang mga tiil sang mga nagabantala sing maayong balita sang maayong mga butang!’ ” Wala pa gid anay matabo nga mas importante nga magpadayon nga may positibo nga panimuot sa pagtuman sining hatag-Dios nga hilikuton. Tungod sina ang mga Saksi ni Jehova masako gid sa paghimo kag sa pagpanagtag sing mga Biblia kag sing mga bulig sa pagtuon sa Biblia sa 340 ka hambal. Ang paghanda sining materyal nagakinahanglan sing kapin sa 18,000 ka boluntaryo sa ila mga ulong-talatapan kag mga sanga talatapan sa lainlain nga kadutaan. Kag halos anom ka milyon ka Saksi ang nagapakigbahin sa pagpanagtag sining mga literatura sang Biblia sa bug-os nga kalibutan.

3. Ano ang matigayon paagi sa pagsab-ug sang kamatuoran sang Ginharian?

3 Ano ang bunga sining lakas nga pagpangabudlay? Subong anay sa maaga nga mga inadlaw sang Cristianismo, madamo sa karon ang nagabaton sang kamatuoran. (Binuhatan 2:​41, 46, 47) Apang, mas importante sangsa daku nga kadamuon sang bag-ong bawtismado nga mga manugbantala sang Ginharian amo ang kamatuoran nga ining daku nga pagpanaksi nagaamot sa pagpakabalaan sa ngalan ni Jehova kag sa pagbindikar sa iya subong ang lamang matuod nga Dios. (Mateo 6:9) Dugang pa, ang ihibalo sa Pulong sang Dios nagapauswag sang kabuhi sang madamo kag mahimo magdul-ong sa ila kaluwasan.​—⁠Binuhatan 13:⁠47.

4. Tubtob diin nabalaka ang mga apostoles sa mga tawo nga ila anay ginbantalaan?

4 Ang mga apostoles nakahibalo gid sang nagahatag-kabuhi nga importansia sang maayong balita, kag nagaulikid gid sila sa ila mga ginbantalaan. Maathag ini sa mga pulong ni apostol Pablo, sang nagsulat sia: “Nga may malum-ok nga pagpalangga sa inyo, nahamuot kami sa pagpaambit sa inyo, indi lamang sang maayong balita sang Dios, kundi man sang amon kaugalingon nga mga kalag, bangod nga nangin mahal gid kamo sa amon.” (1 Tesalonica 2:8) Sa pagpakita sining matuod nga pag-ulikid sa mga tawo, si Pablo kag ang iban pa nga apostoles nag-ilog kay Jesus kag sa langitnon nga mga anghel, nga masako gid sa nagaluwas-kabuhi nga hilikuton. Repasuhon naton ang importante nga mga papel nga ginatungod sining langitnon nga mga alagad sang Dios sa pagsab-ug sang kamatuoran sang Ginharian, kag tan-awon naton kon paano kita ginapalig-on sang ila halimbawa nga tumanon ang aton katungdanan.

Si Jesus—Ang Manugsab-ug Sang Kamatuoran Sang Ginharian

5. Sa anong hilikuton ilabi na nga masako si Jesus sang yari sia sa duta?

5 Si Jesus, nga isa ka himpit nga tawo, may ikasarang sa pag-aman sing madamong maayo nga butang sa materyal nga paagi para sa katawhan sang panahon niya. Halimbawa, mahimo kuntani niya nalubad ang madamong sayop nga mga ideya sa medisina sang panahon niya, ukon mahimo kuntani niya napauswag ang paghangop sang tawo sa iban nga mga siensia. Apang, gin-athag niya sa maaga gid nga bahin sang iya ministeryo nga ang iya hilikuton amo ang pagbantala sing maayong balita. (Lucas 4:​17-21) Kag sa talipuspusan sang iya ministeryo, sia nagpaathag: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Gani nangin masako sia sa pagsab-ug sing mga binhi sang kamatuoran sang Ginharian. Ang pagtudlo sa iya mga katubotubo tuhoy sa Dios kag sa Iya mga katuyuan mas importante sangsa bisan anong iban pa nga edukasyon nga ginhatag ni Jesus sa ila.​—⁠Roma 11:​33-36.

6, 7. (a) Anong talalupangdon nga saad ang ginhimo ni Jesus antes sia magkayab sa langit, kag paano niya ini ginatuman? (b) Paano ikaw personal nga naapektuhan sang panimuot ni Jesus sa hilikuton nga pagbantala?

6 Ginpatuhuyan ni Jesus ang iya kaugalingon subong Manugsab-ug sang kamatuoran sang Ginharian. (Juan 4:​35-38) Ginpalapnag niya ang mga binhi sang maayong balita sa tagsa ka higayon. Bisan pa nagatagumatayon sia sa usok, ginbantala niya ang maayong balita tuhoy sa palaabuton nga paraiso sa duta. (Lucas 23:43) Dugang pa, ang iya daku nga pag-ulikid nga ang maayong balita mabantala wala matapos sang mapatay sia sa usok sang pag-antos. Antes sia magkayab sa langit, ginsugo niya ang mga apostoles nga padayunon ang pagsab-ug sing mga binhi sang kamatuoran sang Ginharian kag ang paghimo sing mga disipulo. Nian tumalagsahon nga nagsaad si Jesus. Sia nagsiling: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—⁠Mateo 28:​19, 20.

7 Paagi sa sining mga pulong si Jesus nagsaad sa pagsakdag, sa pagtuytoy, kag sa pag-amlig sa hilikuton nga pagbantala sing maayong balita “sa tanan nga adlaw tubtob sa katapusan sang sistema sang mga butang.” Tubtob sa aton adlaw, si Jesus padayon nga nagapakita sing personal nga interes sa  hilikuton nga pag-ebanghelyo. Sia ang aton Lider, nga nagadumala sa pagsab-ug sing kamatuoran sang Ginharian. (Mateo 23:10) Subong Ulo sang Cristianong kongregasyon, may salabton sia sa atubangan ni Jehova para sa sining bug-os kalibutan nga hilikuton.​—⁠Efeso 1:​22, 23; Colosas 1:⁠18.

Ang mga Anghel Nagabantala Sing Maayong Balita

8, 9. (a) Paano ginpakita sang mga anghel ang matuod nga interes sa mga hilikuton sang tawo? (b) Sa anong kahulugan masiling nga kita isa ka talan-awon sa teatro sa mga anghel?

8 Sang gintuga ni Jehova ang duta, ang mga anghel “nagsinggit sing tingob sa kasadya, kag . . . naghinugyaw sa kalipay.” (Job 38:4-7) Sugod sadto, ining langitnon nga mga tinuga nagpakita sing daku nga interes sa mga hilikuton sang tawo. Gingamit sila ni Jehova sa pagpaalinton sang mga pahibalo sang Dios sa mga tawo. (Salmo 103:20) Matuod ini ilabi na may kaangtanan sa pagpalapnag sing maayong balita sa aton adlaw. Sa bugna nga ginhatag sa iya, nakita ni apostol Juan ang “anghel nga nagalupad sa tunga sang langit” nga may “walay katapusan nga maayong balita nga ibantala sa mga nagapuyo sa duta, kag sa tagsa ka pungsod kag tribo kag hambal kag katawhan, nga nagasiling sa mabaskog nga tingog:  ‘Kahadluki ninyo ang Dios kag hatagi sia sing himaya, kay nag-abot na ang oras sang iya paghukom.’”​—⁠Bugna 14:​6, 7.

9 Ginapatuhuyan sang Biblia ang mga anghel subong “mga espiritu para mag-alagad sa publiko, nga ginpadala agod mag-alagad sa mga magapanubli sing kaluwasan.” (Hebreo 1:14) Samtang ang mga anghel nagatuman sing malangkagon sang ila gintangdo nga mga katungdanan, may higayon sila nga obserbahan kita kag ang aton hilikuton. Subong daw yara sa kitaon gid nga entablado sa teatro, ginatuman naton ang aton hilikuton sa atubangan sang langitnon nga tumalambong. (1 Corinto 4:9) Daw ano ka makatarunganon kag makakulunyag nga mahibaluan nga wala kita nagapangabudlay sing isahanon subong mga manugsab-ug sang kamatuoran sang Ginharian!

Ginatuman Naton Sing Malangkagon ang Aton Katungdanan

10. Paano maaplikar sa aton hilikuton nga pag-ebanghelyo ang praktikal nga laygay sa Manugwali 11:​6?

10 Ngaa interesado gid si Jesus kag ang mga anghel sa aton hilikuton? Ginhatag ni Jesus ang isa ka rason sang nagsiling sia: “Ginasiling ko sa inyo, may kalipay sa tunga sang mga anghel sang Dios tungod sa isa ka makasasala nga nagahinulsol.” (Lucas 15:10) Ginapakita man naton inang matuod nga interes sa mga tawo. Gani, ginahimo naton ang aton bug-os nga masarangan agod ipalapnag ang kamatuoran sang Ginharian bisan diin. Ang mga pulong sang Manugwali 11:6 maaplikar sa aton hilikuton. Didto ang Biblia nagalaygay sa aton: “Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot; kay wala ka makahibalo kon diin ini magauswag, kon diri ukon dira, ukon kon ang duha mangin alangay nga maayo.” Isiling naton nga sa tagsa ka tawo nga nagabaton sang aton mensahe ginatos ukon linibo pa gani ang mahimo nga nagasikway sini. Apang kaangay sang mga anghel, nagakalipay kita kon bisan ang “isa ka makasasala” nagabaton sang mensahe sang kaluwasan.

11. Daw ano ka epektibo ang paggamit sing mga publikasyon nga pasad sa Biblia?

11 Daku ang nadalahig sa pagbantala sing maayong balita. Ang isa ka importante nga bulig sa sining hilikuton amo ang naimprinta nga materyal pasad sa Biblia nga ginagamit sang mga Saksi ni Jehova. Sa pila ka bahin, ining mga publikasyon kaangay man sa mga binhi nga ginasab-ug bisan diin. Wala kita makahibalo kon diin ini magmadinalag-on. Kon kaisa ang publikasyon mahimo magsulusaylo sa mga tawo antes may isa nga magabasa sini. Mahimo pa gani tuytuyan ni Jesus kag sang mga anghel ang mga hitabo sa pila ka halimbawa agod mahanabo ini para sa kaayuhan sang mga matarong-sing-tagipusuon. Binagbinaga ang pila ka eksperiensia nga nagailustrar kon paano pahanabuon ni Jehova ang wala ginapaabot kag makalilipay nga mga resulta nga ginagamit ang mga literatura nga ginbilin sa mga tawo.

Ang Hilikuton Sang Matuod nga Dios

12. Paano ang isa ka daan nga magasin nangin instrumento sa pagbulig sa isa ka pamilya nga makilala si Jehova?

12 Sang 1953, sanday Robert, Lila, kag mga anak  nila nagsaylo halin sa daku nga siudad pakadto sa gabok kag daan nga balay sa uma sa Pennsylvania, E.⁠U.⁠A. Wala pa lang madugay nga nakasaylo, namat-od si Robert sa paghimo sing banyo sa ubos sang nadingdingan nga hagdan. Sang ginpanguha niya ang mga kahoy, natukiban niya nga sa likod sang dingding, ang mga ilaga nagtipon sang gision nga mga papel, panit sang walnut, kag iban pa nga mga sagbot. Didto, sa tunga sini nga tanan, yara ang isa ka kopya sang magasin nga The Golden Age. Nawili si Rob­ert ilabi na sa artikulo may kaangtanan sa pagpadaku sa mga anak. Nagdayaw gid sia sa maathag, pasad-sa-Biblia nga panuytoy nga ginhatag sa magasin amo nga ginsugiran niya si Lila nga magabuylog sila sa “relihion sang The Golden Age.” Sa sulod lamang sang pila ka semana, ang mga Saksi ni Jehova nagduaw sa ila balay, apang ginsilingan sila ni Rob­ert nga ang pamilya interesado lamang sa “relihion sang The Gold­en Age.” Ginpaathag sang mga Saksi nga ang The Gold­en Age may bag-o na nga ngalan, ang Magmata! Si Rob­ert kag si Lila nagsugod sa pagtuon sing tayuyon sa Biblia upod sa mga Saksi, kag sang ulihi ginbawtismuhan sila. Ginsab-ug man nila ang mga binhi sang kamatuoran sa ila mga anak kag nag-ani sing bugana. Sa karon, kapin sa 20 ka katapo sining pamilya, lakip ang tanan pito ka anak nanday Robert kag Lila, ang bawtismado nga mga alagad ni Jehova nga Dios.

13. Ano ang nagpahulag sa isa ka mag-asawa sa Puer­to Rico nga mapalambo ang interes sa Biblia?

13 Sang nagligad nga mga 40 ka tuig, sanday Wil­liam kag Ada, mag-asawa nga taga-Puer­to Rico, indi interesado sa pagtuon sa Biblia. Kon manuktok gani ang mga Saksi ni Jehova sa ila ganhaan, ang mag-asawa nagpakunokuno nga wala sa balay. Isa ka adlaw nagkadto si Wil­liam sa isa junk­yard agod magbakal sing isa ka butang nga kinahanglanon para sa kalay-uhon sa balay. Sang manuglakat na sia, nakita niya ang duag-lemon nga libro sa daku nga basurahan. Ini amo ang Religion, isa ka libro nga ginbalhag sang mga Saksi ni Jehova sang 1940. Gindala pauli ni Wil­liam ang libro kag nakunyag sia sa pagbasa tuhoy sa kinatuhayan sang butig kag matuod nga relihion. Sang nagduaw liwat ang mga Saksi ni Jehova, sanday Wil­liam kag Ada malipayon nga namati sa ila mensahe kag nagtuon sa Biblia upod sa ila. Mga pila ka bulan sang ulihi ginbawtismuhan sila sa Di­vine Will Inter­na­tion­al As­sem­bly sang 1958. Sugod sadto, kapin sa 50 ka tawo ang nabuligan nila nga mangin bahin sang aton Cristianong paghiliutod.

14. Subong sang ginapakita sang isa ka eksperiensia, ano ang mahimo nga matigayon sang aton pasad-sa-Biblia nga mga literatura?

14 Si Karl 11 anyos lamang kag medyo sutil. Daw pirme sia nagakaulamid sa gamo. Gintudluan sia sang iya amay, nga isa ka Aleman nga manugwali sang Metodista, nga ang malain nga mga tawo ginasunog sa impierno kon mapatay sila. Gani nahadlok gid si Karl sa impierno. Isa ka adlaw sang 1917, nadiparahan ni Karl ang isa ka may imprinta nga panid sang papel sa dalan kag ginpudyot ini. Samtang ginabasa niya ini, ang iya mga mata gilayon nga natuon sa pamangkot: “Ano ang impierno?” Ang papel isa ka imbitasyon sa pamulongpulong publiko sa tema tuhoy sa impierno, nga  ginsakdag sang mga Estudyante sang Biblia, nga kilala karon subong mga Saksi ni Jehova. Pagligad sang mga isa ka tuig, pagkatapos sang pila ka sesyon sang pagtuon sa Biblia, si Karl ginbawtismuhan, kag bangod sina nangin isa sang mga Estudyante sang Biblia. Sang 1925 gin-agda sia nga magtrabaho sa bug-os kalibutan nga ulong-talatapan sang mga Saksi ni Jehova​—⁠diin nagaalagad gihapon sia. Ang Cristianong karera nga nagalawig sing kapin sa walo ka dekada nagsugod paagi sa isa ka panid sang papel sa dalan.

15. Ano ang sarang himuon ni Jehova, subong sang nakita niya nga nagakaigo?

15 Matuod, labaw sa ikasarang sang tawo nga mahibaluan kon kag tubtob diin direkta nga nadalahig ang mga anghel sa sining mga eksperiensia. Apang, indi gid kita dapat magduhaduha nga si Jesus kag ang mga anghel may aktibo nga papel sa hilikuton nga pagbantala kag mahimo tuytuyan ni Jehova ang mga nagakatabo kon nakita niya nga nagakaigo. Ini kag ang madamo pa kaanggid nga mga eksperiensia nagailustrar sang maayo nga mahimo matigayon sang aton literatura sa tapos naton ini mapahamtang.

Gintulinan Kita Sing Isa ka Bahandi

16. Ano ang matun-an naton gikan sa mga pulong sang 2 Corinto 4:​7?

16 Si apostol Pablo nagpamulong tuhoy sa “bahandi sa human-sa-daga nga mga suludlan.” Ina nga bahandi amo ang hatag-Dios nga hilikuton sa pagbantala, kag ang human-sa-daga nga mga suludlan amo ang mga tawo nga gintulinan ni Jehova sini nga bahandi. Sanglit ini nga mga tawo di-himpit kag may mga limitasyon, si Pablo nagpadayon sa pagsiling nga ang resulta sang paghatag sa ila sini nga hilikuton amo nga “ang gahom nga labaw sa kinaandan mangin iya sang Dios kag indi gikan sa amon kaugalingon.” (2 Corinto 4:7) Huo, makasalig kita nga si Jehova magahatag sa aton sing gahom nga kinahanglan agod matuman naton ang hilikuton karon.

17. Ano ang masumalang naton samtang ginasab-ug naton ang mga binhi sang kamatuoran sang Ginharian, kag ngaa dapat naton huptan ang positibo nga panimuot walay sapayan sini?

17 Sa masami nagahimo kita sing mga sakripisyo. Mahimo nga mabudlay ukon indi masulhay ang magpangabudlay sa pila ka teritoryo. May mga lugar diin ang kalabanan nga mga tawo daw wala gid nagasapak, di-mainabyanon pa gani. Mahimo nga dapat himuon ang daku nga panikasog sa subong sini nga mga lugar nga daw wala sing makita nga kadalag-an. Apang ang aton panikasog takus sa sini kay daku gid kaayo ang nataya. Dumduma, ang mga binhi nga ginasab-ug ninyo makahatag sa mga tawo sing kalipay sa karon kag subong man sing kabuhi nga walay katapusan sa ulihi. Ang mga pulong sang Salmo 126:6 napamatud-an nga matuod sing madamo nga beses: “Ang isa nga wala duhaduha nga nagalakat, nga nagatalangison pa, dala ang isa ka puyo sang binhi, wala duhaduha nga magasulod nga nagasinggit sa kasadya, dala ang iya mga linaylay.”

18. Paano naton mahatagan sing dalayon nga igtalupangod ang aton ministeryo, kag ngaa dapat naton ini himuon?

18 Himuslan naton ang tagsa ka nagakaigo nga higayon nga isab-ug ang mga binhi sang kamatuoran sang Ginharian sing bugana. Kabay nga indi gid naton pagkalimtan nga, bisan pa kita ang nagatanom kag nagabunyag sang mga binhi, si Jehova amo ang nagapatubo sini. (1 Corinto 3:​6, 7) Apang, subong nga ginahimo ni Jesus kag sang mga anghel ang ila bahin sa hilikuton, ginapaabot ni Jehova nga tumanon naton ang aton ministeryo sing bug-os. (2 Timoteo 4:5) Kabay nga hatagan naton sing dalayon nga igtalupangod ang aton pagpanudlo, ang aton panimuot, kag ang aton kalangkag sa ministeryo. Ngaa? Si Pablo nagasabat: “Sa paghimo sini maluwas mo ang imo kaugalingon kag ang mga nagapamati sa imo.”​—⁠1 Timoteo 4:⁠16.

Ano ang Natun-an Naton?

• Sa anong mga paagi ang aton pagsab-ug nga hilikuton nagapatubas sing maayong mga resulta?

• Paano si Jesucristo kag ang mga anghel nadalahig sa hilikuton nga pag-ebanghelyo sa karon?

• Ngaa dapat kita mangin maalwan subong mga manugsab-ug sang kamatuoran sang Ginharian?

• Kon makasumalang kita sing indi pagsapak ukon indi pagkamainabyanon sa aton ministeryo, ano ang dapat magpahulag sa aton nga magpadayon?

[Mga Pamangkot sa Pagtinuon]

[Piktyur sa pahina 15]

Kaangay sang mga mangunguma sa dumaan nga Israel, ginapalapnag karon sang mga Cristiano ang mga binhi sang kamatuoran sang Ginharian sing bugana

[Piktyur sa pahina 16, 17]

Ang mga Saksi ni Jehova nagahimo kag nagapanagtag sing nagkalainlain nga pasad-sa-Biblia nga mga publikasyon sa 340 ka hambal