Magdiretso sa kaundan

Magdiretso sa listahan sang kaundan

Ibantala ang Maayong Balita sing Malangkagon

Ibantala ang Maayong Balita sing Malangkagon

 Ibantala ang Maayong Balita sing Malangkagon

“Magmainit kamo sa espiritu. Magpaulipon kamo para kay Jehova.”—ROMA 12:⁠11.

1, 2. Ano nga panimuot ang ginapanikasugan sang mga Cristiano nga huptan subong mga manugbantala sing maayong balita?

ISA ka pamatan-on nga lalaki ang nakunyag sa bag-o nga trabaho. Sa iya una nga adlaw sa trabaho, mabinalak-on nga ginahulat niya ang mga instruksion sang iya amo. Malangkagon nga ginapaabot niya ang iya una nga hilikuton kag serioso gid sia sa sini. Nalangkag sia nga himuon ang iya bug-os nga masarangan.

2 Sa kaanggid nga paagi, ginatamod naton subong mga Cristiano ang aton kaugalingon subong bag-ong mga mamumugon. Sanglit ang aton paglaum amo ang magkabuhi sing dayon, masiling naton nga nagasugod pa lang kita sa pagtrabaho para kay Jehova. Pat-od gid nga ang aton Manunuga may madamong hilikuton nga ginahunahuna para sa aton agod magpabilin kita nga masako sa walay katubtuban. Apang ang una gid nga hilikuton nga nabaton naton amo ang pagpahayag sing maayong balita sang iya Ginharian. (1 Tesalonica 2:4) Ano ang balatyagon naton sa sining tulumanon gikan sa Dios? Kaangay sang pamatan-on nga lalaki, luyag naton ini tumanon sa aton bug-os nga masarangan, sing makugihon, sing malipayon​—⁠huo, sing malangkagon!

3.Ano ang kinahanglan agod magmadinalag-on subong ministro sing maayong balita?

3 Matuod, ang paghupot sing subong sini ka positibo nga panimuot makahalangkat. Dugang sa aton ministeryo, may madamo pa kita nga salabton, ang pila sini mahimo nga nagapahago sa aton sa pisikal kag sa emosyon. Sa kadamuan, nasarangan naton nga atipanon ining mga butang samtang ginahatagan sing nagakaigo nga igtalupangod ang ministeryo. Apang, mahimo ini mangin dalayon nga pagpanikasog. (Marcos 8:34) Ginpadaku ni Jesus nga ang aton kadalag-an subong mga Cristiano magakinahanglan sing lakas nga panikasog.​—⁠Lucas 13:⁠24.

4. Paano ang adlaw-adlaw nga mga kabalaka makaapektar sang aton espirituwal nga panimuot?

4 Bangod sang tuman kadamo nga butang nga dapat himuon, madali kita magbatyag nga nabudlayan ukon nabug-atan kon kaisa. Ang “mga kabalaka sa kabuhi” mahimo magbalabag sa aton kakugi kag apresasyon sa teokratikong mga hilikuton. (Lucas 21:​34, 35; Marcos 4:​18, 19) Bangod sang aton di-himpit tawhanon nga kinaugali, mahimo naton bayaan ang ‘aton nahauna nga gugma.’ (Bugna 2:​1-4) Ang pila ka bahin sang aton pag-alagad kay Jehova mahimo nga daw mangin rutina na lamang. Paano ang Biblia nagahatag sing kinahanglanon nga pagpalig-on agod mahuptan naton nga buhi ang aton kakugi sa ministeryo?

Kaangay Sang “Kalayo nga Nagadabdab” sa Aton Tagipusuon

5, 6. Paano gintamod ni apostol Pablo ang iya pribilehiyo sa pagbantala?

5 Ang ministeryo nga gintulin ni Jehova sa aton tuman gid ka bilidhon agod tugutan ini nga mangin kinaandan lamang. Ginkabig ni apostol Pablo ang pagbantala sing maayong balita nga isa ka daku gid nga pribilehiyo, kag gintamod niya ang iya kaugalingon subong indi takus agod tulinan sini. Sia nagsiling: “Sa akon, isa ka tawo nga labing kubos gid sa tanan nga balaan, ginhatag ining di-bagay nga kaayo, agod mabantala ko sa mga pungsod ang maayong balita tuhoy sa di-matungkad nga kamanggaran ni Cristo kag mapakita sa tanan nga tawo kon paano ginadumalahan ang sagrado nga tinago nga sugod sa walay latid nga nagligad natago sa Dios, nga nagtuga sang tanan nga butang.”​—⁠Efeso 3:​8, 9.

6 Ang positibo nga panimuot ni Pablo sa iya ministeryo isa ka labing maayo nga halimbawa para sa aton. Sa iya sulat sa mga taga-Roma, sia nagsiling: “May kalangkag sa bahin ko nga ipahayag man ang maayong balita.” Wala niya  ginkahuya ang maayong balita. (Roma 1:​15, 16) May husto sia nga panimuot kag nalangkag nga tumanon ang iya ministeryo.

7. Sa iya sulat sa mga taga-Roma, batok sa ano nga nagpaandam si Pablo?

7 Nakita ni apostol Pablo ang kinahanglanon nga huptan ang makugi nga punto-de-vista, gani ginlaygayan niya ang mga Cristiano sa Roma: “Indi kamo magligoy sa inyo hilikuton. Magmainit kamo sa espiritu. Magpaulipon kamo para kay Jehova.” (Roma 12:11) Ang Griegong tinaga nga ginbadbad nga “magligoy” nagakahulugan sing “magpabuyanbuyan, magtinamad.” Bisan pa mahimo nga wala kita aktuwal nga nagaligoy sa aton ministeryo, kita tanan dapat mangin alisto sa bisan ano man nga maaga nga mga sintoma sang espirituwal nga pagpabuyanbuyan kag maghimo sing nagakaigo nga mga pagbag-o sa aton panimuot kon nakita naton ini nga mga sintoma sa aton kaugalingon.​—⁠Hulubaton 22:⁠3.

8. (a) Ano ang nangin kaangay sang “kalayo nga nagadabdab” sa tagipusuon ni Jeremias, kag ngaa? (b) Ano nga leksion ang matun-an naton gikan sa eksperiensia ni Jeremias?

8 Ang espiritu sang Dios makabulig man sa aton kon naluyahan kita sing buot. Halimbawa, sang isa ka bes nasapwan ni manalagna Jeremias ang iya kaugalingon nga naluyahan sing buot, kag naghunahuna sia nga mag-untat sa iya hilikuton sa pagpanagna. Nagsiling pa gani sia tuhoy kay Jehova: “Indi na gid ako maghinambit sa iya, kag indi ako magpamulong pa sa iya ngalan.” Isa bala ini ka pamatuod sang malubha nga espirituwal nga kakulangan kay Jeremias? Indi. Sa katunayan, ang mabakod nga espirituwalidad ni Jeremias, ang iya gugma kay Jehova, kag ang iya kakugi sa kamatuoran nagpabaskog sa iya nga magpadayon sa  pagpanagna. Sia nagpaathag: “Sa akon tagipusuon ang [pulong ni Jehova] subong sang kalayo nga nagadabdab nga natakpan sa akon mga tul-an; kag ginalapyo ako sa pagpugong, kag indi ko ini mabatas.” (Jeremias 20:9) Natural lang nga ang matutom nga mga alagad sang Dios makaeksperiensia sang pagluya sing buot sa tion kag tion. Apang kon magpangamuyo sila sing bulig kay Jehova, basahon niya ang ila tagipusuon kag ihatag sa ila sing hilway ang iya balaan nga espiritu kon, kaangay ni Jeremias, ang pulong niya yara sa ila tagipusuon.​—⁠Lucas 11:​9-13; Binuhatan 15:⁠8.

“Indi Pagpalunga ang Kalayo Sang Espiritu”

9. Ano ang makaupang sa pagpanghikot sang balaan nga espiritu tungod sa aton?

9 Si apostol Pablo naglaygay sa mga taga-Tesalonica: “Indi pagpalunga ang kalayo sang espiritu.” (1 Tesalonica 5:19) Huo, ang mga buhat kag mga panimuot nga supak sa diosnon nga mga prinsipio makaupang sa pagpanghikot sang balaan nga espiritu tungod sa aton. (Efeso 4:30) Ang mga Cristiano karon may katungdanan nga ibantala ang maayong balita. Ginatamod naton ining pribilehiyo nga may tudok nga pagtahod. Wala kita nakibot nga ginatamay sang mga wala makakilala sa Dios ang aton hilikuton sa pagbantala. Apang kon ang isa ka Cristiano hungod nga nagapatumbaya sang iya ministeryo, mahimo ini magresulta sa pagpalong sa kalayo sang nagapahulag nga espiritu sang Dios.

10. (a) Paano kita maapektuhan sang pagtamod sang aton isigkatawo? (b) Anong mataas nga pagtamod sa aton ministeryo ang ginapabutyag sa 2 Corinto 2:​17?

10 Mahimo tamdon sang iban sa guwa sang Cristianong kongregasyon ang aton ministeryo subong pagpanagtag lamang sing mga literatura. Ang iban mahimo maghinakop sing sayop nga nagapamalaybalay kita agod makakuha sing mga donasyon. Kon tugutan naton ining negatibo nga mga pagtamod nga maimpluwensiahan ang aton panimuot, mahimo sini mabuhinan ang aton pagkaepektibo sa ministeryo. Sa baylo nga tugutan ini nga panghunahuna nga maapektuhan kita, huptan naton ang pagtamod ni Jehova kag ni Jesus sa aton ministeryo. Ginpabutyag ni apostol Pablo inang mataas nga pagtamod sang nagsiling sia: “Indi kita mga manuglibod sing pulong sang Dios subong sang madamo nga tawo, kundi bangod sang pagkasinsero, huo, subong ginpadala gikan sa Dios, sa idalom sang pagtamod sang Dios, upod kay Cristo, nagahambal kita.”​—⁠2 Corinto 2:⁠17.

11. Ano ang nagbulig sa unang mga Cristiano agod magpabilin nga makugi bisan sa idalom sang paghingabot, kag paano kita dapat maapektuhan sang ila halimbawa?

11 Wala madugay nga napatay si Jesus, ang iya mga disipulo sa Jerusalem nag-atubang sing isa ka  panag-on sang paghingabot. Ginpahog kag ginpauntat sila sa pagbantala. Apang, ang Biblia nagasiling nga ‘napuno sila sing balaan nga espiritu kag nagpamulong sang pulong sang Dios nga may kasidla.’ (Binuhatan 4:​17, 21, 31) Ang mga pulong ni Pablo kay Timoteo mga pila ka tuig sang ulihi nagapakita sang positibo nga panimuot nga dapat huptan sang mga Cristiano. Si Pablo nagsiling: “Ang Dios wala maghatag sa aton sang espiritu sang katalaw, kundi sang gahom kag gugma kag kaligdong sang hunahuna. Busa dili mo ikahuya ang panaksi tuhoy sa aton Ginuo, ukon ako nga isa ka bilanggo tungod sa iya, kundi mag-ambit ka sa pag-antos sa kalautan tungod sa maayong balita suno sa gahom sang Dios.”​—⁠2 Timoteo 1:​7, 8.

Ano ang Utang Naton sa Aton Isigkatawo?

12. Ano ang panguna nga rason kon ngaa ginabantala naton ang maayong balita?

12 Agod matigayon ang nagakaigo nga panimuot sa aton ministeryo, dapat nga may husto kita nga motibo. Ngaa nagabantala kita? Ang panguna nga rason makita sa mga pulong sang salmista: “Pakamaayuhon ka [si Jehova] sang imo mga mainunungon. Tuhoy sa himaya sang imo pagkahari magapamulong sila, kag tuhoy sa imo pagkagamhanan magahambal sila, agod ipahibalo sa mga anak sang tawo ang iya gamhanan nga mga buhat kag ang himaya sang kagayunan sang iya pagkahari.” (Salmo 145:​10-12) Huo, nagabantala kita agod dayawon si Jehova sing dayag kag agod pakabalaanon ang iya ngalan sa atubangan sang tanan nga katawhan. Bisan pa diutay lamang ang nagapamati sa aton, ang matutom naton nga pagwali sa mensahe sang kaluwasan nagahatag sing kadayawan kay Jehova.

13. Ano ang nagapahulag sa aton nga isugid sa iban ang paglaum sang kaluwasan?

13 Nagabantala man kita tungod sa aton gugma sa katawhan kag agod malikawan ang kasal-anan sa dugo. (Ezequiel 33:​8; Marcos 6:34) May kaangtanan sa sini amo ang mga pulong ni Pablo sang nagpamulong sia sa mga tawo sa guwa sang Cristianong kongregasyon: “May utang ako sa mga Griego kag sa mga Barbaro, sa mga maalam kag sa mga buangbuang.” (Roma 1:14) Nagbatyag si Pablo nga utang niya sa katawhan nga ibantala ang maayong balita sa ila, kay kabubut-on sang Dios nga “ang tanan nga sahi sang tawo maluwas.” (1 Timoteo 2:4) Sa karon, nagabatyag kita sing amo man nga gugma kag obligasyon sa aton isigkatawo. Bangod sang gugma ni Jehova sa katawhan, ginpadala niya ang iya Anak sa duta agod mapatay tungod sa ila. (Juan 3:16) Daku yadto nga sakripisyo. Ginailog naton ang gugma ni Jehova kon ginagamit naton ang tion kag panikasog sa pagsugid sa iban tuhoy sa maayong balita sang kaluwasan pasad sa halad ni Jesus.

14. Paano ginalaragway sang Biblia ang kalibutan sa guwa sang Cristianong kongregasyon?

14 Ginatamod sang mga Saksi ni Jehova ang mga isigkatawo subong posible nga mga katapo sang Cristianong paghiliutod. Dapat kita magbantala sing masidla, apang ang aton kasidla indi makiawayon. Sa katunayan, ang Biblia nagagamit sing matigdas nga mga tinaga kon nagapamulong sa kalibutan sa kabilugan. Ang tinaga mismo nga “kalibutan” gingamit ni Pablo sa negatibo nga kahulugan sang nagpamulong sia tuhoy sa “kaalam sining kalibutan” kag sa “kalibutanon nga mga kailigbon.” (1 Corinto 3:​19; Tito 2:12) Ginpahanumdom man ni Pablo ang mga Cristiano sa Efeso nga sang naglakat sila “suno sa sistema sang mga butang sining kalibutan,” “patay” sila sa espirituwal. (Efeso 2:​1-3) Ining mga pulong kag ang iban pa nga kaangay sini nahisanto sa ginsiling ni apostol Juan: “Ang bug-os nga kalibutan yara sa gahom sang isa nga malauton.”​—⁠1 Juan 5:⁠19.

15. May kaangtanan sa mga indibiduwal sa guwa sang Cristianong kongregasyon, ano ang wala naton ginahimo, kag ngaa?

15 Apang, dumduma nga ining mga pulong nagapatuhoy sa kalibutan sa kabilugan nga nahamulag sa Dios, indi sa mga indibiduwal. Ang mga Cristiano wala nagapangahas nga hukman sing una kon ano ang mangin reaksion sang bisan ­sin-o nga indibiduwal sa hilikuton nga pagbantala. Wala sila sing basihan agod ilaragway ang bisan sin-o nga mga indibiduwal subong mga kanding. Indi para sa aton ang magsiling kon ano ang mangin resulta kon magkari si Jesus agod painpainon ang “mga karnero” gikan sa “mga kanding.” (Mateo 25:​31-46) Si Jesus amo ang gintangdo nga hukom; indi kita. Isa pa, ginapakita sang eksperiensia nga ang pila nga nagpatuyang bisan sa pinakamalain nga paggawi nagbaton sang mensahe sang Biblia, nagbag-o, kag nangin mga Cristiano nga nagakabuhi sing matinlo. Gani, bisan pa wala kita nagapanikasog nga makig-upod sa pila ka indibiduwal, wala kita nagapangalag-ag sa pagpakighambal sa ila tuhoy sa paglaum sang Ginharian kon may higayon. Ang Kasulatan nagapamulong tuhoy sa pila ka indibiduwal nga, samtang indi pa mga  tumuluo, “husto nga napahamtang para sa kabuhi nga walay katapusan.” Sang ulihi nangin mga tumuluo sila. (Binuhatan 13:48) Kon amo, indi gid naton mahibaluan kon sin-o ang husto nga napahamtang tubtob mapanaksihan naton sila​—⁠ayhan sing madamong beses. Nagadumdom sini, ginapakig-angutan naton ang mga wala pa magbaton sang mensahe sang kaluwasan nga may “kalulo” kag “tudok nga pagtahod,” sa paglaum nga ang iban sa ila magabaton sang mensahe sang kabuhi.​—⁠2 Timoteo 2:​25; 1 Pedro 3:⁠15.

16. Ano ang isa ka rason kon ngaa luyag naton nga mapalambo ang “kalantip sa pagpanudlo”?

16 Ang pagpalambo sing kalantip subong mga manunudlo magadugang sa aton kalangkag nga ibantala ang maayong balita. Sa pag-ilustrar: Ang isa ka makakulunyag nga hampang ukon isport mahimo nga indi makawiwili sa isa ka tawo nga indi makahibalo sa paghampang sini. Apang sa isa nga maayo sa paghampang sini, makalilipay ini. Sing kaanggid, ang mga Cristiano nga nagapalambo sing “kalantip sa pagpanudlo” nagapauswag sang ila kalipay sa ministeryo. (2 Timoteo 4:​2; Tito 1:9) Si Pablo naglaygay kay Timoteo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Paano naton mapalambo ang aton mga ikasarang sa pagpanudlo?

17. Paano naton ‘matigayon ang kahidlaw’ sa ihibalo sa Biblia, kag paano ini nga ihibalo makabulig sa aton ministeryo?

17 Ang isa ka paagi amo ang pagkuha sing dugang nga sibu nga ihibalo. Si apostol Pedro nagapalig-on sa aton: “Subong sang mga lapsag nga bag-o natawo, magtigayon kamo sing kahidlaw sa wala masimbugan nga gatas nga natungod sa pulong, agod nga paagi sini magatubo kamo sa kaluwasan.” (1 Pedro 2:2) Ang isa ka mapagros nga lapsag duna nga nahidlaw sa gatas. Apang, ang isa ka Cristiano mahimo nga kinahanglan nga ‘magtigayon sing kahidlaw’ sa ihibalo sa Biblia. Sarang ini mahimo paagi sa pagpalambo sang maayo nga mga batasan sa pagtuon kag sa pagbasa. (Hulubaton 2:​1-6) Ang panikasog kag disiplina-sa-kaugalingon ginakinahanglan agod mangin sampaton kita nga mga manunudlo sang Pulong sang Dios, apang ini nga mga panikasog nagahatag sing mga padya. Ang kalipay nga maagom gikan sa pag-usisa sa Pulong sang Dios magabulig sa aton nga magmainit sa espiritu sang Dios, nalangkag nga ipaambit sa iban ang mga butang nga aton natun-an.

18. Paano kita masangkapan sang Cristianong mga miting nga gamiton sing husto ang pulong sang kamatuoran?

18 Ang Cristianong mga miting may importante man nga papel sa aton sampaton nga paggamit sing Pulong sang Dios. Kon ang mga teksto sa Biblia ginabasa sa tion sang mga diskurso publiko kag sa iban pa nga mga pagbinagbinag sa Kasulatan, maayo nga sundan naton ang pagbasa sa aton mismo Biblia. Maalamon nga pamatian naton sing maayo ang mga bahin sa miting, lakip na ang nagahinun-anon ilabi na sa aton hilikuton nga pagbantala. Indi gid naton dapat pagpakadiutayon ang kabilihanan sang mga demonstrasyon, ayhan nagatugot sang aton kaugalingon nga matublag. Sa liwat, ang disiplina-sa-kaugalingon kag konsentrasyon kinahanglanon. (1 Timoteo 4:16) Ang Cristianong mga miting nagapabakod sang aton pagtuo, nagabulig sa aton nga magtigayon sing kahidlaw sa Pulong sang Dios, kag nagahanas sa aton nga mangin malangkagon nga mga manugwali sang maayong balita.

Makalaum Kita Sang Pagsakdag ni Jehova

19. Ngaa ang regular nga pagpakigbahin sa pagbantala nga hilikuton kinahanglanon?

19 Ang mga Cristiano nga ‘mainit sa espiritu’ kag malangkagon sa pagbantala sing maayong balita nagapanikasog nga makigbahin sing  tayuyon sa ministeryo. (Efeso 5:​15, 16) Matuod, nagkalainlain ang mga sirkunstansia, kag indi tanan makahinguyang sing magkapareho nga kadamuon sang tion sa sining nagaluwas-kabuhi nga hilikuton. (Galacia 6:​4, 5) Apang, ayhan mas importante sangsa kabug-usan nga kadamuon sang oras nga ginahinguyang naton sa hilikuton nga pagbantala amo ang kasunson nga ginasugid naton sa iban ang aton paglaum. (2 Timoteo 4:​1, 2) Sa labi nga pagbantala naton, labi nga maapresyar naton ang pagkaimportante sining hilikuton. (Roma 10:​14, 15) Magauswag kita sa kaawa kag patugsiling kon tayuyon kita nga nagapakig-angot sa sinsero nga mga tawo nga nagapanghayhay kag nagabakho kag wala sing paglaum.​—⁠Ezequiel 9:​4; Roma 8:⁠22.

20, 21. (a) Ano nga hilikuton ang yara pa sa unahan naton? (b) Paano ginasakdag ni Jehova ang aton mga panikasog?

20 Si Jehova nagtulin sa aton sing maayong balita. Amo ini ang una nga hilikuton nga nabaton naton halin sa iya subong “mga masigkamanugpangabudlay” niya. (1 Corinto 3:​6-9) Nalangkag kita nga tumanon ining hatag-Dios nga responsabilidad sing bug-os kalag, sa aton bug-os nga masarangan. (Marcos 12:​30; Roma 12:1) May madamo pa nga husto nga napahamtang nga mga tawo sa kalibutan nga ginagutom sa kamatuoran. Madamo pa sing dapat himuon, apang makalaum kita sang pagsakdag ni Jehova samtang ginatuman naton sing bug-os ang aton ministeryo.​—⁠2 Timoteo 4:⁠5.

21 Si Jehova nagahatag sa aton sang iya espiritu kag nagasangkap sa aton sang “espada sang espiritu,” ang Pulong sang Dios. Paagi sa bulig niya matikab naton ang aton mga baba “nga may kahilwayan sa paghambal agod ipahibalo ang sagrado nga tinago sang maayong balita.” (Efeso 6:​17-20) Kabay nga isiling sa aton ang ginsulat ni apostol Pablo sa mga Cristiano sa Tesalonica: “Ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa gahom man kag paagi sa balaan nga espiritu kag malig-on nga pagsalig.” (1 Tesalonica 1:5) Huo, ibantala naton ang maayong balita sing malangkagon!

Malip-ot nga Repaso

• Bangod sang mga kabalaka sa kabuhi, ano ang mahimo mahanabo sa aton kakugi sa ministeryo?

• Sa anong paagi ang aton handum nga ibantala ang maayong balita mangin kaangay sang “kalayo nga nagadabdab” sa aton tagipusuon?

• Anong negatibo nga mga panimuot sa ministeryo ang dapat naton likawan?

• Sa kabilugan, paano naton dapat tamdon ang mga tawo nga indi pareho sa aton ang mga pagtuluuhan?

• Paano kita ginabuligan ni Jehova nga mahuptan ang aton kakugi sa hilikuton nga pagbantala?

[Mga Pamangkot sa Pagtinuon]

[Mga piktyur sa pahina 9]

Ginailog sang mga Cristiano ang kakugi nanday Pablo kag Jeremias

[Mga retrato sa pahina 10]

Ang aton kalangkag sa ministeryo ginapahulag sang gugma sa Dios kag sa isigkatawo