Magdiretso sa kaundan

Magdiretso sa listahan sang kaundan

Pagkilala sa Mahigugmaon nga Dios

Pagkilala sa Mahigugmaon nga Dios

 Report sang mga Manugbantala sang Ginharian

Pagkilala sa Mahigugmaon nga Dios

SA EDAD nga 16 anyos, nalugaw-an na sa kabuhi ang taga-Brazil nga si Antônio. Ang pagbatyag nga wala sia sing pulos nagdul-ong sa iya sa pag-abuso sa droga kag alkohol. Masami sia nga nagahunahuna sa paghikog. Sa sini nga mga tion nga nadumduman niya ang ginsiling sa iya sang iya iloy: “Ang Dios gugma.” (1 Juan 4:8) Apang diin ining mahigugmaon nga Dios?

Sa pagtinguha nga maulian gikan sa iya pag-abuso sa droga kag alkohol, nagpangayo sing bulig si Antônio sa lokal nga pari sang paroko. Bisan pa nga nangin aktibo katama si Antônio sa Iglesia Katolika, madamo gihapon sia sing pamangkot. Halimbawa, ang mga pulong ni Jesus nga, “Mahibaluan ninyo ang kamatuoran, kag ang kamatuoran magahilway sa inyo,” nagpalibog sa iya. (Juan 8:32) Ano nga sahi sang kahilwayan ang ginsaad ni Jesus? Indi makahatag ang simbahan sing makapaayaw nga mga sabat sa iya mga pamangkot. Sang ulihi, nadaldal palayo si Antônio kag nagbalik sa iya daan nga mga bisyo. Ang matuod, naglain tapat ang iya pagkagiyan.

Sa amo man nga tion, ang asawa ni Antônio, nga si Maria, nagsugod sa pagtuon sing Biblia upod sa mga Saksi ni Jehova. Bisan pa wala nagapamatok sa iya pagtuon, gintamod ni Antônio ang mga Saksi subong “isa ka relihion sang mga Amerikano para sa mga intereses sang Amerikano nga imperyalismo.”

Wala maluyahan sing buot, nagabilin si Maria sa balay sing mga kopya sang Lalantawan kag Magmata! nga mga magasin nga may mga artikulo nga sa hunahuna niya mahimo nga interesado si Antônio. Sanglit palabasa si Antônio, kon kaisa ginatulutan-aw niya ang mga magasin kon wala didto ang iya asawa. Sa una nga tion sang iya kabuhi, nasapwan niya ang mga sabat sa iya mga pamangkot sa Biblia. “Natalupangdan ko man ang gugma kag kaayo nga ginapakita sa akon sang akon asawa kag sang mga Saksi,” hinumdom niya.

Sang tungatunga sang 1992, namat-od si Antônio nga luyag man niya magtuon sing Biblia upod sa mga Saksi ni Jehova. Apang, nagpadayon sia sa pag-abuso sa droga kag pag-inom sing lakas. Isa ka gab-i samtang manugpauli sila sang iya abyan gikan sa banwa, ginpadulog sila sang mga pulis. Sang nadakpan sang mga pulis nga may cocaine si Antônio, ginbakol nila sia. Gintiklod sia sang isa ka pulis sa lunang kag gintayaan sing pusil malapit sa iya guya. “Tapusa na sia!” singgit sang iban pa nga pulis.

Samtang nagahigdaon sa lunang si Antônio, napamensar niya ang iya kabuhi. Ang lamang maayo nga mga butang nga iya madumduman amo ang iya pamilya kag si Jehova. Nangamuyo sia sing malip-ot, nagpakitluoy sing bulig kay Jehova. Sa wala mahibalui nga rason, ginbiyaan sia sang mga pulis. Nagpauli sia, kumbinsido nga gin-amligan sia ni Jehova.

Ginsugdan ni Antônio ang pagtuon sing Biblia nga may kapagsik. Amat-amat sia nga nagbag-o agod pahamut-an si Jehova. (Efeso 4:​22-24) Paagi sa pagpalambo sing pagpugong sa kaugalingon, nalandas niya ang iya mga problema sa droga. Apang, kinahanglan niya nga magpabulong. Ang duha ka bulan sa klinika sa rehabilitasyon naghatag sa iya sing kahigayunan nga mabasa ang pila ka publikasyon sa Biblia, lakip ang libro nga Ang Ihibalo nga Nagadul-ong sa Kabuhi nga Walay Katapusan. Ginpaambit dayon ni Antônio sa iban nga mga pasyente ang natun-an niya gikan sa sini nga mga libro.

Sang nagpauli si Antônio halin sa klinika, ginpadayon niya ang iya pagtuon sa Biblia upod sa mga Saksi. Sa karon, sanday Antônio, Maria, ang ila duha ka anak nga babayi, kag ang iloy ni Antônio nagaalagad kay Jehova subong isa ka malipayon kag nahiusa nga pamilya. Si Antônio nagsiling: “Karon nahangpan ko na ang matuod nga kahulugan sang pinamulong nga ‘ang Dios gugma.’ ”

[Retrato sa pahina 8]

Pagbantala sa Rio de Janeiro