Napatay Sia Tungod sa Prinsipio

“GINADUMDOM namon si August Dickmann (natawo sang 1910), isa sang mga Saksi ni Jehova.” Amo sini ang panugod sang inskripsion sa isa ka plake (ginapakita diri) nga natukiban sining karon lang sa anay kampo konsentrasyon sang Sachsenhausen. Ngaa ang isa sang mga Saksi ni Jehova takus sa sina nga plake? Ang nabilin nga bahin sang inskripsion nagasugid sing sugilanon: “Dayag [sia] nga gintiro sang SS sang Septiembre 15, 1939, bangod sang pagpangindi nga magsoldado tungod sa relihioso nga mga prinsipio.”

Si August Dickmann ginbilanggo sa kampo konsentrasyon sa Sachsenhausen sang 1937. Tatlo ka adlaw pagkatapos nagdabdab ang Bug-os Kalibutan nga Inaway II sang 1939, ginmanduan sia nga pirmahan ang iya papeles sa pagsulod sa militar. Sang nangindi sia, ginpakig-angutan sang kumander sang kampo si Heinrich Himmler, pangulo sang SS (Schutzstaffel, pinakaali nga guardia ni Hitler), kag nangayo sing permiso sa pagpatay kay Dickmann sa presensia sang tanan iban pa nga bilanggo. Sang Septiembre 17, 1939, ang The New York Times nagreport halin sa Alemanya: “Si August Dickmann, 29 anyos, . . . gintiro diri sang firing squad.” Ang pamantalaan nagsiling nga sia ang nahauna nga Aleman nga nangindi sa pagsoldado tungod sa relihioso nga mga prinsipio sa amo nga inaway.

Kan-uman ka tuig sang ulihi, sang Septiembre 18, 1999, ang kamatayon ni Dickmann gindumdom sang Brandenburg Memorial Foundation, kag ang handumanan nga plake nagapahanumdom karon sa mga dumuluaw sang iya kaisog kag malig-on nga pagtuo. Ang ikaduha nga plake sa naguwa nga pader sang anay kampo nagapahanumdom sa mga dumuluaw nga si Dickmann isa lamang sang mga 900 ka Saksi ni Jehova nga nag-antos sa Sachsenhausen tungod sang ila pagtuluuhan. Madamo pa ang nag-antos sa iban nga mga kampo. Huo, bisan sa idalom sang grabe nga mga kahimtangan sa mga kampo konsentrasyon, madamo ang nagpabilin nga matutom sa diosnon nga mga prinsipio.

Para sa mga Saksi ni Jehova, obligasyon sang isa ka Cristiano nga “magpasakop sa superyor [panguluhan] nga mga awtoridad.” (Roma 13:1) Apang, kon piliton sila sang mga panguluhan nga lapason ang kasuguan sang Dios, ginasunod nila ang halimbawa sang mga apostoles ni Cristo, nga nagsiling: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Subong resulta, sa isa ka kalibutan diin ang pag-ilinaway sang mga tribo kag etniko nga pagdinumtanay nagresulta sa makakulugmat nga pagpamintas, ang mga Saksi ni Jehova bisan diin, kaangay ni August Dickmann, nagatinguha sing paghidait. Ginasunod nila ang laygay sang Biblia: “Dili ka magpadaug sa malaut, kundi dag-a ang malaut paagi sa maayo.”​—⁠Roma 12:⁠21.