Magdiretso sa kaundan

Magdiretso sa listahan sang kaundan

Ang Malipayon nga Pamilya Nagaganyat sang Iban sa Dios

Ang Malipayon nga Pamilya Nagaganyat sang Iban sa Dios

 Report sang mga Manugbantala sang Ginharian

Ang Malipayon nga Pamilya Nagaganyat sang Iban sa Dios

GINPAKAMAAYO ni Jehova si Jose sing daku nga kaalam kag paghantop. (Binuhatan 7:10) Subong resulta, ang kaalam ni Jose “nangin maayo sa panulok ni Paraon kag sang tanan niya nga alagad.”​—⁠Genesis 41:⁠37.

Subong man karon, nagahatag si Jehova sing kaalam kag paghantop sa iya katawhan paagi sa ila pagtuon sa Biblia. (2 Timoteo 3:​16, 17) Nagapatubas sing maayo nga bunga ining kaalam kag paghantop samtang ginasunod ang pasad-sa-Biblia nga mga laygay. Ang ila maayo nga paggawi masami nga ‘nangin maayo sa panulok sadtong makakita sini,’ subong sang ginailustrar sang masunod nga mga eksperiensia sa Zimbabwe.

• May kaingod nga mga Saksi ni Jehova ang isa ka babayi. Bisan pa wala niya maluyagi ang mga Saksi, nagdayaw sia sa ila paggawi, ilabi na sa ila pagkabuhi sa sulod sang puluy-an. Natalupangdan niya nga may maayo gid nga kaangtanan ang bana kag asawa kag masinulundon ang ila mga anak. Natalupangdan niya ilabi na nga ginahigugma gid sang bana ang iya asawa.

Ang kinaandan nga pagpati sa pila ka kultura sa Aprika amo nga kon ginahigugma sang isa ka bana ang iya asawa, mahimo nga may anting-anting ang asawa agod “magbuot” ang iya bana. Gani nagpalapit ang babayi sa Saksi nga asawa kag namangkot: “Puwede mo bala ako hatagan sang anting-anting nga ginhatag mo sa imo bana agod higugmaon man ako sang akon bana kasubong sang paghigugma sang bana mo sa imo?” Ang Saksi nagsabat: “Aba, huo, dalhon ko ini sa imo buwas sa hapon.”

Sang masunod nga adlaw, ginduaw sang utod nga babayi ang iya kaingod dala ang iya “anting-anting.” Ano ini? Ini amo ang Biblia, lakip ang publikasyon nga Ang Ihibalo nga Nagadul-ong sa Kabuhi nga Walay Katapusan. Pagkatapos mabinagbinag ang impormasyon gikan sa Ihibalo nga libro sa tema nga “Pagtukod Sing Pamilya nga Nagapadungog sa Dios,” nagsiling sia sa babayi: “Amo ini ang ‘anting-anting’ nga ginagamit namon sang akon bana agod ‘magbuot’ ang kada isa sa amon, kag amo sina kon ngaa nagapalanggaanay gid kami.” Nasugdan ang isa ka pagtuon sa Biblia, kag madasig nga nag-uswag ang babayi tubtob nga nagsimbulo sia sang iya dedikasyon kay Jehova paagi sa bawtismo sa tubig.

• Duha ka espesyal payunir nga gintangdo sa diutay nga kongregasyon malapit sa naaminhan-sidlangan nga dulunan sang Zimbabwe kag Mozambique ang wala makaguwa sa pamalaybalay nga ministeryo sa sulod sang duha ka semana. Ngaa? Bangod nagkadto sa ila ang mga tawo agod mamati sa ila ginasiling. Ang isa sa mga payunir nag-asoy kon paano ini natabo: “Nagalakbay kami sing 15 kilometros agod maghiwat sing semanal nga pagtuon sing Biblia sa puluy-an sang isa ka interesado nga tawo. Indi mahapos para sa amon nga kadtuan ini nga lugar. Nagalakat kami sa lunang, kag nagatabok kami sa masulog nga mga suba nga hasta sa amon liog. Nagalakip ini sang pagbalanse sang amon mga panapton kag sapatos nga ginalukdo namon, pagtabok sa suba, kag dayon pag-ilis liwat sa pihak nga pangpang.

“Ang mga kaingod sang interesado nga tawo nagdayaw gid sang amon kakugi. Isa sa nakatalupangod sa sini amo ang lider sang isa relihioso nga organisasyon sa amo nga lugar. Ginsilingan niya ang iya mga sumulunod: ‘Indi bala ninyo luyag nga mangin makugi kaangay sadtong duha ka pamatan-on nga lalaki nga mga Saksi ni Jehova?’ Sang masunod nga adlaw, madamo sang iya sumulunod ang nagkadto sa amon puluy-an agod hibaluon kon ngaa mapinadayunon gid kami. Dugang pa, sang masunod nga duha ka semana, madamo gid ang amon bisita amo nga wala na gani kami sing tion sa pagdigamo!”

Ang isa sang mga indibiduwal nga nagduaw sa puluy-an sang mga payunir sa tion sining duha ka semana amo ang relihioso nga lider. Handurawa ang kalipay sang mga payunir sang nagbaton sia sing pagtuon sa Biblia sa puluy-an!