Magdiretso sa kaundan

Magdiretso sa listahan sang kaundan

Paghimo nga Bag-o sang Tanan nga Butang—subong sang Gintagna

Paghimo nga Bag-o sang Tanan nga Butang—subong sang Gintagna

 Paghimo nga Bag-o sang Tanan nga Butang​—⁠subong sang Gintagna

“Ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: . . . ‘Ining mga pulong matutom kag matuod.’ ”​—⁠BUGNA 21:⁠5.

1, 2. Ngaa madamo nga tawo ang nagapangalag-ag gid nga binagbinagon kon ano ang palaabuton?

NASILING ukon nahunahuna na bala ninyo, ‘Sin-o ang nakahibalo kon ano ang buwas?’ Mahangpan ninyo kon ngaa nagapangalag-ag ang mga tawo sa pagpakot kon ano ang palaabuton ukon sa pagsalig sa mga tawo nga mahimo magtinikal nga mapaktan nila ang palaabuton. Ang mga tawo wala gid sing ikasarang nga mapaktan sing husto kon ano ang mahanabo sa mga binulan ukon mga tinuig nga maabot.

2 Ang magasin nga Forbes ASAP naghugod sang isa ka isyu tuhoy sa tion. Sa sini, ang host sang dokumentaryo sa TV nga si Robert Cringely nagsulat: “Sa ulihi kita tanan pakahuy-an sang tion, apang labi na gid ang mga manugpakot. Ang pagtinguha nga pakton ang palaabuton isa ka pahito nga halos kita pirme ang pierde. . . . Walay sapayan sina, ang ginatawag nga mga eksperto padayon nga nagapakot.”

3, 4. (a) Ano ang ginalauman sang iban tuhoy sa bag-ong milenyo? (b) Ano ang realistiko nga ginapaabot sang iban tuhoy sa palaabuton?

3 Mahimo napanilagan ninyo nga bangod sang daku gid nga igtalupangod nga ginahatag sa bag-ong milenyo, daw mas madamo pa nga tawo ang nagahunahuna tuhoy sa palaabuton. Sang pamuno sang nagligad nga tuig, ang magasin nga Maclean’s  nagsiling: “Ang tuig 2000 mahimo nga isa lamang ka bag-o nga tuig sa kalendaryo para sa kalabanan nga taga-Canada, apang mahimo ini magdungan sa isa ka bag-o gid nga panugod.” Si Propesor Chris Dewdney sang York University naghatag sini nga rason agod magmalaumon: “Ang milenyo nagakahulugan nga mahimo naton indi pag-akuon ang salabton sa isa ka mabudlay gid nga siglo.”

4 Daw dalamguhanon lamang bala ini? Sa isa ka surbe sa Canada 22 porsiento lamang sang mga ginpamangkot ang “nagapati nga pagasugdan sang 2000 ang isa ka bag-o nga panugod para sa kalibutan.” Sa katunayan, halos katunga ang “nagapaabot sing isa pa ka inaway sa kalibutan”​—⁠isa ka bug-os kalibutan nga inaway​—⁠sa sulod sang 50 ka tuig. Sing maathag, nahangpan sang kalabanan nga indi madula sang bag-ong milenyo ang aton mga problema, ginahimo nga bag-o ang tanan nga butang. Si Sir Michael Atiyah, anay presidente sang Royal Society sang Britanya, nagsulat: “Ang madasig nga mga pagbag-o . . . nagakahulugan nga ang ikaduha ka pulog-isa nga siglo magadala sing importante nga mga hangkat sa aton bug-os nga sibilisasyon. Ang mga problema sa pagdamo sang populasyon, pagdiutay sang kinaugali nga manggad, polusyon sa palibot, kag lapnag nga kaimulon naeksperiensiahan na naton kag dapat atubangon subong isa ka butang nga hilingagawon.”

5. Diin naton masapwan ang masaligan nga impormasyon tuhoy sa palaabuton?

5 Mahimo mamangkot kamo, ‘Sanglit indi mapaktan sang mga tawo kon ano ang aton palaabuton, dapat bala nga indi na lang naton pagsapakon ang palaabuton?’ Ang sabat amo ang indi! Matuod, indi matagna sing sibu sang mga tawo ang palaabuton, apang indi kita dapat maghunahuna nga wala sing isa nga makahimo sini. Kon amo, sin-o, kag ngaa dapat kita mangin malaumon tuhoy sa palaabuton? Masapwan ninyo ang makaalayaw nga mga sabat sa apat ka espesipiko nga tagna. Narekord ini sa ginapanag-iyahan kag ginabasa gid sing lapnag nga libro, nga amo man ang wala mahangpi kag wala ginasapak sing lapnag​—⁠ang Biblia. Kon ano man ang pagtamod ninyo sa Biblia, kag kon daw ano man kadamo ang inyo nahibaluan sa sini, mangin mapuslanon gid sa inyo nga binagbinagon ining apat ka sadsaran nga teksto. Ang matuod, ginatagna sini ang isa ka masanag gid nga palaabuton. Dugang pa, ginapakita sining apat ka importante nga tagna kon ano ang palaabuton ninyo kag sang inyo mga hinigugma.

6, 7. San-o nagtagna si Isaias, kag paano ang iya mga tagna may makatilingala nga katumanan?

6 Ang nahauna masapwan sa Isaias kapitulo 65. Antes ini basahon, handurawa ninyo sing maathag ang danyag sini​—⁠kon san-o ginsulat ining materyal kag kon ano nga kahimtangan ang ginaatubang sini. Ang manalagna sang Dios nga si Isaias, nga nagsulat sining mga pulong, nagkabuhi kapin sa isa ka siglo antes ginlaglag ang ginharian sang Juda. Nag-abot ang kalaglagan sang ginkuha ni Jehova ang iya pag-amlig gikan sa di-matutom nga mga Judiyo, nagtugot sa mga Babilonianhon sa paghapay sa Jerusalem kag sa pagbihag sa katawhan sini. Natabo yadto kapin sa isa ka gatos ka tuig sa tapos ini gintagna ni Isaias.​—⁠2 Cronica 36:​15-21.

7 Nahanungod sa maragtason nga impormasyon sang katumanan, dumduma nga paagi sa panuytoy sang Dios gintagna ni Isaias ang ngalan sang wala pa matawo nga Persianhon, si Ciro, nga nagpukan sang ulihi sa Babilonia. (Isaias 45:1) Ginhanda ni Ciro ang dalan para sa pagbalik sang mga Judiyo sa ila dutang natawhan sang 537 B.⁠C.⁠E. Sing makatilingala, gintagna ni Isaias yadto nga pagpasag-uli, subong sang mabasa naton sa kapitulo 65. Ginpatalupangod ni Isaias ang kahimtangan nga maagom sang mga Israelinhon didto sa ila dutang natawhan.

8. Anong malipayon nga palaabuton ang gintagna ni Isaias, kag ano nga ekspresyon ang ilabi na nga makawiwili?

8 Aton mabasa sa Isaias 65:​17-19: “Yari karon ako nagatuga sing bag-ong mga langit kag bag-ong duta; kag ang nagligad nga mga butang indi na pagdumdumon, ukon magsulod sa tagipusuon. Apang magkasadya, kamo nga katawhan, kag magkalipay sing dayon sa kon ano ang akon ginatuga. Kay yari karon akon ginatuga ang Jerusalem nga isa ka rason sa pagkasadya kag ang iya katawhan nga rason sa pagkalipay. Kag magakalipay ako sa Jerusalem kag magakasadya sa akon katawhan; kag indi na gid mabatian sa iya ang tingog sang paghibi ukon ang tingog sang pagtangis.” Sa pagkamatuod, ginlaragway ni Isaias ang mga kahimtangan nga mas maayo sangsa ginpuy-an sang mga Judiyo sa Babilonia. Gintagna niya ang pagkalipay kag pagkasadya. Tan-awa karon ang ekspresyon nga “bag-ong mga langit kag bag-ong duta.” Amo ini ang nahauna sa apat ka beses nga pagsambit sina nga mga tinaga sa Biblia, kag ining apat ka teksto mahimo nga may talangkod nga kaangtanan sa aton palaabuton, nagatagna pa gani sini.

9. Paano nadalahig sa katumanan sang Isaias 65:​17-19 ang dumaan nga mga Judiyo?

 9 Ang una nga katumanan sang Isaias 65:​17-19 nagdalahig sa dumaan nga mga Judiyo nga, subong sang sibu nga gintagna ni Isaias, nagbalik sa ila dutang natawhan, diin gintukod nila liwat ang putli nga pagsimba. (Esdras 1:​1-4; 3:​1-4) Sa pagkamatuod, nahibaluan ninyo nga nagbalik sila sa ila dutang natawhan sa amo gihapon nga planeta, indi sa iban pa nga duog sa uniberso. Ina nga paghangop makabulig sa aton nga mahangpan kon ano ang buot silingon ni Isaias sa bag-ong mga langit kag bag-ong duta. Indi na kinahanglan nga maghaumhaum kita, subong sang ginahimo sang iban, tuhoy sa di-maathag nga mga tagna ni Nostradamus ukon sang iban pa nga tawhanon nga mga manugpakot. Ginapaathag mismo sang Biblia kon ano ang buot silingon ni Isaias.

10. Paano naton dapat hangpon ang bag-ong “duta” nga gintagna ni Isaias?

10 Sa Biblia, ang “duta” wala pirme nagapatuhoy sa aton planeta. Halimbawa, ang Salmo 96:1 literal nga nagasiling: ‘Mag-amba kay Jehova, bug-os nga duta.’ Nahibaluan naton nga ang aton planeta​—⁠ang kadutaan kag ang malapad nga kadagatan​—⁠indi makaamba. Ang mga tawo nagaamba. Huo, ang Salmo 96:1 nagapatuhoy sa katawhan sang duta.⁠ * Apang ang Isaias 65:​17 nagasambit man sing “bag-ong mga langit.” Kon ang “duta” nagarepresentar sa bag-ong katilingban sang mga tawo sa dutang natawhan sang mga Judiyo, ano naman ang “bag-ong mga langit”?

11. Ano ang ginatudlo sang mga tinaga nga “bag-ong mga langit”?

11 Ang Cyclopædia of Biblical, Theological, and Ecclesiastical Literature, nanday M’Clintock kag Strong, nagasiling: “Sa kada tion nga ginasambit ang danyag sang isa ka matagnaon nga palanan-awon, ang langit nagakahulugan sing . . . bug-os nga hubon sang nagagahom nga kagamhanan . . . subong nga sa ibabaw kag nagagahom sa mga sinakpan, subong nga ang kinaugali nga langit yara sa ibabaw kag nagagahom sa duta.” Tuhoy sa kombinasyon nga mga tinaga nga “langit kag duta,” ang Cyclopædia nagapaathag nga ‘sa matagnaon nga lenguahe ang mga tinaga nagakahulugan sing politikal nga kahimtangan sang mga tawo gikan sa nanuhaytuhay nga pagkabuhi. Ang langit amo ang soberano; ang duta amo ang ginagamhan, mga tawo nga ginagamhan sang mga superyor.’

12. Paano naeksperiensiahan sang dumaan nga mga Judiyo ang “bag-ong mga langit kag bag-ong duta”?

12 Sang nagbalik ang mga Judiyo sa ila dutang natawhan, nakatigayon sila sang matawag ninyo nga isa ka bag-ong sistema sang mga butang. May yara isa ka bag-ong nagagahom nga hubon. Si Zorobabel, nga kaliwat ni Hari David, amo ang gobernador,  kag si Josue amo ang mataas nga saserdote. (Hageo 1:​1, 12; 2:​21; Zacarias 6:11) Sila ang “bag-ong mga langit.” Sa ibabaw sang ano? Ang “bag-ong mga langit” nagagahom sa ibabaw sang “bag-ong duta,” ang natinluan nga katilingban sang katawhan nga nagbalik sa ila pungsod agod ipatindog liwat ang Jerusalem kag ang templo sini para sa pagsimba kay Jehova. Busa, sa sining matuod gid nga kahulugan, may bag-ong mga langit kag bag-ong duta sa katumanan nga nagadalahig sa mga Judiyo sadto nga tion.

13, 14. (a) Ano pa nga paggamit sang mga tinaga nga “bag-ong mga langit kag bag-ong duta” ang binagbinagon naton? (b) Ngaa ang tagna ni Pedro ilabi na nga makawiwili sa sini nga tion?

13 Maghalong nga basi indi ninyo mahangpan ang katuyuan. Indi ini pagpatpat sa Biblia ukon pagpasiplat lamang sa dumaan nga maragtas. Makita ninyo ini paagi sa pagliton sa isa pa ka paggamit sa tinaga nga “bag-ong mga langit kag bag-ong duta.” Sa 2 Pedro kapitulo 3, makita ninyo ining mga tinaga kag mahangpan ninyo nga ang aton palaabuton nadalahig.

14 Ginsulat ni apostol Pedro ang iya sulat kapin sa 500 ka tuig sa tapos nakabalik ang mga Judiyo sa ila dutang natawhan. Subong isa sang mga apostoles ni Jesus, ginsulatan ni Pedro ang mga sumulunod ni Cristo, ang “Ginuo” nga ginsambit sa 2 Pedro 3:⁠2. Sa bersikulo 4, ginasambit ni Pedro ang “ginsaad nga presensia” ni Jesus, gani ang tagna may kaangtanan gid sa karon. Ginapakita sang nagakaigo nga ebidensia nga sugod sang Bug-os Kalibutan nga Inaway I, si Jesus presente sa kahulugan nga may awtoridad sia subong Manuggahom sa langitnon nga Ginharian sang Dios. (Bugna 6:​1-8; 11:​15, 18) May pinasahi nga kahulugan ini bangod sang isa pa ka butang nga gintagna ni Pedro sa sining kapitulo.

15. Paano natuman ang tagna ni Pedro tuhoy sa “bag-ong mga langit”?

15 Aton mabasa sa 2 Pedro 3:​13: “Nagahulat kita sing bag-ong mga langit kag bag-ong duta suno sa iya saad, kag sa sini magapuyo ang pagkamatarong.” Ayhan nahibaluan na ninyo nga si Jesus sa langit amo ang panguna nga Manuggahom sa “bag-ong mga langit.” (Lucas 1:​32, 33) Apang, ginapakita sang iban pa nga mga teksto sa Biblia nga wala sia nagagahom sing isahanon. Nagsaad si Jesus nga ang mga apostoles kag ang iban pa kaangay nila makatigayon sing duog sa langit. Sa tulun-an sang Hebreo, ginlaragway sila ni apostol Pablo subong “mga umalambit sang langitnon nga pagtawag.” Kag nagsiling si Jesus nga ini nga grupo magalingkod sa mga trono sa langit kaupod niya. (Hebreo 3:​1; Mateo 19:​28; Lucas 22:​28-​30; Juan 14:​2, 3) Ang punto amo nga may iban pa nga magagahom kaupod ni Jesus subong bahin sang bag-ong mga langit. Kon amo ano ang buot silingon ni Pedro sa mga tinaga nga “bag-ong duta”?

16. Anong “bag-ong duta” ang nagaluntad na?

16 Subong sa dumaan nga katumanan​—⁠ang pagbalik sang mga Judiyo sa ila dutang natawhan⁠—ang katumanan karon sang 2 Pedro 3:​13 nagadalahig sa mga tawo nga nagapasakop sa paggahom sang bag-ong mga langit. Makita ninyo ang minilyon karon nga malipayon nga nagapasakop sa sina nga paggahom. Nagabenepisyo sila gikan sa edukasyunal nga programa sini kag nagatinguha sa pagsunod sa kasuguan sini nga masapwan sa Biblia. (Isaias 54:13) Amo ini sila ang nagahuman sang sadsaran sang “bag-ong duta” sa kahulugan nga nagaporma sila sing isa ka bug-os kalibutan nga katilingban gikan sa tanan nga nasyonalidad, lenguahe, kag rasa, kag nagabuligay sila sa pagpanghikot samtang nagapasakop sa nagagahom nga Hari, si Jesucristo. Ang importante nga kamatuoran amo nga mahimo kamo mangin bahin sini!​—⁠Miqueas 4:​1-4.

17, 18. Ngaa ang mga pulong sa 2 Pedro 3:​13 nagahatag sa aton sing rason nga magtan-aw sa palaabuton?

17 Indi kamo maghunahuna nga amo lamang ini ang nadalahig, nga wala na kita sing bisan anong detalyado pa nga paghangop kon ano ang palaabuton. Sa kamatuoran, samtang ginausisa ninyo ang konteksto sang 2 Pedro kapitulo 3, makita ninyo ang isa ka daku nga pagbag-o sa palaabuton nga ginapahangop sini. Sa bersikulo 5 kag 6, si Pedro nagsulat tuhoy sa Anaw sang adlaw ni Noe, ang Anaw nga nagtapos sang malaut nga kalibutan sadto anay. Sa bersikulo 7, ginasambit ni Pedro nga “ang mga langit kag ang duta nga amo karon,” ang pagginahom kag ang kadam-an sang katawhan, ginatigana “sa adlaw sang paghukom kag sang kalaglagan sang mga tawo nga di-diosnon.” Ginapamatud-an sini nga ang mga tinaga nga “ang mga langit kag ang duta nga amo karon” nagapatuhoy, indi sa aton kalibutan, kundi sa mga tawo kag sa ila pagginahom.

18 Ginapaathag ni Pedro pagkatapos sina nga ang nagahilapit nga adlaw ni Jehova magapahanabo sing isa ka daku nga pagpaninlo, sa paghanda sang dalan para sa bag-ong mga langit kag bag-ong duta nga ginsambit sa bersikulo 13. Talupangda  ang katapusan sina nga bersikulo​—⁠“sa sini magapuyo ang pagkamatarong.” Wala bala ini nagapahangop nga ang pila ka dalagku nga mga pagbag-o para sa kaayuhan dapat mahanabo? Wala bala ini nagahatag sing paglaum sa bag-o gid nga mga butang, isa ka tion nga ang mga tawo makasapo sing daku pa nga kalipay sa pagkabuhi sangsa karon? Kon nahangpan ninyo ina, nian nakatigayon na kamo sing paghantop sa ginatagna sang Biblia, butang nga pila lamang ang nakahantop.

19. Sa anong danyag ginatudlo sang tulun-an sang Bugna ang “bag-ong mga langit kag bag-ong duta” nga magaabot pa?

19 Apang binagbinagon naton ini sing dugang pa. Nabinagbinag na naton ang paggamit sa mga tinaga nga “bag-ong mga langit kag bag-ong duta” sa Isaias kapitulo 65 kag ang isa pa sa 2 Pedro kapitulo 3. Karon buksi ninyo ang Bugna kapitulo 21, nga may yara isa pa ka paggamit sini nga ekspresyon sa Biblia. Sa liwat, makabulig kon mahangpan naton ang danyag. Sa duha ka kapitulo antes sini, sa Bugna kapitulo 19, nakita naton ang isa ka inaway nga ginlaragway sa maathag nga simbulo​—⁠apang indi isa ka inaway sa ulot sang nagasumpunganay nga mga pungsod. Sa isa ka bahin sining inaway amo ang “Pulong sang Dios.” Ayhan nakilala ninyo ina subong isa ka titulo ni Jesucristo. (Juan 1:​1, 14) Didto sia sa langit, kag ining palanan-awon nagalaragway sa iya upod sa langitnon nga mga hangaway. Nagapakig-away batok kay sin-o? Ang kapitulo nagasambit sing “mga hari,” “mga kumander sang militar,” kag sing mga tawo nga may nanuhaytuhay nga tindog, “magamay kag dalagku.” Ini nga inaway nagadalahig sa nagapakari nga adlaw ni Jehova, ang kalaglagan sang kalautan. (2 Tesalonica 1:​6-10) Sa pagpadayon, ang Bugna kapitulo 20 nagabukas paagi sa paglaragway sang pagdula sa “dumaan nga man-ug, nga amo ang Yawa kag Satanas.” Nagahanda ini sang pagbinagbinag sa Bugna kapitulo 21.

20. Anong importante nga pagbag-o sa palaabuton ang ginapakita sang Bugna 21:​1?

20 Si apostol Juan nagasugod paagi sa makakulunyag nga mga pulong: “Nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat.” Pasad sa nahangpan na naton sa Isaias kapitulo 65 kag 2 Pedro kapitulo 3, mapat-od naton nga wala ini nagakahulugan nga islan ang literal nga mga langit kag ang aton planeta, lakip ang tubigon nga kadadalman sini. Subong sa ginpakita sa nauna nga mga kapitulo, ang malaut nga katawhan kag ang ila pagginahom, lakip ang di-kitaon nga manuggahom nga si Satanas, pagadulaon. Huo, ang ginasaad diri amo ang isa ka bag-ong sistema sang mga butang nga nagalakip sang mga tawo sa duta.

21, 22. Ano nga mga pagpakamaayo ang ginapasalig sa aton ni Juan, kag ano ang kahulugan sang pagpahid sang mga luha?

21 Ginapasalig ini sa aton samtang ginabinagbinag naton sing dugang pa ining dalayawon nga tagna. Ang katapusan sang bersikulo 3 nagasugid tuhoy sa tion nga ang Dios mangin kaupod sang katawhan, nagaliso sang iya maalwan nga igtalupangod sa katawhan nga nagahimo sang iya kabubut-on. (Ezequiel 43:7) Si Juan nagapadayon sa bersikulo 4, 5: “Pahiran niya [si Jehova] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan. Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong matutom kag matuod.’ ” Daw ano ka makapalig-on nga tagna!

22 Magdulog anay agod binagbinagon ang ginatagna sang Biblia. ‘Pahiran sang Dios ang tagsa ka luha sa mga mata nila.’ Indi ini mahimo magpatuhoy sa kinaandan nga mga luha nga nagatinlo sang aton sensitibo nga mga mata, ni magpatuhoy ini sa mga luha sang kalipay. Indi, ang mga luha nga pahiran sang Dios amo ang mga luha sang pag-antos, kasubo, kapaslawan, kasakit, kag kalisang. Paano naton mapat-od? Ti, ining talalupangdon nga saad sang Dios nga pahiran niya ang  mga luha ginaangot sa ‘kamatayon, kalisod, paghibi, kag kasakit nga mawala na.’​—⁠Juan 11:⁠35.

23. Katapusan sang ano nga mga kahimtangan ang ginagarantiya sang tagna ni Juan?

23 Wala bala ini nagapamatuod nga ang kanser, stroke, atake sa tagipusuon, kag bisan ang kamatayon madula na? Sin-o sa aton ang wala pa namatyan sing hinigugma bangod sang balatian, aksidente, ukon kalamidad? Ang Dios nagasaad diri nga ang kamatayon madula na, nga nagapahangop nga ang mga bata nga mahimo matawo sa amo nga tion indi mabuhi agod magdaku kag magtigulang lamang​—⁠nga magadangat lamang sa kamatayon. Ini nga tagna nagakahulugan man nga wala na sing Alzheimer’s disease, osteoporosis, fibroid tumor, glaucoma, ukon bisan sing mga katarata​—⁠nga kinaandan gid sa mga tigulang.

24. Paano ang ‘bag-ong langit kag bag-ong duta’ mangin isa gid ka pagpakamaayo, kag ano pa ang binagbinagon naton?

24 Walay duhaduha nga magaugyon kamo nga ang kalisod kag paghibi mabuhinan kon madula na ang kamatayon, pagtigulang, kag balatian. Apang, kamusta naman ang makapaluya-sang-buot nga kaimulon, pag-abuso sa kabataan, kag mapiguson nga pagdampigdampig bangod sang ginhalinan ukon duag sang panit? Kon ining mga butang​—⁠nga kinaandan karon​—⁠magpadayon, indi madula sa aton ang kalisod kag paghibi. Sa amo, ang kabuhi sa idalom sang ’bag-ong langit kag bag-ong duta’ indi mamusingan sining mga kabangdanan karon sang kasubo. Daw ano nga pagbag-o! Apang, tatlo pa lamang sang apat ka paggamit sang Biblia sa mga tinaga nga “bag-ong mga langit kag bag-ong duta” ang nabinagbinag naton. May isa pa nga may kaangtanan sa nabinagbinag na naton kag nagapadaku kon ngaa may rason kita sa paghulat kon san-o kag kon paano tumanon sang Dios ang iya saad nga ‘himuon nga bag-o ang tanan nga butang.’ Binagbinagon sang masunod nga artikulo ina nga tagna kag kon ano ang kahulugan sini para sa aton kalipay.

[Nota]

^ par. 10 Ang The New English Bible nagabadbad sang Salmo 96:⁠1: “Mag-amba sa GINUO, tanan nga tawo sa duta.” Ang The Contemporary English Version mabasa: “Tanan sa sini nga duta, mag-amba sing kadayawan sa GINUO.” Nahisanto ini sa paghangop nga ang ginapatuhuyan ni Isaias sa “bag-ong duta” amo ang katawhan sang Dios sa ila duta.

Ano ang Madumduman Mo?

• Ano ang tatlo ka beses nga ginatagna sang Biblia ang “bag-ong mga langit kag bag-ong duta”?

• Paano nadalahig sa katumanan sang “bag-ong mga langit kag bag-ong duta” ang dumaan nga mga Judiyo?

• Anong mga katumanan ang mahangpan para sa “bag-ong mga langit kag bag-ong duta” subong sang ginsambit ni Pedro?

• Paano ginatudlo sa aton sang Bugna kapitulo 21 ang isa ka masanag nga palaabuton?

[Mga Pamangkot sa Pagtinuon]

[Retrato sa pahina 10]

Subong sang gintagna ni Jehova, ginhanda ni Ciro ang dalan sa pagbalik sang mga Judiyo sa ila dutang natawhan sang 537 B.⁠C.⁠E.