Magdiretso sa kaundan

Magdiretso sa listahan sang kaundan

Ang mga Nagapakig-away Batok sa Dios Indi Magadaug!

Ang mga Nagapakig-away Batok sa Dios Indi Magadaug!

 Ang mga Nagapakig-away Batok sa Dios Indi Magadaug!

“Sila pat-od nga magapakig-away batok sa imo, apang indi sila magadaug batok sa imo.”​—⁠JEREMIAS 1:⁠19.

1. Ano nga sugo ang nabaton ni Jeremias, kag daw ano kadugay magapadayon ang iya hilikuton?

GINSUGO ni Jehova ang pamatan-on nga si Jeremias nga mangin manalagna sa mga pungsod. (Jeremias 1:5) Natabo ini sadtong paggahom sang maayo nga si Hari Josias sang Juda. Ang hilikuton sa pagpanagna ni Jeremias nagpadayon sa magamo nga panag-on antes gin-agaw sang Babilonia ang Jerusalem kag tubtob sang gintapok ang katawhan sang Dios.​—⁠Jeremias 1:​1-3.

2. Paano ginpalig-on ni Jehova si Jeremias, kag ano ang kahulugan sang pagpakig-away batok sa sadtong manalagna?

2 Ang mga mensahe sang paghukom nga ipahayag ni Jeremias magapukaw sing pagpamatok. Busa, ginpabakod sia sang Dios sa kon ano ang mahanabo sa palaabuton. (Jeremias 1:​8-10) Halimbawa, ang espiritu sang manalagna ginpalig-on sang mga pulong: “Sila pat-od nga magapakig-away batok sa imo, apang indi sila magadaug batok sa imo, kay ‘ako kaupod nimo,’ siling ni Jehova, ‘sa pagluwas sa imo.’ ” (Jeremias 1:19) Ang pagpakig-away batok kay Jeremias magakahulugan sing pagpakig-away batok sa Dios. Sa karon, si Jehova may yara tulad-manalagna nga grupo sang mga alagad nga may hilikuton kaangay kay Jeremias. Kaangay niya, masidla nila nga ginabantala ang matagnaon nga pulong sang Dios. Kag ini nga mensahe may maayo ukon malain nga epekto sa tanan nga indibiduwal kag pungsod, depende sa ila reaksion sa sini. Subong sang panahon ni Jeremias, may mga tawo nga nagapakig-away batok sa Dios paagi sa pagpamatok sa iya mga alagad kag sa ila mga hilikuton nga ginhatag sang Dios.

 Ang mga Alagad ni Jehova Ginasalakay

3. Ngaa ang mga alagad ni Jehova ginasalakay?

3 Ang katawhan ni Jehova ginasalakay sugod sang maaga nga bahin sang ika-20 nga siglo. Sa madamo nga kadutaan, gintinguhaan sang mga tawo nga may malaut nga katuyuan nga balabagan​—⁠huo, pahipuson​—⁠ang pagwali sing maayong balita sang Ginharian sang Dios. Ginsugyot sila sang aton panguna nga Kaaway, ang Yawa, nga “nagaluyong subong sang isa ka nagangurob nga leon, nga nagapangita sing bisan sin-o nga matukob.” (1 Pedro 5:8) Sang natapos “ang gintalana nga panag-on sang mga pungsod” sang 1914, ginpalingkod sang Dios ang iya Anak subong ang bag-o nga Hari sang duta, upod ang sugo: “Magpanglutos ka sa tunga sang imo mga kaaway.” (Lucas 21:​24; Salmo 110:2) Paagi sa paggamit sang iya gahom, gintabog ni Cristo si Satanas gikan sa langit kag ginlatiran sia sa palibot sang duta. Sa pagkahibalo nga malip-ot na lang ang iya tion, ginpaupok sang Yawa ang iya kasingkal sa hinaplas nga mga Cristiano kag sa ila mga kaupdanan. (Bugna 12:​9, 17) Ano ang nangin mga resulta sang sulitsulit nga pagsalakay sining mga nagapakig-away batok sa Dios?

4. Anong mga pagtilaw ang naeksperiensiahan sang katawhan ni Jehova sang panahon sang Bug-os Kalibutan nga Inaway I, apang ano ang natabo sang 1919 kag 1922?

4 Ang hinaplas nga mga alagad ni Jehova nag-atubang sing madamo nga pagtilaw sang pagtuo sang Bug-os Kalibutan nga Inaway I. Ginyaguta sila kag ginpasipalahan, ginlagas sang mga guban, kag ginsakit. Subong sa gintagna ni Jesus, sila nangin ‘sentro sang pagdumot sang tanan nga pungsod.’ (Mateo  24:9) Sa tunga sang kakugmat sang inaway, gingamit sang mga kaaway sang Ginharian sang Dios ang taktika nga gingamit anay batok kay Jesucristo. Mapasipalahon nga gintawag nila ang katawhan ni Jehova nga mga rebelde sa panguluhan, kag ginpuntariya nila ang sentro mismo sang kitaon nga organisasyon sang Dios. Sang Mayo 1918, nagmando ang pederal nga panguluhan nga dakpon ang presidente sang Watch Tower Society, si J. F. Rutherford, kag ang pito sang iya pinakasuod nga mga kaupdanan. Ining walo ka lalaki mabug-at nga ginpamatbatan sing pagkabilanggo kag ginpadala sa pederal nga bilangguan sa Atlanta, Georgia, E.⁠U.⁠A. Pagligad sang siam ka bulan ginpaguwa sila. Sang Mayo 1919 nagdesisyon ang korte sang apelasyon sang sirkito nga ang mga akusado wala mahatagi sing makatarunganon nga kasaba, kag gani ginbaliskad ang desisyon. Gintalana ang bag-o nga pagkasaba para sa kaso, apang ginbawi sang ulihi sang gobierno ang demanda, kag si Utod Rutherford kag ang iya mga kaupdanan bug-os nga naabsuwelto. Ginpadayon nila ang ila mga hilikuton, kag ang mga kombension nga ginhiwat sa Cedar Point, Ohio, sang 1919 kag 1922 nagpabaskog liwat sang hilikuton nga pagbantala sang Ginharian.

5. Kamusta ang mga Saksi ni Jehova sa Nazi Alemanya?

5 Sang dekada 1930, ang diktatoryal nga mga panguluhan nagluntad, kag ang Alemanya, Italya, kag Japan naghiusa sa pagporma sang Axis nga kagamhanan. Sang maaga nga bahin sadtong dekada, ang katawhan sang Dios mapintas nga ginhingabot, labi na sa Nazi nga Alemanya. Ginpatuman ang mga pagdumili. Ang mga pamalay ginlighot, kag ang mga nagailistar sa sini gindakop. Linibo ang ginlupot sa mga kampo konsentrasyon bangod sang indi nila pagsikway sang ila pagtuo. Katuyuan sang pagpakig-away batok sa Dios kag sa iya katawhan nga papason ang mga Saksi ni Jehova sa sadtong totalitaryan nga teritoryo.⁠ * Sang ang mga Saksi nagdangop sa mga korte sa Alemanya agod ipakig-away ang ila mga kinamatarong, ang Ministri sang Katarungan sang Reich naghanda sing malaba nga desisyon agod pat-uron nga indi sila magdaug. Ini nagsiling: “Ang mga korte indi dapat mapaslawan bangod lamang sang daw legal nga mga pormalidad; kundi dapat maghimo kag mangita sing mga paagi walay sapayan sang pormal nga mga pagpamatok, sa pagtuman sang ila importante gid nga mga katungdanan.” Nagkahulugan ini nga ang katarungan indi mahimo matigayon. Nagsiling ang mga Nazi nga ang hilikuton sang mga Saksi ni Jehova nagasupak, ukon nagapamatok, kag ‘nagatublag sa Pungsudnon nga Sosyalistiko nga kahimusan.’

6. Anong mga panikasog ang ginhimo agod pauntaton ang aton hilikuton sang Bug-os Kalibutan nga Inaway II kag pagkatapos sadto?

6 Sang Bug-os Kalibutan nga Inaway II, ang mga pagdumili sa katawhan sang Dios ginpatuman sa Australia, Canada, kag sa iban pa nga mga kadutaan nga katapo sang British Commonwealth​—⁠sa Aprika, sa Asia, kag sa mga isla sang Caribbean kag sang Pasipiko. Sa Estados Unidos, ang gamhanan nga mga kaaway kag ang mga tawo nga ginhatagan sing sayop nga impormasyon ‘nagpahito sing kalainan paagi sa kasuguan.’ (Salmo 94:20) Apang ang mga problema tuhoy sa pagsaludo sa bandera kag ang mga ordinansa sang komunidad nga nagadumili sang pamalaybalay nga pagbantala gindangop sa mga korte, kag ang paborable nga mga desisyon sa Estados Unidos nagpalig-on sing mabakod nga pagsakdag sa kahilwayan sa pagsimba. Sa bulig ni Jehova, ang mga panikasog sang kaaway wala magmadinalag-on. Sang matapos ang inaway sa Europa, ginkuha ang mga pagdumili. Ang linibo ka Saksi nga ginbilanggo sa mga kampo konsentrasyon ginbuy-an, apang ang pagpakig-away wala pa matapos. Sa gilayon pagkatapos sang Bug-os Kalibutan nga Inaway II, ang Cold War nagsugod. Labi pa nga gin-ipit sang mga pungsod sa Nasidlangan nga Europa ang katawhan ni Jehova. Ginhimo ang opisyal nga tikang agod balabagan kag padulugon ang aton pagpanaksi nga mga hilikuton, punggan ang pagsulod sang mga literatura sa Biblia, pauntaton ang aton dayag nga mga pagtilipon. Madamo ang ginbilanggo ukon ginlupot sa mga kampo sang lakas nga pagpangabudlay.

Padayon sa Pagbantala nga Hilikuton!

7. Ano ang naeksperiensiahan sang mga Saksi ni Jehova sa Poland, Rusya, kag sa iban pa nga mga kadutaan sining ulihi nga mga tinuig?

7 Sa pagligad sang mga dekada, ang hilikuton sang pagbantala sing Ginharian ginbuksan. Walay sapayan nga Komunista pa gihapon, gintugutan sang Poland ang paghiwat sing isa-ka-adlaw nga mga kombension sang 1982. Ginhiwat didto ang internasyonal nga mga kombension sang 1985. Ginsundan ini sang dalagku nga internasyonal nga mga kombension sang 1989, nga gintambungan sang linibo gikan sa Rusya kag Ukraine. Sadto man  nga tuig ginkilala sing legal sang Hungary kag Poland ang mga Saksi ni Jehova. Sang tigragas sang 1989, ang Pader sang Berlin narumpag. Pagligad sang pila ka bulan, ginkilala kita sing legal sa Sidlangan nga Alemanya, kag wala madugay pagkatapos sadto ginhiwat ang isa ka internasyonal nga kombension sa Berlin. Kag sa pamuno sang katapusan nga dekada sang ika-20 nga siglo, ginhimo ang mga panikasog nga mapakig-angutan sing personal ang mga kauturan sa Rusya. Ang pila sa mga opisyales sa Moscow ginpalapitan, kag sang 1991, ang mga Saksi ni Jehova ginrehistro sing legal. Sugod sadto ang hilikuton nag-uswag sing daku sa Rusya kag sa mga republika nga bahin sang anay Unyon Sobyet.

8. Ano ang natabo sa katawhan ni Jehova sa sulod sang 45 ka tuig pagkatapos sang Bug-os Kalibutan nga Inaway II?

8 Samtang nagdulog ukon nagbuhin ang paghingabot sa pila ka duog, nagdugang naman ini sa iban. Sa sulod sang 45 ka tuig pagkatapos sang ikaduha nga inaway sa bug-os nga kalibutan, madamo nga kadutaan ang wala magkilala sing legal sa mga Saksi ni Jehova. Dugang pa, ginpatuman ang mga pagdumili sa aton ukon sa aton mga hilikuton sa 23 ka kadutaan sa Aprika, 9 sa Asia, 8 sa Europa, 3 sa Latin Amerika, kag 4 sa isla nga mga pungsod.

9. Ano ang naagihan sang mga alagad ni Jehova sa Malawi?

9 Ang mga Saksi ni Jehova sa Malawi nakaeksperiensia sing mapintas nga paghingabot sugod sang 1967. Bangod sang ila neutral nga tindog subong matuod nga mga Cristiano, ang aton mga masigkatumuluo didto wala magbakal sing mga kard sa partido politika. (Juan 17:16) Pagkatapos sang sinapol sang Malawi Congress Party sang 1972, ginhimo liwat ang pagpamintas. Ang mga kauturan gintabog sa ila mga puluy-an kag gindumilian sa pagtrabaho. Linibo ang nagpalagyo sa pungsod agod indi mapatay. Apang nagdaug bala ang mga nagapakig-away batok sa Dios kag sa iya katawhan? Wala! Sa tapos sang pagbaliskad sang mga kahimtangan, may kataason nga 43,767 ka manugbantala sang Ginharian ang nagreport sa Malawi sang 1999, kag kapin sa 120,000 ang nagtambong sa distrito nga mga kombension didto. Isa ka bag-ong sanga talatapan ang ginpatindog sa kapital nga siudad.

Nangita Sila Sing Inugsumbong

10. Subong sang natabo kay Daniel, ano ang ginhimo sang karon nga mga manugpamatok sang katawhan sang Dios?

10 Indi maagwanta sang mga apostata, mga klerigo, kag sang iban pa ang aton mensahe gikan sa Pulong sang Dios. Sa idalom sang pag-ipit sang pila ka relihioso nga mga bahin sang Cristiandad, ang mga manugpamatok nagapangita sang ginatawag nga legal nga paagi agod pakamatarungon ang ila pagpakig-away batok sa aton. Ano nga mga taktika ang ginagamit kon kaisa? Ti, ano ang ginhimo sang mga manughimbon sa pagsalakay kay manalagna Daniel? Sa Daniel 6:​4, 5, aton mabasa: “Ang mataas nga mga opisyales kag ang mga satrapa mismo dalayon nga nagpangita sing inugsumbong batok kay Daniel may kaangtanan sa ginharian; apang wala gid sila sing makita nga inugsumbong ukon garok nga butang, sanglit masaligan sia kag wala gid sing bisan ano nga pagpatumbaya ukon garok nga butang nga nakita sa iya. Busa ining mabukod nga mga lalaki nagsiling: ‘Wala gid kita sing makita nga inugsumbong batok sini nga Daniel, luwas lamang nga makita naton ini batok sa iya sa kasuguan sang iya Dios.’ ” Sa karon, nagapangita man ang mga manugpamatok sing inugsumbong. Nagasinggit sila sing mabaskog tuhoy sa “makatalagam nga mga kulto” kag nagatinguha nga ihatag ining matinamayon nga tawag sa mga Saksi ni Jehova. Paagi sa paghatag sing sayop nga impormasyon, sugyot, kag kabutigan, ginasalakay nila ang aton pagsimba kag ang aton pagsunod sa diosnon nga mga prinsipio.

11. Ano ang butig nga ginsiling sang pila ka manugpamatok tuhoy sa mga Saksi ni Jehova?

11 Sa iban nga mga kadutaan, wala ginakilala sang nanuhaytuhay nga relihioso kag politikal nga mga grupo nga ginabuhat naton ang “porma sang pagsimba nga matinlo kag walay dagta gikan sa pagtamod sang aton Dios.” (Santiago 1: 27) Bisan pa ang aton Cristianong mga hilikuton ginahimo sa 234 ka kadutaan, ang mga manugpamatok nagasiling nga indi kita isa ka “kilala nga relihion.” Wala lamang madugay antes sang internasyonal nga kombension sang 1998, ginbalikwat sang isa ka pamantalaan sa Atenas ang klero sang Griegong Ortodokso nga nagsiling nga “ang [mga Saksi ni Jehova] indi isa ka ‘kilala nga relihion,’ ” walay sapayan sang tuhay nga desisyon sang European Court of Human Rights. Pagligad sang pila ka adlaw, ginbalikwat sang isa pa ka pamantalaan sa amo man nga siudad ang humalambal sang simbahan nga nagsiling: “Ang [mga Saksi ni Jehova] indi mahimo mangin ‘isa ka Cristianong kongregasyon,’ kay indi gid sila pareho sing Cristianong pagtuo kay Jesucristo.” Makatilingala gid ini, kay wala na sing iban pa nga relihion nga nagapadaku sing labi sa pag-ilog kay Jesus sangsa mga Saksi ni Jehova!

12. Sa aton espirituwal nga pagpakig-away, ano ang dapat naton himuon?

 12 Ginatinguhaan naton nga pangapinan kag tukuron ang maayong balita sa legal nga mga paagi. (Filipos 1:7) Dugang pa, wala naton ginakompromiso ukon ginapahuyang ang aton malig-on nga pagsunod sa mga talaksan sang Dios sa pagkamatarong. (Tito 2:​10, 12) Kaangay ni Jeremias, aton ‘ginatampian ang aton mga balikawang kag ginapamulong ang tanan nga butang nga ginasugo ni Jehova sa aton,’ wala nagatugot nga makugmat kita sa mga nagapakig-away batok sa Dios. (Jeremias 1:​17, 18) Maathag nga ginasugid sang Balaan nga Pulong ni Jehova ang husto nga dalanon nga dapat naton laktan. Indi gid naton luyag magsandig sa maluya nga “butkon nga unod” ukon ‘magdangop sa landong sang Egipto,’ nga amo, ining kalibutan. (2 Cronica 32:​8; Isaias 30:​3; 31:​1-3) Sa aton espirituwal nga pagpakig-away, dapat kita magpadayon sa pagsalig kay Jehova upod ang aton bug-os nga tagipusuon, ginapatuytuyan sa iya ang aton mga tikang, kag wala nagasandig sa aton kaugalingon nga paghangop. (Hulubaton 3:​5-7) Kon wala ang pagsakdag ni Jehova kag ang iya mismo pagbantay sa aton, ang aton tanan nga hilikuton mangin “wala sing pulos.”​—⁠Salmo 127:⁠1.

Ginhingabot Apang Malig-on

13. Ngaa masiling nga ang sataniko nga pagsalakay kay Jesus napaslawan?

13 Ang labing maayo nga halimbawa sang malig-on nga debosyon kay Jehova amo si Jesus, nga ginsumbong sing sayop sang pagrebelde batok sa panguluhan kag sang paggamo sa natukod na nga sistema. Sa tapos mausisa ang kaso ni Jesus, si Pilato handa nga buy-an si Jesus. Apang ang kadam-an, sa sugyot sang relihiosong mga lider, nagsinggit nga ilansang si Jesus, bisan pa wala sia sing sala. Sa baylo ni Jesus, ginpangabay nila nga buy-an si Barabas​—⁠ang isa ka tawo nga ginbilanggo bangod sang pagrebelde sa panguluhan kag pagpatay! Gintinguhaan liwat ni Pilato nga hayluhon ang di-makatarunganon nga mga manugpamatok, apang sang ulihi nagpasugot sia sa luyag sang publiko. (Lucas 23:​2, 5, 14, 18-25) Bisan pa nga si Jesus napatay sa isa ka usok, ang makangilidlis nga satanikong pagsalakay sa wala sala nga Anak sang Dios napaslawan sing bug-os, kay ginbanhaw ni Jehova si Jesus kag ginbayaw sia sa Iya mismo  tuo nga kamot. Kag sang adlaw sang Pentecostes 33 C.⁠E., paagi sa ginhimaya nga si Jesus, ang balaan nga espiritu ginpasagahay, ginatukod ang Cristianong kongregasyon​—⁠ang “bag-ong tinuga.”​—⁠2 Corinto 5:​17; Binuhatan 2:​1-4.

14. Ano ang resulta sang ang Judiyong relihioso nga grupo nagpanghikot batok sa mga sumulunod ni Jesus?

14 Wala madugay pagkatapos sadto ginpahog sang relihioso nga mga grupo ang mga apostoles, apang yadtong unang mga sumulunod ni Cristo wala mag-untat sa paghambal nahanungod sa mga butang nga ila nakita kag nabatian. Ang mga disipulo ni Jesus nangamuyo: “Jehova, talupangda ang ila mga pamahog, kag itugot sa imo mga ulipon ang padayon nga pagpamulong sang imo pulong sa bug-os nga kasidla.” (Binuhatan 4:29) Ginsabat ni Jehova ang ila pag-ampo paagi sa pagpuno sa ila sing balaan nga espiritu kag sa pagpabakod sa ila nga padayunon ang ila walay kahadlok nga pagbantala. Wala madugay ginsugo liwat ang mga apostoles nga mag-untat sa pagbantala, apang si Pedro kag ang iban pa nga mga apostoles nagsabat: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Ang mga pamahog, mga pag-aresto, kag mga pagbakol wala magpauntat sa ila sa pagpasangkad sang ila hilikuton sa Ginharian.

15. Sin-o si Gamaliel, kag ano nga laygay ang ginhatag niya sa relihiosong mga nagapamatok sa mga sumulunod ni Jesus?

15 Ano ang reaksion sang relihioso nga mga manuggahom? “Napilasan gid ang ila balatyagon kag naghandum sila nga patyon [ang mga apostoles].” Apang, ang isa ka manunudlo sang Kasuguan nga si Gamaliel, isa ka Fariseo, didto sadto, kag ginatahod gid sia sang tanan nga tawo. Ginpaguwa sa salapulan sang Sanhedrin sa makadali ang mga apostoles, ginlaygayan niya ang relihioso nga mga manugpamatok: “Mga tawo sang Israel, hatagi ninyo sing igtalupangod ang inyo kaugalingon nahanungod sa ginabuko ninyo nga himuon nahanungod sining mga tawo. . . . Nagasiling ako sa inyo, Indi ninyo paghilabti ining mga tawo, kundi pabayai sila; (kay, kon ining katuyuan ukon ining buhat naghalin sa mga tawo, mapukan ini; apang kon naghalin ini sa Dios, indi ninyo sila mapukan;) basi masapwan pa kamo nga sa katunayan nagapakig-away batok sa Dios.”​—⁠Binuhatan 5:​33-39.

Wala Sing Hinganiban nga Ginhimo Batok sa Aton ang Magmadinalag-on

16. Sa imo kaugalingon nga mga tinaga, paano mo ipabutyag ang pasalig nga ginahatag ni Jehova sa iya katawhan?

16 Maayo ang laygay ni Gamaliel, kag ginapasalamatan naton kon ang iban maghambal para sa aton. Ginabaton man naton nga ang kahilwayan sa pagsimba ginasakdag paagi sa mga desisyon sa korte sang wala-sing-pinasulabi nga mga hukom. Siempre pa, ang pagsunod naton sa Pulong sang Dios wala nagapahamuot sa klero sang Cristiandad kag sa iban pa nga mga lider sang Babilonia nga Daku, ang bug-os kalibutan nga emperyo sang butig nga relihion. (Bugna 18:​1-3) Bisan pa nga sila kag ang mga naimpluwensiahan nila nagapakig-away batok sa aton, may amo kita sini nga pasalig: “ ‘Ang bisan anong hinganiban nga himuon batok sa imo indi magmadinalag-on, kag ang tagsa ka dila nga magtindog batok sa imo sa paghukom tagudilian mo. Amo ini ang panublion sang mga alagad ni Jehova, kag ang ila pagkamatarong gikan sa akon,’ siling ni Jehova.”​—⁠Isaias 54:⁠17.

17. Bisan pa ang mga nagapamatok nagapakig-away batok sa aton, ngaa maisugon kita?

17 Ang aton mga kaaway nagapakig-away batok sa aton nga wala sing rason, apang wala kita mahadlok. (Salmo 109:​1-3) Indi gid kita magtugot nga pahugon kita sang mga nagadumot sa aton mensahe sang Biblia nga ikompromiso ang aton pagtuo. Bisan pa ginapaabot naton nga magabaskog pa ang aton espirituwal nga pagpakig-away, nahibaluan naton ang resulta. Kaangay ni Jeremias, maeksperiensiahan naton ang katumanan sang matagnaon nga mga pulong: “Sila pat-od nga magapakig-away batok sa imo, apang indi sila magadaug batok sa imo, kay ‘ako kaupod nimo,’ siling ni Jehova, ‘sa pagluwas sa imo.’ ” (Jeremias 1:19) Huo, nahibaluan naton nga ang mga nagapakig-away batok sa Dios indi magadaug!

[Nota]

^ par. 5 Tan-awa ang artikulo nga “Matutom kag Maisog Walay Sapayan Sang Pagpamigos Sang mga Nazi,” pahina 24-8.

Paano Mo Sabton?

• Ngaa ang mga alagad ni Jehova ginasalakay?

• Sa anong mga paagi ang mga nagapamatok nagapakig-away batok sa katawhan ni Jehova?

• Ngaa makapat-od kita nga ang mga nagapakig-away batok sa Dios indi magadaug?

[Mga Pamangkot sa Pagtinuon]

[Retrato sa pahina 17]

Si Jeremias ginpasalig nga si Jehova mangin kaupod niya

[Retrato sa pahina 18]

Mga nakalampuwas sa kampo konsentrasyon

[Retrato sa pahina 18]

Kasingki sang guban batok sa mga Saksi ni Jehova

[Retrato sa pahina 18]

Si J. F. Rutherford kag ang iya mga kaupdanan

[Retrato sa pahina 21]

Sa bahin ni Jesus, ang mga nagapakig-away batok sa Dios wala magdaug