Magdiretso sa kaundan

Magdiretso sa listahan sang kaundan

Pagbulig sa Tanan nga Sahi sang Tawo sa Netherlands

Pagbulig sa Tanan nga Sahi sang Tawo sa Netherlands

 Report sang mga Manugbantala sang Ginharian

Pagbulig sa Tanan nga Sahi sang Tawo sa Netherlands

SI Abraham isa ka tawo nga may tumalagsahon nga pagtuo. “Sang gintawag sia,” siling ni apostol Pablo, gintuman ni Abraham ang tingog sang Dios kag ‘naglakat, bisan pa wala makahibalo kon diin sia makadto.’ Sa tapos masaylo ang iya bug-os nga pamilya, “nagpuyo [si Abraham] subong isa ka dumuluong sa duta sang saad” sa nabilin nga isa ka gatos ka tuig sang iya kabuhi.​—⁠Hebreo 11: 8, 9.

Subong man sa karon, ginabaton sang madamo nga Saksi ni Jehova ang hangkat sang pagsaylo sa iban nga pungsod agod mag-alagad kon diin mas daku ang kinahanglanon. Ang iban nagtuon sing tuhay nga lenguahe agod makapanaksi sila sa mga dumuluong nga nagsaylo sa ila pungsod. Subong sang ginapakita sang masunod nga mga halimbawa, ining maayo nga espiritu nagbukas sing “isa ka daku nga ganhaan nga nagatuytoy padulong sa hilikuton” sa Netherlands, diin isa ka milyon sang 15 milyones ka pumuluyo ang naghalin sa iban nga mga pungsod.​—⁠1 Corinto 16:⁠9.

□ Si Bahram, nga isa anay ka instruktor sang Kung Fu, naggikan sa isa ka pungsod sa Natung-an nga Sidlangan. Nakatigayon sia sing isa ka kopya sang Biblia kag sing pila ka publikasyon sang Watch Tower. Sa slod sang isa ka bulan, narealisar ni Bahram nga nasapwan niya ang kamatuoran. Nasugdan ang isa ka pagtuon sa ila nga mag-asawa, apang may problema​—⁠ang nagatudlo sa ila sing Biblia indi makahibalo sang ila lenguahe. Nagpaalintunay sila paagi sa pagkumpas, nagahambal “paagi sa mga kamot kag mga tiil,” suno sa paghinumdom nila. Sang ulihi, natultulan ni Bahram kag sang iya asawa ang isa ka kongregasyon diin ginagamit ang ila tumandok nga hambal, kag pagkatapos sadto nagdasig ang ila pag-uswag. Isa na karon ka bawtismado nga Saksi si Bahram.

□ Ginpalapitan sang isa ka Olandes nga mag-asawa nga payunir ang isa ka taga-Indonesia nga lalaki nga nagatindog sa atubangan sang supermarket. Nakibot gid sia sang nakighambal sa iya ang mag-asawa sa iya kaugalingon nga lenguahe. Nian ginhimo ang kahimusan nga duawon sia sa iya puluy-an. Natukiban nga nag-istar sia gali anay sa Rusya sa sulod sang kapin sa 20 ka tuig, nga sa amo nga tion nangin isa sia ka gynecologist. Nagsiling sia nga isa sia ka ateista, apang ginbaton niya nga kada may ginapabata sia, indi niya malikawan ang magdayaw, “Daw ano ka himpit ang lawas sang tawo! Isa gid ka milagro!” Nagpasugot sia nga magtuon sa Biblia kag wala magdugay nagpati sia nga may isa ka Manunuga nga nagaulikid sa katawhan. (1 Pedro 5:​6, 7) Isa na sia ka bawtismado nga utod karon kag nagaalagad sa Indonesian nga kongregasyon sa Amsterdam.

□ Sa Rotterdam, isa sang pinakadaku nga pantalan sa kalibutan, ang isa ka grupo sang mga payunir nangin sampaton sa pagbantala sa mga grupo nga may nanuhaytuhay nga lenguahe nga nagadungka adlaw-adlaw. Subong resulta sang hilikuton sining mapagsik nga grupo sang mga manugbantala, ginbaton sang pila ka marinero, lakip ang isa ka kapitan, isa ka opisyal sang mga marinero, kag isa anay ka badigard, ang kamatuoran. Sa karon nagabulig man sila sa pagpalapnag sing maayong balita tuhoy sa Ginharian sang Dios sa bug-os nga kalibutan.​—⁠Mateo 24:⁠14.

Subong sa iban nga bahin sang kalibutan, ang mga Saksi ni Jehova sa Netherlands determinado nga himuon ang ila bahin sa pagbantala sing maayong balita nga dayon sa tagsa ka pungsod, tribo, hambal, kag katawhan.​—⁠Bugna 14:⁠6.