Magdiretso sa kaundan

Magdiretso sa listahan sang kaundan

Ano ang Yabi sa Kadalag-an?

Ano ang Yabi sa Kadalag-an?

 Ano ang Yabi sa Kadalag-an?

SISTEMATIKO nga ginahanda sang duha ka mapahituon nga lamharon nga lalaki ang isa ka makatilingala-tulukon nga makina para sa isa ka importante nga pagtilaw. Sing hinali, ginhugakom sang isa ka mabaskog nga dalimuos ang mahuyang nga aparato, ginbuyong ini sa kahanginan, kag upod ang nagahinurungkadol nga lagabong nawasdak ini. Naluyahan sing buot, naurungan ang mga lalaki. Ang ila mauti kag mabudlay nga hinimuan nahamtang nga daw kinumos sa nagatinuwas nga hinantal sang mga kahoy kag metal.

Para kanday Orville kag Wilbur Wright, ang natabo sadtong isa ka adlaw sang Oktubre sang 1900 indi ang nahauna nga kapaslawan sa ila pagtinguha nga makahimo sing isa ka mabug-at-sangsa-hangin nga nagalupad nga makina. Nakahinguyang na sila sing pila ka tuig kag nakagasto sing daku nga kantidad sang kuwarta sa pag-eksperimento.

Apang, sang ulihi, nagmadinalag-on ang ila pagkamapinadayunon. Sang Disiembre 17, 1903, sa Kitty Hawk, Aminhan nga Carolina, E.⁠U.⁠A., nakalansar ang mag-utod nga Wright sing isa ka de-motor nga orihinal nga modelo nga naglupad sa sulod sang 12 segundos​—⁠malip-ot lamang kon ipaanggid sa mga paglupad karon, apang tuman na kalawig agod mabag-o sing dayon ang kalibutan!

Ang kadalag-an sa kalabanan nga mga panikasog nagasandig sing daku sa mapailubon nga pagpadayon. Pagtuon man ini sing isa ka bag-o nga hambal, pagtuon sing palangitan-an, ukon pagpalambo pa gani sing pag-abyanay, ang kalabanan nga butang nga may balor matigayon lamang paagi sa padayon nga panikasog. “Siam ka beses sa napulo,” siling sang awtor nga si Charles Templeton, “ang kadalag-an direkta nga mapabangod sa isa ka butang: lakas nga pagpangabudlay.” Ang kolumnista nga si Leonard Pitts, Jr., nagsiling: “Ginahambalan naton ang tuhoy sa kinaadman, ginabaton naton ang swerte, apang sa masami gid, ginapasapayanan naton ang labing importante nga mga butang. Ang lakas nga pangabudlay kag ang madamo nga kapaslawan. Ang malawig nga inoras sang pagtrabaho.”

Ginapamatud-an sini ang ginasiling sang Biblia sang una: “Ang kamot sang maukod amo ang magagahom.” (Hulubaton 12:24) Ang pagkaukod nagakahulugan nga magpadayon kita sa aton mga panikasog. Kinahanglan ini kon luyag naton nga matigayon ang gintalana naton nga himuon. Ano ang pagkamapinadayunon? Paano kita makapadayon sa paghimud-os sa aton mga tulumuron, kag sa ano kita dapat magpadayon? Ining mga pamangkot pagasabton sa masunod nga artikulo.

[Picture Credit sa pahina 3]

U.⁠S. National Archives photo