Magdiretso sa kaundan

Magdiretso sa listahan sang kaundan

Bag-o nga mga Katapo sang Nagadumala nga Hubon

Bag-o nga mga Katapo sang Nagadumala nga Hubon

 Bag-o nga mga Katapo sang Nagadumala nga Hubon

SANG Sabado, Oktubre 2, 1999, ang Tuigan nga Miting sang Watch Tower Bible and Tract Society of Pennsylvania natapos paagi sa isa ka sorpresa nga pahibalo. Ang 10,594 nga nagtambong ukon ginkonektar paagi sa telepono nakunyag sa pagpamati nga apat ka bag-o nga katapo ang gindugang sa Nagadumala nga Hubon sang mga Saksi ni Jehova. Ang bag-o nga mga katapo, ang tanan hinaplas nga mga Cristiano, amo sanday Samuel F. Herd; M. Stephen Lett; Guy H. Pierce; kag David H. Splane.

• Si Samuel Herd nagsugod sa pagpayunir sang 1958, kag kutob sang 1965 tubtob 1997, nag-alagad sia sa hilikuton sa sirkito kag distrito. Pagkatapos sadto, sila sang iya asawa, si Gloria, nangin katapo sang pamilya Bethel sa Estados Unidos, diin nagtrabaho si Utod Herd sa Service Department. Nag-alagad man sia subong kabulig sa Service Committee.

• Si Stephen Lett nagsugod sa pagpayunir sang Disiembre 1966, kag kutob sang 1967 tubtob 1971, nag-alagad sia sa Bethel sa Estados Unidos. Sang Oktubre 1971, nagminyo sila sang iya asawa, si Susan, kag nag-espesyal payunir. Kutob sang 1979 tubtob 1998, nag-alagad sia subong manugtatap sa sirkito. Kutob sang Abril 1998, sila ni Susan nangin bahin sang pamilya Bethel sa Estados Unidos. Didto nagtrabaho sia sa Service Department kag nangin kabulig sa Teaching Committee.

• Si Guy Pierce nagpamilya kag wala madugay pagkatapos sadto nagpayunir sila sang iya asawa sang Abril 1982. Nag-alagad sia subong manugtatap sa sirkito kutob sang 1986 tubtob 1997, sang sila sang iya asawa, si Penny, nangin bahin sang pamilya Bethel sa Estados Unidos. Nag-alagad si Utod Pierce subong kabulig sa Personnel Committee.

• Si David Splane nagsugod sa pagpayunir sang Septiembre 1963. Gradwado sang ika-42 nga klase sang Gilead, nag-alagad sia subong misyonero sa Senegal, Aprika, nian sa sulod sang 19 ka tuig sa hilikuton sa sirkito sa Canada. Sila sang iya asawa, si Linda, nag-alagad sa Bethel sa Estados Unidos kutob sang 1990, diin nagtrabaho si Utod Splane sa Service kag Writing nga mga departamento. Kutob sang 1998, nangin kabulig sia sa Writing Committee.

Dugang sa apat ka bag-ong katapo, ang Nagadumala nga Hubon karon ginatapuan nanday C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, kag D. Sydlik. Ginapangamuyo sang tanan nga kabay nga padayon nga pakamaayuhon kag pabakuron ni Jehova ang Nagadumala nga Hubon, nga karon gindugangan, samtang padayon sini nga ginadumalahan ang mga hilikuton sang katawhan sang Dios sa bug-os nga kalibutan kag ginatatap ang ila espirituwal nga mga interes.