Nabasa mo na bala sing maayo ang ulihi nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ano ang dapat himuon sang mga utod nga lalaki, pareho sang mga manugtatap sang sirkito kag mga gulang sa kongregasyon, kon makabaton sila sang panuytoy halin sa organisasyon sang Dios?

Dapat nila ini tumanon dayon. Pamangkuton nila ang ila kaugalingon: ‘Nagabulig bala ako sa pag-uswag sang espirituwalidad sang mga kaupod ko? Ginasunod ko bala dayon kag ginasakdag ang mga panuytoy?’—w16.11, p. 11.

San-o ginbihag sang Babilonia nga Daku ang matuod nga mga Cristiano?

Natabo ini wala madugay pagkatapos nga mapatay ang mga apostoles. May mga gusto sadto mangin lider sa kongregasyon. Ginsakdag sang Simbahan kag Gobierno ang apostata nga Cristianismo kag gintinguhaan nila nga indi mabatian ang tingog sang tulad-trigo nga mga Cristiano. Pero sa mga dekada antes sang 1914, amat-amat nga nahilway ang mga hinaplas.—w16.11, p. 23-25.

Ano ang importante nga ginhimo ni Lefèvre d’Étaples?

Sang dekada 1520, ginbadbad ni Lefèvre ang Biblia sa Pranses para mabasa ini sang ordinaryo nga mga tawo. Ang iya paagi sa pagbadbad sang mga teksto sa Biblia nakaimpluwensia kanday Martin Luther, William Tyndale, kag John Calvin.—wp16.6, p. 10-12.

Ano ang kinatuhayan sang “paghunahuna suno sa unod” kag “paghunahuna suno sa espiritu”? (Roma 8:6)

Ang mga nagahunahuna suno sa unod nagapokus sa mga handum kag huyog sang indi himpit nga unod, pirme nila ini nga ginaistoryahan, kag nanamian sila sa sini. Pero nagaresulta ini sa kamatayon. Ang mga nagahunahuna suno sa espiritu nagapokus sa mga butang nga may kaangtanan sa Dios kag sa iya panghunahuna; ang mga Cristiano nga nagahimo sini ginagiyahan sang balaan nga espiritu, kag nagaresulta ini sa kabuhi kag paghidait.—w16.12, p. 15-17.

Ano ang pila ka praktikal nga paagi para mabuhinan ang kabalaka?

Unaha ang mas importante nga mga butang, mangin rasonable, magtigana sing regular nga tion para sa imo kaugalingon, apresyaha ang mga tinuga sang Dios, mangin masinadyahon, mag-ehersisyo sing regular, kag magpahuway sing maayo.—w16.12, p. 22-23.

Ginliton si Enoc agod indi sia mapatay. (Heb. 11:5) Paano?

Mahimo nga ginliton si Enoc sang Dios halin sa kabuhi pakadto sa kamatayon sa paagi nga wala niya mabatyagan.—wp17.1, p. 12-13.

Ngaa importante gihapon ang kaugdang?

Ang maugdang nga tawo nakahibalo sang iya masarangan kag mga limitasyon. Dapat nahibaluan naton kon paano ang aton paggawi nagaapektar sa iban, kag indi kita dapat magbatyag nga importante gid kita.—w17.01, p. 18.

Ano ang pamatuod nga gintuytuyan sang Dios ang nagadumala nga hubon sang unang siglo pareho sang pagtuytoy niya sa Nagadumala nga Hubon subong?

Ginbuligan sila sang balaan nga espiritu nga mahangpan ang mga kamatuoran sa Biblia. Ginbuligan sila sang mga anghel nga pangunahan ang pagbantala, kag nagpatuytoy sila sa Pulong sang Dios. Amo man ini subong.—w17.02, p. 26-28.

Ano ang mga basihan para makasiling kita nga hamili gid ang gawad?

May apat ka basihan: Kon sin-o ang naghatag sini, kon ngaa ginhatag ini, kon ano nga sakripisyo ang ginhimo para mahatag ini, kag kon bala kinahanglan gid ini. Dapat naton pamalandungan ini nga mga basihan.—wp17.2, p. 4-6.

Kon nakadesisyon na ang isa ka Cristiano, puede pa bala niya ini bag-uhon?

Dapat naton himuon ang aton desisyon. Pero, may mga tion nga dapat binagbinagon naton liwat ang aton desisyon. Sang maghinulsol ang mga taga-Ninive, ginbag-o sang Dios ang iya desisyon. Kon kaisa, mahimo nga nagbag-o ang mga kahimtangan ukon may bag-o nga impormasyon nga mabasihan naton para bag-uhon ang aton desisyon.—w17.03, p. 16-17.

Ngaa makatalagam gid ang kutsokutso?

Mahimo ini magpalala sang problema. Husto man kita ukon indi, ang paghambal sing masakit sa iban indi gid makasolbar sang problema.—w17.04, p. 21.