Magdiretso sa kaundan

Magdiretso sa listahan sang kaundan

Makig-abyan sa mga Tawo nga Lain Sangsa Imo

Makig-abyan sa mga Tawo nga Lain Sangsa Imo

Ang Problema

Kon likawan naton ang mga tawo nga wala naton nanamian, mahimo magdugang ang aton diskriminasyon sa ila. Kag kon makig-abyan lang kita sa mga tawo nga pareho sa aton, mahimo naton pensaron nga ang aton panghunahuna, balatyagon, kag paggawi amo lang ang insakto.

Prinsipio sa Biblia

‘Buksi ninyo sing masangkad ang inyo mga tagipusuon.’—2 CORINTO 6:13.

Ano ang buot silingon sini? Ang aton “tagipusuon” mahimo magpatuhoy sa aton mga balatyagon kag mga nanamian. Kon ang aton nanamian amo lang ang mga tawo nga pareho man sa aton, mangin sirado ukon makitid ang aton tagipusuon. Para malikawan ina nga problema, dapat man kita makig-abyan sa mga tawo nga lain sangsa aton.

Kon Paano Makabulig ang Pagpakig-abyan sa mga Tawo nga Lain Sangsa Aton

Samtang ginatinguhaan naton nga mas makilala ang iban, amat-amat man naton nga maintiendihan kon ngaa lain ang ila paagi sa paghimo sang pila ka butang. Kag samtang nagasuod kita sa ila, amat-amat man naton sila nga ginakabig nga pareho sa aton. Mas ginapabaloran na naton sila kag mabatyagan na naton ang ila kalipay kag kasubo.

Binagbinaga ang halimbawa ni Nazaré. Sang una, may diskriminasyon sia batok sa mga imigrante. Ginpaathag niya kon ano ang nakabulig sa iya para madula ang iya diskriminasyon. “Nakig-upod ako sa ila kag nagtrabaho upod sa ila. May mga nakilala ako nga ang batasan baliskad gid sa ginasiling sang mga tawo parte sa ila. Kon makig-abyan ka sa mga tawo nga lain ang kultura, matun-an mo  nga indi sila paghukman base lamang sa ila itsura ukon sa ginasiling sang iban parte sa ila. Palanggaon mo na sila kag pabaloran bilang indibiduwal.”

Ano ang Mahimo Mo?

Mangita sing kahigayunan nga maistorya ang mga tawo nga lain ang pungsod, kultura, ukon lenguahe. Puede mo mahimo ang masunod:

  • Pamangkuta sila parte sa ila kaugalingon.

  • Agdaha sila sa pagkaon.

  • Magpamati sa ila mga istorya kag hibalua kon ano ang importante sa ila.

Kon tinguhaan mo nga hangpon nga nangin amo sila sina nga tawo bangod sang ila eksperiensia sa kabuhi, mangin positibo ang imo pagtan-aw sa ila kag manamian ka na sa ila.