Magdiretso sa kaundan

Magdiretso sa listahan sang kaundan

Ano ang Epekto sang mga Gadyet sa Inyo Pag-asawahay?

Ano ang Epekto sang mga Gadyet sa Inyo Pag-asawahay?

Ang gadyet makabulig para mangin mabakod ang relasyon sang mag-asawa kon gamiton nila ini sing maayo. Halimbawa, makabulig ini sa ila nga makakontakanay sa bilog nga adlaw.

Pero indi insakto ang paggamit sang iban nga mag-asawa sa ila mga gadyet. Bangod sini . . .

  • wala na sila sing tion sa isa kag isa.

  • ginadala nila ang ila trabaho sa ila balay bisan indi man kinahanglanon.

  • ginadudahan nila ang isa kag isa kag nagaluib pa gani.

 ANO ANG DAPAT MO MAHIBALUAN?

PAG-UPDANAY

Ang isa ka bana nga si Michael, nagsiling: “Kon kaisa, bisan pa updanay kami sang akon asawa, pamatyag ko daw wala lang sia kay busy sia sa iya cellphone kag wala niya ako ginasapak. Kag nagasiling sia: ‘Subong pa lang ’ko gani kauyat sang akon cellphone.’” Ang isa ka bana nga si Jonathan nagsiling nga kon amo sina ang sitwasyon, “bisan pa updanay ang mag-asawa, daw pareho lang gihapon nga layuay sila.”

PAMENSARA INI: Pirme ka bala may ginatawgan ukon gina-text bisan pa ginaistorya ka sang imo asawa ukon bana?—EFESO 5:33.

TRABAHO

May mga tawo nga ang ila obra nagakinahanglan nga makontak sila bisan ano oras. Bisan pa indi amo sini ang obra sang pila ka tawo, ginadala gihapon nila ang ila obra sa ila balay. “Ginasabat ko gihapon ang mga tawag ukon mga text halin sa akon obra bisan pa ara na ako sa balay kag oras ko na ’na tani para sa akon asawa,” siling sang isa ka bana nga si Lee. Ang isa ka asawa nga si Joy nagsiling: “Naga-work from home ako, gani unay gid pirme ang obra, amo nga bisan pa indi na oras sang akon obra nagatrabaho ako gihapon.”

PAMENSARA INI: Kon ginaistorya ka sang imo bana ukon asawa, ginapamatian mo bala sing maayo ang iya mga ginahambal?—LUCAS 8:18.

KATUTOM

Suno sa isa ka surbe, madamo nga mag-asawa ang nagainaway bangod nagaduda sila sa ginahimo sang ila bana ukon asawa sa social media. Dies porsiento sang mga ginsurbe ang nagsiling nga may gin-post sila online nga wala kabalo ang ila bana ukon asawa.

Madamo nga tawo ang nagapati nga kon indi maayo ang paggamit sang social media, mahimo ini mangin rason nga mag-inaway ang mag-asawa kag magluib pa gani. Amo nga indi katingalahan nga ang mga abogado nagsiling nga ang isa sa panguna nga rason sa pagbulagay amo ang social media.

PAMENSARA INI: May ginaistorya ka bala nga opposite sex kag ginatago mo ini sa imo bana ukon asawa?—HULUBATON 4:23.

 ANO ANG MAHIMO MO?

UNAHA KON ANO ANG IMPORTANTE

Ang isa ka tawo nga wala nagakaon, sa ulihi magamasakit gid. Sing kaanggid, kon wala ginahatagan sing oras sang isa ka tawo ang iya bana ukon asawa, sa ulihi maguba man ang ila pag-asawahay.—Efeso 5:28, 29.

PRINSIPIO SA BIBLIA: “[Pat-ura] ninyo ang mas importante nga mga butang.”—FILIPOS 1:10.

Binagbinaga kon diin sa masunod nga mga panugda ang gusto mo himuon, ukon isulat ang imo mismo mga ideya kon ano ang inyo himuon para indi masablagan sang inyo mga gadyet ang inyo pag-asawahay.

  • Magkaon sing dungan bisan isa lang ka bes kada adlaw

  • Mag-iskedyul sing tion nga indi kamo maggamit sang inyo mga gadyet

  • Mag-iskedyul sing tion para maka-date kamo

  • I-off ang mga gadyet kon gab-i kag indi ini pag-ihulid

  • Mag-istoryahanay sing 15 minutos kada adlaw nga wala nagauyat sing gadyet

  • Mag-iskedyul sing tion nga indi kamo maggamit sing Internet