MALIPAYON KA BALA NGA TAWO? Kon amo, ano ang nagapalipay sa imo? Ang imo bala pamilya, trabaho, ukon relihion? Ayhan may gusto ka nga lab-uton para mangin malipayon. Halimbawa, gusto mo makatapos sa pag-eskwela, makaobra, ukon makabakal sing salakyan.

Madamo nga tawo ang nalipay man sang nalab-ot nila ang ila handum ukon nakuha ang butang nga gusto nila. Pero nagadugay bala ang ila kalipay? Sa masami wala, amo nga napaslawan gid sila.

Ang kalipay isa ka balatyagon nga nagadugay, halin sa pagbatyag nga kontento ka asta sa pagbatyag nga nanamian ka gid sa imo kabuhi, kag gusto mo nga magpadayon ini.

Dugang pa, bangod nagapadayon ini nga balatyagon, ginasiling nga ang kalipay indi isa ka destinasyon ukon lalab-uton, kundi padayon nga paglakbay. Gani ang pagsiling sing, “Mangin malipayon lang ako kon . . . ”, daw pareho lang nga ginapunggan mo ang imo kalipay.

Halimbawa, ikumparar naton ang kalipay sa maayo nga panglawas. Paano mangin maayo ang aton panglawas? Nagakaon kita sing masustansia nga pagkaon, nagaehersisyo, kag wala nagaabuso sa aton lawas. Amo man sini ang kalipay. Resulta ini sang maayo nga pagkabuhi, nga amo ang pagsunod sa husto nga mga prinsipio.

Ano nga mga prinsipio ukon mga kinaiya ang nagahatag sing kalipay? Madamo, pero ang masunod amo ang pinakaimportante:

• PAGKAKONTENTO KAG KAALWAN

• MAAYO NGA PANGLAWAS KAG KABAKOD

• GUGMA

• PAGPATAWAD

• KATUYUAN SANG KABUHI

• PAGLAUM

Ang isa ka ginarespeto gid nga libro parte sa kaalam nagsiling: “Malipayon ang mga wala sing kasawayan sa ila dalanon.” (Salmo 119:1) Binagbinagon naton ina nga dalanon.