TULUN-AN NGA ARTIKULO 37
AMBAHANON 118 “Dugangi ang Amon Pagtuo”
Isa ka Sulat nga Makabulig sa Aton nga Makabatas Asta sa Katapusan
“Ginahuptan naton sing malig-on tubtob sa katapusan ang pagsalig nga yara sa aton sa ginsuguran.”—HEB. 3:14.
ANG MATUN-AN NATON
Binagbinagon naton ang mga leksion nga matun-an naton sa sulat para sa mga Hebreo. Makabulig ini sa aton nga makabatas kag mangin matutom asta sa katapusan.
1-2. (a) Ano ang sitwasyon sa Judea sang ginsulatan ni apostol Pablo ang mga Hebreo? (b) Ngaa suno gid sa tion ini nga sulat?
PAGKATAPOS mapatay si Jesus sang 33 C.E., nakaeksperiensia sang mga kabudlayan ang Hebreo nga mga Cristiano sa Jerusalem kag sa Judea. Sadto nga tion, ginporma ang Cristianong kongregasyon, kag grabe nga paghingabot ang naeksperiensiahan sang mga Cristiano. (Binu. 8:1) Dayon pagligad sang mga 20 ka tuig, binudlayan gid sila bangod sang tiggulutom kag kapigaduhon. (Binu. 11:27-30) Kag sang ulihi, nakaeksperiensia sila sang mas grabe pa gid nga kabudlayan. Pero antes nila ini naeksperiensiahan, medyo nagtawhay ang sitwasyon sang mga 61 C.E. Sa sina nga tion, gintuytuyan ni Jehova si apostol Pablo nga sulatan sila.
2 Suno gid sa tion ang sulat para sa mga Hebreo bangod indi magadugay ang ila matawhay nga sitwasyon. Ginhatagan sila ni Pablo sang mga laygay nga makabulig sa ila nga mabatas ang kapipit-an nga malapit na lang nila maeksperiensiahan. Kay man, malapit na lang matabo ang gintagna ni Jesus parte sa paglaglag sa Jerusalem. (Luc. 21:20) Siempre, wala kabalo si Pablo kag ang mga Cristiano sa Judea kon san-o gid ini matabo. Pero, may tion pa ang mga Cristiano sadto nga mahandaan ini. Puede nila gamiton ini nga tion para pabakuron ang ila pagtuo kag pagbatas.—Heb. 10:25; 12:1, 2.
3. Ngaa dapat kita mangin interesado subong sa sulat para sa mga Hebreo?
3 Malapit na lang naton maeksperiensiahan ang kapipit-an nga mas mabudlay pa sa naeksperiensiahan sadto sang Hebreo nga mga Cristiano. (Mat. 24:21; Bug. 16:14, 16) Gani, binagbinagon naton ang pila ka laygay nga ginhatag ni Jehova sa ila nga makabulig man sa aton subong.
“MAGPANIKASOG KITA PADULONG SA PAGKAHAMTONG”
4. Ano nga mga kabudlayan ang naeksperiensiahan sang mga Judiyo nga nangin Cristiano? (Tan-awa man ang piktyur.)
4 Dapat maghimo sang daku nga pagbag-o ang mga Judiyo nga nangin Cristiano, pero indi ini mahapos himuon. May tion sa kasaysayan nga nangin pinili nga katawhan ni Jehova ang mga Judiyo. Ara sa Jerusalem ang hari nga nagarepresentar kay Jehova, kag nagakadto sa templo sa Jerusalem ang mga tawo nga gusto magsimba sa Iya. Ginasunod sang tanan nga matutom nga mga Judiyo ang Mosaikong Kasuguan nga ginapaathag sa ila sang mga lider sang ila relihion. May ginasunod sila nga mga kasuguan parte sa pagkaon, parte sa pagpatuli, kag parte sa ila pagtratar sa mga indi Judiyo. Pero pagkatapos napatay si Jesus, wala na ginpatuman ang Mosaikong Kasuguan kag indi na kinahanglan maghalad sa templo. Bangod sini, nabudlayan ang mga Judiyo nga nangin Cristiano nga bag-uhon ang ila paagi sang pagsimba. (Heb. 10:1, 4, 10) Bisan gani ang hamtong nga mga Cristiano, pareho kay apostol Pedro, nabudlayan man nga mag-adjust sa pila ka mga pagbag-o. (Binu. 10:9-14; Gal. 2:11-14) Bangod nangin Cristiano ini nga mga Judiyo, ginhingabot sila sang mga lider sang relihion sang mga Judiyo.
Dapat mangin kumbinsido gid ang mga Cristiano sa kamatuoran, kag dapat nila sikwayon ang butig nga mga panudlo sang mga lider sang relihion sang mga Judiyo nga nagapamatok sa ila (Tan-awa ang parapo 4-5)
5. Ano ang duha ka grupo nga nagpamatok sa mga Cristiano?
5 Duha ka grupo sang mga tawo ang nagpamatok sa mga Cristiano sa Judea. Ang isa ka grupo amo ang mga lider sang relihion sang mga Judiyo. Para sa ila, apostata ang Hebreo nga mga Cristiano bangod ginbiyaan nila ang relihion sang mga Judiyo. Ang isa pa ka grupo amo ang pila ka tawo sa kongregasyon nga nagainsister nga dapat padayon nga sundon sang tanan nga Cristiano ang Mosaikong Kasuguan. Posible nga ginainsister nila ini para indi sila paghingabuton. (Gal. 6:12) Ano ang makabulig sa mga Cristiano nga mangin matutom kay Jehova?
6. Ano ang ginpalig-on ni Pablo sa iya mga kauturan nga dapat nila himuon? (Hebreo 5:14–6:1)
6 Sa sulat ni Pablo para sa mga Hebreo, ginpalig-on niya ang iya mga kauturan nga tun-an sing maayo ang Pulong sang Dios kag pamalandungan ini. (Basaha ang Hebreo 5:14–6:1.) Gingamit ni Pablo ang Hebreong Kasulatan para ipaathag sa ila nga mas labaw ang paagi sang pagsimba sang mga Cristiano sangsa paagi sang pagsimba sang mga Judiyo. a Ginpalig-on sila ni Pablo nga magtuon sing maayo para mas mahangpan pa gid nila ang kamatuoran. Paagi sa sini, mapauswag nila ang ila ikasarang nga mabal-an ang butig nga mga panudlo kag masikway ini.
7. Paano kita ginapamatukan subong?
7 Subong, may mga tawo man nga nagapalapta sang mga impormasyon kag mga ideya nga nagasumpakil sa matarong nga mga kasuguan ni Jehova. May pila ka tawo nga nagapakalain sa aton kay ginatuman gid naton ang mga kasuguan sang Biblia parte sa sex. Estrikto kuno kita katama kag mapintas. Malayo na gid katama sa panghunahuna ni Jehova ang panghunahuna sang mga tawo sa kalibutan. (Hulu. 17:15) Gani, dapat naton pauswagon ang aton ikasarang nga mabal-an ang sala nga mga panghunahuna kag sikwayon ini. Indi naton pagtugutan ang mga nagapamatok sa aton nga paluyahon ang aton buot ukon pauntaton kita sa pag-alagad kay Jehova.—Heb. 13:9.
8. Ano ang dapat naton himuon para mangin hamtong kita nga mga Cristiano?
8 Ginlaygayan ni Pablo ang Hebreo nga mga Cristiano nga dapat nila panikasugan nga mangin hamtong. Dapat man naton iaplikar ini nga laygay. Buot silingon, dapat naton tun-an sing maayo ang Biblia para mas makilala pa gid naton si Jehova kag para mailog naton ang iya panghunahuna. Dapat padayon naton ini nga himuon bisan pa nabawtismuhan na kita. Kag bisan pa madugay na kita nga nagaalagad kay Jehova, dapat naton regular nga basahon kag tun-an ang Pulong sang Dios. (Sal. 1:2) Kon regular kita nga nagatuon, magabakod ang aton pagtuo. Amo ini ang kinaiya nga ginsiling ni Pablo nga dapat ipakita sang Hebreo nga mga Cristiano.—Heb. 11:1, 6.
DAPAT MAY ‘PAGTUO KITA NGA MAKATIPIG SA ATON KABUHI’
9. Ngaa kinahanglan sang Hebreo nga mga Cristiano ang mabakod nga pagtuo?
9 Kinahanglan sang Hebreo nga mga Cristiano ang mabakod nga pagtuo para malampuwasan nila ang kapipit-an sa Judea nga malapit na lang gid matabo. (Heb. 10:37-39) Ginpaandaman ni Jesus ang iya mga sumulunod nga kon makita nila nga ginalibutan na sang mga soldado ang Jerusalem, dapat sila magpalagyo sa mga bukid. Dapat ini tumanon sang tanan nga Cristiano nga nagaistar sa siudad sang Jerusalem kag sa kaumhan sang Judea. (Luc. 21:20-24) Sadto nga tion, kon may magsalakay nga mga soldado, nagapalagyo sa siudad ang mga tawo nga ara sa uma. Nagapati sila nga maproteksionan sila sang siudad nga napalibutan sang pader, pareho sang Jerusalem. Para sa Hebreo nga mga Cristiano, daw mas maayo kuntani kon magpabilin na lang sila sa Jerusalem imbes nga magpalagyo sa mga bukid. Gani, kinahanglan nila ang mabakod nga pagtuo para matuman nila si Jesus.
10. Kon mabakod ang pagtuo sang isa ka Cristiano, palig-unon sia sini nga himuon ang ano? (Hebreo 13:17)
10 Kinahanglan man sang Hebreo nga mga Cristiano nga magsalig sa mga gintangdo ni Jesus nga magpanguna sa kongregasyon. Posible gid nga may ginhatag nga mga instruksion ining nagapanguna nga mga utod. Nalakip sa sini kon san-o sila dapat malagyo kag kon paano nila ini himuon. (Basaha ang Hebreo 13:17.) Ang Griego nga tinaga nga gingamit sa Hebreo 13:17 para sa ekspresyon nga “mangin matinumanon” nagapahangop nga nagatuman ang isa ka tawo sa instruksion bangod may salig sia sa naghatag sini. Ginapahangop sini nga dapat magtuman ang Hebreo nga mga Cristiano indi bangod dapat nila ini himuon, kundi bangod may salig sila sa mga nagapanguna sa ila. Gani antes mag-abot ang kapipit-an, dapat nila pabakuron ang ila pagsalig sa mga nagapanguna sa ila. Kon nagatuman sila sa tion nga medyo matawhay ang sitwasyon, mangin mahapos para sa ila nga magtuman sa tion sang kabudlayan.
11. Ngaa importante nga mabakod ang aton pagtuo subong?
11 Pareho sa Hebreo nga mga Cristiano, kinahanglan man naton ang pagtuo subong. Wala nagapati ang kalabanan nga mga tawo nga malapit na lang laglagon ining malain nga kalibutan. Ginayaguta pa gani nila kita bangod nagapati kita sa paandam sang Biblia parte sa sini. (2 Ped. 3:3, 4) Kag bisan pa may pila ka impormasyon nga ginasugid ang Biblia parte sa matabo sa tion sang dakung kapipit-an, madamo pa nga mga butang ang wala naton nabal-an parte sa sini. Gani, dapat mabakod ang aton pagtuo nga laglagon gid ni Jehova ining malain nga kalibutan sa iya gintalana nga tion. Kag dapat kumbinsido kita nga indi niya kita pagpabay-an sa sina nga tion.—Hab. 2:3.
12. Ano ang makabulig sa aton para makalampuwas kita sa dakung kapipit-an?
12 Dapat man naton pabakuron ang aton pagtuo sa “matutom kag mainandamon nga ulipon” nga amo ang ginagamit ni Jehova para giyahan kita subong. (Mat. 24:45) Sang napalibutan na sang Romano nga mga soldado ang Jerusalem, posible nga nakabaton sang mga instruksion ang Hebreo nga mga Cristiano. Kon magsugod na ang dakung kapipit-an, posible nga makabaton man kita sang mga instruksion nga makaluwas sang aton kabuhi. Gani, importante gid nga pabakuron naton ang aton pagsalig sa mga instruksion nga ginahatag sang mga nagapanguna sa organisasyon ni Jehova. Kon wala naton ginatuman ang ila mga instruksion subong, mabudlayan kita nga tumanon ang ila mga instruksion sa tion sang dakung kapipit-an.
13. Ngaa kinahanglan gid sang mga Cristiano ang laygay nga mabasa sa Hebreo 13:5?
13 Samtang ginahulat sang Hebreo nga mga Cristiano ang instruksion nga tion na para magpalagyo sila, dapat man nila pasimplehon ang ila kabuhi paagi sa pagsikway sa “gugma sa kuarta.” (Basaha ang Hebreo 13:5.) Ang pila sa ila nakaeksperiensia sadto sang tiggulutom kag kapigaduhon. (Heb. 10:32-34) Bisan pa napamatud-an na nila nga masarangan nila nga batason ang mga kabudlayan para sa maayong balita, posible nga nahunahuna sang pila sa ila nga kinahanglan nila padamuon ang ila kuarta para indi sila maapektuhan sang kapigaduhon. Pero bisan ano pa kadamo sang ila kuarta, indi ini makaamlig sa ila kon laglagon na ang Jerusalem. (Sant. 5:3) Ang matuod, kon importante gid sa isa ka Cristiano sadto ang materyal nga mga butang, posible gid nga indi mahapos para sa iya nga magpalagyo kag biyaan ang iya balay kag mga pagkabutang.
14. Kon mabakod ang aton pagtuo, paano ini makaimpluwensia sa aton mga desisyon parte sa materyal nga mga butang?
14 Kon mabakod ang aton pagtuo nga malapit na lang laglagon ni Jehova ining malain nga kalibutan, mapalig-on kita sini nga sikwayon ang materyalismo. Sa tion sang dakung kapipit-an, wala na sing pulos ang kuarta. Ang Biblia nagasiling nga “ihaboy [sang mga tawo] ang ila mga pilak sa mga dalan” bangod marealisar nila nga “bisan ang ila pilak ukon bulawan indi makaluwas sa ila sa adlaw sang kaakig ni Jehova.” (Ezeq. 7:19) Gani imbes nga magpokus sa kon paano naton padamuon ang aton kuarta, dapat makita sa aton mga desisyon nga gusto naton magkabuhi sing simple kag balanse. Halimbawa, indi gid maayo kon mangutang kita kon indi man lang kinahanglan. Indi man maayo kon nagakaubos ang aton tion sa pagmentinar sang madamo nga pagkabutang. Dapat man kita maghalong kay basi mangin pinakaimportante na sa aton kabuhi ang aton materyal nga mga butang. (Mat. 6:19, 24) Samtang nagahilapit ang kalaglagan sining malain nga kalibutan, posible gid nga matilawan ang aton pagtuo. Gani, dapat kita magsalig kay Jehova imbes sa aton materyal nga mga butang.
“KINAHANGLAN NGA MAGBATAS KAMO”
15. Ngaa kinahanglan gid sang Hebreo nga mga Cristiano ang pagbatas?
15 Bangod nagabudlay pa gid ang sitwasyon sa Judea, kinahanglan batason sang Hebreo nga mga Cristiano ang mga pagtilaw sa ila pagtuo. (Heb. 10:36) Bisan pa nakaeksperiensia sang grabe nga paghingabot ang pila sa ila sang una, madamo nga mga Cristiano ang wala nakaeksperiensia sini. Kay man, nangin Cristiano ang madamo sa ila sang medyo matawhay na ang sitwasyon. Gani ginpahanumdom sa ila ni Pablo nga bisan pa nabatas nila ang mabudlay nga mga pagtilaw, dapat nila handaan ang madamo pa nga mga pagtilaw. Dapat man sila mangin matutom asta sa kamatayon, pareho kay Jesus. (Heb. 12:4) Bangod nagadamo ang mga Cristiano, naakig gid ang madamo nga Judiyo. Mga pila ka tuig antes ginhimo ni Pablo ang iya sulat, gusto sia patyon sang mga tawo sang nagbantala sia sa Jerusalem. Sobra 40 ka Judiyo ang “nagpanumpa nga indi sila magkaon ukon mag-inom kon indi nila mapatay si Pablo.” (Binu. 22:22; 23:12-14) Bisan pa ginadumtan kag ginahingabot ang Hebreo nga mga Cristiano, dapat padayon sila nga magtipon para magsimba, dapat padayon sila nga magbantala sang maayong balita, kag dapat padayon nila nga pabakuron ang ila pagtuo.
16. Paano makabulig sa aton ang sulat para sa mga Hebreo para mangin husto ang aton pagtamod sa mga paghingabot? (Hebreo 12:7)
16 Ano ang makabulig sa Hebreo nga mga Cristiano para mabatas nila ang mga pagpamatok? Kabalo si Pablo nga dapat husto ang ila pagtamod sa mga pagtilaw. Gani ginpaathag niya nga kon makaeksperiensia sang pagtilaw ang isa ka Cristiano, puede ini gamiton sang Dios para hanason sia. (Basaha ang Hebreo 12:7.) Paagi sa sini nga paghanas, matun-an nila kag mapakita ang maayo nga mga kinaiya. Kon magpokus ang Hebreo nga mga Cristiano sa maayo nga resulta sang mga pagtilaw, mangin mahapos para sa ila nga batason ini.—Heb. 12:11.
17. Ano ang natun-an ni Pablo parte sa pagbatas sa mga paghingabot?
17 Ginpalig-on ni Pablo ang Hebreo nga mga Cristiano nga mangin maisog pa gid sa pagbatas sa mga pagtilaw. Makahatag gid si Pablo sing maayo nga laygay parte sa sini. Kay man, antes sia nangin Cristiano, isa sia ka mapintas nga manugpamatok sang mga Cristiano. Kabalo man sia kon paano batason ang mga paghingabot. Kay man, nakaeksperiensia man sia sang sarisari nga mga pagpamatok pagkatapos sia nangin Cristiano. (2 Cor. 11:23-25) Gani, kabalo gid si Pablo kon paano ini batason. Ginlaygayan niya ang Hebreo nga mga Cristiano nga kon may ginabatas sila nga mga pagtilaw, indi sila dapat magsalig sa ila kaugalingon kundi kay Jehova. Amo ini ang naghatag sing kaisog kay Pablo, gani nagsiling sia: “Si Jehova ang akon manugbulig; indi ako magkahadlok.”—Heb. 13:6.
18. Ano ang maeksperiensiahan naton tanan sa palaabuton, kag ano ang dapat naton himuon subong?
18 Nagabatas subong sang mga paghingabot ang pila sa aton mga kauturan. Mapakita naton nga palangga naton sila paagi sa pagpangamuyo para sa ila. Puede man naton sila buligan paagi sa paghatag sa ila sang ila mga kinahanglanon. (Heb. 10:33) Pero, maathag nga ginasiling sang Biblia nga “ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Tim. 3:12) Bangod sini, dapat naton tanan handaan ang mabudlay gid nga sitwasyon nga maeksperiensiahan naton sa palaabuton. Gani, dapat padayon kita nga magsalig sing bug-os kay Jehova nga buligan niya kita nga mabatas ang bisan ano nga pagtilaw. Kag sa iya gintalana nga tion, paumpawan niya ang tanan niya nga matutom nga mga alagad.—2 Tes. 1:7, 8.
19. Ano ang puede naton himuon para mahandaan naton ang dakung kapipit-an? (Tan-awa man ang piktyur.)
19 Sigurado gid nga nakabulig sa Hebreo nga mga Cristiano ang sulat ni Pablo para sa ila. Nakabulig ini sa ila nga mahandaan ang kapipit-an nga maeksperiensiahan nila. Ginpalig-on ni Pablo ang iya mga kauturan nga tun-an kag hangpon sing maayo ang Pulong sang Dios. Paagi sa sini, mapauswag nila ang ila ikasarang nga mabal-an ang mga panudlo nga makapaluya sang ila pagtuo. Ginpalig-on man niya sila nga pabakuron ang ila pagtuo para mangin madasig sila sa pagtuman sa mga instruksion ni Jesus kag sang mga nagapanguna sa kongregasyon. Kag ginbuligan niya sila kon paano batason ang mga pagtilaw. Nagsiling sia nga dapat nila ini tamdon bilang isa ka paagi sang ila mahigugmaon nga Amay para hanason sila. Kabay pa nga iaplikar man naton ini nga mga laygay sa Biblia. Kon himuon naton ini, makabatas kita kag mangin matutom asta sa katapusan.—Heb. 3:14.
Ginpakamaayo ang matutom nga mga Cristiano bangod nagbatas sila. Pagkatapos nila magpalagyo halin sa Judea, padayon sila nga nagtipon. Ano ang matun-an naton sa sini? (Tan-awa ang parapo 19)
AMBAHANON 126 Magpabilin nga Nagamata, Malig-on, kag Mabakod
a Sa una pa lang nga kapitulo sang sulat ni Pablo, ginkutlo niya ang Hebreong Kasulatan sing indi magnubo sa pito ka beses. Ginpakita niya nga mas labaw ang paagi sang pagsimba sang mga Cristiano sangsa paagi sang pagsimba sang mga Judiyo.—Heb. 1:5-13.