Magdiretso sa kaundan

Magdiretso sa listahan sang kaundan

TULUN-AN NGA ARTIKULO 38

AMBAHANON 25 Ginapanag-iyahan sang Dios

Ginapamatian Mo Bala ang mga Paandam?

Ginapamatian Mo Bala ang mga Paandam?

“Ang isa kuhaon kag ang isa ibilin.”​—MAT. 24:40.

ANG MATUN-AN NATON

Binagbinagon naton ang tatlo ka ilustrasyon ni Jesus, kag kon ano ang kaangtanan sini sa tion sang paghukom nga matabo antes sang katapusan sining sistema sang mga butang.

1. Ano ang himuon ni Jesus sa indi na lang gid madugay?

Ang imo sabat

 MADAMO nga mga hitabo ang ginapaabot naton nga matabo sa aton tion subong. Sa indi na lang gid madugay, hukman ni Jesus ang tanan nga tawo. Ginbuligan kita ni Jesus nga mabal-an kon malapit na lang niya ini himuon. Ginsugid niya sa iya mga disipulo ang “tanda” sang iya indi makita nga presensia kag sang “hingapusan sang sistema sang mga butang.” (Mat. 24:3) Mabasa ini nga tanda sa Mateo kapitulo 24 kag 25, sa Marcos kapitulo 13, kag sa Lucas kapitulo 21.

2. Ano ang binagbinagon naton sa sini nga artikulo, kag paano ini makabulig sa aton?

Ang imo sabat

2 Naggamit si Jesus sang tatlo ka ilustrasyon bilang paandam para buligan kita nga maghanda. Ang tatlo ka ilustrasyon amo ang parte sa mga karnero kag mga kanding, ang parte sa mainandamon kag buangbuang nga mga birhen, kag ang parte sa mga talanton. Buligan kita sang kada ilustrasyon nga mahangpan nga hukman ni Jesus ang kada tawo base sa ila mga ginahimo. Samtang ginabinagbinag naton ini nga mga ilustrasyon, hibaluon naton kon ano ang aton matun-an sa sini. Una naton nga binagbinagon ang ilustrasyon parte sa mga karnero kag mga kanding.

ANG MGA KARNERO KAG ANG MGA KANDING

3. San-o hukman ni Jesus ang mga tawo?

Ang imo sabat

3 Sa ilustrasyon ni Jesus parte sa mga karnero kag mga kanding, ginsambit niya nga may tsansa ang mga tawo nga batunon ang maayong balita kag suportahan ang iya hinaplas nga mga utod. Kag amo ini ang basihan ni Jesus sa paghukom niya sa mga tawo. (Mat. 25:​31-46) Himuon ni Jesus ini nga paghukom sa tion sang “dakung kapipit-an” antes mag-Armageddon. (Mat. 24:21) Pareho sa isa ka manugbantay nga nagapain sang mga karnero sa mga kanding, painon ni Jesus ang mga mainunungon nga nagasuporta sa mga hinaplas sa mga wala nagasuporta sa ila.

4. Base sa Isaias 11:​3, 4, ngaa makasigurado kita nga mangin matarong ang paghukom ni Jesus sa mga tawo? (Tan-awa man ang piktyur.)

Ang imo sabat

4 Si Jesus ang gintangdo ni Jehova nga Hukom. Ginapakita sang tagna sa Biblia nga mangin matarong ang iya paghukom sa mga tawo. (Basaha ang Isaias 11:​3, 4.) Ginaobserbahan niya sing maayo ang ila mga ginahimo, pamatasan, kag ginahambal. Ginaobserbahan man niya kon paano nila ginatratar ang iya hinaplas nga mga utod. (Mat. 12:​36, 37; 25:40) Gani, mabal-an ni Jesus kon sin-o ang nagasuporta sa iya hinaplas nga mga utod kag sa ila hilikuton. a Ang isa sa pinakaimportante nga paagi para masuportahan ang mga utod sang Cristo amo ang pagbulig sa ila sa pagbantala nga hilikuton. Ano ang himuon ni Jesus sa mga nagasuporta sa ila? Hukman niya sila bilang “matarong” nga mga tawo, kag may paglaum sila nga mabaton ang “kabuhi nga wala sing katapusan” sa duta. (Mat. 25:46; Bug. 7:​16, 17) Dalayawon gid ini nga padya. Kon mangin matutom sila sa tion sang dakung kapipit-an kag pagkatapos sini, magapabilin “sa libro sang kabuhi” ang ila mga ngalan.​—Bug. 20:15.

Sa indi na lang gid madugay, hukman ni Jesus ang mga tawo bilang mga karnero ukon mga kanding (Tan-awa ang parapo 4)


5. Ano ang matun-an naton sa ilustrasyon parte sa mga karnero kag mga kanding, kag sin-o ang makabenepisyo sa sini?

Ang imo sabat

5 Pamatud-i nga matutom ka kag mainunungon. Ang ilustrasyon ni Jesus parte sa mga karnero kag mga kanding nagapokus sa mga may paglaum nga mabuhi sing wala sing katapusan sa duta. Ginapakita nila ang ila pagtuo paagi sa pagbulig sa mga utod sang Cristo sa pagbantala nga hilikuton, kag paagi sa pagsunod sing mainunungon sa matutom kag mainandamon nga ulipon nga ginpili ni Jesus. (Mat. 24:45) Pero dapat man pamatian sang mga may paglaum nga mabuhi sa langit ang paandam sang sini nga ilustrasyon. Ngaa? Bangod ginaobserbahan ni Jesus ang ila mga ginahimo, pamatasan, kag ginahambal. Dapat man nila pamatud-an nga matutom sila. Ang matuod, ginpaandaman ni Jesus ang mga hinaplas. Matun-an naton ini sa duha pa niya ka ilustrasyon nga makita man sa Mateo kapitulo 25. Binagbinagon naman naton ang ilustrasyon parte sa mainandamon kag buangbuang nga mga birhen.

ANG MAINANDAMON KAG ANG BUANGBUANG NGA MGA BIRHEN

6. Paano ginpakita sang lima ka birhen nga mainandamon sila? (Mateo 25:​6-10)

Ang imo sabat

6 Sa ilustrasyon ni Jesus parte sa mga birhen, nagsiling sia nga may napulo ka birhen nga naggua para sugataon ang kalaslon nga nobyo. (Mat. 25:​1-4) Gusto nila nga mag-upod sa nobyo sa iya punsion. Ginlaragway ni Jesus ang lima ka birhen bilang “mainandamon” kag ang lima pa ka birhen bilang “buangbuang.” Nakahanda kag nagabantay ang mainandamon nga mga birhen. Handa sila nga hulaton ang nobyo bisan pa gab-i na sia katama makaabot. Gani, nagdala sila sang mga suga. Nagdala pa gani sila sang dugang nga lana engkaso maatrasar ang nobyo. Gani nakahanda sila kay ginsigurado nila nga padayon nga nagasiga ang ila mga suga. (Basaha ang Mateo 25:​6-10.) Pag-abot sang nobyo, nag-upod sa iya ang mainandamon nga mga birhen sa iya punsion. Sing kaanggid, ang mga hinaplas nga nagapabilin nga handa kag matutom asta sa pag-abot sang Cristo magabaton sang ila padya. Magaupod sila sa Nobyo, nga si Jesus, sa iya Ginharian sa langit. b (Bug. 7:​1-3) Ano naman ang natabo sa lima ka buangbuang nga birhen?

7. Ano ang natabo sa lima ka buangbuang nga birhen, kag ngaa?

Ang imo sabat

7 Indi pareho sa mainandamon nga mga birhen, wala nakahanda ang lima ka buangbuang nga birhen pag-abot sang nobyo. Nagapiraw na ang ila mga suga, kag wala sila nagdala sang dugang nga lana. Sang nabal-an nila nga lapit na lang mag-abot ang nobyo, kinahanglan nila maglakat para magbakal sang lana. Pag-abot sang nobyo, wala pa sila nakabalik. Pero, “ang nakahanda nga mga birhen nag-upod sa iya sa punsion. Kag pagsulod gid nila, ginsiraduhan dayon ang puertahan.” (Mat. 25:10) Sang ulihi, pagbalik sang buangbuang nga mga birhen, gusto man kuntani nila magsulod. Pero, ginsilingan sila sang nobyo: “Wala ako makakilala sa inyo.” (Mat. 25:​11, 12) Wala nakahanda ini nga mga birhen sa paghulat sa nobyo. Ano ang matun-an sang mga hinaplas sa sini nga ilustrasyon?

8-9. Ano ang matun-an sang mga hinaplas sa ilustrasyon parte sa mga birhen? (Tan-awa man ang piktyur.)

Ang imo sabat

8 Pamatud-i nga nakahanda ka kag nagabantay. Wala ginapahangop ni Jesus nga may duha ka grupo sang mga hinaplas. Wala sia nagsiling nga may isa ka grupo nga nakahanda nga maghulat asta sa katapusan sining malain nga kalibutan, kag may isa naman ka grupo nga wala nakahanda. Sa baylo, ginapaathag niya kon ano ang matabo sa mga hinaplas kon wala sila nakahanda nga magbatas asta sa katapusan. Kon wala sila nakahanda, indi nila mabaton ang ila padya. (Juan 14:​3, 4) Serioso gid ini nga paandam. Sa langit man ukon sa duta ang aton paglaum, dapat naton tanan pamatian ang paandam sang ilustrasyon parte sa mga birhen. Dapat padayon kita nga magbantay, kag dapat handa kita nga magbatas asta sa katapusan.​—Mat. 24:13.

9 Pagkatapos masugid ni Jesus ang ilustrasyon parte sa mga birhen nga nagatudlo sang importansia sang paghanda kag pagbantay, ginsugid naman niya ang ilustrasyon parte sa mga talanton. Ginatudlo naman sini nga importante nga mangin mapisan ang mga alagad ni Jehova.

Dapat pamatian gid naton ang paandam sa ilustrasyon parte sa mga birhen. Mahimo naton ini kon mangin handa kita, padayon kita nga nagabantay, kag nagabatas kita asta sa katapusan (Tan-awa ang parapo 8-9)


ANG MGA TALANTON

10. Paano ginpamatud-an sang duha ka ulipon nga matutom sila? (Mateo 25:​19-23)

Ang imo sabat

10 Sa ilustrasyon ni Jesus parte sa mga talanton, nagsiling sia nga may duha ka ulipon nga matutom sa ila agalon kag may isa ka ulipon nga indi matutom. (Mat. 25:​14-18) Ginpamatud-an sang duha ka ulipon nga matutom sila paagi sa mapisan nga pag-obra para madugangan ang kuarta sang ila agalon. Antes magkadto sa iban nga pungsod ang ila agalon, ginhatagan niya sila sing mga talanton. Daku gid ang kantidad sini nga kuarta. Mapisan ang duha ka matutom nga ulipon kag ginnegosyo nila ang kuarta. Ano ang resulta? Pagbalik sang ila agalon, doble na ang kadamuon sang kuarta nga ginhatag sa ila. Gindayaw sila sang ila agalon kag nagkalipay sila “upod sa [ila] agalon.” (Basaha ang Mateo 25:​19-23.) Kamusta naman ang ikatlo nga ulipon? Ano ang ginhimo niya sa kuarta nga ginhatag sa iya sang iya agalon?

11. Ano ang natabo sa “uyaya” nga ulipon, kag ngaa?

Ang imo sabat

11 Ginhatagan ang ikatlo nga ulipon sing isa ka talanton, pero nangin “uyaya” sia. Gusto kuntani sang iya agalon nga inegosyo niya ang talanton. Pero, ginlubong niya ini sa duta. Pagbalik sang agalon, isa lang gihapon ka talanton ang kuarta sang ulipon. Indi maayo ang panimuot sini nga ulipon. Imbes nga mangayo sing pasaylo kay wala niya nadugangan ang kuarta sang iya agalon, gintawag pa niya ang iya agalon nga “estrikto gid nga tawo.” Wala gid nalipay ang agalon sa sini nga ulipon. Gani, ginkuha sa iya ang talanton kag ginpahalin sia sa panimalay sang iya agalon.​—Mat. 25:​24, 26-30.

12. Sin-o ang ginapatuhuyan sang duha ka ulipon subong?

Ang imo sabat

12 Ang ginapatuhuyan sang duha ka ulipon amo ang matutom nga mga hinaplas. Ginaagda sila sang Agalon, nga si Jesus, nga ‘magkalipay upod sa ila agalon.’ Mabaton nila ang ila padya sa langit paagi sa nahauna nga pagkabanhaw. (Mat. 25:​21, 23; Bug. 20:5b) Pero, isa ka paandam para sa mga hinaplas ang indi maayo nga halimbawa sang uyaya nga ulipon. Ngaa masiling naton ini?

13-14. Ano ang matun-an sang mga hinaplas sa ilustrasyon parte sa mga talanton? (Tan-awa man ang piktyur.)

Ang imo sabat

13 Pamatud-i nga mapisan ka. Pareho sa ilustrasyon parte sa mga birhen, wala ginapahangop ni Jesus sa iya ilustrasyon parte sa mga talanton nga mangin uyaya ang mga hinaplas. Sa baylo, ginapaathag niya kon ano ang matabo sa ila kon indi sila mangin mapisan. Mapaslawan sila nga ‘mapat-od ang pagtawag kag pagpili sa ila,’ kag indi sila makasulod sa Ginharian sa langit.​—2 Ped. 1:10.

14 Maathag ang leksion nga ginatudlo sang mga ilustrasyon ni Jesus parte sa mga birhen kag mga talanton. Magluwas nga dapat nakahanda kag nagabantay ang tanan nga hinaplas, dapat man sila mangin mapisan. May dugang pa bala nga paandam si Jesus para sa mga hinaplas? Huo. Mabasa naton ini sa Mateo 24:​40, 41.

Gusto ni Jesus nga mangin mapisan ang mga hinaplas asta sa katapusan (Tan-awa ang parapo 13-14) d


SIN-O ANG “KUHAON”?

15-16. Paano ginapakita sang Mateo 24:​40, 41 nga dapat padayon nga magbantay ang mga hinaplas?

Ang imo sabat

15 Antes ginsugid ni Jesus ang tatlo ka ilustrasyon, ginsambit niya ang parte sa katapusan nga paghukom sa mga hinaplas. Sa sina nga tion, mabal-an kon sin-o ang makabaton sang ila padya. Ginsambit niya ang parte sa duha ka tawo nga ara sa uma kag ang parte sa duha ka babayi nga nagagaling. Daw ginapahangop sang ginsiling ni Jesus nga pareho ang ginaobra sang duha ka tawo, kag pareho man ang ginaobra sang duha ka babayi. Pero, nagsiling sia nga “ang isa kuhaon kag ang isa ibilin.” (Basaha ang Mateo 24:​40, 41.) Dayon ginsilingan niya ang iya mga sumulunod: “Gani, padayon kamo nga magbantay, kay wala kamo makahibalo kon ano nga adlaw magaabot ang inyo Ginuo.” (Mat. 24:42) Halos pareho man sa sini ang ginsiling ni Jesus pagkatapos niya ginsugid ang ilustrasyon parte sa mga birhen. (Mat. 25:13) Gani, pareho ang paandam ni Jesus sa sining duha niya ka ginsiling. Ang matuod lang nga mga hinaplas nga nangin matutom ang “kuhaon,” kag magaupod sila kay Jesus sa Ginharian sa langit.​—Juan 14:3.

16 Pamatud-i nga padayon ka nga nagabantay. Kon mapaslawan sa pagbantay ang isa ka hinaplas, indi sia malakip sa pagtipon sa “mga pinili.” (Mat. 24:31) Pero, dapat padayon man nga magbantay kag magpabilin nga matutom ang mga may paglaum nga mabuhi sing wala sing katapusan sa duta. Kay man, para sa tanan nga katawhan sang Dios ang paandam ni Jesus.

17. Ngaa indi kita dapat matingala kon may ginahaplasan pa si Jehova sang iya balaan nga espiritu sa aton tion subong?

Ang imo sabat

17 Bangod kilala na naton sing maayo si Jehova, nagasalig kita sa tanan niya nga ginahimo. Gani wala kita natingala kon may ginahaplasan pa si Jehova sang iya balaan nga espiritu sa aton tion subong. c Kag sa ilustrasyon ni Jesus parte sa ulubasan, ginsambit niya ang parte sa mga mamumugon nga nag-obra sang mga ika-11 na nga oras. (Mat. 20:​1-16) Pareho ang sueldo nga nabaton sang mga ulihi na nag-obra sa ulubasan kag sang mga temprano pa nag-obra. Sing kaanggid, bisan san-o man nangin hinaplas ang mga ginpili ni Jehova, mabaton nila ang ila padya sa langit kon magpabilin sila nga matutom.

PAMATII ANG MGA PAANDAM

18-19. Ano nga mga leksion kag mga paandam ang aton natun-an?

Ang imo sabat

18 Ano ang aton mga natun-an? Para sa mga may paglaum nga mabuhi sing wala sing katapusan sa duta, natun-an naton sa ilustrasyon parte sa mga karnero kag mga kanding nga dapat kita magpabilin nga matutom kag mainunungon kay Jehova. Dapat naton ini himuon subong kag sa tion sang dakung kapipit-an nga malapit na lang gid matabo. Kon magpabilin kita nga matutom asta sa sina nga tion, magadesisyon si Jesus nga nagakadapat kita ‘magbaton sang kabuhi nga wala sing katapusan.’—Mat. 25:46.

19 Ginbinagbinag man naton ang duha ka ilustrasyon nga nagahatag sing paandam sa mga hinaplas. Sa ilustrasyon ni Jesus parte sa mainandamon kag buangbuang nga mga birhen, ginpamatud-an sang lima sa ila nga mainandamon sila. Nakahanda sila kag nagabantay sa pag-abot sang nobyo bisan pa nga naghulat sila sing madugay. Pero wala nakahanda ang buangbuang nga mga birhen. Gani wala sila ginpasulod sang nobyo sa iya punsion. Dapat handa man kita nga maghulat asta nga tapuson na ni Jesus ining sistema sang mga butang. Kag sa ilustrasyon ni Jesus parte sa mga talanton, ginbinagbinag naton ang parte sa duha ka mapisan nga ulipon. Nagpangabudlay gid sila para sa ila agalon, gani nalipay sia sa ila. Pero ginpahalin sang agalon ang uyaya nga ulipon. Ano ang natun-an naton sa sini? Dapat kita mangin masako sa pag-alagad kay Jehova asta sa katapusan. Kag ginbinagbinag naton nga dapat padayon nga magbantay ang mga hinaplas para “kuhaon” sila ni Jesus kag mabaton nila ang ila padya sa langit. Excited na gid ang mga hinaplas sa tion sang “pagtipon sa [ila] agod mangin kaupod” sila ni Jesus sa langit. Pagkatapos sang inaway sa Armageddon, mangin nobya sila ni Jesus sa kasal sang Kordero.​—2 Tes. 2:1; Bug. 19:9.

20. Ano ang himuon ni Jehova para sa mga nagapamati sa iya mga paandam?

Ang imo sabat

20 Malapit na ang tion nga hukman ni Jesus ang mga tawo, pero indi kita dapat mahadlok. Kon magpabilin kita nga matutom, hatagan kita sang aton mahigugmaon nga Amay sa langit sing “gahom nga labaw sa kinaandan” para “magmadinalag-on [kita] sa pagtindog sa atubangan sang Anak sang tawo.” (2 Cor. 4:7; Luc. 21:36) Gani sa langit man ukon sa duta ang aton paglaum, malipay sa aton ang aton Amay kon pamatian naton ang mga paandam sa mga ilustrasyon ni Jesus. Kag paagi sa wala tupong nga kaayo ni Jehova, ‘masulat ang aton ngalan sa libro’ sang kabuhi.​—Dan. 12:1; Bug. 3:5.

AMBAHANON 26 Ginhimo Ninyo Ini Para sa Akon

a Tan-awa ang artikulo nga “Paano Hukman ni Jehova ang mga Tawo sa Palaabuton?” sa Mayo 2024 nga Ang Lalantawan.

b Para sa dugang nga impormasyon, tan-awa ang artikulo nga “Magapadayon Bala Kamo sa Pagbantay?” sa Marso 15, 2015, nga Ang Lalantawan.

d PIKTYUR: Gina-Bible study sang isa ka hinaplas nga sister ang isa ka pamatan-on nga babayi nga nabantalaan niya.