Natawo ako sa Quebec City, sa probinsia sang Quebec sa Canada. French ang lenguahe diri. Maayo kag mapinalanggaon gid ang akon mga ginikanan nga sanday Louis kag Zélia. Mahuluy-on kag palabasa ang akon amay. Nanamian gid ako magsulat kag handum ko gid nga mangin isa ka journalist.

Sang mga 12 anyos ako, nagbisita sa amon balay ang kaupod ni Tatay sa trabaho nga si Rodolphe Soucy kag ang abyan sini. Mga Saksi ni Jehova sila. Gamay lang gid ang akon nabal-an parte sa mga Saksi kag indi man gid ako interesado sa ila relihion. Pero nagdayaw gid ako sa ila makapakumbinsi nga pagsabat sang amon mga pamangkot gamit ang Biblia. Nagdayaw man ang akon mga ginikanan, gani nagtuon kami sang Biblia upod sa ila.

Sadto nga tion, nagaeskwela ako sa isa ka eskwelahan nga ginapanag-iyahan sang Katoliko. May mga tion nga ginaistoryahan namon sang akon mga klasmeyt ang parte sa mga natun-an ko sa Biblia. Sang ulihi, nabal-an ini sang amon mga manunudlo nga mga pari. Imbes nga gamiton nila ang Kasulatan para pamatud-an nga sala ang akon mga ginasiling, gin-akusar ako sang isa sa ila sa atubangan sang bilog nga klase nga isa ako kuno ka rebelde! Naglalain gid ako, pero maayo man gani kay amo sadto ang natabo. Didto ko nahangpan nga wala nahisanto sa Biblia ang ginatudlo sang amon eskwelahan parte sa Dios. Narealisar ko nga dapat ako magsaylo sang eskwelahan. Gani naglisensia ako sa akon mga ginikanan kag nagpasugot sila.

Nagpadayon ako sa pagtuon sang Biblia, pero mahinay ang akon pag-uswag bangod nakulbaan ako magpamalaybalay. Grabe gid ang impluwensia sang simbahan sang Katoliko kag ginapamatukan gid nila ang amon pagbantala. Suod nga kaalyado sang simbahan ang prime minister sang Quebec nga si Maurice Duplessis. Paagi sa iya bulig, gingamo kag ginhalitan sang mga tawo ang mga Saksi.  Sadto nga tion, dapat maisog gid ang mga Saksi para makabantala sila.

Ginbuligan ako ni John Rae, nga naggradwar sa ikasiam nga klase sang Gilead School, nga madula ko ang akon kahadlok. Eksperiensiado gid nga utod si John, mapainubuson, maugdang, kag mahapos palapitan. Talagsa niya lang ako ginalaygayan, pero madamo ako sang natun-an sa iya maayo nga halimbawa. Diutay lang ang nabal-an ni John nga French, gani pirme ko sia ginaupdan sa ministeryo kag ginabuligan ko sia nga matun-an ang lenguahe. Nakabulig ang akon pirme nga pag-upod kay John para makadesisyon ako nga mangin isa ka Saksi ni Jehova. Nabawtismuhan ako sang Mayo 26, 1951, pagligad sang napulo ka tuig nga naistorya ko ang mga Saksi.

Mga payunir ang kalabanan sang mga utod sa amon gamay nga kongregasyon sa Quebec City. Napalig-on ako nga magpayunir bangod sang ila maayo nga impluwensia. Sadto nga tion, Biblia lang ang ginagamit namon kon nagapamalaybalay kami. Kinahanglan epektibo ang amon paggamit sang Biblia bangod wala kami sang mga literatura nga ginatanyag. Gani ginpanikasugan ko gid nga masaulo ang mga teksto para mangin epektibo ako sa akon pagpakig-istorya. Pero madamo ang indi gusto magbasa sang Biblia kon ang bersion sini wala gin-aprobahan sang simbahan sang Katoliko.

Sang 1952, ginpakaslan ko si Simone Patry, isa ka matutom nga sister sa amon kongregasyon. Nagsaylo kami sa Montreal, kag wala pa mag-isa ka tuig, natawo ang amon bata nga babayi nga si Lise. Bisan nag-untat ako sa pagpayunir wala madugay pagkatapos kami magpakasal ni Simone, gintinguhaan namon nga huptan nga simple ang amon kabuhi para makapakigbahin kami sing bug-os sa mga hilikuton sa kongregasyon bilang isa ka pamilya.

Pagligad sang napulo ka tuig, ginpamensaran ko sing maayo ang pagpasangkad sang akon ministeryo. Sang 1962, nag-eskwela ako sa Kingdom Ministry School para sa mga gulang. Ginhiwat ini sa Bethel sa Canada nga naglawig sing isa ka bulan. Nakaupod ko sa kuarto ang isa ka brother nga si Camille Ouellette. Napalig-on gid ako sang katutom ni Camille sa ministeryo, ilabi na bangod may asawa kag kabataan sia. Sang una sa Quebec, talagsa ka lang makabati nga nagapayunir ang mga ginikanan samtang nagapadaku sang ila kabataan. Pero amo ini ang gintinguhaan nga himuon ni Camille. Samtang updanay kami, ginpalig-on niya ako nga pamensaron ang akon sitwasyon. Pagligad sang pila ka bulan, narealisar ko nga puede liwat ako makaregular payunir.  Nagsiling ang iban nga indi maayo ang akon desisyon, pero nagpayunir ako liwat bangod sigurado ako nga buligan ako ni Jehova para mapasangkad ko ang akon ministeryo.

Sang 1964, gin-asayn kami ni Simone bilang mga espesyal payunir sa amon lugar sa Quebec City, kag nag-alagad kami diri sa pila ka tuig. Sa sini nga tion, diutay na lang ang mga nagapamatok sa pagbantala.

Isa ka Sabado sang hapon, gindakop ako sang isa ka pulis sa Sainte-Marie, isa ka gamay nga banwa malapit sa Quebec City. Gindala niya ako sa presinto kag ginpriso bangod nagabantala ako sa mga balay kag wala ako sang permit. Sang ulihi, gindala ako sa ginakahadlukan nga huwes nga si Baillargeon. Ginpamangkot niya ako kon sin-o ang akon abogado. Sang ginsiling ko nga si Glen How, * ginkulbaan sia kag nagsiling: “Gali? Tapos gid!” Isa ka kilala nga Saksi nga abogado si Glen How kag bantog sia sa pagpangapin sang mga kaso sang mga Saksi. Wala magdugay, ginpahibalo ako sang korte nga ginbasura na ang akon kaso.

Bangod ginapamatukan ang aton hilikuton sa Quebec, nabudlayan kami mangita sang komportable nga lugar nga arkilahan para gamiton sa mga miting. Isa lang ka daan nga garahe ang amon nakita para magamit sang amon gamay nga kongregasyon. Kon tigtulugnaw kag naga-snow, may ginapaandar nga gamit ukon heater ang mga utod para mainit-initan ang garahe. Antes magsugod ang miting, masami nga nagatipon kami sa palibot sang heater kag nagaistoryahanay sing pila ka oras parte sa amon makapalig-on nga mga eksperiensia.

Makalilipay gid makita ang maayo nga resulta sang pagbantala pagligad sang mga tuig. Sang dekada ’60, diutay lang ang mga kongregasyon sa Quebec City, Côte-Nord, kag Gaspé Peninsula. Subong, may sobra na duha ka sirkito diri, kag manami na ang mga Kingdom Hall nga ginagamit sang mga kauturan.

Gin-asayn kami ni Simone nga mag-alagad sa sirkito sang 1970. Dayon sang 1973, gin-asayn kami nga mag-alagad sa distrito. Sa sini nga mga tuig, madamo gid ako sing natun-an kanday Laurier Saumur * kag David Splane, * nga nag-alagad man bilang nagalakbay nga mga manugtatap. Pagkatapos sang kada asembleya, nagaistoryahanay kami ni David kon paano namon mapauswag ang amon pagtudlo. Isa ka bes, nadumduman ko nga ginsilingan ako ni David: “Nanamian ako sang katapusan mo nga pamulongpulong, Léonce. Maayo gid, pero tatlo na ka pamulongpulong ang puede ko mahimo sa tanan nga impormasyon nga gingamit mo.” Masami nga sobra kadamo ang impormasyon sa akon pamulongpulong. Dapat ko matun-an kon paano ini pasimplehon.

Responsibilidad sang mga manugtatap sang distrito nga palig-unon ang mga manugtatap sang sirkito. Pero madamo sang kauturan sa Quebec ang  suod sa akon. Gusto nila mag-upod sa akon sa pagbantala kon nagabisita ako sa mga sirkito. Nalipay ako mag-upod sa ila sa pagbantala, pero daw wala na ako sing tion nga makaupod ang manugtatap sang sirkito. Isa ka bes, may isa ka mapinalanggaon nga manugtatap sang sirkito nga nagpahanumdom sa akon: “Maayo kay nagahatag ka gid sang tion para sa mga kauturan, pero indi pagkalimti nga nagkadto ka diri para bisitahan ako subong nga semana. Kinahanglan ko man ang pagpalig-on!” Ining mainayuhon nga laygay nagbulig sa akon nga mangin balanse sa akon asaynment.

Sang 1976, natabo ang wala ko ginapaabot nga nagpasubo gid sa akon. Nagmasakit ang akon pinalangga nga asawa nga si Simone kag napatay sia. Maayo gid sia nga asawa kay handa sia magsakripisyo kag palangga gid niya si Jehova. Bangod nangin masako ako sa ministeryo, nakabulig ini sa akon nga maghaganhagan ang akon kasubo. Kag nagapasalamat gid ako kay Jehova kay ginbuligan niya ako sa sining mabudlay gid nga tion. Sang ulihi, nagpakasal kami ni Carolyn Elliott, isa ka matutom nga payunir nga nagsaylo sa Quebec para mag-alagad sa teritoryo nga kinahanglan ang dugang nga manugbantala. English ang lenguahe ni Carolyn, mahapos sia palapitan kag interesado gid sia sa iban, ilabi na sa mga mahuluy-on ukon sa mga nagapangasubo. Daku gid ang nabulig niya sa akon asaynment bilang nagalakbay nga manugtatap.

Sang Enero 1978, ginpangabay ako nga magtudlo sa pinakauna nga Pioneer Service School sa Quebec. Nakulbaan gid ako bangod wala ako nakaeskwela sa sini nga eskwelahan kag wala ko pa nabasa ang libro nga ginagamit diri, gani pareho lang ako sa mga estudyante nga wala gid sang ideya parte sa sini. Maayo lang kay madamo ang eksperiensiado nga mga payunir sa una nga klase nga gintudluan ko. Bisan pa ako ang instruktor, madamo ako sang natun-an sa mga estudyante!

Sang 1978, ginhiwat ang “Victorious Faith” International Convention sa Olympic Stadium sa Montreal. Amo yadto ang pinakadaku nga kombension sa Quebec, nga may sobra sa 80,000 ka tumalambong. Naasayn ako sa News Service Department.  Madamo ang naistorya ko nga journalist kag nalipay gid ako nga madamo sila sang ginreport nga maayo parte sa aton. Gin-interbyu nila kami sa TV kag sa radyo. Kon tingbon ang tanan nga interbyu, sobra ini 20 ka oras. Ginatos man ka artikulo ang ginsulat nila sa mga newspaper parte sa aton. Daku gid nga panaksi ang nahimo sini!

Daku nga pagbag-o ang nag-abot sang 1996. Sugod sang nabawtismuhan ako, nag-alagad ako sa Quebec nga French ang lenguahe. Pero sang 1996, gin-asayn ako sa isa ka distrito sa Toronto nga English ang lenguahe. Pamatyag ko indi ako kalipikado kag nakulbaan gid ako magpamulongpulong bangod indi ako sagad mag-English. Gani nagapangamuyo ako pirme kag nagasalig sing bug-os kay Jehova.

Grabe gid ang akon kulba antes ako nagsugod sa pag-alagad sa sini nga distrito, pero nalipay ako nga makaalagad sa Toronto sing duha ka tuig. Mapinasensiahon ako nga ginbuligan ni Carolyn para mangin maayo ako sa paghambal sang English, kag ginbuligan man ako kag ginpalig-on sang mga kauturan. Madamo kami gilayon sang nangin abyan.

Magluwas sa dugang nga mga hilikuton kag mga preparasyon para sa sirkito nga asembleya nga ginahiwat kon Sabado kag Domingo, masami nga nagapamalaybalay ako bisan isa lang ka oras sa Biernes sang gab-i. Mahimo ang iban nagapalibog, ‘Ngaa mamalaybalay ka pa kay asembleya na buas?’ Pero natalupangdan ko nga makapalig-on gid kon may maayo ka nga maistorya sa ministeryo. Bisan subong, mas malipayon ako kon makabantala ako.

Sang 1998, ginhatagan kami ni Carolyn sang bag-o nga asaynment bilang mga espesyal payunir sa Montreal. Sa pila ka tuig, lakip sa akon asaynment ang pag-organisar sang espesyal nga pagbantala sa publiko nga mga lugar kag ang pagpakig-istorya sa mga nagaobra sa media para madula ang indi husto nga pagtamod sang mga tawo parte sa mga Saksi ni Jehova. Subong, nalipay kami ni Carolyn nga magbantala sa mga tawo nga nagsaylo sa Canada halin sa iban nga pungsod, nga masami gusto gid magtuon sang Biblia.

Kon pamalandungan ko ang akon pag-alagad kay Jehova sa nagligad nga 68 ka tuig sugod sang nabawtismuhan ako, masiling ko nga ginpakamaayo gid niya ako. Nalipay gid ako bangod natun-an ko kon paano pabaloran ang ministeryo kag madamo ako sang nabuligan nga makatuon sang kamatuoran. Sang nagdalagku na ang kabataan nanday Lise kag sang iya bana, nagregular payunir sila nga mag-asawa. Nalipay gid ako kay matutom si Lise nga nagaalagad. Nagapasalamat gid ako sa akon mga kauturan. Ang ila maayo nga halimbawa kag maalamon nga mga laygay nagbulig sa akon nga magbakod ang akon kaangtanan kay Jehova kag maalagad sia sa lainlain nga mga paagi. Narealisar ko nga posible lang kita makapabilin nga matutom sa aton asaynment kon magsalig kita sa bulig sang balaan nga espiritu ni Jehova. (Sal. 51:11) Ginapasalamatan ko si Jehova bangod ginhatagan niya ako sang bilidhon nga pribilehiyo nga dayawon ang iya ngalan!—Sal. 54:6.