1. Ano ang pila sa kinaandan nga mga sitwasyon nga makabatyag kita sang kahadlok?

 BINAGBINAGA ini nga mga sitwasyon nga naeksperiensiahan sang pila ka alagad ni Jehova. Gusto ni Nestor kag sang iya asawa nga si María nga mag-alagad sa lugar nga kinahanglan ang dugang nga manugbantala. * Para mahimo ini, dapat sila maghimo sang mga pagbag-o sa ila kabuhi. Pero nahadlok sila nga basi indi na sila mangin malipayon kon magkinot sila. Nagaistar si Biniam sa isa ka pungsod nga ginapamatukan ang hilikuton sang katawhan sang Dios. Gani sang nangin Saksi ni Jehova sia, kabalo sia nga posible nga hingabuton sia. Nahadlok sia hingabuton, pero mas nahadlok sia sa mangin reaksion sang iya pamilya kon mabal-an nila nga Saksi na sia. Nabal-an ni Valérie nga may malala sia nga kanser, kag nabudlayan sia makakita sang doktor nga magarespeto sang iya desisyon nga nabase sa Biblia parte sa dugo. Nahadlok sia nga basi mapatay sia.

2. Ngaa dapat kita magpanikasog nga madaug ang aton kahadlok?

² Naeksperiensiahan mo na bala ini nga kahadlok? Madamo sa aton ang nakaeksperiensia na sini. Kon indi kita magpanikasog nga madaug ang aton kahadlok, posible nga makahimo kita sang indi maayo nga mga desisyon. Bangod sini, posible pa gani nga magluya ang aton kaangtanan kay Jehova. Amo ini ang gusto ni Satanas nga matabo sa aton. Ginatinguhaan man niya nga mahadlok kita para indi naton pagtumanon ang mga kasuguan ni Jehova. Lakip sa sini ang sugo nga magbantala sang maayong balita. (Bug. 12:17) Malain gid si Satanas, wala sia sing kaluoy, kag gamhanan sia. Pero madaug naton sia. Paano?

3. Ano ang makabulig sa aton para madaug naton ang aton kahadlok?

³ Kon kumbinsido kita nga palangga kita ni Jehova kag dampig sia sa aton, wala sing mahimo si Satanas para mahadlok kita. (Sal. 118:6) Halimbawa, nakaeksperiensia sang mabudlay gid  nga mga sitwasyon ang nagsulat sang Salmo 118. Madamo sia sang kaaway, kag ang iban sa ila prominente nga mga tawo (bersikulo 9, 10). May mga tion nga grabe gid ang iya kabalaka (bersikulo 13). Kag gindisiplina man sia ni Jehova (bersikulo 18). Pero nakaamba gihapon ini nga salmista: “Indi ako mahadlok.” Ano ang nakabulig sa iya nga indi mahadlok? Kabalo sia nga bisan pa gindisiplina sia ni Jehova, palangga gid sia sang iya Amay sa langit. Kumbinsido ang salmista nga handa sia pirme buligan sang iya mahigugmaon nga Dios sa bisan ano nga sitwasyon.—Sal. 118:29.

4. Ano nga kahadlok ang aton madaug kon kumbinsido kita nga palangga kita sang Dios?

⁴ Dapat kita mangin kumbinsido nga palangga kita ni Jehova. Makabulig ini sa aton nga madaug ang tatlo ka kinaandan nga kahadlok: (1) kahadlok nga basi indi naton mahatag ang kinahanglanon sang aton pamilya, (2) kahadlok sa tawo, kag (3) kahadlok sa kamatayon. Nadaug sang mga kauturan nga ginsambit sa una nga parapo ang ila kahadlok kay kumbinsido sila nga palangga sila sang Dios.

5. Ano ang posible nga ginakabalak-an sang isa ka ulo sang pamilya? (Tan-awa ang piktyur sa kober.)

⁵ Ginaserioso gid sang isa ka Cristiano nga ulo sang pamilya ang iya responsibilidad nga amanan sang materyal nga kinahanglanon ang iya pamilya. (1 Tim. 5:8) Kon isa ikaw ka ulo sang pamilya, posible nga nabalaka ka nga basi madulaan ka sang obra sa tion sang pandemic. Posible nga nabalaka ka nga basi mabudlayan ka nga makakita sang kuarta para sa pagkaon sang imo pamilya kag para ibayad sa arkila sa balay. Posible nga nahadlok ka man nga kon madulaan ka sang obra, basi indi ka makakita sang lain nga obra. Ukon pareho kanday Nestor kag María nga ginsambit kaina, basi nagapamensar ka nga mabudlayan ka kon buhinan mo ang imo tion sa pag-obra. Bangod sini nga mga kabalaka, madamo ang napauntat ni Satanas sa pag-alagad kay Jehova.

6. Ano ang ginatinguhaan ni Satanas nga patihan naton?

⁶ Ginatinguhaan ni Satanas nga papatihon kita nga indi kita palangga ni Jehova kag wala sia nagabulig sa aton para maatipan naton ang aton pamilya. Gani basi maghunahuna kita nga para indi kita mapahalin sa aton obra, dapat naton himuon ang tanan bisan pa malapas naton ang mga prinsipio sa Biblia.

7. Ano ang ginapasalig ni Jesus sa aton?

⁷ Si Jesus ang mas nakakilala sa iya Amay. Gani ginapasalig niya kita nga “nahibaluan sang [aton Dios] ang [aton] ginakinahanglan bisan wala pa [kita] makapangayo sa iya.” (Mat. 6:8) Kag kabalo si Jesus nga handa si Jehova sa paghatag sang aton mga kinahanglanon. Bilang mga Cristiano, miembro kita sang pamilya sang Dios. Si Jehova ang Ulo sang aton pamilya, gani makasigurado kita nga himuon gid niya ang ginsugo niya sa tanan nga ulo sang pamilya nga mabasa sa 1 Timoteo 5:8.

8. (a) Ano ang makabulig sa aton para madaug naton ang kahadlok nga basi indi naton mahatag ang kinahanglanon sang aton pamilya? (Mateo 6:31-33) (b) Base sa piktyur, paano naton mailog ang halimbawa sang mag-asawa nga nagadala sang pagkaon sa isa ka sister?

⁸ Kon kumbinsido kita nga palangga kita ni Jehova kag palangga niya ang aton pamilya, indi kita magaduhaduha nga mabaton naton ang aton mga kinahanglanon. (Basaha ang Mateo 6:31-33.) Gusto ni Jehova nga ihatag ang aton mga kinahanglanon. Mahigugmaon kag maalwan gid niya ini nga ginahimo. Sang gintuga niya ang duta, ginhatag niya ang aton panguna nga mga kinahanglanon para mabuhi kita. Pero may ginhimo pa gid sia. Madamo sia sang gintuga sa duta para malipay gid kita. (Gen. 2:9) Kon kaisa, iguigo lang gid ang  ara sa aton para sa aton mga kinahanglanon. Pero dapat kita magpasalamat nga nakatibawas kita kay ginapakita sini nga wala kita ginapabay-an ni Jehova. (Mat. 6:11) Pirme naton dumdumon nga labaw gid ang ginahatag sa aton ni Jehova kon ikumparar sa tanan nga ginasakripisyo naton subong. Kag sa palaabuton, hatagan niya kita sang kabuhi nga wala sing katapusan. Amo ini ang narealisar nanday Nestor kag María.—Isa. 65:21, 22.

9. Ano ang matun-an mo sa halimbawa nanday Nestor kag María?

⁹ Maayo gid ang pangabuhi nanday Nestor kag María sa Colombia. “Ginhunahuna namon nga pasimplehon ang amon kabuhi para madugangan ang amon ginahimo sa pag-alagad,” siling nila, “pero nahadlok kami nga basi indi na kami mangin malipayon kon magkinot kami.” Ano ang nakabulig sa ila para madaug ang ila kahadlok? Ginpamalandungan nila ang madamo nga paagi nga ginpakita ni Jehova nga palangga niya sila. Nangin kumbinsido sila nga atipanon gid sila ni Jehova, gani nag-resign sila sa ila mga trabaho nga daku sing sueldo. Ginbaligya nila ang ila balay kag nagsaylo sila sa isa ka lugar sa ila pungsod nga kinahanglan ang dugang nga manugbantala sang Ginharian. Ano ang masiling nila parte sa ila ginhimo nga desisyon? Nagsiling si Nestor: “Naeksperiensiahan namon nga matuod gid ang ginasiling sang Mateo 6:33. Wala gid kami ginkulang sa amon materyal nga kinahanglanon. Kag mas malipayon kami subong.”

10. Ngaa indi na kita matingala kon nahadlok ang mga tawo sa pareho nila nga tawo?

¹⁰ Halin pa sang una, ginahalitan na sang tawo ang iya isigkatawo. (Man. 8:9) Halimbawa, ginaabusuhan sang mga tawo ang ila awtoridad, ginahalitan sang mga kriminal ang iban, ginainsulto kag ginapahog sang mga bully ang ila mga klasmeyt, kag ginasakit pa gani sang pila ka tawo ang ila pamilya. Gani indi na kita matingala kon nahadlok ang mga tawo sa pareho nila nga tawo. Paano ginagamit ni Satanas ini nga kahadlok sa tawo para mapaluya kita?

11-12. Paano ginagamit ni Satanas ang kahadlok sa tawo para mapaluya kita?

¹¹ Ginatinguhaan ni Satanas nga mahadlok kita sa mga tawo para magkompromiso kita kag para mag-untat kita sa pagbantala. Ginaimpluwensiahan niya ang mga gobierno nga dumilian ang aton hilikuton kag hingabuton kita. (Luc. 21:12; Bug. 2:10) Sa kalibutan ni Satanas, madamo nga tawo ang nagapalapta sang  sala nga mga impormasyon kag sang mga kabutigan parte sa mga Saksi ni Jehova. Posible nga yagutaon kita ukon sakiton pa gani kita sang mga tawo nga nagapati sa sini nga mga kabutigan. (Mat. 10:36) Bag-o bala ini nga pamaagi ni Satanas? Indi. Gingamit na niya ini sang unang siglo.—Binu. 5:27, 28, 40.

¹² Gusto ni Satanas nga mahadlok kita kon pamatukan kita sang mga gobierno. Pero isa lang ini sa iya mga pamaagi. Nahadlok ang iban sa mangin reaksion sang ila pamilya kon mag-Saksi sila. Kon kaisa, mas nahadlok sila sa sini sangsa sakiton sila sang mga nagapanghingabot. Palangga gid nila ang ila mga paryente, kag gusto nila nga makilala sang ila mga paryente si Jehova kag palanggaon sia. Nasubuan sila kon mabatian nila nga ginapakalain sang ila mga paryente ang matuod nga Dios kag ang mga nagasimba sa iya. Pero may pila ka paryente nga nagapamatok sang primero ang nangin mga alagad ni Jehova sang ulihi. Pero ano abi kon sikwayon kita sang aton pamilya bangod nangin Saksi ni Jehova kita? Ano ang himuon naton?

13. Kon kumbinsido kita nga palangga kita sang Dios, paano ini makabulig sa aton kon sikwayon kita sang aton pamilya? (Salmo 27:10)

¹³ Mapalig-on gid kita sang ginasiling sang Salmo 27:10. (Basaha.) Kon dumdumon naton nga palangga gid kita ni Jehova, indi kita mabalaka bisan pa sikwayon kita sang aton pamilya. Kag makasalig kita nga padyaan niya kita kon magbatas kita. Ihatag ni Jehova ang tanan naton nga kinahanglanon sa adlaw-adlaw, buligan niya kita nga mangin malipayon, kag buligan niya kita nga mangin suod sa iya. Kag wala sing makalabaw sa iya sa paghimo sini. Amo ini ang naeksperiensiahan ni Biniam nga ginsambit kaina.

14. Ano ang matun-an mo sa halimbawa ni Biniam?

¹⁴ Nangin Saksi ni Jehova si Biniam bisan pa kabalo sia nga grabe ang paghingabot sang gobierno sang ila pungsod sa mga Saksi. Kabalo sia nga palangga sia ni Jehova. Binagbinaga kon paano ini nakabulig kay Biniam nga madaug ang kahadlok sa tawo. “Grabe gid ang paghingabot,” siling niya. “Nahadlok ako nga hingabuton sang gobierno, pero mas nahadlok ako nga pamatukan sang akon pamilya. Nahadlok ako nga basi maakig ang akon amay sa akon desisyon nga mangin isa ka Saksi ni Jehova kag ikahuya ako sang akon pamilya.” Pero kumbinsido si Biniam nga pirme ginaatipan ni Jehova ang mga ginapalangga Niya. Nagsiling si Biniam: “Ginpamalandungan ko kon paano ginbuligan ni Jehova ang iban para mabatas  nila ang kapigaduhon, pagpakanubo sa ila, kag pagsakit sa ila. Kabalo ako nga kon mangin matutom ako kay Jehova, pakamaayuhon niya ako. Madamo nga beses ako nga gin-aresto kag ginsakit, pero napamatud-an ko nga pirme kita ginabuligan ni Jehova kon mangin matutom kita sa iya.” Para kay Biniam, matuod gid nga Amay si Jehova, kag nangin pamilya gid niya ang katawhan ni Jehova.

15. Ngaa normal lang nga mahadlok kita sa kamatayon?

¹⁵ Suno sa Biblia, ang kamatayon isa ka kaaway. (1 Cor. 15:25, 26) Posible nga nahadlok kita sa kamatayon kag ginapamensar naton ini, ilabi na kon may malala kita nga balatian ukon ang aton mga pinalangga. Ngaa nahadlok kita sa kamatayon? Bangod sang gintuga kita ni Jehova, ginhatagan niya kita sang handum nga mabuhi sing wala sing katapusan. (Man. 3:11) Kon husto ang aton pagtamod sa kamatayon, makaamlig ini sa aton kabuhi. Halimbawa, mapalig-on kita sini nga magkaon sang masustansia nga pagkaon kag mag-ehersisyo, magpadoktor kag magtomar sang bulong kon nagamasakit kita, kag maghalong para malikawan ang peligro.

16. Paano ginagamit ni Satanas ang aton normal nga kahadlok sa kamatayon?

¹⁶ Kabalo si Satanas nga ginapabaloran gid naton ang aton kabuhi. Kag nagsiling sia nga isakripisyo naton ang tanan, bisan ang aton kaangtanan kay Jehova, kon ara sa peligro ang aton kabuhi. (Job 2:4, 5) Sala gid si Satanas. Pero bangod ‘may ikasarang sia sa pagpahanabo sing kamatayon,’ ginagamit niya ang aton normal nga kahadlok sa kamatayon para talikdan naton si Jehova. (Heb. 2:14, 15) May mga tion nga ginaimpluwensiahan niya ang pila ka tawo para pahugon ang mga alagad ni Jehova nga patyon nila sila kon indi nila pag-isikway ang ila relihion. Ukon sa tion nga kinahanglan naton magpabulong kay ara sa peligro ang aton kabuhi, posible nga gamiton niya ini nga sitwasyon para magkompromiso kita. Posible nga piliton kita sang mga doktor ukon sang aton indi Saksi nga pamilya nga magpatughong sang dugo, bisan pa nagalapas ini sa kasuguan sang Dios. Ukon posible nga may magtinguha nga magkumbinsi sa aton nga batunon ang iban pa nga paagi sang pagbulong nga nagalapas sa mga prinsipio sa Biblia.

17. Suno sa Roma 8:37-39, ngaa indi kita dapat mahadlok sa kamatayon?

¹⁷ Indi naton gusto mapatay. Pero kabalo kita nga palangga kita gihapon ni Jehova bisan pa mapatay kita. (Basaha ang Roma 8:37-39.) Kon mapatay ang mga abyan ni Jehova, ginadumdom niya sila, nga daw pareho lang nga buhi sila gihapon. (Luc. 20:37, 38) Gusto gid niya nga banhawon sila. (Job 14:15) Daku gid ang ginbayad ni Jehova para ‘makatigayon kita sang kabuhi nga wala sing katapusan.’ (Juan 3:16) Kabalo kita nga palangga gid kita ni Jehova kag nagaulikid gid sia sa aton. Gani sa baylo nga talikdan si Jehova kon nagamasakit kita ukon ginapahog kita nga patyon, dapat kita magdangop sa iya para paumpawan kita, hatagan kita sang kaalam, kag pabakuron kita. Amo gid ini ang ginhimo ni Valérie kag sang iya bana.—Sal. 41:3.

18. Ano ang matun-an mo sa halimbawa ni Valérie?

¹⁸ Sang 35 anyos si Valérie, nabal-an niya nga may malala sia nga kanser kag pila lang ka tawo ang may amo sini nga kanser. Binagbinaga kon paano nakabulig ang gugma para madaug niya ang iya kahadlok sa kamatayon. Nagsiling sia: “Sang nabal-an ko nga may kanser ako, grabe gid ang amon kakibot sang akon bana. Dapat ako operahan, kag indi ini simple nga operasyon. Madamo nga doktor ang ginkadtuan ko, pero tanan sila indi mag-opera kon indi ako  magpatughong sang dugo. Nahadlok gid ako, pero indi gid ako magpatughong sang dugo bangod sugo ini sang Dios. Sa bilog ko nga kabuhi, ginpakita ni Jehova nga palangga gid niya ako. Subong, tsansa ko na ini nga ipakita nga palangga ko sia. Sa kada tion nga may indi maayo nga balita ang mga doktor parte sa akon kondisyon, ginapanikasugan ko pa gid nga himuon ang makapahalipay kay Jehova kag makapierde kay Satanas. Sang ulihi, naoperahan gid man ako nga wala gintughungan sang dugo. Wala pa ako mag-ayo, pero ginahatag pirme ni Jehova ang kinahanglan namon. Halimbawa, antes ko nabal-an nga may kanser ako, bag-o lang ginbinagbinag sa miting sang kongregasyon ang artikulo nga ‘Pag-atubang sing Maisugon sa mga Kabudlayan Subong.’ * Bangod sini nga artikulo, naumpawan gid kami. Sulitsulit namon ini nga ginbasa. Bangod sang mga artikulo pareho sini kag sang padayon namon nga pagbantala kag pag-attend sa mga miting, nangin kalmado kami kag nakahimo kami sang maayo nga mga desisyon.”

19. Ano ang malapit na lang nga matabo?

¹⁹ Paagi sa bulig ni Jehova, nasarangan sang mga Cristiano sa bilog nga kalibutan ang mabudlay nga mga sitwasyon kag napamatukan nila ang Yawa. (1 Ped. 5:8, 9) Mahimo mo man ini. Malapit na lang nga manduan ni Jehova si Jesus kag ang iya kaupod nga mga manuggahom nga “gub-on ang mga binuhatan sang Yawa.” (1 Juan 3:8) Pagkatapos sini, ‘wala na sing kahadlukan’ ang katawhan sang Dios nga nagaalagad sa iya sa duta. (Isa. 54:14; Miq. 4:4) Pero samtang wala pa ina nga tion, dapat kita magpanikasog nga madaug ang aton kahadlok.

20. Ano ang makabulig sa aton para madaug naton ang aton kahadlok?

²⁰ Dapat padayon naton nga pabakuron ang aton pagsalig nga palangga ni Jehova ang iya mga alagad kag ginaamligan niya sila. Para mahimo naton ini, makabulig sa aton ang pagpamalandong kag ang pagsugid sa iban kon paano gin-amligan ni Jehova ang iya mga alagad sang una. Kag dumdumon man naton kon paano niya kita ginabuligan kon makaeksperiensia kita sang mabudlay nga mga sitwasyon. Paagi sa bulig ni Jehova, madaug naton ang aton kahadlok.—Sal. 34:4.