1. Ano ang ginpaandam ni apostol Pablo sa hinaplas nga mga Cristiano?

“UNTATI na ninyo ang pagpadihon sa mga dalanon sang katawhan sini nga sistema sang mga butang,” paandam ni apostol Pablo. (Roma 12:2) Ginsulat niya ini para sa mga Cristiano sang unang siglo. Ngaa prangka nga ginlaygayan ni Pablo ang mga lalaki kag mga babayi nga nadedikar sa Dios kag ginhaplasan sang balaan nga espiritu?—Roma 1:7.

2-3. Ano ang ginahimo ni Satanas para talikdan naton si Jehova, pero paano naton magabot ang mga panimuot nga nanggamot na sa aton hunahuna?

² Nabalaka si Pablo bangod naimpluwensiahan ang pila ka Cristiano sang indi maayo nga mga pangatarungan kag pilosopiya sang kalibutan ni Satanas. (Efe. 4:17-19) Mahimo man ini matabo sa aton. Si Satanas ang dios sang sini nga sistema sang mga butang kag ginatinguhaan niya nga magtalikod kita kay Jehova. Para mahimo ini, nagagamit sia sang lainlain nga pamaagi. Ang isa sini amo ang paghingalit sa aton handum nga mangin bantog. Mahimo niya gamiton ang aton mga eksperiensia sang una, kultura, ukon ineskwelahan, para ilugon naton ang iya panghunahuna.

³ Posible pa bala naton magabot ang mga panimuot nga “natukod sing malig-on” ukon nanggamot na sa aton hunahuna? (2 Cor. 10:4) Talupangda ang sabat ni Pablo: “Ginatumba namon ang mga pangatarungan kag ang tanan nga pagpabugal nga supak sa ihibalo sang Dios, kag ginabihag namon ang tanan nga panghunahuna agod mangin matinumanon ini sa Cristo.” (2 Cor. 10:5) Gani posible gid nga magabot naton ukon madula ang indi maayo nga mga pangatarungan paagi sa bulig ni Jehova. Pareho  sang bulong nga makadula sang epekto sang hilo, ang Pulong sang Dios makabulig sa aton nga madula ang makahililo nga epekto sang kalibutan ni Satanas.

4. Ano nga mga pagbag-o ang ginhimo sang madamo sa aton sang natun-an naton ang kamatuoran?

⁴ Hunahunaa ang mga pagbag-o nga ginhimo mo sang natun-an mo ang kamatuoran sa Pulong sang Dios kag nagdesisyon ka nga alagaron si Jehova. Madamo sa aton ang nag-untat sa paghimo sang malain nga mga buhat. (1 Cor. 6:9-11) Nagapasalamat gid kita nga ginbuligan kita ni Jehova nga mauntatan ang paghimo sang sini nga mga sala!

5. Suno sa Roma 12:2, ano ang duha ka butang nga dapat naton himuon?

⁵ Pero, indi kita dapat magbatyag nga indi na naton kinahanglan maghimo sang dugang nga mga pagbag-o. Bisan pa gin-untatan na naton ang paghimo sang serioso nga mga sala nga ginahimo naton antes kita mabawtismuhan, dapat gihapon kita magpanikasog nga malikawan ang bisan ano nga mahimo magsulay sa aton nga himuon ini liwat. Paano? Nagsabat si Pablo: “Untati na ninyo ang pagpadihon sa mga dalanon sang katawhan sini nga sistema sang mga butang, kundi bag-uha na ninyo ang inyo panghunahuna.” (Roma 12:2) Gani duha ang dapat himuon. Una, dapat ‘untatan na naton nga magpadihon’ ukon magpaimpluwensia sa sini nga kalibutan. Ikaduha, dapat naton ‘bag-uhon’ ang aton panghunahuna.

6. Ano ang matun-an naton sa ginsiling ni Jesus sa Mateo 12:43-45?

⁶ Ang pagbag-o nga ginsiling ni Pablo wala lang nagapatuhoy sa pagbag-o sang aton hitsura. Nadalahig sa sini ang aton bug-os nga pagkatawo. (Tan-awa ang kahon nga “ Nagbag-o Ukon Nagapakunokuno?”) Dapat naton bag-uhon ang aton hunahuna, nga nagalakip sang aton pinakasulod nga panimuot, balatyagon, kag handum. Gani dapat naton tanan pamangkuton ang aton  kaugalingon, ‘Hapaw lang bala nga pagbag-o ang akon ginhimo para mailog ko ang Cristo, ukon ginbag-o ko na gid ang akon bug-os nga pagkatawo?’ Indi gid pareho ining duha ka pagbag-o. Sa Mateo 12:43-45, ginsiling ni Jesus kon ano ang dapat himuon. (Basaha.) Ang iya ginsiling nagatudlo sa aton sining importante nga kamatuoran: Indi bastante nga kuhaon lang naton ang malain nga panghunahuna; dapat naton ini buslan sang panghunahuna sang Dios.

7. Paano naton mabag-o ang aton pinakasulod nga pagkatawo?

⁷ Posible gid bala nga mabag-o ang aton pinakasulod nga pagkatawo? Ang Pulong sang Dios nagasabat: “Padayon nga bag-uha ninyo ang inyo panghunahuna, kag isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efe. 4:23, 24) Gani posible nga mabag-o ang aton pinakasulod nga pagkatawo, pero indi ini mahapos. Indi lang pagpugong sang aton malain nga mga handum kag pag-untat sa paghimo sang malain nga mga buhat ang dapat naton himuon. Dapat naton bag-uhon ang aton “panghunahuna.” Nagalakip ini sang pagbag-o sang aton mga handum, huyog, kag motibo. Nagakinahanglan ini sang padayon nga pagpanikasog.

8-9. Paano ginapakita sang eksperiensia sang isa ka utod nga kinahanglan naton bag-uhon ang aton pinakasulod nga pagkatawo?

⁸ Binagbinagon naton ang halimbawa sang isa ka utod nga bayolente sang una. Palainom sia sang alak kag pirme lang sia makakita sing away, pero gin-untatan niya ini kag nakalipikar sia sa bawtismo. Daku gid nga panaksi sa ila lugar ang iya pagbag-o. Pero isa ka gab-i, wala madugay pagkatapos sia mabawtismuhan, nakaatubang sia sang wala ginapaabot nga pagtilaw. Isa ka hubog ang nagkadto sa iya balay kag ginhangkat sia sing inaway. Sa umpisa, daw batuan sia sang aton utod pero napunggan niya ang iya kaugalingon. Pero sang ginpakalain sang hubog ang ngalan ni Jehova, wala na makapugong ang utod. Naggua sia kag ginkastigo niya ang hubog. Ngaa nahimo ini sang utod? Sang nagtuon sia sang Biblia, nabuligan sia sini nga mapunggan ang iya bayolente nga pamatasan, pero wala pa niya mabag-o ang iya panghunahuna. Buot silingon, wala pa niya mabag-o ang iya pinakasulod nga pagkatawo.

⁹ Pero, wala nag-untat ini nga utod sa paghimo sang mga pagbag-o. (Hulu. 24:16) Paagi sa bulig sang mga gulang, daku gid ang iya ginbag-o. Sang ulihi, nakalipikar sia nga mangin gulang. Dayon isa ka gab-i, sa gua lang sang Kingdom Hall, nakaatubang sia sang pagtilaw nga pareho sa naeksperiensiahan niya pila ka tuig na ang nagligad. Isa ka hubog ang naghana nga kastiguhon ang isa ka gulang. Ano ang ginhimo sang aton utod? Kalmado kag malulo nga gin-istorya sang utod ang hubog nga tawo. Sang ulihi, nagkalma ang hubog. Ginbuligan pa gani sang utod ang hubog, nga nagaikis-ikis maglakat, nga makapauli sa ila balay. Ngaa lain na ang reaksion subong sang utod? Nabag-o na sang aton utod ang iya panghunahuna. Nangin matuodtuod gid sia nga mahidaiton kag mapainubuson. Bangod sini, nahimaya si Jehova!

10. Ano ang dapat naton himuon para mabag-o naton ang aton pinakasulod nga pagkatawo?

¹⁰ Nagakinahanglan sang tion ini nga pagbag-o, kag indi ini awtomatiko. Dapat ‘manikasog gid’ kita sing madamo nga tuig. (2 Ped. 1:5) Ini nga pagbag-o wala nagadepende sa aton kalawigon sa pag-alagad kay Jehova. Sa baylo, dapat gid naton himuon ang aton bug-os nga masarangan nga bag-uhon ang aton pinakasulod nga pagkatawo. May pila ka importante nga tikang nga makabulig sa aton nga mahimo ini nga pagbag-o. Binagbinagon naton ang pila sini.

11. Paano ang pagpangamuyo makabulig sa aton nga mabag-o ang aton pinakasulod nga pagkatawo?

¹¹ Ang pagpangamuyo amo ang una nga importante nga tikang. Dapat naton ipangamuyo ang ginpangamuyo sang salmista: “O Dios ko, putlia ang akon tagipusuon, kag hatagi ako sing bag-o kag malig-on nga espiritu.” (Sal. 51:10) Dapat naton batunon nga kinahanglan naton bag-uhon ang aton panghunahuna kag magpabulig kita kay Jehova. Ngaa makasigurado kita nga buligan kita ni Jehova? Mapalig-on kita sa sining promisa ni Jehova sa batinggilan nga mga Israelinhon sang panahon ni Ezequiel: “Hatagan ko sila sing nahiusa nga tagipusuon, kag sing isa ka bag-o nga espiritu; kag . . . sing mahumok nga tagipusuon [buot silingon, isa nga sensitibo sa panuytoy sang Dios].” (Ezeq. 11:19; footnote) Handa si Jehova nga buligan ang mga Israelinhon nga magbag-o, kag handa man sia nga buligan kita.

12-13. (a) Suno sa Salmo 119:59, ano ang dapat naton pamalandungan? (b) Ano ang mga dapat mo ipamangkot sa imo kaugalingon?

¹² Ang pagpamalandong amo ang ikaduha nga importante nga tikang. Samtang ginabasa naton ang Pulong sang Dios kada adlaw, dapat naton hatagan sing tion ang pagpamalandong, ukon ang paghunahuna sing maayo, para makita naton kon ano nga mga panghunahuna kag motibo ang dapat naton bag-uhon. (Basaha ang Salmo 119:59; Heb. 4:12; Sant. 1:25) Dapat mabal-an naton kon ano nga kaalam sang kalibutan ang posible nanamian kita nga sundon. Dapat naton batunon kon ano ang aton mga kaluyahon kag panikasugan gid naton nga dulaon ini.

¹³ Halimbawa, pamangkuta ang imo kaugalingon: ‘Nahisa bala ako kon kaisa?’ (1 Ped. 2:1) ‘Nagapabugal bala ako kon kaisa bangod sang akon gindak-an, ineskwelahan, ukon manggad?’ (Hulu. 16:5) ‘Ginapakanubo ko bala ang mga imol ukon ang mga lain sang rasa?’ (Sant. 2:2-4) ‘Nanamian bala ako sa mga butang sa kalibutan ni Satanas?’ (1 Juan 2:15-17) ‘Nanamian bala ako sa imoral kag bayolente nga mga kalingawan?’ (Sal. 97:10; 101:3; Amos 5:15) Ang imo sabat sa sini nga mga pamangkot makabulig sa imo nga makita kon ano ang mga dapat mo bag-uhon. Kon gabuton naton ang mga pangatarungan nga nanggamot na sa aton hunahuna, mapahamut-an naton ang aton Amay sa langit.—Sal. 19:14.

14. Ngaa importante ang pagpili sang maayo nga mga kaupdanan?

¹⁴ Ang pagpili sang maayo nga mga kaupdanan amo ang ikatlo nga importante nga tikang. Daku ang impluwensia sa aton sang aton mga kaupdanan, narealisar man naton ini ukon wala. (Hulu. 13:20) Sa ulubrahan ukon sa eskwelahan, mahimo napalibutan kita sang mga tawo nga indi makabulig sa aton nga pabaloran ang panghunahuna sang Dios. Pero, makakita kita sang pinakamaayo nga mga kaupdanan sa aton Cristiano nga mga miting. Diri kita mapalig-on nga magpakita sang ‘gugma kag maayong mga buhat.’—Heb. 10:24, 25.

15-16. Paano ginatinguhaan ni Satanas nga bag-uhon ang aton panghunahuna?

¹⁵ Pero, dumduma nga ginatinguhaan gid ni Satanas nga bag-uhon ang aton panghunahuna. Ginagamit niya ang tanan nga sahi sang pangatarungan para balewalaon naton ang impluwensia sang kamatuoran sang Pulong sang Dios.

¹⁶ Ginpamangkot sadto ni Satanas si Eva sa hardin sang Eden: “Matuod gid bala nga nagsiling ang Dios . . . ?” (Gen. 3:1) Amo gihapon nga estilo sang pagpamangkot ang ginagamit ni Satanas subong. Sa sini nga kalibutan nga iya ginagamhan, masami naton mabatian ang pareho sini nga mga pamangkot: ‘Matuod gid bala nga  wala ginabaton sang Dios ang pagpakasal sang pareho sing sekso? Matuod gid bala nga indi gusto sang Dios nga magselebrar kamo sang Krismas kag birthday? Matuod gid bala nga indi gusto sang inyo Dios nga magpatughong kamo sang dugo? Matuod gid bala nga gusto sang mahigugmaon nga Dios nga likawan ninyo ang pagpakig-upod sa inyo mga pinalangga nga na-disfellowship?’

17. Ano ang dapat naton himuon kon ginakuestyon ang aton mga ginapatihan, kag ano ang resulta kon himuon naton ini suno sa Colosas 2:6, 7?

¹⁷ Dapat kumbinsido kita nga matuod gid ang aton mga ginapatihan. Kon pabay-an naton nga indi masabat ang mga pamangkot nga mahimo ginapamensar naton, posible nga mag-umpisa na kita sa pagduhaduha. Kag mahimo ini magpaburon sa aton panghunahuna kag magpaluya sang aton pagtuo. Gani, ano ang dapat naton himuon? Ginalaygayan kita sang Pulong sang Dios nga bag-uhon ang aton panghunahuna para mapamatud-an naton sa aton kaugalingon “kon ano ang maayo kag kalahamut-an kag himpit nga kabubut-on sang Dios.” (Roma 12:2) Paagi sa regular nga pagtuon, mapamatud-an naton sa aton kaugalingon ang mga kamatuoran nga natun-an naton sa Biblia. Kag mangin kumbinsido pa gid kita nga ang mga talaksan ni Jehova amo ang husto. Dayon, pareho sang kahoy nga may madalom nga gamot, makapanggamot man kita sang maayo, ukon mangin ‘mabakod ang aton pagtuo.’—Basaha ang Colosas 2:6, 7.

18. Ano ang makabulig sa aton nga mapamatukan ang makahalalit nga impluwensia sang kalibutan ni Satanas?

¹⁸ Kita lang ang makapabakod sang aton pagtuo, kay wala sing makahimo sini para sa aton. Gani padayon nga bag-uha ang imo panghunahuna. Pirme mangamuyo kag pangabaya nga buligan ka sang espiritu ni Jehova. Magpamalandong sing maayo kag usisaa pirme ang imo mga panghunahuna kag motibo. Pilia ang maayo nga mga kaupdanan nga makabulig sa imo nga mabag-o ang imo panghunahuna. Kon himuon mo ini, mapamatukan mo ang makahalalit nga impluwensia sang kalibutan ni Satanas kag masikway mo “ang mga pangatarungan kag ang tanan nga pagpabugal nga supak sa ihibalo sang Dios.”—2 Cor. 10:5.