1. Suno sa Colosas 2:4, 8, paano ginaimpluwensiahan ni Satanas ang aton hunahuna?

GUSTO ni Satanas nga talikdan naton si Jehova. Gani ginaimpluwensiahan niya ang aton hunahuna para himuon naton kon ano ang luyag niya. Ginagamit niya ang mga butang nga makagalanyat sa aton para madaya kita nga magsunod sa iya.—Basaha ang Colosas 2:4, 8.

2-3. (a) Ngaa indi naton dapat pagbalewalaon ang paandam sa Colosas 2:8? (b) Ano ang binagbinagon naton sa sini nga artikulo?

² Madaya gid man bala kita ni Satanas? Huo! Dumduma nga ang paandam ni Pablo sa Colosas 2:8 wala ginsulat para sa mga indi tumuluo. Ginsulat niya ini para sa mga Cristiano nga ginhaplasan sang balaan nga espiritu. (Col. 1:2, 5) Makatalagam ang ila panahon sang una kay posible sila madaya, pero mas makatalagam ang aton panahon subong. (1 Cor. 10:12) Ngaa? Bangod gintagbong na si Satanas sa duta, kag ginatinguhaan gid niya nga mapatalang ang matutom nga mga alagad sang Dios. (Bug. 12:9, 12, 17) Nagakabuhi man kita sa tion nga ang malaut nga mga tawo kag mga impostor mas ‘nagalain pa gid.’—2 Tim. 3:1, 13.

³ Sa sini nga artikulo, binagbinagon naton kon paano ginagamit ni Satanas ang “wala sing pulos nga daya” para impluwensiahan ang aton hunahuna. Hibaluon naton ang iya tatlo ka “tuso nga mga pahito” ukon pamaagi. (Efe. 6:11) Dayon sa masunod nga artikulo, binagbinagon naton kon paano naton mapamatukan ang iya mga pamaagi. Pero binagbinagon anay naton kon ano ang  aton matun-an sa pamaagi nga gingamit ni Satanas para masulay ang mga Israelinhon sang nakatabok na sila sa Ginsaad nga Duta.

4-6. Suno sa Deuteronomio 11:10-15, ano nga bag-o nga paagi sang pagpanguma ang dapat matun-an sang mga Israelinhon sang ara na sila sa Ginsaad nga Duta?

⁴ Nasulay ni Satanas ang mga Israelinhon nga magsimba sa mga diosdios. Paano niya ini ginhimo? Kabalo sia nga kinahanglan nila ang pagkaon, gani gingamit niya ini para masulay sila nga himuon ang iya luyag. Sang nakatabok na ang mga Israelinhon sa Ginsaad nga Duta, kinahanglan nila magtuon sang bag-o nga paagi sang pagpanguma. Sang didto sila sa Egipto, ang tubig para sa ila mga uma nagahalin sa Suba Nilo. Pero sa Ginsaad nga Duta, wala sing malapad nga suba, gani nagadepende sa ulan kag tun-og ang pagtubo sang mga tanom. (Basaha ang Deuteronomio 11:10-15; Isa. 18:4, 5) Gani kinahanglan magtuon sang mga Israelinhon sang bag-o nga paagi sang pagpanguma. Indi ini mahapos bangod ang kalabanan sang mga may eksperiensia sa pagpanguma napatay sa kamingawan.

⁵ Ginsilingan ni Jehova ang iya katawhan nga nagbag-o na ang ila kahimtangan. Dayon ginpaandaman niya sila: “Mag-andam kamo nga indi mahaylo ang inyo tagipusuon sa pagsimba sa iban nga mga dios kag sa pagyaub sa ila.” (Deut. 11:16, 17) Pero daw wala sing labot sa pagpanguma ini nga paandam. Ti, ngaa nagpaandam si Jehova parte sa pagsimba sa butig nga mga dios kay parte man sa bag-o nga paagi sang pagpanguma ang iya ginapaathag?

⁶ Kabalo si Jehova nga para makatuon ang mga Israelinhon sang mga paagi sang pagpanguma, posible nga mamangkot gid sila sa mga pagano nga katawhan sa ila lugar. Mas eksperiensiado sila sa pagpanguma sangsa  mga Israelinhon, gani makatuon ang katawhan sang Dios sa ila. Pero may katalagman ini. Ang panghunahuna sang Canaanhon nga mga mangunguma naimpluwensiahan sang ila pagsimba kay Baal. Nagapati sila nga si Baal ang tag-iya sang langit kag sia ang nagahatag sang ulan. Indi gusto ni Jehova nga maimpluwensiahan sining butig nga panudlo ang iya katawhan. Pero sulitsulit nga ginsimba sang mga Israelinhon si Baal. (Num. 25:3, 5; Huk. 2:13; 1 Hari 18:18) Talupangda kon ano ang ginhimo ni Satanas para himuon sang mga Israelinhon ang luyag niya.

7. Paano gintilawan ang pagtuo sang mga Israelinhon sang nakatabok na sila sa Ginsaad nga Duta?

⁷ Ang una nga pamaagi ni Satanas amo ang paghingalit sa normal nga handum sang mga Israelinhon nga kuntani mag-ulan para matubigan ang ila uma. Talagsa lang nagaulan sa Ginsaad nga Duta halin sa katapusan sang Abril asta sa Septiembre. Gani para mabuhi ang mga Israelinhon kag para madamo ang ila patubas, nagadepende sila sa ulan nga masami nagaumpisa sa Oktubre. Ginlimbungan ni Satanas ang mga Israelinhon kag napapati niya sila nga kon gusto nila ang madamo nga patubas, dapat nila ilugon ang mga kustombre sang mga pagano sa palibot nila. Ini nga mga pagano nagapati nga kinahanglan himuon ang pila ka ritwal para magpaulan ang ila mga dios. Ang mga kulang sing pagtuo kay Jehova nagpati nga ang paghimo sang sini nga mga ritwal amo lang ang paagi para indi maglawig ang tig-ilinit, gani ginhimo nila ini para padunggan ang butig nga dios nga si Baal.

8. Ano ang ikaduha nga pamaagi nga gingamit ni Satanas? Ipaathag.

⁸ Ang ikaduha nga pamaagi nga gingamit ni Satanas sa mga Israelinhon amo ang paghingalit sa imoral nga mga handum. Ang pagano nga mga pungsod nagasimba sa ila mga dios paagi sa paghimo sing makahuluya nga imoral nga mga buhat. Gintugutan nila ang makihilawason nga mga babayi kag mga lalaki sa mga templo sa ila imoral nga paagi sang pagsimba. Ginkunsinti nila ang seksuwal nga imoralidad lakip ang homoseksuwalidad, kag para sa ila indi ini malain. (Deut. 23:17, 18; 1 Hari 14:24) Nagapati ang mga pagano nga kon himuon nila ini nga mga ritwal, may himuon man ang ila mga dios para makapatubas sing maayo ang ila mga uma. Madamo nga Israelinhon ang nanamian sa imoral nga mga ritwal sang mga pagano. Bangod sini, gin-alagad na nila ang butig nga mga dios. Gani naimpluwensiahan sila ni Satanas nga himuon ang luyag niya.

9. Suno sa Oseas 2:16, 17, paano ginpaburon ni Satanas ang pagkilala sang mga Israelinhon kay Jehova?

⁹ Naggamit si Satanas sang ikatlo nga pamaagi. Ginpaburon niya ang pagkilala sang mga Israelinhon kay Jehova. Sang panahon ni manalagna Jeremias, nagsiling si Jehova nga bangod sa butig nga mga manalagna, nalimtan sang Iya katawhan ang Iya ngalan “tungod kay Baal.” (Jer. 23:27) Gin-untatan gid man sang katawhan sang Dios ang paggamit sang ngalan ni Jehova kag gin-islan nila ini sang Baal, nga nagakahulugan sing “Tag-iya” ukon “Agalon.” Bangod sini, nagburon sa hunahuna sang mga Israelinhon kon ano ang kinalain ni Jehova kay Baal, gani daw wala lang sa ila nga gintingob nila ang mga ritwal sa pagsimba kay Baal kag ang pagsimba kay Jehova.—Basaha ang Oseas 2:16, 17 kag footnote.

10. Ano nga mga pamaagi ang ginagamit ni Satanas subong?

¹⁰ Amo gihapon nga mga pamaagi ang ginagamit ni Satanas subong. Ginasulay niya ang mga tawo paagi sa paghingalit sa ila natural nga mga  handum, pagganyat sa ila nga maghimo sang seksuwal nga imoralidad, kag pagpaburon sang ila pagkilala kay Jehova. Una naton nga binagbinagon ang iya ikatlo nga pamaagi.

11. Paano ginpaburon ni Satanas ang pagkilala sang mga tawo kay Jehova?

¹¹ Ginapaburon ni Satanas ang pagkilala sang mga tawo kay Jehova. Sang mapatay ang mga apostoles ni Jesus, ang pila nga nagapangangkon nga mga Cristiano nagpalapta sang butig nga mga panudlo. (Binu. 20:29, 30; 2 Tes. 2:3) Ginpaburon sini nga mga apostata kon sin-o gid ang matuod nga Dios. Halimbawa, wala na nila gingamit ang ngalan sang Dios sa mga Biblia nga ila ginhimo kag mas ginpili nila nga gamiton ang “Ginuo” ukon iban pa nga titulo. Bangod gin-islan nila sang “Ginuo” ang ngalan sang Dios, nabudlayan ang mga nagabasa sang Biblia nga makita ang kinalain ni Jehova sa iban nga “mga ginuo” nga ginsambit sa Kasulatan. (1 Cor. 8:5) Pareho man nila nga ginatawag nga “Ginuo” si Jehova kag si Jesus, gani nabudlayan ang mga tawo nga mahangpan nga lain si Jehova kay Jesus. (Juan 17:3) Amo ini ang isa sa mga rason kon ngaa may doktrina sang Trinidad, pero wala ini ginatudlo sang Pulong sang Dios. Bangod sini tanan, madamo nga tawo ang nagapati nga ang Dios isa ka misteryo kag indi naton sia makilala. Kabutigan gid ini!—Binu. 17:27.

12. Ano ang ginatudlo sang butig nga relihion, kag ano ang resulta sini suno sa Roma 1:28-31?

¹² Ginahingalitan ni Satanas ang imoral nga mga handum. Sa Israel sang una, gingamit ni Satanas ang butig nga relihion para paguaon nga indi sala ang imoralidad. Amo man gihapon ang ginahimo niya subong. Ginakunsinti sang butig nga relihion ang imoral nga mga buhat kag ginatudlo nila nga normal lang ini. Gani madamo sa mga nagasiling nga nagaalagad sila sa Dios ang nagsikway sang iya maathag nga talaksan sa moral. Ginlaragway ni apostol Pablo sa iya sulat sa mga taga-Roma kon ano ang resulta sini. (Basaha ang Roma 1:28-31.) Lakip sa “mga butang nga indi nagakaigo” ang tanan nga sahi sang seksuwal nga imoralidad, pareho sang homoseksuwalidad. (Roma 1:24-27, 32; Bug. 2:20) Importante gid nga sundon naton ang maathag nga mga panudlo sang Biblia!

13. Ano ang isa pa ka pamaagi ni Satanas?

¹³ Ginahingalitan ni Satanas ang natural nga mga handum. May natural kita nga handum nga magtuon sang mga obra nga makabulig sa aton nga maamanan ang aton kaugalingon  kag ang aton pamilya. (1 Tim. 5:8) Masami nga matun-an naton ini paagi sa pag-eskwela kag pagtuon sang maayo. Pero dapat kita mag-andam. Sa madamo nga pungsod, indi lang parte sa obra ang ginatudlo sa mga estudyante kundi pati ang kaalam sang kalibutan. Ginatudluan nila ang mga estudyante nga magduhaduha nga may Dios kag indi magpati sa Biblia. Ginatudluan man sila nga ang panudlo parte sa ebolusyon amo lang ang mapatihan nga paathag kon paano nagsugod ang kabuhi. (Roma 1:21-23) Ini nga mga panudlo nagasumpakil sa “kaalam sang Dios.”—1 Cor. 1:19-21; 3:18-20.

14. Ano ang ginapalig-on sang kaalam sang kalibutan nga himuon sang mga tawo?

¹⁴ Ang kaalam sang kalibutan nagabalewala ukon nagasumpakil sa matarong nga mga talaksan ni Jehova. Wala ini nagapalig-on nga ipakita ang mga kinaiya nga ginapatubas sang espiritu sang Dios, kundi “ang mga buhat sang unod.” (Gal. 5:19-23) Ginapalig-on sini ang pagpabugal, gani ang mga tawo nangin “mahigugmaon sa kaugalingon.” (2 Tim. 3:2-4) Ini nga kinaiya kabaliskaran sang pagkamapainubuson nga gusto sang Dios nga makita sa iya mga alagad. (2 Sam. 22:28) Ang pila ka Cristiano nga nag-eskwela sa unibersidad naimpluwensiahan sang panghunahuna sang kalibutan imbes nga sang panghunahuna sang Dios. Binagbinagon naton ang isa ka posible nga resulta kon balewalaon naton ang mga katalagman.

15-16. Ano ang natun-an mo sa eksperiensia sang isa ka sister?

¹⁵ Ang isa ka sister nga nagaalagad sing bug-os tion sing sobra 15 ka tuig nagsiling: “Bilang bawtismado nga Saksi, pirme ko mabasahan kag mabatian ang mga katalagman sang pag-eskwela sa unibersidad, pero ginbalewala ko  ini. Naghunahuna ako nga wala naaplikar sa akon ang mga laygay parte sa sini.” Ano ang resulta? Nagsiling sia: “Madamo nga oras kag kusog ang ginagamit ko sa pagtuon. Puerte sa akon kasako kag kakapoy amo nga indi na pareho sang una ang pagpangamuyo ko kay Jehova, wala na ako nalipay sa pag-istorya sa iban parte sa Biblia, kag indi ko na mahandaan sing maayo ang mga miting. Nagapasalamat ako kay sang nakamarasmas ako nga ang paghimakas sa unibersidad nagaguba sang akon kaangtanan kay Jehova, nagdesisyon ako nga mag-untat sa pag-eskwela.”

¹⁶ Paano naimpluwensiahan sang pag-eskwela sa unibersidad ang iya panghunahuna? Nagsiling sia: “Nahuya ako nga akuon nga bangod sang akon pag-eskwela sa unibersidad, nangin palabantay ako sa mga kakulangan sang iban, ilabi na sa akon mga kauturan, nagbatyag ako nga wala nila ginahimo ang ila bug-os nga masarangan, kag wala na ako nagaupod sa ila. Nadugayan ako nga bag-uhon ini nga panghunahuna. Ini nga eksperiensia nagtudlo sa akon nga makatalagam gid kon balewalaon naton ang mga paandam nga ginahatag sang aton Amay sa langit paagi sa iya organisasyon. Mas kilala ako ni Jehova sangsa pagkilala ko sa akon kaugalingon. Kuntani ginpamatian ko sia sa umpisa pa lang!”

17. (a) Ano ang dapat naton himuon? (b) Ano ang binagbinagon naton sa masunod nga artikulo?

¹⁷ Indi gid magpaimpluwensia sa “pilosopiya kag wala sing pulos nga daya” sang kalibutan ni Satanas. Kag pirme magbantay sa iya mga pamaagi. (1 Cor. 3:18; 2 Cor. 2:11) Indi gid magpaimpluwensia sa iya para indi magburon ang imo pagkilala kay Jehova. Sunda ang mataas nga mga talaksan ni Jehova sa moral. Kag indi magpadaya kay Satanas kay luyag niya nga sikwayon mo ang mga laygay ni Jehova. Pero ano abi kon natalupangdan mo nga naimpluwensiahan ka na sang panghunahuna sini nga kalibutan? Binagbinagon sa masunod nga artikulo kon paano kita mabuligan sang Pulong sang Dios nga bag-uhon ang mga panghunahuna kag pamatasan nga nanggamot na ukon “natukod sing malig-on.”—2 Cor. 10:4, 5.