1. Ngaa dapat daw pareho sa isa ka kahoy ang mga Cristiano? (Tan-awa man ang piktyur.)

 “INDI matumba ang kahoy nga nagapaayon sa hangin.” Ginapahangop sini nga hulubaton nga para indi matumba sang mabaskog nga hangin ang isa ka kahoy, dapat nga flexible ini. Dapat man kita mangin flexible ukon makatarunganon para padayon kita nga makaalagad kay Jehova sing malipayon. Paano? Mapakita naton nga makatarunganon kita paagi sa pag-adjust kon nagbag-o ang aton kahimtangan kag paagi sa pagrespeto sa opinyon kag desisyon sang iban.

2. Ano nga mga kinaiya ang makabulig sa aton nga maka-adjust kon nagbag-o ang aton kahimtangan, kag ano ang binagbinagon naton sa sini nga artikulo?

² Bilang mga alagad ni Jehova, gusto naton mangin makatarunganon. Gusto man naton mangin mapainubuson kag maluluy-on. Sa sini nga artikulo, hibaluon naton kon paano nakabulig ini nga mga kinaiya sa pila naton ka kauturan sang nagbag-o ang ila kahimtangan. Hibaluon man naton kon paano makabulig sa aton ini nga mga kinaiya. Pero binagbinagon anay naton kon paano ginpakita ni Jehova kag ni Jesus nga makatarunganon sila bangod sila ang aton pinakamaayo nga mga halimbawa parte sa sini.

3. Ano ang pamatuod nga makatarunganon si Jehova?

³ Gintawag si Jehova nga “ang Igang” bangod malig-on sia kag mapag-on. (Deut. 32:4) Pero, makatarunganon man sia. Bangod nagabag-o ang kahimtangan sa kalibutan, naga-adjust ang aton Dios para matuman ang iya katuyuan. Gintuga ni Jehova ang mga tawo suno sa iya larawan, gani ginhatagan niya kita sang ikasarang nga maka-adjust kon nagbag-o ang aton kahimtangan. Ginhatagan niya kita sang mga prinsipio sa Biblia nga makabulig sa aton nga makahimo sang maayo nga mga desisyon bisan ano pa ang aton kahimtangan. Ang halimbawa ni Jehova kag ang  mga prinsipio nga ginhatag niya sa aton amo ang nagapamatuod nga bisan pa “Igang” sia, makatarunganon man sia.

4. Maghatag sing halimbawa nga nagapakita nga makatarunganon si Jehova. (Levitico 5:7, 11)

⁴ Perpekto kag makatarunganon ang mga paagi ni Jehova, kag flexible sia sa kahimtangan sang mga tawo. Halimbawa, binagbinaga kon paano ginpakita ni Jehova nga makatarunganon sia sa mga Israelinhon. Wala sia nagsugo nga dapat pareho gid ang ihalad sang tanan nga Israelinhon, manggaranon man ukon imol. May mga sitwasyon nga gintugutan niya nga maghalad ang kada isa suno sa iya masarangan.—Basaha ang Levitico 5:7, 11.

5. Maghatag sing halimbawa nga nagapakita nga mapainubuson kag maluluy-on si Jehova.

⁵ Bangod mapainubuson kag maluluy-on si Jehova, nangin makatarunganon sia. Halimbawa, sang tion nga laglagon na ni Jehova ang malain nga mga tawo sa Sodoma, ginpakita niya nga mapainubuson sia. Paagi sa iya mga anghel, ginsugo niya ang matarong nga si Lot nga magpalagyo sa bukid. Pero nahadlok si Lot nga magpalagyo didto. Gani nakitluoy sia nga sa Zoar lang sia malagyo upod sa iya pamilya. Ang Zoar isa ka gamay nga banwa nga laglagon man kuntani ni Jehova. Gani puede magsiling si Jehova nga dapat tumanon gid ni Lot ang ginasugo Niya sa iya. Pero ginpasugtan niya si Lot nga magpalagyo sa Zoar, kag wala niya ginlaglag ini nga banwa. (Gen. 19:18-22) Pagligad sang ginatos ka tuig, ginpakita ni Jehova nga maluluy-on sia. Binagbinaga ang natabo sa Ninive. Ginpadala niya sa Ninive ang manalagna nga si Jonas para ipabalo sa malain nga mga pumuluyo sini nga laglagon sila kag ang ila siudad. Pero bangod naghinulsol ang mga taga-Ninive, naluoy si Jehova sa ila kag wala niya ginlaglag ang siudad.—Jon. 3:1, 10; 4:10, 11.

6. Maghatag sing halimbawa nga nagapakita nga makatarunganon man si Jesus kay gin-ilog niya si Jehova.

⁶ Makatarunganon man si Jesus kay gin-ilog niya si Jehova. Ginpadala sia sa duta para magbantala “sa nadula nga mga karnero sang panimalay sang Israel.” Pero nangin makatarunganon sia sa pagtuman sa iya asaynment. Isa ka bes, nakitluoy kay Jesus ang isa ka babayi nga indi Israelinhon nga ayuhon ang iya bata nga babayi. “Malain ang kahimtangan” sang iya bata “bangod ginsudlan sia sang demonyo.” Bangod sa kaluoy ni Jesus, gin-ayo niya ang bata sini nga babayi. (Mat. 15:21-28) Binagbinaga ang isa pa ka halimbawa. Sa umpisa sang pagministeryo ni Jesus, nagsiling sia: “Ang tanan nga nagapanghiwala sa akon . . . , ipanghiwala ko man.” (Mat. 10:33) Pero sang ginpanghiwala sia ni Pedro sing tatlo ka beses, wala niya ginpanghiwala si Pedro. Ngaa? Bangod kabalo si Jesus nga naghinulsol si Pedro kag matutom sia nga tawo. Pagkatapos ginbanhaw si Jesus, nagpakita sia kay Pedro kag posible gid nga ginpasalig niya si Pedro nga ginpatawad na niya sia kag palangga niya sia.—Luc. 24:33, 34.

7. Base sa Filipos 4:5, ano ang gusto naton nga pagkilala sang mga tawo sa aton?

⁷ Natun-an naton nga makatarunganon si Jehova nga Dios kag si Jesucristo. Ano ang ginatudlo sini sa aton? Gusto ni Jehova nga mangin  makatarunganon kita. (Basaha ang Filipos 4:5.) Dapat naton ini ipakita paagi sa aton mga ginahimo. Gani pamangkuton naton ang aton kaugalingon: ‘Ano ang pagkilala sang mga tawo sa akon? Para sa ila, makatarunganon bala ako, nagapasunaid, kag mahinangpanon? Ukon basi para sa ila, estrikto ako, wala nagapakita sang kaluoy, kag mabudlay pakigbagayan? Ginainsister ko bala sa iban ang akon paagi sa paghimo sang isa ka butang kay nagapati ako nga amo ini ang husto? Ukon ginapamatian ko bala ang iban kag nagapasugot ako sa ila gusto kon posible sa isa ka sitwasyon?’ Kon pirme naton ginapakita nga makatarunganon kita, mas mailog naton si Jehova kag si Jesus. Binagbinagon naman naton ang duha ka sitwasyon nga kinahanglan naton mangin makatarunganon: kon nagbag-o ang aton kahimtangan kag kon lain ang opinyon kag desisyon sang iban sangsa aton.

8. Ano ang makabulig sa aton nga mangin makatarunganon kon nagbag-o ang aton kahimtangan? (Tan-awa man ang footnote.)

⁸ Para mapakita naton nga makatarunganon kita kon nagbag-o ang aton kahimtangan, dapat kita mangin flexible. Kon may mga pagbag-o, posible nga makaeksperiensia kita sang mga problema nga wala naton ginapaabot. Halimbawa, posible nga gulpi lang kita magmasakit sang grabe. Ukon posible nga mabudlayan gid kita sa aton pangabuhi bangod nagbag-o ang sitwasyon sa ekonomiya sa aton lugar ukon bangod sang ginamo sa pulitika. (Man. 9:11; 1 Cor. 7:31) Posible pa gani nga mabudlayan man kita kon nagbag-o ang aton asaynment sa pag-alagad kay Jehova. Ano man ang maeksperiensiahan naton nga mga kabudlayan, masarangan naton nga mag-adjust sa bag-o nga kahimtangan kon himuon naton ining apat ka butang: (1) batuna ang sitwasyon, (2) hunahunaa ang palaabuton, (3) magpokus sa positibo, kag (4) buligi ang iban. b Binagbinagon naton kon paano ini nakabulig sa pila naton ka kauturan.

9. Ano ang nakabulig sa isa ka mag-asawa nga mga misyonero nga masarangan ang mga problema nga wala nila ginpaabot?

⁹ Batuna ang sitwasyon. Gin-asayn ang mag-asawa nga si Emanuele kag si Francesca bilang mga misyonero sa iban nga pungsod. Samtang nagatuon sila sang bag-o nga lenguahe kag naga-adjust sa ila bag-o nga kongregasyon, nag-umpisa ang COVID-19 nga pandemic kag kinahanglan nila magdistansia sa iban nga tawo. Pero hinali lang nga napatay ang iloy ni Francesca. Gusto gid ni Francesca nga makaupod ang iya pamilya, pero indi sia makabiyahe bangod sa pandemic. Ano ang nakabulig sa iya nga masarangan ining mabudlay gid nga mga sitwasyon? Una, magkaupod nga nangamuyo si Emanuele kag si Francesca nga hatagan sila sang kaalam nga magpokus lang sa nagakatabo kada adlaw. Ginsabat ni Jehova ang ila mga pangamuyo sa husto gid nga tion paagi sa iya organisasyon. Halimbawa, napalig-on sila sa ginsiling sang isa ka brother sa isa ka video. Amo ini ang ginsiling sang brother: “Kon mag-adjust kita dayon sa aton bag-o nga sitwasyon, mangin malipayon kita liwat kag makita naton nga puede gihapon naton maalagad si Jehova kag mabuligan ang iban.” c Ikaduha, nagdesisyon sila nga pauswagon ang ila ikasarang sa pagpanaksi paagi sa telepono. Bangod sini, nakakita sila sang Bible study. Ikatlo, ginbaton nila ang bulig sang ila mga kauturan. Nagapasalamat gid sila sa gugma nga ginpakita sa ila. Halimbawa, ginapadalhan sila pirme sang isa ka sister sang malip-ot nga mensahe nga nabase sa Biblia. Ginahimo ini sang sister kada adlaw sa sulod sang isa ka tuig. Kon batunon man naton ang  aton bag-o nga sitwasyon, mangin malipayon kita sa kon ano lang ang mahimo naton.

10. Ano ang ginhimo sang isa ka sister para maka-adjust sia sa daku nga pagbag-o sa iya kabuhi?

¹⁰ Hunahunaa ang palaabuton, kag magpokus sa positibo. Binagbinaga ang isa ka Romanian nga sister nga si Christina nga nagaistar sa Japan. Bahin sia sang isa ka English nga kongregasyon nga gin-dissolve ukon gin-untat, gani nasubuan gid sia. Pero, ginpanikasugan niya nga indi ini pirme pagpamensaron. Sa baylo, nagsaylo sia sa Japanese nga kongregasyon kag ginhimo niya ang iya bug-os nga masarangan nga magbantala sa mga Japanese. Nagpabulig sia sa isa ka babayi nga upod niya sa trabaho sang una para mangin sagad sia sa Japanese. Nagpasugot ang babayi nga gamiton ang Biblia kag ang brosyur nga Magkabuhi sing Wala Katapusan! para tudluan si Christina sing Japanese. Gani magluwas nga nangin sagad si Christina sa Japanese, nangin interesado man ang babayi sa kamatuoran. Kon hunahunaon naton ang palaabuton kag magpokus kita sa positibo bisan pa gulpi lang nga nagbag-o ang aton kahimtangan, posible nga makabaton kita sang mga pagpakamaayo nga wala naton ginapaabot.

11. Ano ang ginhimo sang isa ka mag-asawa nga naapektuhan sang indi maayo nga ekonomiya?

¹¹ Buligi ang iban. Binagbinaga ang isa ka mag-asawa nga nagaistar sa pungsod nga ginadumilian ang aton hilikuton. Naapektuhan ang ila palangabuhian bangod sang indi maayo nga ekonomiya. Ano ang ginhimo nila? Una, ginpasimple nila ang ila kabuhi. Dayon, sa baylo nga magpokus sa ila mga problema, nagpokus sila sa pagbulig sa iban paagi sa paggamit sang ila tion sa pagbantala. (Binu. 20:35) Ang bana nagsiling, “Bangod masako kami sa pag-preaching, mas nagpokus kami sa paghimo sang kabubut-on sang Dios imbes nga sa amon mga problema.” Kon nagbag-o ang aton kahimtangan, dapat naton dumdumon nga importante gid nga padayon naton nga buligan ang iban, ilabi na paagi sa aton pagbantala.

12. Paano makabulig ang halimbawa ni apostol Pablo para mangin flexible kita sa aton pagbantala?

¹² Dapat kita mangin flexible sa aton pagbantala. Lainlain ang mga ginapatihan, kinaiya, kag gindak-an sang mga tawo nga aton ginabantalaan. Nangin flexible si apostol Pablo, kag makatuon kita sa iya halimbawa. Gintangdo sia ni Jesus nga mangin ‘apostol sa mga pungsod.’ (Roma 11:13) Gani ginbantalaan ni Pablo ang mga Judiyo, mga Griego, mga may tinun-an, mga ordinaryo nga mga tawo, mga opisyal sang gobierno, kag mga hari. Para malab-ot ni Pablo ang tagipusuon sining sarisari nga mga tawo, ‘nakigbagay sia sa tanan nga sahi sang tawo.’ (1 Cor. 9:19-23) Ginhunahuna niya sing maayo kon ano ang ila kultura, gindak-an, kag ginapatihan. Bangod sini, kabalo sia kon ano nga mga topiko ang posible makapainteres sa iya maistorya. Kon mangin flexible kita kag kon panikasugan naton nga ibagay ang aton topiko sa sitwasyon sang kada tawo, mangin mas epektibo man kita sa aton pagbantala.

13. Base sa 1 Corinto 8:9, ano ang malikawan naton kon respetuhon naton ang opinyon sang iban?

¹³ Kon makatarunganon kita, ginarespeto man naton ang opinyon sang iban. Halimbawa, gusto sang pila naton ka sister nga maggamit sang makeup, pero may ara man nga indi gusto maggamit sini. Gusto sang pila naton ka utod nga mag-inom sang alak sing haganhagan lang, pero may mga utod nga indi gid mag-inom sang alak. Gusto naton tanan nga mangin maayo ang aton panglawas, pero lainlain nga paagi sang pagbulong ang ginapili sang kada isa sa aton. Kon ginahunahuna naton nga kita lang pirme ang husto kag ginapilit naton sa iban ang aton gusto, posible nga may masandad sa aton kag maguba ang aton paghiusa. Indi gid naton gusto nga matabo ina. (Basaha ang 1 Corinto 8:9;  10:23, 24) Kon iaplikar naton ang mga prinsipio sa Biblia, makabulig ini sa aton nga indi pag-ipilit sa iban ang aton gusto para indi maguba ang aton paghiusa. Binagbinagon naton ang duha ka halimbawa.

14. Ano nga mga prinsipio sa Biblia ang makabulig sa aton parte sa pagpili sang estilo sang bayo kag buhok?

¹⁴ Estilo sang bayo kag buhok. Wala nagsiling si Jehova kon ano nga estilo sang mga bayo ang aton isuksok, pero naghatag sia sang mga prinsipio nga dapat naton sundon. Dapat naton isuksok ang estilo sang mga bayo nga nagakabagay sa isa ka ministro sang Dios. Paagi sa sini, mapakita naton nga makatarunganon kita, maugdang, kag may “maligdong nga hunahuna.” (1 Tim. 2:9, 10; 1 Ped. 3:3) Gani indi naton gusto nga magpokus ang mga tawo sa aton bangod sa estilo sang aton bayo. Makabulig man sa mga gulang ang mga prinsipio sa Biblia para malikawan nila nga maghimo sang ila kaugalingon nga mga kasuguan parte sa estilo sang bayo kag buhok. Halimbawa, gusto sang mga gulang sa isa ka kongregasyon nga buligan ang mga pamatan-on nga brother nga nagasunod sa uso nga estilo sang buhok. Malip-ot ang ila buhok pero daw wala ini ginhusay. Indi gusto sang mga gulang nga maghimo sang kasuguan. Pero paano nila mabuligan ang mga pamatan-on nga brother? Ginlaygayan sang circuit overseer ang mga gulang nga amo ini ang ila ihambal sa mga pamatan-on, “Kon mas nagapokus ang mga tumalambong sa imo hitsura sangsa imo ginahambal kon may bahin ka, may problema sa estilo sang imo bayo kag buhok.” Nakabulig ini sa mga pamatan-on nga mahangpan kon ano ang dapat nila himuon, kag wala naghimo sang kasuguan ang mga gulang. d

15. Ano nga mga kasuguan kag mga prinsipio ang makabulig sa aton kon nagahimo kita sang desisyon parte sa paagi sang pagbulong? (Roma 14:5)

¹⁵ Paagi sang pagbulong. Ang kada isa amo  ang dapat magdesisyon parte sa kon paano niya atipanon ang iya kaugalingon. (Gal. 6:5) Kon mapabulong ang isa ka Cristiano, dapat niya sundon ang mga kasuguan sang Biblia nga dapat maglikaw sa dugo kag sa espiritismo. (Binu. 15:20; Gal. 5:19, 20) Pero kon wala sing may nalapas nga kasuguan ang isa ka paagi sang pagbulong, ang kada isa amo ang magadesisyon para sa iya kaugalingon. Gusto sang iban nga sa doktor lang sila magpabulong, pero may ara man nga mas gusto nila ang iban pa nga paagi sang pagbulong. Posible nga may paagi sang pagbulong nga mas gusto naton kay nagapati kita nga amo ini ang pinakaepektibo, pero dapat naton respetuhon ang desisyon sang aton mga kauturan parte sa ila gusto nga paagi sang pagbulong. Gani, dapat naton tandaan ining apat ka punto: (1) Ang Ginharian sang Dios lang ang makadula sang tanan nga balatian. (Isa. 33:24) (2) Dapat “kumbinsido” ang isa ka Cristiano kon ano ang pinakamaayo para sa iya. (Basaha ang Roma 14:5.) (3) Wala naton ginahukman ang iban ano man ang ila desisyon kag ginalikawan naton nga masandad sila sa aton. (Roma 14:13) (4) Nagapakita sang gugma ang mga Cristiano kag nahangpan nila nga mas importante ang paghiusa sang kongregasyon sangsa ila mga opinyon. (Roma 14:15, 19, 20) Kon tandaan naton ini nga mga punto, mangin suod kita sa aton mga kauturan kag indi madula ang paghidait sa kongregasyon.

16. Paano mapakita sang isa ka gulang nga makatarunganon sia sa kaupod niya nga mga gulang? (Tan-awa man ang mga piktyur.)

¹⁶ Dapat mangin makatarunganon ang mga gulang, kag dapat sila mangin maayo nga halimbawa sa pagpakita sini. (1 Tim. 3:2, 3) Halimbawa, kon mas magulang ang isa ka gulang sangsa kaupod niya nga mga gulang, indi niya dapat paghunahunaon nga ang iya opinyon lang pirme ang husto. Kabalo sia nga puede giyahan sang espiritu ni Jehova ang bisan sin-o sa ila para maghatag sang panugda nga makabulig sa ila nga makahimo sang maayo nga desisyon. Kag kon wala man lang sing nalapas nga prinsipio ang desisyon sang kalabanan nga mga gulang, ginasuportahan sang makatarunganon nga gulang ini nga desisyon, bisan pa nga lain kuntani ang iya gusto.

17. Ano ang mga pagpakamaayo kon makatarunganon kita?

¹⁷ Kon makatarunganon kita, madamo kita sang mabaton nga pagpakamaayo. Mangin suod kita sa aton mga kauturan, kag indi madula ang paghidait sa kongregasyon. Makita naton nga bisan pa sarisari ang personalidad kag kultura sang aton mga kauturan, katahom sini tulukon kag nahiusa kita sa pagsimba kay Jehova. Labaw sa tanan, nalipay kita kay kabalo kita nga ginailog naton ang aton makatarunganon nga Dios nga si Jehova.