1. Ngaa maayo gid kon handaan naton ang mga kalamidad?

 ANG paghanda makaluwas sang kabuhi. Halimbawa, kon nagahanda ang mga tawo antes mag-abot ang kalamidad, mas daku ang tsansa nga maluwas sila kag makabulig pa sila sa iban. Ang isa ka organisasyon sa Europe nga nagabulig sa mga tawo nagsiling: “Maghanda sing maayo kay nagadepende sa sini ang imo kabuhi.”

2. Ngaa dapat naton handaan ang dakung kapipit-an? (Mateo 24:44)

² Hinali lang ang pag-umpisa sang “dakung kapipit-an.” (Mat. 24:21) Madamo nga kalamidad ang gulpi lang nagakatabo, gani posible nga indi kita makapangaman. Pero lain ang dakung kapipit-an kay kabalo kita nga matabo gid ini. Mga 2,000 ka tuig na ang nagligad, ginsilingan ni Jesus ang iya mga disipulo nga dapat handaan nila ini. (Basaha ang Mateo 24:44.) Kon nakahanda kita antes mag-abot ining mabudlay gid nga tion, makabatas kita kag mabuligan naton ang iban nga makabatas man.—Luc. 21:36.

3. Paano makabulig ang pagbatas, kaluoy, kag gugma para mahandaan naton ang dakung kapipit-an?

³ Para mahandaan naton ang dakung kapipit-an, dapat naton ipakita ang tatlo ka kinaiya. Ano ang himuon naton kon silingan kita nga ibantala ang masakit nga mensahe sang paghukom kag pamatukan kita sang iban? (Bug. 16:21) Kinahanglan naton ipakita ang pagbatas para matuman naton si Jehova kay nagasalig kita nga amligan niya kita. Ano ang himuon naton kon nadulaan sang mga pagkabutang ang aton mga kauturan ukon wala na gid sing nabilin sa ila mga pagkabutang? (Hab. 3:17, 18) Kinahanglan naton ipakita ang kaluoy kay gusto naton sila buligan. Kon salakayon na kita sang naghimbon nga mga pungsod, ano ang himuon naton kon kinahanglan naton mag-upod sa aton mga kauturan para magpanago? (Ezeq. 38:10-12) Kinahanglan naton ipakita ang aton mabakod nga gugma sa ila para malampuwasan naton ining mabudlay gid nga tion.

4. Paano ginapakita sang Biblia nga dapat naton padayon nga ipakita ang pagbatas, kaluoy, kag gugma?

⁴ Ginapalig-on kita sang Pulong sang Dios nga padayon nga  ipakita ang pagbatas, kaluoy, kag gugma. Ang Lucas 21:19 nagasiling: “Paagi sa inyo pagbatas, matipigan ninyo ang inyo kabuhi.” Ang Colosas 3:12 nagasiling: “Isuksok ninyo ang . . . kaawa” ukon ang kaluoy. Kag ang 1 Tesalonica 4:9, 10 nagasiling: “Kamo mismo gintudluan sang Dios nga maghigugmaanay. . . . Apang ginapalig-on namon kamo, mga kauturan, nga padayon ninyo nga himuon ini sing bug-os.” Nagapakita na nga daan sang pagbatas, kaluoy, kag gugma ang mga disipulo. Pero ginsulat ini nga mga teksto para palig-unon sila nga dapat padayon nila ini nga ipakita. Amo man sini ang dapat naton himuon. Para buligan kita nga mahimo ini, binagbinagon naton kon paano ginpakita sang mga Cristiano sang una ini nga mga kinaiya. Dayon binagbinagon naton kon paano naton sila mailog para mapakita naton nga nagahanda kita sa dakung kapipit-an.

5. Paano nabatas sang mga Cristiano sang una ang ila mga problema?

⁵ Madamo sang ginbatas ang mga Cristiano sang una. (Heb. 10:36) Magluwas sa mga problema nga kinaandan nga ginabatas sang mga tawo, may iban pa gid sila nga mga problema. Madamo sa ila ang ginhingabot sang mga lider sang relihion sang mga Judiyo, sang mga opisyal sang Roma, kag pati sang ila mga pamilya. (Mat. 10:21) Kag dapat nila siguraduhon nga indi sila maimpluwensiahan sang mga ginatudlo sang mga apostata nga nagaguba sang paghiusa sang kongregasyon. (Binu. 20:29, 30) Matutom ini nga ginbatas sang mga Cristiano sang una. (Bug. 2:3) Ano ang nakabulig sa ila? Ginpamalandungan nila ang mga halimbawa sa Kasulatan parte sa pagbatas, pareho sa halimbawa ni Job. (Sant. 5:10, 11) Nangamuyo sila nga pabakuron sila. (Binu. 4:29-31) Kag nagpokus sila sa maayo nga mga resulta kon magbatas sila.—Binu. 5:41.

6. Ano ang natun-an mo sa ginhimo ni Merita para mabatas niya ang pagpamatok?

⁶ Kon regular naton nga tun-an kag pamalandungan ang mga halimbawa sang mga nagbatas nga mabasa sa Pulong sang Dios kag sa aton mga publikasyon, makabatas man kita. Ginhimo ini sang isa ka sister sa Albania nga si Merita. Nakabulig ini sa iya nga mabatas ang grabe nga pagpamatok sang iya pamilya. Nagsiling sia: “Napalig-on gid ako sang kasaysayan ni Job sa Biblia. Grabe gid ang iya pag-antos kag wala sia kabalo kon sin-o ang naghatag sa iya sang mga pagtilaw. Pero nagsiling sia: ‘Tubtob mapatay ako, indi ko pag-isikway ang akon integridad!’ (Job 27:5) Nahunahuna ko nga kamalingking lang sang mga problema ni Job ang akon mga problema. Kag indi pareho kay Job, kabalo ako kon sin-o ang nagahatag sa akon sang mga pagtilaw.”

7. Ano ang dapat naton himuon bisan pa indi mabudlay ang aton problema subong?

⁷ Kon hanuot kita pirme nga nagapangamuyo kay Jehova kag ginasugid naton sa iya ang tanan naton nga kabalaka, mapabakod man naton ang aton pagbatas. (Fil. 4:6; 1 Tes. 5:17) Pero ano abi kon indi man gid mabudlay ang imo problema subong? Nagapangamuyo ka man bala kay Jehova kon nasubuan ka ukon daw indi ka kabalo sang dapat mo himuon? Kon pirme ka nagapangamuyo sa Dios para buligan ka bisan sa gamay nga mga problema kada adlaw, sigurado gid nga mangamuyo ka man sa iya kon may mabudlay ka nga mga problema sa ulihi. Kag magasalig ka nga kabalo sia kon san-o ka niya buligan kag kon paano niya ini himuon.—Sal. 27:1, 3.

8. Paano ginapakita sang halimbawa ni Mira nga kon ginabatas naton ang aton mga problema subong, makabulig ini para mabatas naton ang mga problema sa palaabuton? (Santiago 1:2-4) (Tan-awa man ang piktyur.)

⁸ Kon ginabatas naton ang aton mga problema subong, posible gid nga makabatas man kita sa dakung kapipit-an sa palaabuton. (Roma 5:3) Ngaa masiling naton ini? Madamo nga kauturan ang nagsiling nga sa kada tion nga mabatas nila ang mabudlay nga sitwasyon, nagabulig ini sa ila nga mangin mabakod para mabatas ang masunod nga problema. Bangod ginbuligan sila  ni Jehova nga mabatas ang isa ka problema, nagabakod ang ila pagtuo nga buligan gid niya sila pirme. Kag bangod nagatuo sila kay Jehova, mabatas nila ang masunod nga pagtilaw. (Basaha ang Santiago 1:2-4.) Binagbinaga ang halimbawa ni Mira nga isa ka payunir sa Albania. Natalupangdan niya nga bangod nabatas niya ang iya mga problema sang una, nakabulig ini sa iya nga padayon nga batason ang iya mga problema subong. Nagsiling sia nga may mga tion nga pamatyag niya sia lang ang tawo sa kalibutan nga madamo gid sang problema. Pero ginpamalandungan niya kon paano sia ginbuligan ni Jehova sa sulod na sang 20 ka tuig, kag ginasilingan niya ang iya kaugalingon: ‘Padayon nga mangin matutom. Kon mag-untat ka sa pag-alagad sa iya, kanugon lang sang pagbulig niya sa imo nga mabatas ang madamo nga problema sa sulod sang madamo nga tinuig.’ Pamalandungi man kon paano ka ginbuligan ni Jehova nga makabatas. Magsalig nga sa kada tion nga may ginabatas ka nga problema, nakita niya ini kag padyaan ka niya. (Mat. 5:10-12) Kon mag-abot na ang dakung kapipit-an, natun-an mo na kon paano magbatas, gani mapalig-on ka nga padayon nga magbatas.

9. Paano ginpakita sang mga kauturan sa Antioquia sa Siria ang ila kaluoy?

⁹ Binagbinaga ang natabo sang nakaeksperiensia sang grabe nga tiggulutom ang mga Cristiano sa Judea. Sang nabalitaan ini sang mga kauturan sa Antioquia sa Siria, sigurado gid nga nakabatyag sila sang kaluoy para sa ila mga kauturan sa Judea. Gani may ginhimo sila para ipakita ang ila kaluoy. “Namat-od [sila] nga magpadala sing bulig sa mga kauturan sa Judea. Naghatag ang kada isa sa ila suno sa ila masarangan.” (Binu. 11:27-30) Bisan pa ara sa malayo nga lugar ang mga kauturan nga apektado sang tiggulutom, gusto gid sang mga Cristiano sa Antioquia nga buligan sila.—1 Juan 3:17, 18.

10. Paano naton mapakita ang kaluoy sa aton mga kauturan nga naapektuhan sang mga kalamidad? (Tan-awa man ang piktyur.)

¹⁰ Subong, mapakita man naton ang kaluoy sa aton mga kauturan nga naapektuhan sang mga kalamidad. Ginabuligan naton sila dayon paagi sa pagpamangkot sa mga gulang kon paano kita makaboluntaryo sa mga proyekto para sa ila, paagi sa paghatag sang donasyon para sa bug-os kalibutan nga hilikuton, kag paagi sa pagpangamuyo para sa ila. b (Hulu. 17:17) Halimbawa, sang 2020, sobra 950 ka Disaster Relief Committee ang ginhimo sa bilog nga kalibutan para buligan ang mga naapektuhan sang COVID-19 nga pandemic. Nagapasalamat gid kita sa aton mga kauturan nga nagaboluntaryo sa sini nga mga relief committee. Bangod sang ila kaluoy sa ila mga kauturan, ginhatagan nila sila sang ila materyal nga mga kinahanglanon kag ginbuligan nila sila nga padayon nga mag-alagad kay Jehova. Madamo man sila sang ginkay-o ukon ginpatindog nga mga balay kag mga pasilidad nga ginagamit sa pagsimba.—Ipaanggid ang 2 Corinto 8:1-4.

11. Paano mapadunggan ang aton Amay sa langit kon nagapakita kita sang kaluoy?

¹¹ Kon nagapakita kita sang kaluoy pagkatapos sang kalamidad, makita sang iban ang aton mga sakripisyo. Halimbawa, sang 2019, ginguba sang Bagyo Dorian ang Kingdom Hall sa Bahamas. Sang tion nga ginakay-o ini sang aton mga kauturan, ginpamangkot nila ang isa ka kontraktor nga indi Saksi kon pila ang iya sukot kon sia ang mag-obra sang iban nga ulubrahon. Ginsilingan niya sila: “Indi ko pagpabayaran . . . ang mga gamit, ang labor, kag ang mga materyales. . . . Gusto ko gid ini himuon para sa inyo organisasyon. Bilib gid ako sa inyo ginahimo para sa inyo mga abyan.” Indi kilala sang kalabanan nga tawo  si Jehova. Pero makita sang madamo sa ila ang ginahimo sang mga Saksi ni Jehova para buligan ang iban. Nalipay gid kita kay kabalo kita nga kon ginapakitaan naton sang kaluoy ang iban, posible mapalig-on sini ang mga tawo nga magtuon parte kay Jehova nga “bugana sa kaluoy.”—Efe. 2:4.

12. Kon nagapakita kita sang kaluoy subong, paano ini makabulig sa aton nga mahandaan ang dakung kapipit-an? (Bugna 13:16, 17)

¹² Ngaa kinahanglan naton magpakita sang kaluoy sa tion sang dakung kapipit-an? Ginapakita sang Biblia nga makaeksperiensia sang mga kabudlayan ang mga indi magsuporta sa mga gobierno sang kalibutan. Maeksperiensiahan nila ini subong kag sa tion sang dakung kapipit-an. (Basaha ang Bugna 13:16, 17.) Gani posible nga kinahanglan sang aton mga kauturan ang bulig. Kon hukman na sang aton Hari nga si Cristo Jesus ang mga tawo, kabay pa nga makita niya nga nagapakita kita sang kaluoy kag silingan niya kita nga ‘panublion naton ang Ginharian.’—Mat. 25:34-40.

13. Suno sa Roma 15:7, paano ginpabakod sang mga Cristiano sang una ang ila gugma sa isa kag isa?

¹³ Kilala ang mga Cristiano sang una sa ila gugma sa isa kag isa. Pero mahapos bala para sa ila nga magpakita sang gugma? Binagbinaga ang sarisari nga mga kauturan sa kongregasyon sa Roma. May ara mga Judiyo nga gintudluan nga tumanon ang Mosaikong Kasuguan, kag may ara man halin sa iban nga mga pungsod nga lain ang mga kustombre. May ara mga ulipon, kag may ara man mga hilway. Posible pa gani nga may mga ulipon ang pila sa hilway nga mga kauturan. Paano mapabakod sining sarisari nga mga kauturan ang ila gugma sa isa kag isa? Ginpalig-on sila ni apostol Pablo: “Abiabiha ninyo ang isa kag isa.” (Basaha ang Roma 15:7.) Ano ang iya buot silingon? Ang tinaga nga gin-translate “abiabiha” nagakahulugan nga batunon sa balay ang isa ka tawo ukon kabigon sia nga abyan. Halimbawa, ginsilingan ni Pablo si Filemon kon paano niya dapat abiabihon ang nagpalagyo nga ulipon nga si Onesimo. Nagsiling sia: “Batuna sia sing maayo.” (Filem. 17) Sa bahin naman nanday Priscila kag Aquila, gin-abiabi nila si Apolos nga diutay pa lang ang nabal-an parte sa Cristianismo kon ikumparar sa ila, kag “ginpaupod nila sia sa ila.” (Binu. 18:26) Ginapakita sini nga mga halimbawa nga bisan pa may mga kinalain sila, wala sila nabahinbahin kundi gin-abiabi nila ang isa kag isa.

14. Paano ginpakita ni Anna kag sang iya bana ang ila gugma sa mga kauturan?

¹⁴ Mapakita man naton nga palangga naton ang aton mga kauturan paagi sa pagpakig-abyan sa ila. Kon himuon naton ini, mapalig-on sila nga palanggaon man kita. (2 Cor. 6:11-13) Binagbinaga ang eksperiensia ni Anna kag sang iya bana. Wala madugay pagkatapos nila mag-abot sa ila bag-o nga asaynment sa West Africa bilang mga misyonero, nag-umpisa ang COVID-19 nga pandemic. Indi makatipon ang kongregasyon, gani indi mahapos para sa ila nga makilala sing maayo ang mga kauturan. Ano ang ginhimo nila para mapakita nila ang ila gugma sa mga kauturan? Ginkontak nila ang mga kauturan paagi sa videoconference, kag ginsilingan nila sila nga gusto gid nila nga makilala sing maayo ang mga kauturan. Napalig-on gid ang mga kauturan, gani pirme nila ginatawgan kag ginapadalhan sang mga mensahe ang mga misyonero. Ngaa nagpanikasog gid ang mga misyonero nga makilala ang mga kauturan? Si Anna nagsiling: “Indi ko gid malipatan ang gugma nga ginpakita sang mga kauturan sa akon kag sa akon pamilya. Ginahimo nila ini maayo man ukon malain ang sitwasyon. Napalig-on ako sa ila halimbawa nga magpakita man sang gugma.”

15. Ano ang natun-an mo sa halimbawa ni Vanessa parte sa pagpakita sang gugma sa tanan naton nga kauturan? (Tan-awa man ang piktyur.)

¹⁵ Sarisari ang ginhalinan kag personalidad sang mga kauturan sa aton kongregasyon. Kon magpokus kita sa ila maayo nga mga kinaiya, magabakod  ang aton gugma sa ila. Binagbinaga ang halimbawa sang isa ka sister nga si Vanessa nga nagaalagad sa New Zealand. Naugot sia sa personalidad sang pila ka kauturan, gani nabudlayan sia nga makigbagay sa ila. Pero sa baylo nga likawan ini nga mga kauturan, nagdesisyon sia nga magpain sang tion para makaupod sila. Bangod sa iya ginhimo, nakita niya kon ano ang nanamian ni Jehova sa sini nga mga kauturan. Nagsiling sia: “Sang nangin circuit overseer ang akon bana, madamo nga kauturan nga sarisari ang personalidad ang pirme namon makaupod, kag wala na ako nabudlayan nga makigbagay sa ila. Subong, nanamian gid ako nga makaupod ang sarisari nga mga kauturan. Sigurado gid nga nanamian man sa sini si Jehova kay sarisari nga mga tawo ang ginabuyok niya nga magsimba sa iya.” Kon tamdon naton ang iban pareho sa pagtamod ni Jehova sa ila, ginapakita naton nga palangga naton sila.—2 Cor. 8:24.

16. Sa tion sang dakung kapipit-an, ngaa importante gid ang aton gugma sa aton mga kauturan? (Tan-awa man ang piktyur.)

¹⁶ Sa tion sang dakung kapipit-an, importante gid ang aton gugma sa aton mga kauturan. Kon mag-umpisa na ini nga kapipit-an, paano kita amligan ni Jehova? Binagbinaga ang instruksion ni Jehova sa iya katawhan sang ginsalakay ang Babilonia sang una: “Maglakat kamo, katawhan ko, magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Posible nga amo man sini ang himuon naton sa tion sang dakung kapipit-an. Ang “mga hulot” posible nga nagapatuhoy sa aton mga kongregasyon. Nagapromisa si Jehova nga sa tion sang dakung kapipit-an, amligan niya kita kon padayon kita nga mag-alagad sa iya kaupod sa aton mga kauturan. Gani, magluwas nga dapat naton batason ang aton mga kauturan, dapat man naton panikasugan subong nga pabakuron pa gid ang aton gugma sa ila. Nagadepende sa sini ang aton kaluwasan.

17. Kon maghanda kita subong, ano ang masarangan naton nga himuon sa tion sang dakung kapipit-an?

¹⁷ Mabudlayan gid ang tanan nga tawo sa tion sang “daku nga adlaw ni Jehova.” (Sof. 1:14, 15) Gani makaeksperiensia man sang mga kabudlayan ang katawhan ni Jehova. Pero kon maghanda kita subong, mangin kalmado kita kag makabulig kita sa iban. Mabatas naton ang bisan ano nga problema. Kon makaeksperiensia sang kabudlayan ang aton mga kauturan, buligan naton sila sa bug-os naton nga masarangan paagi sa pagpakita sang kaluoy sa ila kag paghatag sang ila mga kinahanglanon. Kag kon higugmaon naton ang aton mga kauturan subong, sigurado gid nga pakitaan man naton sila sang gugma sa palaabuton. Kon himuon naton ini, padyaan kita ni Jehova sing kabuhi nga wala sing katapusan sa isa ka kalibutan nga wala na sang mga kalamidad kag mga problema nga magahalit sa aton.—Isa. 65:17.