Amo ini ang ginbatyag sang 13 anyos nga bata nga babayi sang ginregaluhan sia sing ido. Ang isa ka madinalag-on nga negosyante nga babayi nagsiling nga ang kompyuter nga ginregalo sang iya amay sang hayskul sia nagpabag-o gid sang iya kabuhi. Kag para sa isa ka bana, ang pinakamaayo nga regalo nga nabaton niya amo ang kard nga ginhimo sang iya asawa sa ila una nga anibersaryo.

Kada tuig, madamo nga tawo ang nagapamensar gid sa pagpangita sang “pinakamaayo” nga regalo para sa ila abyan ukon paryente sa espesyal nga okasyon. Kag ang kalabanan gusto gid apresyahon ang ila ginhatag nga regalo pareho sang ginsiling sa umpisa. Amo man bala sina ang gusto mo? Luyag mo bala makahatag sing regalo nga apresyahon gid, ukon makabaton sing regalo nga mapuslanon?

Maayo gid ina nga kahigayunan, indi lang bangod sa epekto sang regalo sa nagabaton, kundi sa nagahatag man sini. Kay man, ang Biblia nagasiling: “Mas malipayon ang nagahatag sangsa nagabaton.” (Binuhatan 20:35) Siempre, mangin mas makalilipay pa gid ang pagregalo kon ginapabaloran gid ini sang nagabaton.

Kon amo, ano ang himuon mo para malipay ka sa pagregalo kag malipay man ang regaluhan mo? Kag kon indi ka makahatag sang “pinakamaayo” nga regalo, ano ang himuon mo para apresyahon gid ini sang nagabaton?