Wala sing nakakuha sang piktyur ni Jesus. Wala man sang may nagdrowing sa iya ukon naghimo sang iya iskultura. Pero makita sia sa madamo katama nga ginhimo sang mga artist sa sulod sang mga siniglo.

Ang matuod, ini nga mga artist wala nakahibalo kon ano gid ang hitsura ni Jesus. Sa masami, ginabase nila ini sa ila mga kultura, pagpati sa relihion, kag sa gusto sang mga nagapahimo sa ila. Pero ang ila ginhimo may impluwensia, kag nagapaburon pa gani, sa pagpati sang mga tawo kay Jesus kag sa iya mga panudlo.

Ang pila nagalaragway kay Jesus bilang maluya nga malaba ang buhok kag bunguton ukon masinulub-on. Sa iban naman, makita si Jesus nga isa ka anghel nga may bilog nga nagasiga sa iya ulo, ukon malayo sia sa iban. Husto bala ina nga mga paglaragway kay Jesus? Paano naton mahibaluan ang matuod? Ang isa ka paagi amo ang pag-usisa sa ginasiling sang Biblia nga makabulig sa aton para mahibaluan kon ano gid ayhan ang hitsura niya. Makabulig man ini para husto ang aton pagpati sa iya.

Amo ini ang ginsiling ni Jesus sa iya pangamuyo nga mahimo sa tion sang iya bawtismo. (Hebreo 10:5; Mateo 3:13-17) Ano ang hitsura sina nga lawas? Mga 30 ka tuig antes sini, nagsiling ang anghel nga si Gabriel kay Maria: “Magabusong ka kag magabun-ag sing isa ka anak nga lalaki, . . . Anak sang Dios.” (Lucas 1:31, 35) Gani si Jesus isa ka perpekto nga tawo, pareho kay Adan sang gintuga sia. (Lucas 3:38; 1 Corinto 15:45) Ginapakita sini nga guapo si Jesus, kag mahimo nga magkaanggid sila sang iya Judiyo nga nanay nga si Maria.

May burangos si Jesus, nga kinaandan sa mga Judiyo kag indi sa mga Romano. Ina nga burangos nagasimbulo sa dignidad kag pagkatalahuron; mahipid ini kag indi malaba. Sigurado nga ginaatipan ni Jesus ukon ginakurtihan ang iya burangos kag mahipid nga naguntingan ang iya buhok. Ang mga Nazareo lamang, pareho ni Samson, ang wala nagautod sang ila buhok.—Numeros 6:5; Hukom 13:5.

Sa halos 30 ka tuig sang kabuhi ni Jesus, nagapamanday sia, isa ka obra nga wala pa sing moderno nga mga kagamitan pareho subong. (Marcos 6:3) Gani mahimo nga mabukod gid sia. Sa umpisa sang iya ministeryo, sia lang ang nagtabog sang “mga karnero kag mga baka pagua sa templo lakip ang mga nagabaligya sa ila. Gin-ula man niya ang mga sensilyo sang mga manugbaylo sing kuarta kag ginpamaliskad ang ila mga lamesa.” (Juan 2:14-17) Kinahanglan nga makusog ang isa para mahimo ina. Gingamit ni Jesus ang lawas nga gin-aman sang Dios sa iya para matuman niya ang sugo sang Dios: “Dapat ko man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.” (Lucas 4:43) Kinahanglan ang daku nga resistensia sa paglakat sa bilog nga Palestina sa pagpahayag sini nga mensahe.

Ang manayanaya nga hitsura ni Jesus amo gid ang nagaganyat sa mga “ginabudlayan kag ginabug-atan” sa sini nga pangagda niya. (Mateo 11:28-30)  Ang iya pagkamahigugmaon kag kaayo amo ang rason nga masaligan gid ang iya promisa nga papahuwayon ukon paumpawan ang mga gusto magtuon sa iya. Bisan ang magagmay nga kabataan gusto magpalapit kay Jesus, kay ang Biblia nagsiling: “Ginhakos niya ang mga bata.”—Marcos 10:13-16.

Bisan pa grabe ang pag-antos ni Jesus antes sia napatay, indi sia masinulub-on nga tawo. Halimbawa, nagbulig sia sa punsion sa kasal sa Cana paagi sa paghimo sang tubig nga maayo nga alak. (Juan 2:1-11) Sa iban pa nga pagtilipon, nagtudlo sia sing indi malimtan nga mga leksion.—Mateo 9:9-13; Juan 12:1-8.

Labaw sa tanan, paagi sa pagbantala ni Jesus, may makalilipay nga paglaum nga mabuhi sing wala katapusan ang mga nagapamati sa iya. (Juan 11:25, 26; 17:3) Sang nagreport sa iya ang 70 niya ka disipulo parte sa ila pagbantala, “napuno sia sang kalipay” kag nagsiling: “Magkalipay kamo bangod ang inyo ngalan nasulat na sa langit.”—Lucas 10:20, 21.

Ang mga lider sang relihion sang panahon ni Jesus nangita sing mga paagi agod makakuha sing atension kag ipakitakita ang ila awtoridad. (Numeros 15:38-40; Mateo 23:5-7) Indi pareho si Jesus sa ila, gintudluan niya ang iya mga apostoles nga indi ‘magpakaginuo’ sa iban. (Lucas 22:25, 26) Nagpaandam pa gani si Jesus: “Mag-andam kamo sa mga escriba nga luyag magdayandayan nga may malaba nga mga bayo kag luyag nila nga tamyawon sila sang mga tawo sa mga tiendahan.”—Marcos 12:38.

Sa kabaliskaran, nagaupod si Jesus sa mga tawo, nga kon kaisa indi sia makilal-an. (Juan 7:10, 11) Pareho lang ang iya panagway sa iya 11 ka matutom nga apostoles kon mag-updanay sila. Amo nga ang nagluib nga si Judas naghatag “sang tanda” sa guban nga kon sin-o ang iya halukan, amo ina si Jesus.—Marcos 14:44, 45.

Gani bisan pa wala nahibaluan ang madamo nga detalye parte kay Jesus, maathag nga sa masami indi husto ang paglaragway sa iya. Pero, ang mas importante pa sangsa hitsura niya amo ang aton pagpati sa iya subong.

Pagligad sang pila ka oras nga ginsiling ini ni Jesus, napatay sia kag ginlubong. (Juan 14:19) Ginhatag niya ang iya kabuhi bilang “gawad kabaylo sang madamo.” (Mateo 20:28) Sa ikatlo nga adlaw, ginbanhaw sia sang Dios “sa espiritu” kag “gintugutan sia nga makita” sang pila niya ka disipulo. (1 Pedro 3:18; Binuhatan 10:40) Ano ang hitsura ni Jesus sang nagpakita sia sa iya mga disipulo sadto? Mahimo nga lain sangsa iya panagway antes sia napatay, kay bisan ang iya suod gid nga mga kaupod wala dayon makakilala sa iya. Abi gani ni Maria Magdalena kon hardinero sia; kag nasal-an sia nga estranghero sang duha niya ka disipulo nga nagalakat pakadto sa Emaus.—Lucas 24:13-18; Juan 20:1, 14, 15.

Paano naton ilaragway ang hitsura ni Jesus subong? Pagligad sang sobra 60 ka tuig sa tapos sang kamatayon ni Jesus, nakita sang pinalangga nga apostol nga si Juan si Jesus sa mga palanan-awon. Wala nagatagumatayon sa krus ang nakita ni Juan. Sa baylo, nakita niya ang “Hari sang mga hari kag Ginuo sang mga ginuo,” ang Hari sang Ginharian sang Dios, nga sa indi madugay magapangdaug sa mga kaaway sang Dios, mga demonyo man ukon mga tawo, kag magahatag sing dayon nga mga pagpakamaayo sa katawhan.—Bugna 19:16; 21:3, 4.