Mahimo indi mahapos ang pagpangita sang regalo nga bagay gid sa tawo nga gusto mo regaluhan. Kay man, ang balor sini nagadepende sa pagtan-aw sang nagabaton. Kag ang pinakamaayo para sa isa, mahimo nga indi pinakamaayo sa iban.

Halimbawa, para sa mga tin-edyer, ang bag-o nga gadyet amo ang pinakamaayo nga regalo. Para naman sa mga adulto, mas ginapabaloran nila ang regalo nga ginahatag sang mga espesyal sa ila, pareho sang palanublion sang pamilya. Sa pila ka kultura, bata man ukon tigulang, mas gusto nila nga kuarta na lang ang iregalo sa ila para mabakal nila kon ano ang gusto nila.

Bisan pa mabudlay, madamo nga tawo ang padayon gihapon sa pagpangita sang regalo nga nagakabagay gid sa tawo nga espesyal para sa ila. Kon kaisa, indi makita ina nga regalo, pero ang pagbinagbinag sang pila ka butang mahimo makabulig sa imo. Binagbinagon naton ang apat ka butang para mapahalipay mo ang imo regaluhan.

Ang nanamian sang regaluhan. Para sa isa ka tawo nga taga-Belfast, Northern Ireland, ang bisikleta nga ginregalo sa iya sang mga 10 ukon 11 anyos sia amo ang pinakamaayo nga regalo nga nabaton niya. Ngaa? “Ti, kay amo gid ini ang gusto ko,” siling niya. Ginapakita sini nga ang nanamian sang isa may daku gid nga epekto kon bala pabaloran niya ang regalo ukon indi. Gani, hunahunaa sing maayo ang tawo nga gusto mo regaluhan. Hibalua kon ano ang mahimo nga importante para sa iya, kay sa masami amo ini ang iya nanamian. Halimbawa, importante para sa mga lolo kag lola nga makaupod ang ila pamilya. Mahimo nanamian gid sila nga pirme makaupod ang ila kabataan kag mga apo. Gani, mas ginapabaloran nila ang pagbakasyon sang pamilya upod sa ila sangsa bisan ano pa nga regalo.

Ang makabulig para mahibaluan kon ano ang nanamian sang isa amo ang pagpamati sing maayo. Ang Biblia nagapalig-on sa aton nga “mangin maabtik sa pagpamati, mahinay sa paghambal.” (Santiago 1:19) Sa kada tion nga nagapakig-istorya ka sa imo mga abyan kag mga paryente, pamatii sila sing maayo para may ideya ka kon ano ang  ila nanamian kag wala nanamian. Makabulig gid ini para makahatag ka sang regalo nga makapalipay gid sa ila.

Ang kinahanglanon sang regaluhan. Pabaloran gid sang ginregaluhan bisan ang simple lang nga regalo kon kinahanglanon gid niya ini. Pero paano mo mahibaluan ang kinahanglanon sang imo regaluhan?

Mahimo nga ang pinakamahapos nga paagi amo ang pagpamangkot sa iya kon ano ang iya kinahanglanon ukon nanamian. Pero, para sa mga nagaregalo, mabuhinan sini ang ila kalipay sa paghatag kay mas gusto nila nga sorpresahon ang ila regaluhan sang regalo nga bagay gid sa iya. Dugang pa, bisan ginapahibalo sang iban ang ila nanamian kag wala nanamian, sa kalabanan, wala nila ginasugid ang ila kinahanglanon.

Gani, obserbahi kag tandai gid ang mga kahimtangan sang imo regaluhan. Bata bala sia, tigulang, soltero ukon dalaga, may bana ukon asawa, ginbulagan, balo, empleyado, ukon retirado? Dayon hunahunaa kon ano nga mga regalo ang masami nga kinahanglan gid sina nga tawo.

Para mahibaluan kon ano gid ang kinahanglanon sang imo regaluhan, pamangkuta ang iban nga pareho man sa iya ang kahimtangan. Mahimo nila isugid sa imo ang pinasahi nga mga kinahanglanon nga wala nahibaluan sang iban. Kon himuon mo ini, makahatag ka sing butang nga kinahanglan gid sang imo regaluhan nga mahimo wala mapamensaran sang iban.

Husto nga tion. Ang Biblia nagasiling: “Ang tinaga nga ginhambal sa husto nga tion—tuman gid kaayo!” (Hulubaton 15:23) Ginapakita sini nga teksto nga ang tayming sang aton ginahambal may daku gid nga epekto. Amo man sini sa aton mga ginahimo. Ang tinaga nga ginhambal sa husto nga tion manami gid pamatian, sing kaanggid ang regalo nga ginhatag sa husto nga tion ukon sa nagakaigo nga okasyon makapalipay gid sa imo regaluhan.

Halimbawa, kalaslon ang imo abyan. May pamatan-on nga manuggradweyt sa eskwelahan. May mag-asawa nga nagahulat nga mabun-ag ang ila bata. Pila lamang ini sa mga okasyon nga sa masami nagahatag kita sing mga regalo. Ang iban nagahimo sing listahan sang pinasahi nga mga okasyon nga hiwaton sa masunod nga tuig. Sa sini nga paagi maplano nila sing maayo kon ano ang pinakamaayo nga maregalo sa kada okasyon. *

Pero indi buot silingon nga sa pinasahi nga mga okasyon ka lang magregalo. Ang kalipay sa paghatag dapat mabatyagan sa bisan ano nga tion. Pero, dapat man maghalong. Halimbawa, kon regaluhan sang isa ka lalaki ang isa ka babayi nga wala sing maathag nga rason, mahimo maghinakop ang babayi nga naluyag ang lalaki sa iya. Kon indi amo sina ang iya tuyo, ina nga regalo mahimo magresulta sa indi paghangpanay ukon komplikado nga sitwasyon. Gani nagakaigo nga binagbinagon naton ang isa pa ka importante nga butang para malipay ang regaluhan—ang motibo sang nagahatag.

Ang motibo sang nagahatag. Pareho sang halimbawa kaina, maayo nga binagbinagon kon bala basi lain ang pag-intiende sang regaluhan sangsa motibo sang nagahatag. Dapat man binagbinagon sang nagaregalo ang iya motibo. Bisan pa madamo sa mga nagaregalo ang nagapamensar nga husto ang ila motibo, may mga okasyon kada tuig nga ang iban napilitan lang sa pagregalo. Ang iban naman nagalaum nga mas daku ang ibalos sangsa ila ginhatag.

Paano mo mapat-od nga maayo ang imo motibo sa pagregalo? Ang Biblia nagasiling: “Himua ninyo nga may paghigugma ang tanan ninyo nga hilikuton.” (1 Corinto 16:14) Kon nagaregalo ka bangod sa matuod nga gugma kag pag-ulikid, mahimo nga malipay ang imo regaluhan, kag mabatyagan mo ang daku nga kalipay bangod sang imo kaalwan. Kon tinagipusuon ang imo paghatag, malipay man ang aton langitnon nga Amay. Gindayaw ni apostol Pablo ang mga Cristiano sa Corinto sadto sang nagpakita sila sing kaalwan kag malipayon nga nagbulig sa ila masigka-Cristiano sa Judea. Si Pablo nagsiling sa ila: “Ginahigugma sang Dios ang nagahatag sing malipayon.”—2 Corinto 9:7.

 Ang pagbinagbinag sini nga mga butang makabulig sa imo para malipay ang iban sa imo regalo. Ini kag ang iban pa nga butang, may daku nga bahin sa kahimusan sang Dios para makabaton ang katawhan sing pinakahamili nga regalo. Ginapalig-on ka namon nga basahon ang masunod nga artikulo para mahibaluan kon ano ini nga regalo.