Natawo ako sa isa ka lugar sa Saxony, sa anay German Democratic Republic (GDR). Suod kag nagapalanggaanay ang amon pamilya, kag gintudluan ako sang akon mga ginikanan sang maayo nga mga pamatasan. Ang GDR isa ka Komunista nga estado, gani indi importante ang relihion para sa kalabanan nga taga-Saxony. Kag para sa akon, wala sing Dios. Duha ka pagpati ang may daku gid nga impluwensia sa akon halin sang bata ako asta mag-18 anyos: ang atiesmo kag ang Komunismo.

Ngaa nanamian ako sa Komunismo? Bangod gusto ko nga alalangay ang tanan. Dugang pa, nagapati ako nga ang tanan nga mga propiedad dapat ipanagtag sing palareho, para wala na sing tama ka manggaranon kag tama ka pigado. Gani nangin masako ako sa isa ka organisasyon sang Komunista nga para sa mga pamatan-on. Sang 14 anyos ako, nagtrabaho ako sing madamo nga tion sa isa ka proyekto nga pagresiklo sang mga papel. Naapresyar gid sang Aue, nga isa ka lugar didto, ang akon pagpangabudlay amo nga ginhatagan ako sang mga opisyal sing award. Bisan bata pa ako, nakilala ko ang pila sa mga mataas nga opisyal sang GDR. Pamatyag ko husto ang akon ginahimo kag mangin maayo ang akon palaabuton.

Pero gulpi lang nagbag-o ang akon kabuhi. Sang 1989, ang Berlin Wall narumpag pati na ang alyansa sang mga Komunista sa Eastern Europe. Dayon nagsunodsunod pa ang malain nga mga hitabo. Natukiban ko sang ulihi nga madamo sing inhustisya nga ginhimo ang GDR. Halimbawa, ang mga wala nagasuporta sa Komunista ginadaugdaug. Paano ina natabo? Indi bala nagapati kami nga mga Komunista nga alalangay ang tanan? Damgo lang bala ang Komunismo? Naglalain gid ako.

Gani ginbag-o ko ang akon mga prioridad kag nagpokus sa musika kag art. Bangod nakatuon ako sang musika sa eskwelahan sang una kag makaeskwela pa kuntani sa unibersidad, ginhandum ko nga mangin musikero. Dugang pa, gintalikdan ko ang maayo nga mga pamatasan nga gintudlo sa akon sang bata pa ako. Ang importante sa akon subong amo ang paglipaylipay, upod na ang pagpakigdeyt sa madamo nga babayi sing dungan. Pero wala nabuhinan sang musika, art, kag pagpagusto sa kabuhi ang akon mga problema. Bisan gani ang ginapinta ko nga mga laragway nagapakita sang grabe nga kahadlok. Ano ang matabo sa palaabuton? Kag ano ang katuyuan sang kabuhi?

 Sang nahibaluan ko na ang mga sabat sa akon mga pamangkot, nakibot gid ako. Isa ka gab-i sa eskwelahan, nagpungko ako upod sa mga estudyante nga nagaistoryahanay parte sa palaabuton. Si Mandy * ang isa sa mga estudyante kag isa man sa mga Saksi ni Jehova. Sa sina nga gab-i, may maayo sia nga ginhambal sa akon. “Andreas,” siling niya, “kon gusto mo masabat ang imo mga pamangkot parte sa kabuhi kag sa palaabuton, usisaa sing maayo ang Biblia.”

Daw indi ako magpati sa iya pero gusto ko ini hibaluon, gani gin-usisa ko ang Biblia. Ginhambalan ako ni Mandy nga basahon ang Daniel kapitulo 2, kag nakibot gid ako sa akon nabasa. Ginapakita sini nga tagna ang nagasundanay nga mga kagamhanan sa kalibutan, mga gobierno nga may daku nga epekto asta subong. Ginpakita ni Mandy sa akon ang iban pa nga tagna sa Biblia parte sa palaabuton. Nasabat na gid man ang akon mga pamangkot! Pero sin-o ang nagsulat sadto nga mga tagna, kag sin-o ang eksakto nga nakahibalo sang matabo sa palaabuton? May Dios gid man ayhan?

Ginpakilala ako ni Mandy kanday Horst kag Angelika, ang mag-asawa nga Saksi nga nagbulig sa akon nga mahangpan sing maayo ang Pulong sang Dios. Nakita ko dayon nga ang mga Saksi ni Jehova lamang ang relihion nga pirme nagagamit kag nagapadaku sang ngalan sang Dios nga Jehova. (Salmo 83:18; Mateo 6:9) Natun-an ko nga may paglaum nga kabuhi nga wala sing katapusan sa paraiso nga duta nga ginatanyag si Jehova nga Dios sa katawhan. Ang Salmo 37:9 nagasiling: “Ang mga nagalaum kay Jehova magapanubli sang duta.” Nanamian gid ako kay ini nga paglaum posible para sa tanan nga nagatinguha nga sundon ang mga talaksan sang Dios sa paggawi nga ginapaathag sang Biblia.

Pero, nabudlayan gid ako nga magbag-o para masunod ang Biblia. Nangin bugalon ako bangod sa akon kadalag-an bilang musikero kag pintor, gani dapat ko anay matun-an nga mangin mapainubuson. Dugang pa, nabudlayan man ako nga bayaan ang imoral nga pagkabuhi. Nagapasalamat gid ako nga mapinasensiahon, maluluy-on, kag may konsiderasyon si Jehova sa mga nagahimo sang ila bug-os nga masarangan nga iaplikar ang ginatudlo sang Biblia!

Grabe gid ang impluwensia sang Komunismo kag atiesmo sa una nga 18 ka tuig sang akon kabuhi; pero ang Biblia na ang nagapabag-o sa akon kabuhi. Ang akon natun-an nagdula sang akon kabalaka parte sa palaabuton kag may katuyuan na ang akon kabuhi. Sang 1993, nabawtismuhan ako bilang isa sa mga Saksi ni Jehova, kag sang 2000, napangasawa ko si Tabitha, nga isa ka mapisan nga masigkatumuluo. Madamo nga tion ang amon ginagamit agod buligan ang iban nga matun-an ang Biblia. Madamo sa naistorya namon ang may pareho nga gindak-an sa akon, nga naimpluwensiahan sang Komunismo kag atiesmo. Daku gid ang akon kalipay kon ginapaathag ko sa ila kon paano makilala si Jehova.

Nakibot gid ang akon mga ginikanan sang nagpakig-upod ako sa mga Saksi ni Jehova. Pero sugod sadto, nakita nila ang maayo nga epekto sa akon sang nakig-upod ako sa mga Saksi. Nalipay gid ako nga nagabasa na sila sang Biblia kag nagatambong sa Cristianong mga miting sang mga Saksi ni Jehova.

Malipayon ang amon pag-asawahay ni Tabitha kay ginatinguhaan gid namon nga sundon ang laygay sang Biblia sa mga mag-asawa. Halimbawa, ang pagsunod sa panuytoy sini parte sa katutom sa pag-asawahay nagapabakod sang amon pag-updanay.—Hebreo 13:4.

Wala na ako nahadlok parte sa kabuhi kag sa palaabuton. Nabatyagan ko nga bahin gid ako sang isa ka bug-os kalibutan nga pamilya sang mga Saksi, nga may matuod nga kalinong kag paghiusa. Sa sini nga pamilya, alalangay ang pagtamod namon sa isa kag isa. Amo sina ang akon ginapatihan kag luyag matigayon sa bug-os ko nga kabuhi.