Ginapakita sang Biblia nga para matuman ang katuyuan sang Dios, kon kaisa, ginaamligan sang mga anghel ang matuod nga mga sumilimba. (Salmo 34:7) Halimbawa:

• Sang ginlaglag ni Jehova ang malain gid nga siudad sang Sodoma kag Gomorra, ginbuligan sang mga anghel ang matarong nga si Lot kag ang iya pamilya nga makapalagyo.—Genesis 19:1, 15-26.

• Sa dumaan nga Babilonia, sang ang tatlo ka Hebreo nga pamatan-on ginsilutan nga ihaboy sa nagadabadaba nga hurno, ang Dios “nagpadala sang iya anghel kag ginluwas ang iya mga alagad.”—Daniel 3:19-28.

• Sang ang matarong nga si Daniel nagtener sing isa ka gab-i sa lungib sang mabangis nga mga leon, nagsiling sia nga wala sia maano bangod ang “Dios nagpadala sing anghel kag ginkipot niya ang baba sang mga leon.”—Daniel 6:16, 22.

Kon kaisa, ang mensahero nga mga anghel sang Dios nagpasilabot sa mga hilikuton sang Cristianong kongregasyon sang una agod matuman ang katuyuan ni Jehova. Halimbawa:

• Ginbuksan sang isa ka anghel ang mga puertahan sang bilangguan kag ginpagua ang mga apostoles kag ginsilingan sila nga padayon nga magbantala sa templo.—Binuhatan 5:17-21.

• Ginsilingan sang isa ka anghel ang ebanghelisador nga si Felipe nga magkadto sa isa ka dalan sa desyerto nga halin sa Jerusalem pakadto sa Gaza kag bantalaan ang isa ka Etiopianhon nga nagkadto sa Jerusalem para magsimba.—Binuhatan 8:26-33.

• Sang gintugutan na sang Dios ang mga indi Judiyo nga mangin Cristiano, nagpakita ang isa ka anghel sa palanan-awon sa isa ka opisyal sang Romanong hangaway nga si Cornelio kag ginsilingan sia nga ipatawag si apostol Pedro nga magkadto sa iya balay.—Binuhatan 10:3-5.

• Sang ginpriso si apostol Pedro, nagpakita sa iya ang isa ka anghel kag ginpagua sia sa bilangguan.—Binuhatan 12:1-11.

Wala sing pamatuod nga ginagamit sang Dios ang mga anghel subong agod buligan ang mga tawo sa milagruso nga paagi pareho sa mabasa sa Biblia. Pero parte sa aton tion, si Jesus nagsiling: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” (Mateo 24:14) Kabalo ka bala nga ginahimo sang mga disipulo sang Cristo ini nga hilikuton sa pagtuytoy sang mga anghel?

Ginapakita sang libro sang Bugna nga ang mga anghel mangin mapisan sa pagbulig sa mga tawo sa bilog nga kalibutan nga makatuon parte kay Jehova nga Dios kag sa iya katuyuan sa katawhan. Si apostol Juan nagsulat: “Nakita ko ang isa pa ka anghel nga nagalupad sa tunga sang kalangitan, kag may ipahayag sia nga wala sing katapusan nga maayong balita sa mga nagaistar sa duta, kag sa tagsa ka pungsod kag tribo kag hambal kag katawhan. Nagasinggit sia: ‘Kahadluki ninyo ang Dios kag himayaa sia, bangod nag-abot na ang oras sang iya paghukom, gani simbaha ninyo ang Isa nga naghimo sang langit, duta, dagat, kag mga tuburan sang tubig.’” (Bugna 14:6, 7) Madamo nga eksperiensia sa aton tion subong ang nagapakita nga ginabuligan sang mga anghel ang bug-os kalibutan nga pagbantala parte sa Ginharian. Ang matuod, kon ang isa ka makasasala maghinulsol kag magbalik kay Jehova, “nagakalipay ang mga anghel sang Dios.”—Lucas 15:10.

Ano ang matabo kon matapos na ang pagbantala? Ang mga anghel nga “mga kasuldadusan sa langit” magabulig kay Jesucristo, ang Hari sang mga hari, sa pagpakig-away “sa inaway nga mahanabo sa daku nga adlaw sang Dios nga Labing Gamhanan” sa Armageddon. (Bugna 16:14-16; 19:14-16) Ang gamhanan nga mga anghel magapadapat sang paghukom sang Dios kon ‘timalusan ni Ginuong Jesus ang mga wala nagatuman sa maayong balita tuhoy sa aton Ginuong Jesus.’—2 Tesalonica 1:7, 8.

Gani makasalig ka nga interesado gid ang mga anghel sa imo. Gusto gid nila buligan ang mga nagahandum nga mag-alagad sa Dios, kag pirme sila ginagamit ni Jehova sa pagpalig-on kag pag-amlig sa iya matutom nga mga alagad sa duta.—Hebreo 1:14.

Gani ang kada isa sa aton dapat gid magdesisyon. Mamati bala kita kag magtuman sa maayong balita nga ginabantala sa bug-os nga duta? Malipay gid ang mga Saksi ni Jehova sa inyo lugar nga buligan ka nga makabenepisyo sa mahigugmaon nga bulig sang gamhanan nga mga anghel sang Dios.